Pandan Lepok Memoryal, Eski To Pou Zele Parey Kouma Zeova ek Zezi?
1. Ki zefor spesial bann Temwin Zeova fer pandan lepok Memoryal?
1 Zeova realiz so proze avek zel. Izai 9:7 fer referans ar sertin benediksion ki Rwayom Bondie pou amene ek li dir: “Avek zel, Zeova, Sef bann larme pou fer sa.” Pandan so minister lor later, Zezi osi ti montre enn gran zel pou vre ladorasion. (Zan 2:13-17; 4:34) Sak lane pandan lepok Memoryal, bann milyon proklamater dan lemond antie montre ki zot zele parey kouma Zeova ek Zezi. Zot fer enn zefor spesial pou fer plis dan zot minister. Eski to’si to pou parmi zot?
2. Kouma nou pou montre nou zel apartir le 7 Mars?
2 Kanpagn Linvitasion: Sa lane-la, kanpagn linvitasion pou Memoryal koumanse Samdi 7 Mars. Koumans prepar twa asterla mem pou ki to kapav zele dan to minister. Amezir ki bann proklamater fer zot best pou kouver maximum teritwar, sa pou kree enn gran lantouziasm dan bann kongregasion. Nou tou ansam, anou fer zefor pou donn enn linvitasion bann letid, vizit, koleg travay, fami, ek kamarad lekol. Ouswa, nou kapav montre zot sa linvitasion-la lor jw.org.
3. Kouma nou kapav fer plis dan nou minister an Mars ek Avril?
3 Pionie Tanporer: Nou zel pou motiv nou pou fer plis. Pena dout ki boukou pou fer pionie tanporer an Mars ek Avril, parski zot pou kapav fer 30 er. Pandan to ladorasion an fami, ouswa to letid personel, reflesi ek priye pou gete kouma to kapav fer sa servis-la. (Prov. 15:22) To lantouziast kapav detin lor lezot, ek pous zot pou prese avek zel. Kifer to pa modifie to program pou fer plis dan to minister? Koumsa to pou montre ki to zele parey kouma Zezi.—Mark 6:31-34.
4. Si nou zele parey kouma Zeova ek Zezi, ki bienfe nou pou gagne?
4 Pandan lepok Memoryal, si nou zele parey kouma Zeova ek Zezi, nou pou gagn boukou bienfe. Par exanp, nou pou kapav rann temwaniaz ar pli boukou dimounn dan teritwar. Kan enn dimounn servi Zeova ek ed lezot, sa fer li gagn lazwa ek satisfaksion. Pandan sa bann mwa-la, nou pou kapav fer sa lexperyans-la. (Zist. 20:35) Me pli inportan, nou pou fer plezir nou Bondie ki zele ek so Garson.