Travail ki beaucoup pli important
1. Ki sacrifice nou grand l’appreciation pou nou ministere pousse nou pou faire?
1 Kifer eski regulierement encourage nou pou consacré nou le temps, nou l’energie ek nou bann ressource dan ministere? Parski pena okenn travail ki ena enn pli grand l’importance! Si nou reflechi lor bann resultat ki sa produire, sa pou faire nou augmente nou desir pou participe dan sa travail ki nou pa pou refaire encore-la.—Actes 20:24.
2. Couma nou predication sanctifié nom Jéhovah?
2 Sanctifié nom Jéhovah: L’activité predication attire l’attention ki Royaume Jéhovah ki dirigé par Christ Jésus, pou remplace tou bann gouvernement ek pou amenn bann solution pou tou bann probleme l’humanité. (Mat. 6:9, 10) Jéhovah gagne la gloire parski zis Li tousel ki kapav sauve nou ar maladie ek la mort. (Is. 25:8; 33:24) Parski nou porte so nom, lezot ki observe nou bon conduite ek nou zele, kapav donne Li la gloire. (1 Pierre 2:12) C’est vrai-mem enn satisfaction pou nou pou faire bann dimoune partout lor la terre konn nom Souverain Seigneur Jéhovah!—Ps. 83:18.
3. Ki benediction bann ki accepté message Royaume Bondié gagné?
3 Sauve bann la vie: Jéhovah “pa envie ki personne detruire, mais Li envie ki tou dimoune repenti.” (2 Pierre 3:9) Selman, couma bann dimoune pou aprann seki Jéhovah considere couma bon ou-soit pa bon, si personne pa enseigne zot? (Yona 4:11; Rom. 10:13-15) Kan bann dimoune accepté la bonne nouvelle, qualité zot la vie amelioré, a mesure ki zot arrete pratik bann kitsoz ki faire zot di-tort. (Mika 4:1-4) En plus, zot gagne l’espoir la vie eternel ki faire zot heureux. Kan nou actif dan predication ek pou enseigne lezot, sa sauve nou ek bann ki ecoute nou. (1 Tim. 4:16) C’est enn role bien important ki nou ena dan sa travail ki pli important-la!
4. Kifer nou bizin faire tou seki nou kapav dan l’activité pou preche Royaume Bondié ek pou faire bann disciple?
4 Bientot la grande tribulation pou mette fin enn sel coup avek sa le monde injuste-la. Bann ki adore Jéhovah pou survive. A cause sa, pena okenn lot l’activité ki pli urgent, pli important ek ki kapav faire nou gagne bann bienfait, ki l’activité pou preché ek pou faire bann disciple. Anou donne sa l’activité-la priorité dan nou la vie!—Mat. 6:33.