Couma l’etude de livre aide nou
1. Couma toulé-cinq reunion la congregation aide nou?
1 Toulé-cinq reunion ki nou ena, zot different par fason ki faire zot, ek zot l’objectif pa pareil. Selman, zot tou important pou aide nou pou “encourage sakenn parmi nou pou montré l’amour, ek faire bann bon action.” (Héb. 10:24, 25) Ki bann l’aspect ki ena zis dan l’etude de livre, ek ki bann bienfait nou gagné grace a sa reunion-la?
2. Ki bann bienfait ena pou faire reunion en ti group dan l’etude de livre?
2 L’aide pou nou progressé lor plan spirituel: Quantité dimoune ki ena dan l’etude de livre li bien pli tigit ki seki ena dan bann lezot reunion la congregation. A cause sa, li pli facile pou developpe bann l’amitié ki kapav aide nou lor plan spirituel. (Prov. 18:24) Eski ou finn faire enn zeffort pou konn tou dimoune dan ou l’etude de livre, kitfois kan ou’nn demann sakenn parmi zot pou preche ensam avek ou? En plus, grace a l’etude de livre, surveillant l’etude de livre kapav konn situation chaque dimoune dan so group ek donne zot enn l’encouragement personnel.—Prov. 27:23.
3. Couma eski l’etude de livre encourage nou bann etudiant pou reponn ek aussi pou vinn assisté l’etude?
3 Eski ou finn invite bann dimoune ki etudié la Bible avek ou pou vinn assisté l’etude de livre? Bann ki interessé mais ki hesité pou assisté bann pli grand reunion, kapav senti-zot plus a l’aise pou vinn dan enn ti reunion, surtout si c’est dan enn lakaz. Parski ena enn l’atmosphere amical, li pli facile pou bann jeune ek bann ki’nn fek konn la verité pou donne bann reponse dan reunion. Parski c’est enn ti group, nou ena plus l’occasion pou participé ek pou loué Jéhovah.—Ps. 111:1.
4. Dan ki fason l’etude de livre kapav enn facilité?
4 En general, faire bann l’etude de livre dan bann l’endroit ki bien facile pou allé. Li pa possible ki tou dimoune al dan enn l’etude de livre ki pré kot zot. Mais kan nou al l’etude de livre kot finn envoye nou, kitfois nou voyage moins ki pou bann lezot reunion la congregation. L’endroit kot faire l’etude de livre kapav enn bon l’endroit aussi pou faire bann reunion predication.
5. Couma nou surveillant l’etude de livre kapav aide nou dan nou ministere?
5 L’aide dan ministere: Surveillant l’etude de livre envie aide sakenn pou kapav vinn regulier, pou gagne bann bon resultat, ek pou gagne la joie dan predication. Alors, li faire zeffort pou travail avek chaque dimoune dan so group, ek donne bann proclamateur enn aide personnel dan different domaine zot ministere. Si ena enn domaine dan ou ministere ki difficile pou ou, par exemple pou faire visite, dire sa ou surveillant l’etude de livre. Kitfois li kapav faire l’arrangement pou ou travail avek enn proclamateur dan zot l’etude de livre ki ena l’experience. Ou capacité pou enseigne bann dimoune la Bible pou augmenté kan ou observe bien bann bon method ki ou surveillant l’etude de livre servi pou enseigné kan li conduire l’etude de livre.—1 Cor. 4:17.
6. Kifer nou bizin faire tou pou profite bien l’etude de livre?
6 L’etude de livre li enn vrai benediction! Sa disposition ki Jéhovah finn prend-la aide nou pou bien stable lor plan spirituel dan sa lepok difficile ki nou pé vive-la.—Ps. 26:12.