Profite bien bann reunion predication
1. Couma eski bann reunion predication kapav aide nou?
1 Grace a bann reunion predication ki efficace, nou gagne l’encouragement ek bann conseil pratik avant nou al preché. Zot permette nou travail ensam avek lezot proclamateur ek donne nou l’occasion pou encourage ek forme sakenn nou camarade. (Prov. 27:17; Eccl. 4:9, 10) Couma nou kapav profite bien sa bann reunion-la?
2. Kan enn frere pé dirige enn reunion predication, lor ki bann kitsoz li kapav kozé?
2 Frere ki dirige sa reunion-la: Normalement bann point ki pou developpé dan sa reunion-la pa finn preparé a l’avance. Alors, si ou pé dirige sa reunion-la ou bizin prepare-ou bien. Pa nek pense pou examine texte du jour, mem si kitfois ou kapav decidé pou cite li, si li koz lor predication. Reflechi ki conseil pratik ou kapav donne bann proclamateur ki pé preché sa jour-la. Par exemple, ou kapav koz lor enn presentation ek apré faire enn demonstration. Kitfois ou pou envie ré-guette enn point dan livre Comment raisonner, ou-soit livre École du ministère, ou-soit enn sujet ki’nn fek faire dan reunion service. Enn lot l’occasion kitfois ou pou envie montré couma kapav faire face ar enn problem ki kapav levé dan ou territoire. Ou kapav aussi montré couma pou developpe l’interet ek commence bann l’etude la Bible, surtout si beaucoup proclamateur ena bann visite pou faire. Lor n’importe ki kitsoz ou pou kozé, montré ou l’enthousiasme ek reste positif.
3. Comié temps reunion-la bizin duré, ek ki bizin fini faire pendant sa lé-temps-la?
3 Commence reunion-la a l’heure mem si ou koné ki certain pou en retard. Servi ou bon jugement kan ou pé organise bann group, ek donne assez territoire bann ki bizin. Reunion-la bizin dure pa plus ki 10-15 minute ek li bizin pli courte si pé faire sa zis apré enn reunion congregation. Avant ki ou termine sa reunion-la, tou bann proclamateur bizin koné ar kisannla zot pé travail ek kot-sa zot pou al preché. Bizin termine reunion-la par enn la-priere.
4. Ki pou aide zot tou pou profite bien bann reunion predication?
4 Nou kapav aidé: Pareil couma dan bann reunion congregation, nou bizin montré respé pou Jéhovah ek consideration pou lezot kan nou arrive a l’heure. Li bon ki ou participe dan sa discussion-la. Kitfois frere ki dirige reunion-la pou decidé ar kisannla ou pou travail ou-soit ou-mem ou kapav faire ou prop l’arrangement avant reunion commencé. Si ou envie faire ou prop l’arrangement, faire zeffort pou ‘elargi-ou’ kan ou preche avek different proclamateur au lieu ki touletan ou preche zis avek ou bann camarade. (2 Cor. 6:11-13) Kan reunion-la fini, evite change bann l’arrangement ki’nn faire ek pa tardé pou al dan territoire.
5. Ki kitsoz reunion predication encourage nou pou faire?
5 Bann reunion predication ek bann reunion congregation ena mem l’objectif. Zot là pou ki nou kapav “interesse-nou sakenn ar nou camarade, pou encourage sakenn parmi nou pou montré l’amour, ek faire bann bon action.” (Héb. 10:24, 25) Si nou faire zeffort pou profite sa bann reunion-la, nou pou gagne l’aide ki bizin pou accompli nou ministere ki vrai-mem enn “bon action”!