“Pres Parol Bondye Plin-Plin”

¹ Kan u sinserman rekonesan pu enn bon kitsoz ki u finn gayne, eski u pa montre sa par u latitid ek u bann aksyon? Byinsir! Get kuma lapot Pol ti reazir akoz bonte ek lamur fidel ki Zeova manifeste anver limanite. Li ti dir: “Dir Bondye mersi pu so don gratis ki pa kapav dekrir”! Ki sa “don gratis” la inplike? Tu “faver extraordiner Bondye ki nu pa merite” ki Li finn montre anver nu. Ek pli gran fason ki Li’nn fer sa se kan Li’nn fer don so prop Garson kuma enn ranson pu nu bann pese.—2 Kor. 9:14, 15; Zan 3:16.

² Eski bann parol remersiman Pol ti zis bann koze anler-anler? Pa ditu! Li’nn montre so profon rekonesans dan buku fason. Li ti byin interese ar byinet spirityel so bann frer Kretyin ek li ti anvi fer seki li ti kapav pu ed zot pu tir ful profi ar lamur fidel Zeova. Konsernan sa bannla, Pol ti dir: “Parski nu ena lafeksyon pu zot, nu ti byin kontan, pa pu zis anons zot labonn nuvel Bondye, me usi pu donn nu prop nam, parski zot ti vinn bann byineme pu nu.” (1 Tes. 2:8) Apart ed bann ki ti deza fer parti dan kongregasyon pu asir zot delivrans, Pol finn pres labonn nuvel san bes lebra; li’nn vwayaz bann milye kilomet ater ek lor lamer pu rod bann “ki ti dan dispozisyon ki bizin pu viv pu tuletan.” (Akt 13:48) Profon rekonesans ki Pol ti ena pu tu seki Zeova ti finn fer pu li finn pus li “pu pres parol Bondye plin-plin.”—Kol. 1:25.

³ Eski nu rekonesans pu tu seki Zeova finn fer pu nu pa pus nu pu ed bann ki bizin led lor plan spirityel dan nu kongregasyon? (Gal. 6:10) Eski nu pa santi nu motive pu partisip plin-plin dan predikasyon labonn nuvel lor Rwayom partu dan nu teritwar?—Mat. 24:14.

⁴ Enn Lokazyon pu Montre Rekonesans: Sak lane, Memoryal lamor Kris donn nu enn lokazyon spesyal pu montre rekonesans pu seki Zeova ek Zezi finn fer pu nu. Memoryal pa sinpleman enn lot reynion kuma lezot uswa enn sinp selebrasyon pu rapel nu enn levennman. Zezi ti dir: “Kontiyn fer sa an mo memwar.” (Lik 22:19) Memoryal lamor Kris li enn lokazyon pu medit lor ki kalite dimunn Zezi ete. Li enn lokazyon pu rekonet ki zordi Zezi vivan ek aktif. Li ena laglwar ek lotorite enn lerwa, ki Bondye finn donn li an rekonpans pu so lavi fidel ek so sakrifis. Sa selebrasyon la li enn lokazyon usi pu montre ki nu sumet ar lotorite Kris pwiski limem ki diriz bann aktivite kongregasyon Kretyin. (Kol. 1:17-20) Par respe pu Memoryal lamor Kris tu bann serviter Bondye bizin prezan pu sa levennman la. Sa lane la li pu tom Zedi, le 28 Mars, 2002 apre kuse soley.

⁵ Lane pase, grasa bann gro zefor ki ti fer avan Memoryal, nu ti gayn enn lasistans maximem 9,688 dan tu bann zil ki anba nu filyal. Ki lasistans nu pu gayne sa lane la? Tu pu depann lor seki nu pu fer, si nu pu “travay dir ek fer zefor” pu ed maximem dimunn posib pu asiste sa levennman la.—1 Tim. 4:10.

