Annonce bann grand qualité ki Jéhovah ena
1. Ki pousse nou pou annonce bann grand qualité Jéhovah?
1 “Ah Jéhovah, grandeur, puissance, beauté, superiorité ek dignité, zot pou toi; parski tou seki dan le ciel ek lor la terre pou toi.” (1 Chron. 29:11) Couma eski nou l’amour ek nou reconnaissance pou Jéhovah influence nou? Sa pousse nou pou ‘annonce bann grand qualité sa kikenn ki finn appel nou pou tire nou dan noirté ek finn faire zot vinn dan so la-lumiere extraordinaire-la.’ (1 Pierre 2:9) Nou pa kapav arrete koz avek lezot concernant nou grand Bondié! Nou pou ena bann bon l’occasion pou annonce bann grand qualité ki Jéhovah ena pendant bann mois mars, avril ek mai.
2. Ki campagne special inn organisé pou invite bann dimoune pou Mémorial, ek kisannla kapav participe dan sa campagne-la?
2 Campagne special pou annonce Mémorial: Nou pou attire l’attention lor bann grand qualité ki Jéhovah ena kan nou pou celebré repas nou Seigneur, lundi le 2 avril. Nou pou distribué enn l’invitation special dan le monde entier a partir le 17 mars ziska le 2 avril. Nou tou nou encouragé pou participé autant ki nou kapav. Sa li pou donne bann nouveau enn bon l’occasion pou commence preche la bonne nouvelle si zot rempli bann condition. Si ou ena bann l’etude ou-soit bann zenfant ki kitfois rempli bann condition ki bizin, ou kapav al koz avek bann ancien.
3. Ki nou kapav dire kan nou pé invite bann dimoune pou Mémorial?
3 Sa campagne-la pou pareil couma campagne ki nou ti ena pou l’assemblée district: “Delivrance pé approché!” Bann congregation pou gagne assez l’invitation pou ki chaque proclamateur kapav gagne 25 copie ek chaque pionnier kapav gagne 150 copie. Ou presentation bizin courte, kitfois ou kapav dire: “Sa c’est ou l’invitation pou enn l’evenement important ki celebré toulé-l’année. Nou pou bien content pou trouve ou. Ou pou gagne bann detail lor l’invitation-la.” Bien-sur, si dimoune-la pose bann question, prend le temps pou reponn li. Sujet lor Repas nou Seigneur ki ena dan l’appendice livre Ki la Bible enseigné? page 206 kapav aide nou pou faire sa. Pendant week-end, nou pou offert bann magazine ensam avek sa l’invitation special-la. Note tou dimoune interessé ki ou joinde, ek prend bann disposition pou revisite zot.
4. Couma eski pou distribué bann l’invitation special pou Mémorial?
4 Si possible, nou bizin quitte sa l’invitation special-la dan la main dimoune-la. Alors note bann absent ek organise-ou pou retourné plitar. Si bann congregation ena enn bon quantité l’invitation ki resté, zot kapav laisse enn copie kot bann dimoune ki absent pendant dernier semaine avant Mémorial, mais pa avant sa. Assure-ou ki ou bann visite, ou bann l’etude, ou bann famille, ou bann collegue travail, ou bann voisin ek lezot connaissance aussi gagne enn l’invitation.
5. Kifer nou bizin commence organise-nou depuis asterla-mem pou faire pionnier auxiliaire?
5 Faire pionnier auxiliaire: Eski ou kapav annonce bann grand qualité ki Jéhovah ena encore plus kan ou faire pionnier auxiliaire en mars, avril ek mai? Pou ou kapav faire pionnier auxiliaire ou pou bizin faire bann changement dan ou program toulé-jour. (Éph. 5:15-17) Ou kapav sur ki si ou faire enn zeffort pou faire plus dan service Jéhovah, ou pou gagne la joie ek aussi benediction Jéhovah. (Prov. 10:22) Parski lepok Mémorial pé kosté, c’est asterla ki ou bizin commence organise-ou.—Prov. 21:5.
