Reunion predication

1. Kifer nou bizin interesse-nou pou al preché dan enn fason organisé?

¹ Jésus finn donne l’exemple dan maniere pou accompli travail predication lor Royaume Bondié dan enn fason organisé ek efficace. Zordi aussi, bann ki responsable sa predication mondial-la, zot bien envie trouve sa travail-la bien organisé. En accord avek sa, bann congregation dan le monde servi bann reunion predication couma enn moyen pou organise bann groupe proclamateur pou predication.—Mat. 24:45-47; 25:21; Luc 10:1-7.

2. Kifer faire reunion predication?

² Enn bon disposition: Bann reunion predication inn faire pou donne l’encouragement, conseil pratik en rapport avek nou ministere, ek l’instruction pou bann ki pé al dan predication. Kitfois kapav examine pou enn ti moment texte du jour kan li applik avek predication. Parfois, kapav discute lor bann rappel ki ena dan Ministere du Royaume, dan livre Comment raisonner, ou-soit dan livre École du ministère, pou kapav prepare tou seki present pou predication sa jour-la. Kapav faire enn demonstration bien courte concernant publication ki pou offert. Avant faire la priere, zot tou bizin koné avek kisannla zot pou travail, ek kot-sa territoire kot zot pou preché-la été. Sa reunion predication-la bizin pa depasse 15 minute, ek zis apré sa, zot tou bizin pé al dan territoire.

3. Kisannla responsable pou l’organisation bann reunion predication?

³ Couma organise reunion predication? Surveillant service, responsable pou organise bann reunion predication. Bann surveillant groupe ou-soit zot bann adjoint, ena responsabilité pou accompagne zot groupe dan week-end. Kitfois certain ancien ou-soit bann assistant ministeriel kapav accompagne bann groupe dan predication pendant la semaine. Bann surveillant groupe travail ensam avek surveillant service pou ki zot groupe ena assez territoire pou travail porte en porte dan week-end. Pendant la semaine, c’est surveillant service ki pou faire sur ki ena enn reunion predication dan la semaine ek kisannla ki pou responsable.

4-6. (a) En rapport avek territoire la congregation, pou ki raison faire bann reunion predication? (b) Ki kapav examiné pou guetté si bizin faire bann reunion predication?

⁴ Kot-sa ek kan? Au lieu ki enn congregation entier joinde dan enn sel place, en general li pli bon faire sa bann reunion-la dan different place approprié. Souvent kapav faire sa dan bann lakaz a travers territoire, avek l’objectif pou travail territoire congregation avek efficacité. Kapav servi la Salle du Royaume aussi pou faire sa. Beaucoup congregation servi la Salle du Royaume pou zot faire zot reunion predication enn ti moment apré discours publik ek l’etude La Tour de Garde dan dimanche. Bizin faire enn zeffort pou ki bann proclamateur pena pou voyage enn quantité avant ki zot arrive dan territoire. A cause sa, bizin regulierement verifié ki bann l’endroit kot faire reunion predication toujours bann l’endroit approprié pou travail territoire a fond ek dan enn fason efficace.

⁵ Ler ki pli approprié pou faire sa bann reunion-la ek comié fois par semaine bizin faire sa depann lor couma territoire-la été. Sa bann question ki ena apré-la kapav aidé pou determiné kot-sa ek kan li pli bon faire bann reunion predication.

⁶ Ki territoire bizin plus travail a fond? Ki ler li pli bon pou faire predication porte en porte? Eski bizin organise enn rendez-vous dan tanto pou predication ou-soit pou faire bann nouvelle visite? Tou bann sorti ki pou faire bizin parette lor tableau congregation. Tou bann proclamateur Royaume Bondié bizin ena desir pou couvert zot territoire a fond ziska ki zot kapav dire pareil couma l’apotre Paul: “Mo nepli ena okenn territoire kot mo pa’nn travail.”—Rom. 15:23.

