Bann Renion Predikasion ki Realiz Zot Lobzektif
1. Kifer ena bann renion predikasion?
1 Enn fwa, Zezi ti rasanble so 70 disip avan zot al prese. (Lik 10:1-11) Pou ankouraz so bann disip, li ti dir zot ki zot pa tousel. Zeova, “Met larekolt” avek zot ek Li pe diriz zot. Pou prepar so bann disip pou sa travay-la, Zezi ti donn zot bann linstriksion. Anplis, li ti organiz zot kan li ti klas zot “de par de.” Azordi osi parey. Bann renion ki fer avan predikasion ankouraz nou, organiz nou, ek prepar nou pou al prese.
2. Komie letan enn renion predikasion bizin dire?
2 Normalman, enn renion predikasion dir apepre 10 a 15 minit. Frer ki responsab-la organiz bann group, dir ki teritwar pou travay, ek fer enn lapriyer. Asterla, ena enn modifikasion. Apartir Avril, enn renion predikasion pou dir zis sink a set minit. Si zis apre renion ena enn sorti predikasion, renion predikasion-la pou pli kourt ankor. Kifer? Parski bann frer ek ser finn fini gagn enn bon program spiritiel, alor zot kapav pas plis letan dan predikasion. Anplis, sa pou permet bann pionie ouswa bann proklamater ki’nn koumans prese depi boner, aret zot laktivite zis pou enn ti moman.
3. Kouma bizin organiz bann renion predikasion pou ki bann proklamater kapav tir profi?
3 Bizin organiz bann renion predikasion dan enn fason ki bann proklamater kapav vremem tir profi. Dan boukou kongregasion, olie ki tou bann group predikasion zwenn enn sel plas, li pli bon ki sak group ena so prop randevou. Koumsa li pou pli fasil pou bann proklamater asiste renion predikasion ek al dan zot teritwar. Li pou pli fasil osi pou sirveyan group organiz predikasion san perdi letan, ek donn tou so latansion bann proklamater dan so group. Komite bann ansien kapav pran an konsiderasion sitiasion lokal ek gete ki laranzman pli bon pou kongregasion. Avan renion predikasion termine, zot tou bizin fini kone kot pou al prese ek avek kisannla zot pou travay. Apre, kapav termine par enn lapriyer bien kourt.
4. Kifer fode pa nou panse ki renion predikasion mwin inportan ki lezot renion?
4 Li Inportan Parey Kouma Lezot Renion: Se bann ki sorti predikasion, ki profit renion predikasion, pa tou manb enn kongregasion. Malgre sa, fode pa nou panse ki bann renion predikasion zot mwin inportan ki lezot renion. Parey kouma tou lezot renion, renion predikasion, se enn dispozision ki Zeova inn etabli pou ankouraz sakenn nou kamarad pou ena lamour ek pou fer seki bon. (Ebre 10:24, 25) Alor, frer ki responsab-la bizin bien prepar li pou ki sa renion-la onor Zeova ek ankouraz bann asistan. Si li dan zot posibilite, bann proklamater ki sorti dan predikasion bizin fer tou seki zot kapav pou asiste sa renion-la.
Fode pa nou panse ki bann renion predikasion zot mwin inportan ki bann renion kongregasion
5. (a) Ki responsabilite sirveyan servis ena? (b) Kouma enn ser bizin diriz renion predikasion?
5 Frer ki Responsab Bizin Prepar Li: Pou ki enn proklamater prepar li bien pou enn size dan renion, li bizin kone alavans ki partisipasion li ena. Pou renion predikasion osi li parey. Biensir, kan bann group zwenn sakenn zot kote, se sirveyan group ouswa so asistan ki organiz renion predikasion. Selman kan tou group zwenn ansam, sirveyan servis pou dezign enn frer pou diriz renion-la. Sertin sirveyan servis donn enn program tou bann ki diriz renion predikasion ek zot met enn kopi sa program-la lor tablo. Sirveyan servis bizin servi so bon zizman kan li dezign bann ki pou diriz sa renion-la. Fode pa li bliye enn kitsoz: Pou ki sa bann renion-la zot efikas, sa pou depann lor kapasite ki sa bann frer-la ena pou ansegne ek organize. Si sertin zour pena okenn ansien, asistan ministeryel, ouswa lezot frer, li pou dezign enn ser ki ena lexperyans pou fer sa renion-la.—Get lartik “Kan enn Ser Pe Dirize.”
6. Kifer enn bon preparasion li inportan?
6 Kan nou gagn enn partisipasion pou Lekol Minister Teokratik ouswa pou Renion Servis, nou konsider sa kouma enn kitsoz serye ek nou prepar nou bien. Se pa kan nou pe al renion sa zour-la ki nou pou koumans reflesi lor seki nou pou dir. Li parey osi pou enn renion predikasion. Asterla ki renion predikasion pou pli kourt, enn bon preparasion pou bien inportan pou ki renion-la ankourazan ek terminn aler. Enn bon preparasion vedir osi fini kone alavans ki teritwar pou travay.
7. Ki bann pwin sa frer ki diriz renion predikasion la kapav examine?
7 Lor ki Size pou Koze: Sak teritwar diferan, akoz sa lesklav fidel pa’nn donn nou enn plan pou sak renion predikasion. Nou gagn sertin sigzesion dan lankadre “Seki To Kapav Examine Pandan enn Renion Predikasion.” An zeneral, bann frer ek ser kapav partisipe pandan renion-la. Parfwa, kapav fer enn demonstrasion bien prepare ouswa montre enn video lor jw.org ki adapte ar nou minister. Dan so preparasion, frer ki diriz renion-la bizin reflesi lor seki li kapav dir pou ankouraz ek prepar bann ki pou prese sa zour-la.