6. Ki nou kapav aprann ar l’experience enn soeur 90 an ki ti faire pionnier auxiliaire l’année passé?
6 Enn soeur 90 an ti gagne l’occasion faire pionnier auxiliaire l’année passé. Li ti dire: “Mem si mo vrai-mem content occupe mo jardin ek mo ti envie commence planté, mo ti realisé ki mo ti bizin decidé ki mo bann priorité. Mo ti ena desir pou mette bann l’interet Royaume Bondié en premier, alors mo’nn decidé pou faire pionnier auxiliaire en mars.” Eski sa soeur-la ti gagne bann benediction pou so bann zeffort? Li dire: “Mo senti ki mo vrai-mem forme partie dan la congregation ek sa inn rapproche moi ar Jéhovah.” Eski nou kapav analyse nou bann priorité ek faire bann changement pareil couma sa soeur-la?
7. Eski li difficile pou faire pionnier auxiliaire?
7 Kitfois li pa aussi difficile ki ou pé pensé pou faire 50 heure, l’objectif pou bann pionnier auxiliaire. Dan la priere, examine ou bann l’activité toulé-jour, faire enn program ek note sa lor calendrier kot ou ecrire ou bann activité theocratik. Ou konn ou situation personnel plus ki n’importe kisannla. Si ou la-santé pa trop bon ek ou pena assez la-force, kitfois ou kapav participe dan predication zis deux heure-temps par jour. Si ou travail a plein temps ou-soit ou al lekol, ou kapav faire pionnier auxiliaire si ou preché dan tantot ou-soit dan week-end.
8. Ki ti permette enn couple faire pionnier auxiliaire?
8 Beaucoup finn kapav faire pionnier auxiliaire en famille. Dan bann l’année passé, enn couple ti hesité pou rempli forme pionnier parski zot ti pensé ki zot situation pa ti permette zot faire pionnier auxiliaire. Ki zot inn faire? Zot dire: “Nou ti prié Jéhovah pou aide nou faire seki nou ti envie faire ensam depuis longtemps.” Avek enn bon program, zot inn reussi faire pionnier auxiliaire. Ek zot dire: “Sa ti extraordinaire. Nou ti gagne beaucoup benediction ensam. Nou suggestion c’est: essayé. Si nou’nn reussi faire sa, kitfois ou aussi ou pou kapav faire li.”
9. Ki ou kapav faire pendant ou prochain l’etude familial pou prepare-ou pou bann prochain mois kot pou ena enn l’activité special?
9 Kifer ou pa reserve enn lé-temps pendant ou prochain l’etude familial pou guetté couma tou dimoune kapav augmente zot l’activité pendant sa bann prochain mois-la? Mem si tou ou famille pa kapav faire pionnier auxiliaire, kitfois enn membre ladan kapav faire sa avek l’aide ek cooperation tou dimoune dan lakaz. Si sa pa possible, kitfois ou famille kapav fixé l’objectif pou passe plus lé-temps dan predication pendant sa bann mois special-la.
10. Kifer nou bizin koz lor nou desir pou faire pionnier auxiliaire pendant lepok Mémorial avek lezot?
10 Aide-zot entre zot: Kan nou ena l’enthousiasme, nou kapav pousse lezot pou ena mem l’attitude. Koz lor ou desir pou faire pionnier avek lezot. Sa kapav encourage lezot pou rempli zot forme zot aussi. En plus, bann ki’nn faire pionnier dan le passé kapav donne ou bann suggestion ki pou aide ou pou organise-ou ek etabli enn program ki pou aide ou gagne 50 heure. (Prov. 15:22) Service pionnier auxiliaire, li enn l’activité ki faire gagne la joie. Si ou kapav faire pionnier auxiliaire, kifer ou pa invite enn lot proclamateur, kitfois enn kikenn ki dan mem situation ki ou, pou faire sa l’activité-la ensam avek ou?
