Eski ou pé suive le Christ avek tou ou leker?

“En realité pareil couma zot pé marché, . . . ki zot contigne faire li encore plus.”—1 THESS. 4:1.

1, 2. (a) Ki bann kitsoz extraordinaire beaucoup dimoune ti temoin dan lepok Jésus? (b) Kifer nou lepok aussi enn lepok bien special?

“MO TI pou content vive dan lepok ki Jésus ti lor la terre!” Eski ou’nn deja ena sa pensée-la? Jésus ti pou kapav gueri ou ek ou pa ti pou souffert a cause certain maladie ki ti pou kapav affecté ou. Surement ou ti pou content aussi pou trouve Jésus, pou ecoute li—pou laisse li enseigne ou ek guette li faire bann mirak. (Marc 4:1, 2; Luc 5:3-9; 9:11) Sa ti pou vrai-mem enn grand privilege pou nou si nou ti present kan Jésus ti faire tou sa bann kitsoz-la! (Luc 19:37) Depuis lepok Jésus, pa’nn ena okenn generation ki finn temoin sa bann kitsoz-la, ek seki Jésus inn accompli “grace a so prop sacrifice” kan li ti lor la terre, jamais pa pou arrivé encore.—Héb. 9:26; Jean 14:19.

² Mais nou lepok aussi li enn lepok bien important. Kifer? Nou pé vive dan lepok ki la Bible appel “lepok la fin” ek lepok “dernier jour.” (Dan. 12:1-4, 9; 2 Tim. 3:1) C’est dan sa lepok-la ki Jésus finn pousse Satan ek finn tire li dan le ciel. Bientot, li pou attache Satan ek pou jette li “dan l’abime.” (Rév. 12:7-9, 12; 20:1-3) C’est aussi dan nou lepok ki nou ena enn grand privilege pou preche “bon nouvelle lor royaume” Bondié partout lor la terre, nou annonce bann dimoune ki pou ena enn paradis lor la terre bientot—c’est enn travail ki pa pou refaire encore.—Mat. 24:14.

3. Juste avant li ti monte dan le ciel, ki Jésus ti dire so bann disciple faire, ek ki sa ti pou impliké?

³ Juste avant li ti monte dan le ciel, Jésus ti dire so bann disciple: “Zot pou vinn mo bann temoin dan Jérusalem, partout dan Judée ek Samarie, ek ziska dan region pli loin lor la terre.” (Actes 1:8) Partout lor la terre ti pou bizin faire sa travail pou enseigne bann dimoune-la. Dan ki but? Pou faire bann disciple—faire encore plus disciple Christ—avant la fin vini. (Mat. 28:19, 20) Ki nou bizin faire si nou envie reussi accompli sa mission-la?

4. (a) Bann parole ki Pierre ti dire dan 2 Pierre 3:11, 12 montré l’importance ki kitsoz? (b) Kont ki danger nou bizin faire attention?

⁴ Remarké ki l’apotre Pierre ti dire: “Ki qualité dimoune zot bizin été par bann action ki montré ki zot conduite saint ek ki zot ena l’attachement pou Bondié, alors ki zot pé attann ek pé garde presence jour Jéhovah touletan dan zot l’esprit!” (2 Pierre 3:11, 12) Bann parole Pierre montré l’importance pou contigne veille bien pendant lepok dernier jour. Sa pou aide nou pou faire sur ki nou pé consacré nou la vie pou faire bann action ki montré nou l’attachement pou Bondié. Parmi sa bann action-la ena predication la bonne nouvelle. Nou ena enn grand la joie pou trouvé ki nou bann frere ek soeur dan le monde entier pé accompli sa mission ki Christ inn donné-la, avek zele! Mais en mem temps, nou bizin faire attention ki bann pression ki nou gagné toulé-jour dan le monde Satan ek nou bann tendance pou faire seki mauvais, pa diminué nou zele dan service Bondié. Alors, anou guetté couma nou kapav contigne suive Christ avek zele.

Accepté bann responsabilité ki Bondié donne nou

5, 6. (a) Pou ki kitsoz Paul ti felicite bann chretien dan Jérusalem, ek kont ki tendance li ti mette zot en garde? (b) Kifer nou bizin prend nou bann responsabilité spirituel avek serieux?

⁵ Dan lettre ki l’apotre Paul ti ecrire bann chretien Jérusalem, li ti felicite zot pou l’endurance ki zot ti ena mem kan zot ti gagne persecution. Li ti dire zot: “Contigne rappel lepok longtemps kan, apré ki zot ti’nn eclairé, zot ti endure enn grand combat dan bann souffrance.” Oui, Jéhovah ti rappel zot fidelité. (Héb. 6:10; 10:32-34) Sa bann felicitation sincere-la ti surement encourage sa bann chretien hébreux-la beaucoup. Selman, dan mem lettre, Paul ti aussi averti zot ki, si zot pa controle enn certain tendance, sa pou riské diminué zot zele dan service Bondié. Li ti dire ki fodé pa bann chretien “repousse enn kikenn ki kozé” sa vedir ki fodé pa ki zot rod bann pretexte pou pa suive bann commandement Bondié.—Héb. 12:25.