Dan so preparasion, frer ki responsab renion predikasion bizin pans lor seki pou ankouraz ek prepar bann ki pe prese sa zour-la
8. Dan Samdi ek Dimans, ki li bon examine pandan bann renion predikasion?
8 Dan Samdi, par exanp, laplipar proklamater ofer Latour Degard ek Réveillez-vous ! Boukou ki prese Samdi pa prese dan lasemenn. Zot kapav trouv sa difisil pou rapel prezantasion ki zot inn pratike pandan zot Ladorasion an Fami. Alor, li bon ki frer ki responsab predikasion re-examinn bann model prezantasion ki ena lor dernie paz Nou Minister. Ena lezot kitsoz osi ki frer-la kapav examine. Par exanp, kouma kapav inklir enn nouvel ki pe fer laktialite, enn levennman, ouswa enn fet, kan pe prezant bann magazinn. Li kapav osi examine kouma pou prepar terin pou enn vizit si enn dimounn inn aksepte enn magazinn. Si sertin finn deza koumans servi bann magazinn ki pe ofer sa mwa-la, frer-la kapav demann zot pou partaz bann sigzesion ouswa rakont bann bon lexperyans. Dan Dimans, li kapav fer parey avek piblikasion ki pe ofer sa mwa-la. Ninport ki zour bann proklamater kapav ofer bann piblikasion kouma par exanp brosir Enn Bon Nouvel, Ekout Bondie, ek liv Ki la Bible enseigné? Alor, frer ki pe dirize kapav examine kouma pou ofer enn sa bann piblikasion-la.
9. Si pandan wikenn kongregasion pe partisip dan enn kanpagn spesial, ki kapav examine dan renion predikasion?
9 Si kongregasion pe partisip dan enn kanpagn spesial pandan wikenn, frer ki pe diriz predikasion kapav donn bann sigzesion lor kouma pou ofer bann magazinn ansam avek linvitasion ouswa trak, ouswa mem ki kapav fer si enn dimounn montre lintere. Li kapav osi demann bann proklamater ki bann bon lexperyans zot inn gagne pandan kanpagn.
10, 11. Kifer bann proklamater osi bizin prepar zot pou renion predikasion?
10 Bann Proklamater Osi Bizin Prepar Zot: Bann proklamater osi zot ena zot par pou fer. Si zot prepar zot alavans, kitfwa pandan zot ladorasion an fami, zot pou ena kitsoz interesan pou partaz avek lezot proklamater. Enn bon preparasion vedir osi ki nou fini pran bann magazinn ek bann piblikasion avan ki nou ariv dan renion predikasion. Koumsa nou pa pou tarde pou al dan teritwar.
11 Li inportan osi ki nou ariv avan ki renion-la koumanse. Biensir nou pou fer zefor pou ariv aler pou tou bann renion. Selman, kan nou ariv an retar pou renion predikasion, frer ki responsab bizin reorganiz tou. Kifer? Frer ki pe diriz renion la pran an konsiderasion plizir kitsoz avan li organiz bann proklamater. Si pena boukou proklamater, kitfwa li pou deside pou avoy zot tou dan enn teritwar ki’nn fini koumans travay. Si sertin inn marse pou vinn asiste sa renion-la ek teritwar kot zot pou al prese li ase lwin, sirman li pou met sa bann proklamater-la ansam avek bann ki ena enn transpor. Si se enn teritwar danzere, li pa pou les bann ser al tousel, li pou avoy bann frer ansam avek zot. Si ena bann proklamater ki andikape, sirman li pou fer zot pres lor enn semin plat ouswa fer bann lakaz kot pena leskalie. Si ena bann nouvo, sirman li pou met zot ansam avek bann ki ena plis lexperyans. Me ki pou arive si nou vinn an-retar? Frer-la pou bizin reorganiz tou ek gete kouma pou klas bann retardater-la. Biensir, li kapav arive ki pou enn bon rezon nou’nn vinn an retar enn fwa. Selman, si touletan nou an-retar, li bon nou demann noumem kifer. Eski se parski sa bann renion-la pena linportans pou nou, ouswa se parski nou pa organiz nou bien alavans?
12. Si to abitie fer to prop laranzman, ki to kapav fer?
12 Avan renion-la koumanse, bann proklamater kapav, swa fer zot prop laranzman, swa pres avek sa kikenn avek ki frer-la pou met zot. Si to abitie fer to prop laranzman, eski to kapav ‘ouver to leker angran,’ ek pres avek lezot proklamater olie ki touletan to pres avek to bann bon kamarad? (2 Kor. 6:11-13.) Eski detanzantan to kapav pres avek bann nouvo ek ed zot amelior zot kapasite pou ansegne? (1 Kor. 10:24; 1 Tim. 4:13, 15) Ekout bien bann linstriksion, kouma par exanp kotsa pou koumans prese. Kan renion fini, evit fer bann sanzman ek pa tarde pou al dan teritwar.
13. Si nou tou nou fer nou par kouma bizin, ki bienfe nou pou gagne?
13 Sa 70 disip ki Zezi ti avoy prese la, ti “retourne dan lazwa.” (Lik 10:17) Pena dout ki renion ki Zezi ti fer avan zot al prese inn ed zot pou gagn bann bon rezilta. Azordi osi parey, bann renion predikasion kapav ena mem rezilta. Si nou tou nou fer nou par kouma bizin, bann renion predikasion pou ankouraz, organiz, ek prepar nou pou rann ‘temwaniaz tou bann nasion.’—Mat. 24:14.