11. Couma eski bann ancien kapav crée l’enthousiasme pou service pionnier auxiliaire pendant bann prochain mois?
11 Beaucoup ancien prend bann disposition necessaire pou zot kapav participe dan sa forme service special-la. (Héb. 13:7) Sa li vrai-mem enn l’encouragement pou la congregation! Bann ancien crée aussi enn l’enthousiasme par bann conversation ki zot ena avek lezot. Dé-trois parole l’encouragement ou-soit certain suggestion pratik, kitfois c’est sa-mem ki certain proclamateur bizin pou zot faire pionnier auxiliaire. Surveillant service pou surement organise lezot rendez-vous predication pou ki tou bann proclamateur kapav preché, mem apré travail ou-soit apré lekol. Fodé annonce sa bann rendez-vous special-la regulierement. Surveillant service pou aussi assure-li ki ena assez territoire ek assez publication.
12. Ki ou kapav faire si li pa possible pou ou faire pionnier auxiliaire?
12 Mem si ou situation pa permette ou faire pionnier, ou kapav encourage bann ki’nn prend sa service-la ek ou kapav prié pou zot. (Prov. 25:11; Col. 4:12) Kitfois ou kapav prend bann disposition pou preché ensam avek zot encore enn lot jour pendant la semaine ou-soit preche inpé plus ki seki ou habitué.
13. Ki l’objectif inn fixé pou nou bann l’île, ek couma eski ou congregation kapav aidé pou reussi arrive sa chiffre-la?
13 L’objectif 750 pionnier auxiliaire en avril: Maximum pionnier auxiliaire ki nou’nn deja gagné pou nou bann l’île, li ti en avril 2001 kan nou ti gagne 696 pionnier auxiliaire. Alors l’objectif realiste pionnier auxiliaire ki nou kapav fixé pou mois avril, li coumsa: la Réunion 430, Maurice 250, Seychelles 40, Mayotte 20 ek Rodrigues 10. Nou kapav arrive sa chiffre-la si dan chaque congregation, en moyenne 1 proclamateur lor chaque 5 proclamateur faire pionnier auxiliaire. Bien-sur, dan certain congregation pou ena encore plus proclamateur ki zot situation permette zot faire pionnier auxiliaire. Pou la plupart congregation, li pa pou difficile pou arrive sa chiffre-la. Mazinn sa l’ambiance ki sa pou crée dan ou congregation ek l’effet positif ki sa pou ena lor travail predication dan ou territoire!
14. Kifer mois avril, li enn bon mois pou faire pionnier auxiliaire?
14 Kifer eski avril li enn bon mois pou faire pionnier auxiliaire? Mémorial pou tombe dan commencement mois avril ek sa pou donne nou beaucoup l’occasion pou visite bann ki’nn assisté Mémorial. Nou pou offert bann periodik avek l’objectif pou place livre Ki la Bible enseigné? kan nou faire bann nouvelle visite, ek pou commence bann l’etude. Alors si nou faire pionnier auxiliaire en avril, nou pou gagne beaucoup l’occasion pou commence bann l’etude. Ena cinq dimanche dan mois avril ek en plus pou ena deux semaine vacance lekol. Alors li pou pli facile pou bann ki travail ou-soit ki al lekol pou faire pionnier.
15. Alors ki lepok Mémorial pé kosté, kifer nou bizin garde dan nou l’esprit ki la fin bien pré?
15 Chaque lepok Mémorial ki passé rapproche nou enn an avek la fin sa system-la. Le temps ki nou ena pou faire lezot konn nou grand Bondié, li pé diminué. (1 Cor. 7:29) Enn fois ki sa lepok Mémorial ki pé vini-la pou fini passé, jamais nou pa pou retrouve sa bann bon l’occasion ki sa lepok-la ti donne nou pou loué nou Papa ki dan le ciel. Anou prepare-nou asterla-mem pou nou faire tou seki nou kapav pendant mois mars, avril ek mai pou nou annonce bann grand qualité ki Jéhovah ena!
[L’encadré page 4]
Eski nou kapav gagne 750 pionnier auxiliaire en avril?
◼ Analyse ou bann priorité
◼ Discute ou bann l’objectif en famille
◼ Koz ar lezot lor ou bann projet