⁶ Sa l’avertissement ki Paul ti donné-la applik aussi ar bann chretien zordi. Nou bizin bien decidé pou prend nou bann responsabilité avek serieux, pou pa laisse nou zele dan service Bondié diminué, ek pou pa rod bann excuse. (Héb. 10:39) Fodé pa nou blié ki nou service sacré c’est enn question la vie la mort.—1 Tim. 4:16.

7, 8. (a) Ki pou aide nou pou garde nou zele dan service Bondié? (b) Si nou finn perdi inpé zele ki nou ti ena avant, ki nou bizin rappel concernant Jéhovah ek Jésus?

⁷ Ki pou aide nou pou pa rod bann pretexte pou nou pa prend nou bann responsabilité spirituel avek serieux? Enn fason important couma nou kapav lutte kont sa tendance-la c’est kan nou medite regulierement lor signification voeu ki nou’nn faire ar Jéhovah. Kan nou ti faire sa voeu-la, nou ti promette Jéhovah ki so volonté pou passe en premier dan nou la vie. Nou envie tini sa promesse-la. (Lire Matthieu 16:24.) Alors, li bon ki de temps en temps nou arreté ek nou demann nou-mem: ‘Eski mo encore toujours bien decidé pou vive en accord avek voeu ki mo’nn faire ar Bondié couma mo ti decidé pou faire kan mo ti prend bapteme? Ou-soit eski avek le temps, mo zele inn diminué?’

⁸ Si nou examine nou-mem dan enn fason honnete, ek nou trouvé ki nou finn baisse inpé lé-bras dan service Jéhovah, li pou bon ki nou reflechi lor sa l’encouragement ki prophete Tsephania ti donné-la: “Pa baisse to lé-bras. Jéhovah to Bondié Li parmi toi. En tant ki enn Bondié ki fort, Li pou sauve toi. Li pou ena la joie pou toi.” (Tseph. 3:16, 17) Sa l’encouragement-la ti applik en premier ar bann Israélite dan le passé ki ti sorti en exil dan Babylone ek ti retourne Jérusalem. Mais sa concerne aussi peuple Bondié zordi. Travail ki nou pé faire c’est travail Jéhovah, alors fodé jamais nou blié ki Jéhovah ek so Garson pou soutenir nou ek pou donne nou la force pou rempli bann responsabilité ki zot inn donne nou, couma bizin. (Mat. 28:20; Phil. 4:13) Si nou faire zeffort pou contigne servi Jéhovah avek zele, Li pou beni nou ek pou aide nou pou contigne faire bann progré spirituel.

“Avant tou kitsoz, contigne rod le royaume” avek zele

9, 10. (a) Ki nou aprann dan l’exemple ki Jésus ti donné lor enn grand fête? (b) Ki leson nou kapav tiré ar sa l’exemple-la?

⁹ Kan li ti pé prend enn repas dan lakaz enn chef parmi bann Pharisien, Jésus ti donne enn l’exemple concernant enn grand fête. Dan sa l’exemple-la, li ti koz lor possibilité ki different dimoune ti gagné pou rempli bann condition pou rente dan Royaume ki dan le ciel. Li ti aussi montré danger ki ena kan rod bann pretexte. (Lire Luc 14:16-21.) Bann dimoune ki ti invité dan sa fête-la ti rod bann pretexte pou pa vini. Enn ladan ti dire ki li ti bizin al guette enn karo ki li ti’nn fek acheté. Enn lot ti dire ki li ti bizin al examine bann zanimo ki li ti’nn acheté. Enn lot encore ti dire: ‘Mo pa pou kapav vini parski mo’nn fek marié.’ C’est bann mauvais pretexte, pa vrai? Normalement, c’est avant ki enn dimoune acheté enn karo ou-soit bann zanimo, ki li bizin examine zot, pa apré. Apré tou, ki empeche enn kikenn ki’nn fek marié pou accepté enn l’invitation important coumsa? Li pa etonnant ki sa dimoune ki ti donne sa l’invitation-la, ti bien en colere!

