Cinq Fason pou Gagne enn L’etude La Bible
1. Si li difficile pou gagne enn l’etude La Bible dan nou territoire, ki nou bizin faire, ek kifer?
1 Eski li difficile pou ou gagne enn l’etude La Bible? Contigne rodé. Jéhovah beni bann ki contigne faire zeffort pou faire so volonté. (Gal. 6:9) Anou examine cinq suggestion ki pou aide ou gagne enn l’etude La Bible.
2. Couma nou kapav commence enn l’etude La Bible?
2 Propose enn Dimoune L’etude Directement: Beaucoup dimoune koné ki nou offert La Tour de Garde ek Réveillez-vous !, mais kitfois zot pa koné ki nou offert bann l’etude La Bible. Kifer ou pa essaye propose bann dimoune enn l’etude La Bible directement kan ou pé preché porte en porte? Ou kapav demann bann dimoune interessé avek ki ou pé preché si zot ti pou content gagne enn l’etude La Bible. Si zot refusé, ou kapav contigne quitte publication avek zot ek suive zot l’interet. Pendant plusieurs l’année, enn frere ti faire bann tournée periodik kot enn couple. Enn jour, apré ki li ti’nn quitte bann dernier magazine, li’nn viré pou allé kan enn coute li’nn pense pou demann bannla: “Eski zot ti pou content etudié La Bible?” Li ti surpris pou tann bannla dire oui. Azordi zot bann chretien baptisé.
3. Eski nou bizin pensé ki tou bann ki assisté reunion pé etudié La Bible avek kikenn? Expliké.
3 Bann Ki Assisté Reunion: Pa pensé ki tou bann dimoune interessé ki vinn reunion pé deja etudié La Bible avek kikenn. Enn frere ti dire: “[Parmi tou bann l’etude ki mo ti ena], plus ki la moitié ladan mo’nn commencé kan mo’nn koz avek bann ki ti pé assisté reunion.” Enn soeur ti decide pou al vers enn madame timide ki ti ena deux tifi baptisé dan congregation. Sa ti faire apepré 15 an ki sa madame-la ti pé assisté reunion, ek touletan li ti vinn La Salle du Royaume zis kan reunion ti pé commencé ek li ti allé desuite couma reunion fini. Madame-la ti accepté pou etudié ek finalement li ti vinn dan la verité. Sa soeur-la ecrire: “Mo zis regretté ki mo’nn attann 15 an pou demann [sa madame-la] si li ti pou content etudié!”
4. Couma nou kapav gagne enn l’etude La Bible kan nou demann lezot?
4 Demann Lezot: Enn soeur faire zeffort pou accompagne bann proclamateur dan zot l’etude. Avek permission sa proclamateur-la, a la fin l’etude, li demann etudiant-la si li konn kikenn ki ti pou content gagne enn l’etude La Bible. Kan ou pé offert livre Ki la Bible enseigné? enn visite, ou kapav demann li: “Eski ou konn enn lot dimoune ki ti pou content gagne sa livre-la?” Parfois, a cause certain situation, bann proclamateur ek bann pionnier pa reussi faire l’etude avek enn dimoune ki zot inn zwenn dan territoire. Alors, faire lezot koné ki ou disponible pou conduire enn l’etude La Bible.
5. Kifer nou kapav demann bann conjoint ki pa Témoins si zot ti pou content etudié?
5 Bann Conjoint Ki Pa Témoins: Eski ena bann proclamateur dan ou congregation ki zot conjoint pa Témoin? Certain sa bann conjoint-la evite koz La Bible avek zot conjoint ki Témoin mais zot pou accepté l’etude avek enn dimoune ki pa zot famille. En general, li pli bon ki ou koz ar conjoint ki Témoin-la avant ki ou al koz ar so conjoint. Coumsa ou pou koné ki pou dire li.
6. Kifer li important ki nou prié kan nou pé rod enn l’etude?
6 La Priere: Pa sous-estime pouvoir la priere. (Jacq. 5:16) Jéhovah promette nou ki Li pou ecoute nou bann la priere si zot en accord avek so volonté. (1 Jean 5:14) Enn frere ki ti ena enn programme bien rempli ti prié pou gagne enn l’etude La Bible. So madame ti pé demann-li-mem si so mari pou ena le temps pou faire enn l’etude, surtout si etudiant-la ena beaucoup probleme. Alors, kan li ti prié Jéhovah pou ki so missié gagne enn l’etude, li ti dire seki ti pé tracasse-li. Environ deux semaine apré, Jéhovah ti reponn zot la priere. Enn soeur pionnier dan congregation ti zwenn enn missié ki ti envie etudié La Bible ek soeur-la ti donne l’etude-la sa frere-la. Madame-la ecrire: “Mo dire n’importe kisannla ki pensé ki li pa pou kapav conduire enn l’etude La Bible, pou faire bann la priere precis, ek ki fodé pa zot arrete prié lor sa sujet-la. Nou finn gagne plus la joie ki mo ti pou kapav maziné.” Avek perseverance, ou aussi ou pou kapav trouve enn l’etude La Bible ek ena la joie pou aide enn dimoune marche lor “chemin ki amenn vers la vie.”—Mat. 7:13, 14.