⁶ Apart asiste Repa Diswar Senyer, kitfwa nu kapav usi ogmant nu laktivite predikasyon. Sirman, plizir dizenn milye frer ek ser pu pyonye oxilyer pandan enn mwa uswa plis. Pu Moris, pandan sa sink dernye lane la, finn ena enn mwayenn 165 pyonye oxilyer par an pandan lepok Memoryal, dan bann mwa Mars ziska Me. Eski u kapav organiz u pu gut lazwa servis pyonye oxilyer sa lane la? Sa pu enn bon fason pu montre u rekonesans sinser pu dispozisyon ranpli ar lamur ki Bondye finn pran, setadir sakrifis Zezi Kris. U kapav sir ki u pu gayn benediksyon Zeova, kuma sa detrwa lexperyans la montre.

⁷ Enn ser ki travay finn ekrir lexperyans ki li’nn fer mwa Mars lane dernyer kan li ti pyonye oxilyer: “Nu Minister DiRwayom Fevriye 2001 ti ankuraz tu bann ki zot sityasyon permet pu fer pyonye oxilyer pandan lepok Memoryal. Pwiski ti ena sink Samdi an Mars, sa ti aranz mwa byin. Alor mo’nn deside pu ranpli mo form pyonye.” Kuma li’nn kumans sa mwa la, li finn fixe lobzektif pu kumans enn letid Labib. Eski li’nn reysi? Wi, dan so 52em lertan temwaynaz sa mwa la! Ki so konklizyon? “Nu gayn bann benediksyon extraordiner kan nu fer zefor anplis.”

⁸ Ki bann byinfe enn fami gayne kan tu so bann manb fer pyonye ansam? Tulekat manb enn fami ti fer pyonye oxilyer Avril lane dernyer, ek pu zot sa pu res tuletan enn mwa memorab. Mama la dir: “Tulezur, nu ti ena enn letadespri pozitif, pwiski nu ti ini ansam dan nu minister! Aswar, dan ler dine, nu ti pas bann bon moman pwiski nu ti rakont nu lazurne dan servis.” Garson la dir: “Mo finn kontan pu travay avek mo papa dan predikasyon pandan lasemenn, parski normalman lasemenn li travay.” Papa la azute: “Antan ki sef fami, mo’nn resanti enn satisfaksyon pwiski mo ti kone ki nu ti pe travay ansam dan laktivite pli inportan ki kapav ena dan nu lepok.” Eski u fami kapav fer pyonye ansam? Kifer eski u pa diskit an fami pu gete si tu dimunn kapav fer pyonye oxilyer pandan lepok Memoryal?

⁹ Eski Nu Kapav Fer Mars Vinn Nu Mwa Pli Spesyal? Dan kumansman lane 2000, Nu Minister DiRwayom ti poz sa kestyon la: “Eski nu kapav fer Avril 2000 vinn nu mwa pli spesyal?” Ki reaksyon ti ena? Ti gayn plizir nuvo maximem. Dan nu bann zil, pu premye fwa ti ena enn maximem 409 pyonye oxilyer pu sa sel mwa la. Anplis, nu ti ena bann nuvo maximem dan kantite ler, peryodik ek bann vizit. Eski u ankor rapel lantuzyas ki ti ena dan u kongregasyon grasa lelan laktivite spirityel pandan sa mwa spesyal la? Eski nu kapav fer parey uswa mem fer plis sa lane la? Si nu tu nu fer zefor ansam, Mars 2002 kapav vinn “Nu Mwa Pli Spesyal.” Me, kifer Mars?

¹⁰ Ena de rezon kifer Mars bizin enn mwa laktivite spesyal. Dabor, Memoryal pu tom dan lafin Mars, donk nu pu ena ful lokazyon depi kumansman mwa mem, pu invit otan dimunn ki posib pu asiste sa selebrasyon la. Dezyeman, sa lane la Mars ena sink wikenn, alor li pu pli fasil pu bann ki travay uswa al lekol fer pyonye oxilyer. Kifer eski asterla mem u pa asize ek u pa fer enn program pratik avek led sa kalandriye ki ena dan sipleman la? Fer pyonye oxilyer kapav pli fasil ki u panse. Par egzanp, si u fixe enn lobzektif 8 ertan predikasyon pandan sa sink wikenn la, u pu bizin rod zis 10 ertan pandan leres zur lasemenn pu gayn 50 er.

