Nou bizin reste zelé dan ministere
1 Chaque l’année ki’nn passé depuis 1992, bann Témoins de Jéhovah finn passe plus ki enn milliard l’heure temps dan travail predication ek faire bann disciple dan le monde entier. Nou bien content ki nou aussi nou finn participe enn tigit ladan pou gagne sa resultat-la!—Mat. 28:19, 20.
2 Bien sur, c’est Jéhovah ki nou bizin remercié ek loué, parski c’est Li ki’nn soutenir nou ek ki’nn donne nou seki nou bizin dan nou service pendant sa ‘bann lepok difficile-la.’ (2 Tim. 3:1) Ki kitsoz nou bizin pou nou kapav contigné participe avek zele dan sa travail important-la?
3 Seki pousse nou pou ena zele: L’amour profond pou Bondié ek pou nou prochain, ek aussi desir pou agir en harmonie avek voeu ki nou finn faire pou servi Jéhovah, motive nou dan nou service pou Royaume Bondié. (Mat. 22:37-39; 1 Jean 5:3) L’amour pousse nou pou faire bann sacrifice pou ki nou kapav participe autant ki nou kapav dan predication.—Luc 9:23.
4 Faire zeffort pou reste zelé: Satan, nou l’ennemi, pé faire tou seki li kapav pou diminué nou zele dan nou service. Certain kitsoz ki li servi pou essaye decourage nou c’est l’indifference bann dimoune dan nou territoire, bann distraction dan sa lé-monde-la, bann pression ki nou gagné dan nou la-vie toulé-jour, ek tracas ki nou gagné a cause nou la-santé ki pé deterioré.
5 Alors, nou bizin travail bien dur pou garde nou zele. Li important ki nou cultive “l’amour ki [nou] ti ena au commencement.” Sa vedir lire ek medite regulierement lor Parole Bondié, la Bible, ek profite tou bann nourriture spirituel ki Jéhovah prend par “l’esclave fidele et avisé” pou fortifié nou la-foi.—Rév. 2:4; Mat. 24:45; Ps. 119:97.
6 Bann prophetie la Bible montré dan enn fason bien clair, ki jour kot Jéhovah pou detruire bann mauvais dimoune pé kosté bien vite. (2 Pierre 2:3; 3:10) Alors anou garde sa bien dan nou l’esprit, ek anou faire tou seki nou kapav pou reste zelé dan nou ministere. Anou contigne participe autant ki nou kapav dan sa l’activité ki pé faire dan le monde entier zordi-la setadir preche Royaume Bondié ek faire bann disciple!