Kuma Bann Sirveyan Letid Liv Montre enn Lintere Personel
1 Kifer eski ena Letid Liv? ‘Se pu donn sak dimunn enn latansyon personel, ek kumsa kapav vey lor zot progre spirityel. . . . Sa se enn prev ki Zeova kontan so pep ek Li pran zot byin swin.’ (omF paz 75; Izai 40:11) Pu donn sa kalite latansyon personel la, sirveyan letid liv zwe enn rol byin-byin inportan.
2 Dan Letid Liv: Si letid liv li enn ti grup, se zisteman pu ki sirveyan letid liv la kapav byin konn sak manb so grup. (Pro. 27:23) Normalman, sak semenn, sirveyan la gayn lokazyon, avan uswa apre letid, pu koz enn tipe avek bann manb so Letid Liv. Seki fer ki dan enn mwa, li gayn lokazyon pu koz avek preske sak manb so grup. Kumsa, bann manb la pu santi zot lib pu apros sirveyan la kan zot konn bann sityasyon difisil uswa kan zot bizin lankurazman.—Izai 32:2.
3 Sirveyan letid liv sey ankuraz tu dimunn pu partisipe dan letid. Enn manyer ki li fer sa, se par fason ki li diriz letid la: li fer sa avek buku swin ek lamur. (1 Tes. 2:7, 8) Li rod bann mwayin pu fer tu dimunn partisipe, mem bann ki pli tipti. Li kapav ed bann ki timid pu reponn. Li kapav ed zot swazir alavans enn verse ki zot pu lir uswa enn paragraf kot zot pu reponn. Ubyin li kapav montre zot kuma reponn dan zot prop mo.
4 Si se enn serviter ministeryel ki adzwin sirveyan letid liv, sirveyan la pu fer li diriz letid enn fwa tulede mwa. Kumsa, sirveyan la pu kapav gete kuma adzwin la diriz letid, ek lerla donn li bann sigzesyon ki pu ed li. Eski sa pa enn bon laranzman pu ed bann frer amelyor zot kapasite pu anseyne?—Tit 1:9.
5 Dan Predikasyon: Enn parmi bann prinsipal responsabilite enn sirveyan letid liv, se pran latet dan predikasyon. (Nonm 27:16, 17) Li fer bann laranzman pratik pu pres an grup, ek li fer zefor pu ed tu bann proklamater so grup pu truv lazwa dan zot servis. (Efe. 4:11, 12) Pu fer sa, li fer li enn devwar pu travay ar sak manb so Letid Liv. Ansam avek sirveyan servis, zot fer usi bann laranzman pu ki enn proklamater ki ena plis lexperyans ed bann ki bizin led pu amelyor zot dan sertin domenn an rapor avek predikasyon.
6 Kuma enn Berze Ki Ena Buku Lamur: Sirveyan letid liv interes li usi avek bann ki pa kapav fer buku dan predikasyon parski zot sityasyon pa permet zot. Ena ki vye, andikape uswa paralize; ena ki’nn tom byin malad uswa ki’nn gayn enn blesir grav. Sirveyan la bizin fer sir ki sa bann dimunn la kone ki mem si zot finn rann temwanyaz pandan 15 minit dan enn mwa, zot kapav remet enn rapor. (Se Komite Servis Kongregasyon ki deside ki bann proklamater ki tom dan sa kategori la.) Sirveyan la pran usi kont bann proklamater dan so grup, ki nepli aktif. Li fer tu pu ed zot pu rekumans prese ek asiste reynion regilyerman.—Lik 15:4-7.
7 Wi, nu byin rekonesan pu lintere ranpli ar lamur ki bann sirveyan letid liv donn nu! Latansyon personel ki zot done ed nu pu “vinn enn sel dan lafwa” parey kuma Kris.—Efe. 4:13.