Prese ek Donn enn Temwaynaz Konple

¹ Kuma “enn gid ek enn komandan,” Zezi ti prepar so bann disip pu sa gran travay predikasyon ki ti pe atann zot devan la. (Izai 55:4; Lik 10:1-12; Akt 1:8) Lapot Pyer ti dekrir misyon ki Zezi ti donn zot par sa bann parol la: “Li finn usi donn nu lord pu pres ar bann dimunn ek pu donn enn temwynaz konple, pu fer kone ki limem sa Kikenn ki finn etabli par Bondye pu ziz bann vivan ek bann mor.” (Akt 10:42) Ki vedir donn enn temwaynaz konple?

² Nu kapav aprann buku ar legzanp lapot Pol. Kan li ti reyni avek bann ansyin kongregasyon Efez, li ti rapel zot sa: “Mo pa finn anpes mwa anons zot tu bann kitsoz ki ti profitab, ni pu anseyn zot an piblik, ek lakaz-lakaz. Me, ar bann Zwif ek Grek tulede, mo finn donn enn temwaynaz konple lor linportans pu repanti devan Bondye ek pu ena lafwa dan nu Senyer Zezi.” Malgre bann leprev ki li ti kone limem, Pol ti fer tu so posib pu pres labonn nuvel ar enn maximem dimunn. Li pa ti kontant li pu partaz ar so bann oditer selman detrwa lanseynman debaz lor laverite. Non, li ti dir zot “tu seki Bondye ena lintansyon pu fer.” Pu sa, li ti dispoze pu fer zefor ek bann sakrifis. Pli lwin, li dir: “Mo lavi pena okenn valer pu mwa. Seki kont, se fini mo lekurs ek minister ki mo finn gayne ar Senyer Zezi, setadir rann enn temwaynaz konple lor bon nuvel faver Bondye.”—Akt 20:20, 21, 24, 27.

³ Kuma eski nu kapav imit legzanp Pol zordi? (1 Kor. 11:1) Dabor, se kan nu rod bann dimunn ek bann fami sinser malgre ki nu ena nu prop difikilte. Answit, se kan nu fer zefor pu pres avek tu dimunn, ninport ki zot ras ek lang ki zot koze, ek finalman, se kan nu ed bann dimunn interese san tarde. (Mat. 10:12, 13) Byinsir, sa demann letan, zefor ek lamur pu bann dimunn.

⁴ Eski U Kapav Fer Pyonye Oxilyer? Mars ek Avril kapav bann bon lokazyon pu u fer pyonye oxilyer. Li ti vremem ankurazan lane pase pu truv sa kantite proklamater ki ti fer pyonye oxilyer la!

⁵ Enn ser 80 an ti santi li motive par lankurazman ki lorganizasyon Zeova ti done. Li’nn ekrir: “Sa finn ogmant dezir ki mo ti ena dan mo leker. Mo’nn santi ki mo ti pu bizin fer pyonye oxilyer omwin enn fwa ankor.” Ser la ti desid pu fer pyonye an Mars. Li kontiyn rakonte: “Premye kitsoz ki mo ti fer se asize ek kalkil byin. Mo ti koz sa ar mo tifi, parski mo ti pu bizin so led. Me sirpriz! Li usi li’nn ranpli enn demann pu fer pyonye.” Pandan sa mwa la, sa ser aze la ti pas 52 ertan dan so servis. “Kan mo ti santi mo kuraz kit mwa, plizir fwa mo’nn priye Zeova pu Li renuvle mo lafors. Kan finn ariv lafin dimwa, mo ti byin ere ek satisfe. Mo’nn remersye Zeova plizir fwa pu so led. Mo ti pu kontan sey sa ankor enn ku.” Sa zoli lexperyans la kapav ankuraz lezot ki anvi vremem fer pyonye oxilyer malgre zot bann problem lasante.

⁶ Enn frer ti perdi so travay san ki li ti atann. Li’nn profit sa sityasyon la pu fer pyonye oxilyer. Pandan sa mwa ki li’nn fer pyonye la, li’nn santi so zel pu travay predikasyon plis ogmante. Ver lafin sa mwa la, li finn kumans enn letid Labib. Kan li reflesi lor so lexperyans, frer la dir: “Sa ti vremem enn zoli mwa!” So lazwa ti byin gran parski Zeova ti gid li ek ti ed li. Wi, Zeova inn byin beni li pu sa zefor anplis ki li’nn fer dan so minister ek Li pu beni u’si parey.—Mal. 3:10.

⁷ Pu buku proklamater, li difisil pu fer pyonye oxilyer. Me mem sa, enn kantite frer ek ser finn reysi malgre zot travay, zot bann responsabilite familyal ek bann lezot problem personel. Pu donn enn temwaynaz konple, suvan nu bizin sakrifye nu letan ki limite ek nu lenerzi. Me, anretur nu gayn bann rekonpans vremem extraordiner.—Pro. 10:22.

⁸ Mars ek Avril zot bann mwa ideal pu fer pyonye oxilyer. Ena sink wikenn an Mars. Donk, sertin ki travay kapav fer pyonye si zot profit sa sink wikenn la ek bann sware. U kapav profit usi sa de konze piblik ki pu ena an Avril la. Bann zenn kitfwa pu an vakans ek sertin kapav pran konze dan zot travay pu zot gayn zot 50 ertan. Dan lankadre sa lartik la, finn donn diferan program ki kapav swiv pu gayn 50 ertan an Mars uswa an Avril. Eski u kapav servi enn program ladan? Diskit u program avek lezot; sirman sa kapav ankuraz zot pu fer pyonye zot usi. Si u pa kapav fer pyonye, fixe enn lobzektif presi pandan sa de mwa la, ek sutenir bann ki kapav fer pyonye. Organiz u depi asterla mem pu u pres plis an Mars ek Avril.