¹¹ Ki bann ansyin kapav fer pu ed tu proklamater dan kongregasyon pu “pres parol Bondye plin-plin”? Par mwayin bann size dan reynion ek bann konversasyon personel, fer bann proklamater devlop lintere pu sa laktivite la. Bann kondikter Letid Liv kongregasyon ek zot adzwin kapav fer premye pa pu koz avek sakenn dan zot grup ek ofer pu ed zot personelman. Detrwa parol lankurazman uswa detrwa sigzesyon pratik kapav samem ki zot bizin. (Pro. 25:11) Buku pu truve ki avek detrwa ti sanzman dan zot program, zot kapav gut privilez servi kuma pyonye oxilyer. Dan buku kongregasyon, preske tu bann ansyin ek serviter ministeryel ek zot madam finn donn enn bon legzanp kan zot finn fer pyonye oxilyer ansam pandan lepok Memoryal. Sa finn ankuraz enn kantite proklamater pu imit zot. Akoz bann andikap fizik uswa enn move lasante, uswa bann lezot sirkonstans ankor, sertin proklamater pa kapav fer pyonye. Me, kapav ankuraz zot pu fer otan ki zot kapav dan minister avek leres manb kongregasyon, ek kumsa zot usi zot pu montre zot rekonesans.

¹² Bann bon rezilta depann lor enn bon lorganizasyon par bann ansyin. Bizin organiz bann reynion predikasyon dan bann ler pratik tutlong lasemenn. Si posib, sirveyan servis pu swazir bann frer kalifye an avans pu diriz tu sa bann reynion predikasyon la. Bann frer la bizin byin prepar zot pu ki bann reynion la dir ant 10-15 minit. Ladan mem bizin fini organiz bann grup, dir dan ki teritwar pu prese, ek fer lapriyer. (Get Kestyon Ki Suleve dan Nu Minister DiRwayom Septam 2001.) Bizin explik kongregasyon klerman program laktivite pu sa mwa la ek apre met program la lor tablodafisaz.

¹³ Bizin fer sir ki ena ase teritwar. Sirveyan servis bizin reyni avek frer ki responsab bann teritwar pu pran bann dispozisyon pu kuver bann teritwar ki pa fer suvan. Bizin sirtu ankuraz bann proklamater pu vizit bann absan, donn temwaynaz lor lari ek dan bann magazin, ek usi pu prese an sware. Si li pratik, kapav ed detrwa proklamater pu donn temwaynaz par telefonn.

¹⁴ Ed Zot pu Rekumans Prese: Eski ena sertin dan teritwar u kongregasyon ki nepli aktif dan predikasyon labonn nuvel? Sa bannla tuzur fer parti dan kongregasyon ek zot bizin led. (Psom 119:176) Pwiski lafin sa vye lemond la pe koste telman vit ek nuvo lemond zis devan nu, nu ena bann bon rezon pu fer tu zefor ki nu kapav pu ed sa bann ki nepli aktif la. (Rom. 13:11, 12) Dan nu bann zil, pandan sa trwa dernye lane la, plis ki 204 proklamater finn aksepte led ek zot finn revinn aktif. Ki nu kapav fer pu ed lezot ankor pu fer reviv lamur ek konfyans ki zot ti ena dan kumansman?—Ebre 3:12-14.