¹⁰ Tou bann serviteur Bondié kapav aprann enn leson ar sa l’exemple Jésus-la. Ki leson? Fodé jamais ki nou laisse bann kitsoz personnel, couma seki Jésus ti mentionné, vinn tellement important dan nou la vie ki nou laisse zot prend place nou service pou Jéhovah. Si enn chretien pa laisse bann kitsoz personnel dan zot place, tigit par tigit so zele dan service Jéhovah pou diminué. (Lire Luc 8:14.) Pou empeche sa arrivé, anou suive conseil ki Jésus ti donné: “Alors, avant tou kitsoz, contigne rod le royaume ek so justice.” (Mat. 6:33) Sa encourage nou kan nou trouve bann serviteur Bondié—jeune ek agé—pé mette en pratik sa conseil-la! En realité, beaucoup finn simplifié zot la vie pou ki zot kapav consacré plus le temps dan zot ministere. Zot faire l’experience par zot-mem ki kan zot rod le Royaume avant tou kitsoz zot vrai-mem heureux ek zot ena enn grand satisfaction.

11. Ki recit biblik montré l’importance pou servi Bondié avek zele ek avek tou nou leker?

¹¹ Pou montré ki li important ki nou zelé dan service Bondié, anou examine enn l’evenement ki ti arrivé dan la vie le roi Yehoash, en Israël. Li ti tellement tracassé pangar la Syrie vinn prend Israël, ki li ti al ploré ar Élisha. Prophete Jéhovah ti demann li pou tire enn coute fleche par la fenetre en direction la Syrie, sa ti pou montré ki Jéhovah ti pou faire li gagne la victoire kont sa nation-la. Sa nouvelle-la ti’nn surement donne li courage. Apré, Élisha ti dire Yehoash prend so bann fleche ek tape la terre avek sa. Yehoash ti tape la terre trois fois. Sa ti faire Élisha bien en colere, parski si Yehoash ti tape la terre cinq ou six fois, sa ti pou montré ki li ti pou “batte la Syrie ziska ki li fini net.” Mais parski Yehoash ti mank zele, li ti pou gagne zis trois la guerre lor la Syrie ek li pa ti pou detruire li net. (2 Rois 13:14-19) Ki leson nou tiré ar sa recit-la? Jéhovah pou beni nou beaucoup selman si nou servi Li avek tou nou leker ek avek zele.

12. (a) Ki pou aide nou pou reste zelé dan service Bondié malgré bann difficulté ki nou gagné? (b) Raconté ki bann bienfait ou pé gagné parski ou bien occupé dan ou ministere.

¹² Bann difficulté ki nou gagné dan la vie testé nou zele pou service Bondié. Beaucoup frere ek soeur pé bizin faire face ar bann difficulté economik. Ena lezot ki decouragé parski a cause bann probleme la santé bien grave, zot pa kapav faire pareil couma avant dan service Jéhovah. Mais kan-mem, sakenn parmi nou kapav prend bann disposition pou garde so zele ek pou contigne suive Christ avek tou so leker. Guette bann suggestion ek bann verset ki trouve dan l’encadré “Ki pou aide ou pou contigne suive Christ?” Guetté couma ou kapav applik sa bann conseil-la autant ki possible. Si ou faire sa, ou pou recolté bann grand benediction. Kan nou reste bien occupé dan nou ministere, sa permette nou pou garde nou l’equilibre, sa ameliore nou la vie, ek faire nou plus heureux ek ena plus la paix. (1 Cor. 15:58) En plus, kan nou servi Jéhovah avek tou nou leker, sa aide nou pou “garde presence jour Jéhovah touletan dan [nou] l’esprit.”—2 Pierre 3:12.

Examine ou dan enn fason honnete

13. Couma nou kapav koné si personnellement nou pé servi Bondié avek tou nou leker?

¹³ Mais li bon nou rappel ki c’est pa quantité le temps ki nou passé dan predication ki montré ki nou pé servi Jéhovah avek tou nou leker. Situation chaque dimoune pa pareil. Si a cause so la santé enn chretien kapav preche zis enn ou deux heure temps par mois, sa faire Jéhovah vrai-mem plaisir. (Compare avek Marc 12:41-44.) Alors, pou nou koné si personnellement, nou pé servi Bondié avek tou nou leker, nou bizin examine nou bann capacité ek nou situation dan enn fason honnete. Pou suive Christ, nou bizin ena mem fason pensée ki li. (Lire Romains 15:5; 1 Cor. 2:16) Ki Jésus ti mette en premier dan so la vie? Li ti dire enn la foule dan Capernaüm: “Mo bizin annonce la bonne nouvelle lor royaume Bondié . . . parski c’est a cause sa ki finn envoye moi.” (Luc 4:43; Jean 18:37) Mazinn zele ki Jésus ti ena dan so ministere, ek examine ou situation pou guetté si ou pa kapav faire plus dan ou ministere.—1 Cor. 11:1.

