Temwaynaz an Grup Fer Nu Gayn Lazwa
1 Kan Zezi ti avoy 70 disip pu prese, li ti anseyn zot seki zot bizin dir. Li ti organiz bann lekip de dimunn ek li ti dir zot ki teritwar zot ti bizin fer. Sa ti fer zot gayn lazwa. (Lik 10:1-17) Zordi usi, predikasyon an grup ed pu ekip, pu organiz ek pu ankuraz lepep Bondye pu laktivite predikasyon.
2 Bann Ansyin Pran Latet: Bann ansyin zwe enn gran rol pu ed tu bann proklamater pu partisip regilyerman dan predikasyon. Sirveyan servis pran latet pu fer bann laranzman pu predikasyon pandan bann zur lasemenn. Sak sirveyan letid liv responsab pu organiz laktivite predikasyon pu so grup, sirtu dan wikenn. Defwa, kan kongregasyon antye zwenn pu reynion predikasyon, par egzanp zis apre letid Latur Degard, sak sirveyan letid liv bizin fer bann laranzman pu bann manb dan so letid liv.
3 ‘Tu Pas Byin ek dan Lord’: Sa kikenn ki finn deziyne pu fer reynion predikasyon la, bizin kumans aler ek fer ansort ki reynion la dir 10-15 minit. Li bizin fini klas bann proklamater ek dir zot kot zot pu travay (amwin kuma finn dir lao, ki se bann sirveyan letid liv ki pu fer sa) avan li termine par lapriyer. Kumsa, li pa pu neseser ki bann proklamater fer bann grup dan teritwar, seki kapav anlev dinite nu predikasyon. Sa li usi an akor avek konsey Pol: “Ki tu kitsoz pas byin ek dan lord.” (1 Kor. 14:40) Tu bann ki asiste reynion predikasyon bizin fer ansort ki sa laranzman la li enn sikse. Kuma zot kapav fer sa? Se kan zot vinn aler, zot korpere antyerman avek sa kikenn ki pe diriz grup la, ek kan zot al dan teritwar tutswit kuma dir zot grup ale.
4 Ansam dan Linite: Bann laranzman pu prese an grup li enn bon lokazyon pu nu arive konn bann lezot manb dan kongregasyon. Li vre ki pena okenn obzeksyon ki nu aranze alavans pu pres avek kikenn. Me nu kapav tir buku profi si nu asiste bann reynion predikasyon san ki nu’nn prevwar avek kisannla nu pu travay. Kitfwa, pu demann nu pu pres avek kikenn ki nu pa tro kone. Kumsa nu pu kapav montre nu lamur anver pli buku dimunn.—2 Kor. 6:11-13.
5 Predikasyon an grup ankuraz nu ek fer nu vinn ini kuma “bann konpaynon travay dan laverite.” (3 Zan 8) Anu partisip plin-plin dan predikasyon an grup!