⁹ Montre U Rekonesans pu Memoryal: Tulelane, pandan lepok Memoryal buku montre zot rekonesans pu sakrifis ki Zezi inn ofer an ranson pu nu. Zot “reaste letan” pu fer pyonye oxilyer. (Efe. 5:15, 16) Dan tu bann zil ki anba nu filyal, lane pase ti ena 579 pyonye oxilyer an Mars ek 234 an Avril. (Pu Moris selman, ti ena 157 pyonye an Mars ek 70 an Avril.) Pu sa de mwa la, sa ti reprezant enn mwayenn 406 pyonye. Sa sif la vremem byin for kan nu konpar li avek 167, mwayenn bann lezot mwa dan sa mem lane servis la. Pu Moris selman, li ti 40. Pandan sa lepok Memoryal la usi, nu pu ena ankor enn bon lokazyon pu montre nu rekonesans pu sa ranson la. Nu pu montre sa rekonesans la kan nu pu partisip plis dan predikasyon.

¹⁰ Amezir ki le 16 Avril aprose, reflesi kuma Memoryal tus u personelman. Pans bann evennman ki ti amenn ziska lamor Zezi Kris. Reflesi lor tu seki ti pe pez lur lor so lespri ek so leker sa ler la. Medit usi lor lazwa ki ti plase devan li ek kuma sa finn ed li pu siport tu so bann sufrans. Panse kuma asterla, antan ki Sef kongregasyon, li pe diriz travay predikasyon ek travay fer bann disip. (1 Kor. 11:3; Ebre 12:2; Rev. 14:14-16) Lerla, montre u rekonesans pu tu seki Kris inn fer. Kuma? Se kan u partisip plin-plin dan travay predikasyon, dapre seki u sityasyon permet u.

¹¹ Ankuraz Lezot pu Donn enn Temwaynaz Konple: Bann ansyin ek bann serviter ministeryel pu ena enn bon lokazyon pu ankuraz lezot manb kongregasyon kan zotmem zot fer pyonye oxilyer. Kan zot pres avek bann proklamater ek kan zot fer bann vizit pastoral, se bann bon lokazyon pu ed lezot pu partisip plin-plin dan sa laktivite spesyal la. Nu tu, anu koz sa dan lapriyer avek Zeova. Kumsa, nu pu met nu zefor ansam pu donn enn temwaynaz konple.

¹² Byinsir, tu bann ansyin ek bann serviter ministeryel pu travay an armoni avek bann dispozisyon ki kongregasyon pu pran pu pres plis pandan mwa Mars ek Avril. Me, se sirtu sirveyan servis ki bizin plis konserne; li pu bizin organiz bann sorti predikasyon. Li pu bizin swazir bann landrwa kot kapav fer bann reynion pu predikasyon. Li pu bizin usi fixe bann zur ek bann ler ki pu pli pratik pu mazorite proklamater. Apre, pu bizin anons sa bann dispozisyon la plizir fwa dan bann Reynion Servis. Kapav fixe bann randevu predikasyon dan diferan ler pandan lazurne. Kumsa, tu bann proklamater kapav gayn lokazyon pu partisip dan diferan form temwaynaz. Zot pu kapav pres dan bann landrwa komersyal, lor lari, lakaz-lakaz, fer bann vizit, uswa pres par telefonn. Pa fini, sirveyan servis pu bizin fer sir ki ena ase piblikasyon, peryodik, ek teritwar pandan sa bann mwa la.

¹³ An Mars, nu pu ofer liv Konesans, avek lobzektif pu kumans bann letid Labib. Dan sipleman Nu Minister DiRwayom Zanvye 2002, ena bann bon sigzesyon lor fason pu prezant liv Konesans. An Avril, nu pu ofer Latur Degard ek Réveillez-vous ! Sey servi bann model prezantasyon ki ena dan parti “Kuma pu Prezant Bann Peryodik.” Tu dimunn bizin pran letan pu prepar li byin pu donn enn temwaynaz konple.

¹⁴ Li vremem enn gran lazwa pu travay anba direksyon Kris Zezi, Sef kongregasyon ek pu ena privilez pu partaz labonn nuvel ar lezot! Amezir ki mwa Mars ek Avril pe koste, ankor enn fwa anu fer zefor pu sa de mwa la vinn nu bann pli meyer mwa ki ena. Nu pu reysi fer sa si nu obeir lord ki Kris inn donn nu pu al prese ek pu donn enn temwaynaz konple.

[Lankadre lor paz 3]

Diferan Program pu Fer Pyonye Oxilyer an Mars ek Avril 2003

Zur Lertan

Lindi 1 2 — — 2 —

Mardi 1 — 3 — — —

Merkredi 1 2 — 5 — —

Zedi 1 — 3 — — —

Vandredi 1 2 — — — —

Samdi 5 4 3 5 6 7

Dimans 2 2 3 2 2 3

Mars 56 56 54 55 50 50

Avril 50 50 51 53 —

Eski enn dan sa bann program la kapav marse pu u?