14. Dan ki fason nou kapav faire plus dan nou ministere?

¹⁴ Si nou examine nou situation bien, kitfois nou pou trouvé ki nou kapav augmente le temps ki nou passé dan nou ministere. (Mat. 9:37, 38) Par exemple, plusieurs millier jeune Témoins ki’nn fek fini lekol, finn prend service pionnier ek zordi zot pé gagne beaucoup la joie dan sa service-la. Eski ou pa ti pou content gagne sa la joie-la ou aussi? Certain frere ek soeur finn réexamine zot situation ek finn decidé ki zot kapav demenagé pou al reste dan enn lot l’endroit ou-soit mem, dan enn lot pays kot bien bizin bann proclamateur. Ena lezot ki finn aprann enn lot langue pou preche avek bann etranger. Kitfois nou bizin faire beaucoup zeffort pou faire plus dan nou ministere, mais sa faire nou gagne bann grand benediction, ek kapav aide beaucoup dimoune pou “gagne enn connaissance exact lor la verité.”—1 Tim. 2:3, 4; 2 Cor. 9:6.

Bann l’exemple biblik ki nou kapav suive

15, 16. Ki bann l’exemple nou kapav imité pou vinn bann disciple zelé Christ?

¹⁵ Couma bann ki ti vinn bann zapotre Jésus ti reagir kan li ti invite zot pou vinn so bann disciple? Concernant Matthieu, la Bible dire: “Li ti laisse tou, li ti levé ek li ti suive li.” (Luc 5:27, 28) Pierre ek André, zot, zot ti pé la peche. La Bible dire: “Desuite zot ti laisse zot filet ek zot ti suive li.” Apré sa, Jésus ti trouve Jacques et Jean ki ti pé repare zot filet avek zot papa. Couma zot ti reagir kan Jésus ti invite zot? “Desuite, zot ti quitte [bateau kot zot ti été] ek zot papa, ek zot ti suive li.”—Mat. 4:18-22.

¹⁶ Enn lot l’exemple c’est Saul, ki ti vinn l’apotre Paul. Mem si li ti persecute bann disciple Jésus dan enn fason bien cruel, li ti change so l’attitude ek li ti vinn enn “vase ki [Jésus ti’nn] choisir” pou porte so nom. “Desuite dan bann synagogue, [Paul] ti commence preché lor Jésus ki Li-mem Garson Bondié.” (Actes 9:3-22) Ek mem si li ti bizin endure beaucoup l’epreuve ek persecution, jamais Paul pa ti perdi so zele.—2 Cor. 11:23-29; 12:15.

17. (a) Ki desir nou ena en rapport avek l’invitation pou suive Christ? (b) Ki bann benediction nou gagné parski nou faire volonté Jéhovah avek tou nou leker ek tou nou la force?

¹⁷ Pena doute ki nou envie imite bon l’exemple sa bann disciple-la ek accepté sans okenn condition l’invitation Christ. (Héb. 6:11, 12) Si nou contigne suive Christ avek zele ek avek tou nou leker, ki bann benediction nou pou gagné? Nou pou ena beaucoup la joie pou faire volonté Bondié. Nou pou ena aussi enn grand satisfaction parski nou finn accepté plus privilege ek responsabilité dan congregation. (Ps. 40:8; lire 1 Thessaloniciens 4:1.) Oui, a mesure ki nou faire zeffort pou suive Christ, nou gagne bann grand benediction ki pou dure pou touletan: nou l’esprit en paix, nou satisfait, nou ena faveur Bondié ek l’espoir pou vive pou touletan.—1 Tim. 4:10.

Eski ou rappel?

• Ki travail important nou finn gagné, ek couma nou bizin considere sa travail-la?

• Kont ki tendance nou bizin faire attention, ek kifer?

• Ki nou bizin faire dan enn fason honnete avek nou-mem?

• Ki pou aide nou pou contigne suive Christ?

[L’encadré page 31]

Ki pou aide ou pou contigne suive Christ?

▪ Lire la Bible toulé-jour ek medite lor seki ou lire.—Ps. 1:1-3; 1 Tim. 4:15.

▪ Prié souvent pou gagne soutien ek direction l’esprit saint.—Zek. 4:6; Luc 11:9, 13.

▪ Frequente bann frere ek soeur ki zelé dan ministere.—Prov. 13:20; Héb. 10:24, 25.

▪ Reconette ki dan nou lepok, pa reste beaucoup le temps avant la fin vini.—Éph. 5:15, 16.

▪ Pa blié ki li dangereux si nou touletan tire bann pretexte.—Luc 9:59-62.

▪ Reflechi regulierement lor voeu ki nou’nn faire ek bann grand benediction ki nou gagné kan nou servi Jéhovah ek kan nou suive Christ avek tou nou leker.—Ps. 116:12-14; 133:3; Prov. 10:22.