Kestyon Ki Suleve
◼ Ki bizin egzamine kan fer reynion predikasyon?
Enn reynion predikasyon ed nu pu konsantre lor laktivite ki vinn apre, setadir nu minister. Akoz sa, sa kikenn ki diriz sa reynion la bizin byin prepare ek pre pu partaz avek bann proklamater enn kitsoz ki ankurazan, presi, ek pratik. Si sa zur la, tex dizur ena enn rapor direk avek predikasyon, kapav lir li ek egzaminn li pandan detrwa minit. Me, reynion la bizin konsantre sirtu lor nu minister, ek ed tu bann ki pe sorti predikasyon pu zot pli byin prepare pu donn temwaynaz sa zur la.—2 Tim. 4:5.
Kapav egzaminn bann pwin pratik ki ena dan Nu Minister Rwayom pu fer tu proklamater kone ki piblikasyon pe ofer ek kuma prezant li. Kan ena Zurne Magazinn kapav fer enn demonstrasyon lor prezantasyon ki ena dan lartik “Ki pu Dir lor Bann Magazinn.” Pu bann lezot kanpayn, kapav atir latansyon lor enn uswa de lintrodiksyon pratik pu teritwar lokal, ki ena dan liv Comment Raisonner. Kapav egzaminn uswa fer enn demonstrasyon lor enn parmi bann lezot faset nu minister, par egzanp kuma servi Labib kan nu devan laport enn dimunn, kuma sirmont enn obzeksyon, kuma pu propoz enn letid Labib, uswa kuma pu swiv lintere.
Fode pa ki reynion predikasyon depas plis ki 10-15 minit, ek ladan mem bizin fini organiz bann grup, dir dan ki teritwar pu prese, ek fer lapriyer. Kan pe sorti pu al prese, tu dimunn bizin fini kone ar kisannla li pu travay ek kot sa zot bizin ale, ek zot bizin al dan teritwar vit. Pwiski reynion la pa dir lontan, li inportan ki tu dimunn ariv aler. Si pe fer reynion predikasyon zis apre enn reynion, kuma par egzanp Letid La Tour de Garde, alor reynion la bizin ankor pli kurt. Pa neseser egzaminn tex dizur, pwiski bann frer finn fek swiv enn size baze lor Labib.
Bizin swazir an avans bann frer kalifye pu diriz bann reynion predikasyon. Si arive enn zur pena frer pu dirize, bann ansyin bizin swazir bann ser batize ki kapav dirize kan neseser. Ser la kapav asiz dan so plas, ek li kapav swa egzaminn tex dizur, swa bann lezot pwin an rapor avek predikasyon; so bann komanter bizin kurt. Li bizin kuver so latet.
Bann reynion predikasyon zot bann bon lokazyon pu ankuraz nu ek ekip nu pu partisip dan minister. Si sa kikenn ki diriz sa reynion la li pli byin prepare, nu tu nu pu tir plis profi.