Gagne Bann Bienfait ar Ou Groupe Predication
1. Ki bann bienfait nou ti gagné dan L’etude de Livre ki nou encore kapav gagné avek nou groupe predication?
1 Eski ou regrette certain kitsoz ki ti ena kan ti pé faire L’etude de Livre? Bann groupe L’etude de Livre ti tipti ek nou ti pli a l’aise. Sa ti permette nou faire bann camarade pli facilement, alors sa ti aide nou pou reste fort lor plan spirituel. (Prov. 18:24) Surveillant L’etude de Livre ti konn sakenn so situation ek li ti kapav donne bann l’encouragement personnel. (Prov. 27:23; 1 Pierre 5:2, 3) Nou encore toujours kapav gagne sa bann bienfait-la avek nou groupe predication.
2. Dan nou groupe predication, couma nou kapav prend l’initiative pou developpe l’amitié ki aide nou pou reste fort lor plan spirituel?
2 Prend L’initiative: En general, enn groupe predication li mem grandeur ki enn groupe L’etude de Livre. Kan nou travail dan predication “ensam” avek lezot, nou kapav developpe bann grand l’amitié. (Phil. 1:27) Avek comié proclamateur dan ou groupe ou’nn deja travail? Eski ou kapav “ouvert [ou] leker bien grand” dan sa domaine-la, setadir al vers lezot? (2 Cor. 6:13) En plus, kitfois temps en temps nou kapav invite enn kikenn dan nou groupe pou nou L’adoration en Famille ou-soit pou enn repas. Dan certain congregation, bann groupe predication sakenn so tour prepare enn repas pou bann frere ki vinn faire discours. Kan zot tour arrivé, zot zwenn ensam pou enn repas ek sakenn encourage so camarade mem si orateur-la pa kapav resté pou mangé.
3. Ki certain l’occasion nou ena pou gagne l’encouragement avek bann ancien dan nou groupe predication?
3 Mem si asterla la congregation zwenn zis deux fois par semaine, sa pa vedir ki bann ancien bizin occupe moins bann frere ek soeur lor plan spirituel. Dan chaque groupe inn etabli bann surveillant pou donne bann ki dan sa groupe-la enn l’encouragement personnel ek enn formation pou ministere. Si ou surveillant groupe pankor prend rendez-vous pou travail avek ou dan predication, kifer ou pa demann pou travail avek li? En plus, surveillant service preche avek enn different groupe enn week-end chaque mois. Dan bann tipti congregation kot ena zis deux-trois groupe predication, li kapav faire l’arrangement pou visite chaque groupe deux fois par an. Eski ou adapté ou programme pou preché kan surveillant service pé visite ou groupe?
4. (a) Couma organise bann reunion predication? (b) Kifer nou bizin pense pou offert nou lakaz pou faire reunion predication?
4 En general, li dan l’avantage bann groupe si pendant week-end chaque groupe zwenn different place pou zot predication. Kan ena bann rendez-vous predication dan plusieurs l’endroit ek dan preské mem ler, kitfois li pou pli facile pou bann proclamateur vinn dan reunion predication ek dan territoire. Sa pou prend moins le temps pou organise bann proclamateur ek pou envoye zot dan territoire. Li pli facile aussi pou surveillant groupe donne plus l’attention bann ki dan so groupe. Selman, a cause certain situation kitfois li pou pli bon ki deux groupe ou-soit plusieurs zwenn ensam. Si congregation en entier zwenn ensam pou preché premier Samedi du mois ou-soit apré L’etude La Tour de Garde, souvent li pli bon ki chaque groupe assize ensam ek donne surveillant groupe deux-trois minute pou organise so groupe avant ki termine reunion predication par la priere.—Guette l’encadré “Eski Ou Kapav Offert Ou Lakaz?”
5. Mem si nepli ena L’etude de Livre, ki l’assurance nou kapav ena?
5 Mem si nepli ena L’etude de Livre, Jéhovah contigne donne nou tou seki nou bizin pou faire so volonté. (Héb. 13:20, 21) Grace a soutien Jéhovah, nou pa mank nanyé. (Ps. 23:1) Nou gagne beaucoup benediction a travers nou groupe predication. Si nou prend l’initiative ek nou “seme en abondance” nou pou ‘recolté en abondance.’—2 Cor. 9:6.
[L’encadré, page 6]
Eski Ou Kapav Offert Ou Lakaz?
Dan certain congregation plusieurs groupe zwenn ensam pou reunion predication pendant week-end parski pena assez lakaz pou faire reunion. Bann reunion predication forme partie dan bann disposition ki congregation inn prend, alors c’est enn grand privilege pou faire sa bann reunion-la dan nou lakaz. Eski ou kapav offert ou lakaz pou faire sa bann reunion-la? Pa hesité pou faire sa parski ou lakaz modeste. Bann ancien pou prend en consideration kot-sa ou lakaz trouvé ek aussi bann lezot condition ki bizin rempli, pareil couma kan ti choisir enn l’endroit pou faire L’etude de Livre. Si ou envie offert ou lakaz, faire ou surveillant groupe koné.