Fixé l’objectif pou conduire enn l’etude la Bible
1 “Leve zot lizié ek guette bann karo: zot blanc, zot inn paré pou recolte.” (Jean 4:35) Sa bann parole ki Jésus Christ ti dire-la applik bien ar situation ki bann ministre chretien pé koné zordi.
2 Nou encore pé trouve bann dimoune ki ena enn leker sincere ek ki envie aprann pou konn bann chemin Jéhovah. Nou trouve sa kan nou guette sa quantité nouveau disciple ki baptisé chaque l’année-la. Si ou bien envie conduire enn l’etude la Bible, ki ou kapav faire?
3 Fixé enn l’objectif: D’abord, fixé l’objectif pou commence ek conduire enn l’etude la Bible regulierement. Garde sa l’objectif-la dan ou la-tête kan ou pé participe dan predication. Parski sa travail ki nou finn gagné en tant ki chretien-la implik ki nou enseigné en mem temps ki nou preché, nou tou bizin faire zeffort pou rod plus l’occasion pou commence bann l’etude la Bible.—Mat. 24:14; 28:19, 20.
4 Lezot point ki nou bizin rappel: Bann la-priere sincere bien important pou bann proclamateur. Parfois nou joinde bann dimoune ki ti pé prié pou gagne l’aide pou comprend la Bible. C’est vrai-mem enn benediction ki Jéhovah servi nou pou trouve ek enseigne sa bann dimoune-la!—Hag. 2:7; Actes 10:1, 2.
5 Enn soeur ti prié pou gagne enn l’etude la Bible. Li ti expose bann tract Eski U Ti Pu Kontan Konn Plis lor Labib ? dan so travail. Kan enn madame ti prend enn tract, ti lire li, ek ti commence rempli coupon ki ena lor tract-la, soeur-la ti koz avek madame-la ek ti commence enn l’etude la Bible avek li.
6 Bann proclamateur ki efficace pou commence ek conduire bann l’etude la Bible kapav aide ou pou realise ou l’objectif pou commence enn l’etude la Bible. Prié pou bann zeffort ki ou faire pou trouve enn l’etude la Bible, ek profite tou bann l’aide ki ou kapav gagné pou ou reussi ou l’objectif. Bientot, surement ou pou ena la joie pou conduire enn l’etude la Bible.