7. Ki responsabilité sa kikenn ki en charge groupe-la, ena?

⁷ Role seki pé dirige bann reunion predication: Sa kikenn ki finn gagne responsabilité pou dirige enn reunion predication-la, montré ki li ena beaucoup respé pou sa disposition theocratik-la kan li bien prepare-li. Sa bann reunion-la bizin commence a ler ek bizin instructif ek pa dure longtemps, entre 10-15 minute. Avant ki reunion-la commencé, responsable groupe bizin gagne territoire ki pou travail. Mem si li pa necessaire pou attann bann ki vinn en retard apré sa reunion-la, li utile ki nou laisse enn message pou faire koné kot-sa groupe-la pou travail. Couma reunion-la fini, tou bann proclamateur bizin al dan territoire ki’nn donne zot. Pena okenn doute ki enn reunion predication ki bien organisé ek instructif pou aide tou seki present gagne bann renseignement ki bizin pou accompli zot ministere sa jour-la.—Prov. 11:14.

8. Dan ki fason bann ki assisté reunion predication kapav cooperé avek bann responsable?

⁸ Responsabilité bann ki assisté reunion predication: Li bien important ki ena enn bon cooperation. (Héb. 13:17) Responsable groupe pou faire tou seki li kapav pou aide tou bann ki bizin enn proclamateur pou travail avek zot. Li bon ki bann proclamateur experimenté, present pou aide bann nouveau ek bann ki pena beaucoup l’experience. Bann ki disposé pou travail avek enn lot proclamateur de temps en temps, kapav faire beaucoup di-bien. (Prov. 27:17; Rom. 15:1, 2) Nou tou nou bizin faire zeffort pou vinn a ler. Respé ki nou ena pou disposition theocratik ek consideration ki nou ena pou nou bann frere ek soeur pou pousse nou pou faire bann changement necessaire dan sa domaine-la.—2 Cor. 6:3, 4; Phil. 2:4.

9. Couma bann pionnier kapav soutenir disposition bann reunion pou predication?

⁹ L’aide bann pionnier: L’aide ki bann pionnier donné pendant reunion predication ena enn grand valeur ek sa encourage nou tou. Nou comprend ki bann pionnier ena beaucoup responsabilité. En plus ki zot conduire bann l’etude la Bible ek faire bann nouvelle visite, dan zot programme pou toulé-jour, kitfois zot bizin aussi prend soin zot famille ek zot travail profane. Alors, fodé pa ki bann pionnier senti-zot obligé pou assisté tou bann reunion predication ki la congregation organisé, surtout si toulé-jour ena reunion predication. Mais, kitfois li pou possible ki zot soutenir au moins deux-trois reunion predication chaque semaine. Dan enn certaine fason, bann reunion predication zot enn formation, ek connaissance lor la Bible ek l’experience ki bann pionnier ena kapav enn grand l’aide pou lezot. Zot participation regulier dan predication finn permette zot pou gagne l’experience dan ministere. Zot kapav partage sa. Zot zele dan ministere ek dan bann reunion predication finn faire zot vinn bann l’exemple ki nou kapav imité. Nou bien apprecié zot participation dan bann reunion predication.

10. Kifer li approprié ki tou bann proclamateur soutenir avek tou zot leker sa disposition-la?

¹⁰ Pareil couma sa ti été pou Jésus ek so bann disciple, enn grand partie nou travail predication li accompli grace a predication porte en porte. Bann reunion predication zot la pou encourage sakenn parmi nou ek pou aide nou pou participe dan sa travail-la avek efficacité. Tou bann proclamateur bizin soutenir sa disposition theocratik-la autant ki possible. (Actes 5:42; 20:20) Nou tou, avek tou nou leker, anou faire tou changement necessaire pou nou kapav soutenir bann reunion predication. Kan nou faire sa, nou kapav sur ki Jéhovah pou donne nou so benediction ek nou pou kapav faire leker nou Chef, Jésus Christ, content pendant ki nou preche la bonne nouvelle lor Royaume Bondié.—Mat. 25:34-40; 28:19, 20.