Eski Ou Pou Faire Pionnier Auxiliaire?
1. Kifer lepok Mémorial c’est enn bon moment pou faire plus dan nou ministere?
1 Lepok Mémorial c’est enn bon moment pou faire plus dan nou ministere. C’est enn moment kot nou medite lor grand l’amour ki Jéhovah inn manifesté kan Li’nn donne so Garson couma enn ranson. (Jean 3:16) Nou tellement ena reconnaissance pou seki Jéhovah inn faire pou nou, ki sa augmente nou desir pou koz lor Li avek lezot dimoune ek pou dire zot seki Li pé faire pou l’humanité. (Is. 12:4, 5; Luc 6:45) C’est aussi enn lepok kot nou gagne l’occasion pou participe dan enn campagne special pou invite bann connaissance ek bann dimoune dan territoire pou assisté Mémorial avek nou. Apré sa, nou pou faire zeffort pou cultive l’interet bann ki’nn vinn assisté Mémorial. Eski ou pou faire pionnier auxiliaire pendant mois Mars, Avril, ou-soit Mai pou ki ou kapav faire plus dan ou ministere?
2. Kifer Mars li surtout enn bon mois pou faire pionnier auxiliaire?
2 Faire Mois Mars Vinn enn Mois Special: Mars pou surtout enn bon mois pou faire pionnier auxiliaire. Bann ki pou faire pionnier sa mois-la pou kapav choisir pou faire soit 30 heure ou-soit 50 heure temps. Si visite surveillant circonscription tombe en Mars, bann pionnier auxiliaire pou kapav assisté en entier, reunion ki li faire avek bann pionnier permanent ek special. Comparé ar bann l’année avant, sa l’année-la, campagne l’invitation pou invite bann dimoune pou assisté Mémorial ki pou celebré Mardi 26 Mars 2013, pou pli longue. Li pou commencé 1er Mars. En plus, Mars ena cinq week-end. Alors, eski ou kapav examine ou situation pou guetté si ou kapav faire sa mois-la vinn mois pli special dan l’année?
3. Couma nou kapav organise nou pou augmente nou ministere?
3 Organise-ou Asterla-mem: C’est asterla-mem ki ou bizin examine ou programme pou guetté ki bann changement ou bizin faire pou faire pionnier. Li important ki la famille cooperé, alors, pendant l’Adoration en Famille prend le temps pou discute lor bann l’objectif ki ou famille kapav fixé ek faire enn programme. (Prov. 15:22) Si ou pa kapav faire pionnier auxiliaire, pa decouragé. Eski ou kapav change ou programme pou ou kapav preche pli longtemps bann jour ki ou sorti? Eski ou kapav preche enn jour en plus dan la semaine?
4. Ki bann bienfait nou pou gagné kan nou augmente nou l’activité en Mars, Avril, ek Mai?
4 Kan nou pou augmente nou l’activité en Mars, Avril, ek Mai, nou pou aussi augmente la joie ek satisfaction ki nou gagné kan nou servi Jéhovah ek aide lezot. (Jean 4:34; Actes 20:35) Seki pli important, sa bann grand zeffort ki nou pou faire-la, pou faire Jéhovah content.—Prov. 27:11.