¹⁵ Sirman, kolez ansyin pu gete kuma zot kapav ed sa bann ki’nn vinn inaktif pandan sa detrwa dernye lane la. (Mat. 18:12-14) Sekreter bizin verifye bann Kart Proklamater ek not bann ki finn vinn inaktif. Atraver vizit pastoral, bann ansyin bizin fer enn zefor spesyal pu donn led. Enn ansyin kapav vizit enn proklamater an partikilye kitfwa parski li ti deza konn li ek li abitye ar li, me sinon kapav demann bann lezot proklamater pu ede. Kitfwa ena proklamater ki ti etidye avek sa dimunn ki inaktif asterla la. Sirman proklamater la ti pu kontan pu donn enn led spesyal dan sa moman ki dimunn la pli bizin. Nu espere ki buku parmi bann ki’nn vinn inaktif pu motive pu rekumans pres parol Bondye. Si zot ranpli bann kondisyon, pena okenn meyer moman pu kumanse apart lepok Memoryal!—Get Kestyon Ki Suleve dan Nu Minister DiRwayom Novam 2000 pu plis detay.

¹⁶ Eski Lezot Ranpli Bann Kondisyon pu Prese? Zeova kontiyn beni so pep kan Li amenn “bann kitsoz dezirab ki sorti dan tu bann nasyon.” (Agai 2:7) Tulelane plizir milye dimunn pe ranpli bann kondisyon pu vinn bann proklamater pa batize. Kisannla zot ete? Bann zanfan bann Temwin Zeova ek usi bann etidyan Labib ki pe progrese. Kuma eski nu kone si zot kalifye pu vinn proklamater labonn nuvel?

¹⁷ Bann Zanfan Temwin Zeova: Buku zanfan pe akonpayn zot paran lakaz-lakaz depi plizir lane, mem si zot pankor vinn proklamater. Kitfwa mwa Mars pu enn bon moman pu zot kumanse. Kuma eski u kone si u zanfan ranpli bann kondisyon? Paz 101 dan liv Organisés pour bien remplir notre ministère reponn: “Kan enn zanfan ena enn bon kondwit ek li kapav exprim so lafwa avek tu so leker letan li koz labonn nuvel ar lezot.” Si u panse u zanfan ranpli bann kondisyon, koz avek enn ansyin dan Komite Servis Kongregasyon.

¹⁸ Bann Etidyan Labib Ki Ranpli Bann Kondisyon: Apre ki enn etidyan finn gayn konesans Labib ek li pe asiste bann reynion depi inpe letan, li kapav demann pu vinn enn proklamater Rwayom. Si u pe fer letid avek enn dimunn ki dan sa sityasyon la, reflesi lor sa bann kestyon la: Eski li pe fer progre, dapre so laz ek so kapasite? Eski li’nn kumans fer lezot konn so lafwa dan temwaynaz okazyonel? Eski li pe devlop enn “nuvo personalite”? (Kol. 3:10) Eski li ranpli bann kondisyon pu vinn enn proklamater ki pa batize, parey kuma explike dan liv Notre ministère paz 98-100? Si wi, u bizin kontakte Komite Servis Kongregasyon ki pu pran bann dispozisyon pu ki de ansyin gayn enn konversasyon avek u ek etidyan la. Si li ranpli bann kondisyon, de ansyin la pu fer li kone ki li kapav kumans partisip dan minister piblik.

¹⁹ Me Ki Nu Pu Fer dan Mwa Avril ek Me? Sa de mwa la usi pu bann mwa spesyal pu ogmant nu aktivite dan minister. Buku parmi bann ki pu pyonye oxilyer an Mars kapav kontiyn zot servis pandan Avril ek/uswa Me. Pandan Avril ek Me, nu pu donn pryorite prezantasyon Latur Degard ek Réveillez-vous ! dan predikasyon. Bann dimunn ki lir sa bann peryodik la finn tir vremem buku profi! Sa bann peryodik la finn zwe enn gran rol dan lakrwasman extraordiner ki nu pe gayne dan lemond antye. Pandan Avril ek Me, nu pu fer enn zefor spesyal pu prezant peryodik ar maximem dimunn posib. Depi asterla mem, fer enn program pu partisip plin-plin dan sa laktivite la.

²⁰ Pwiski pu ena enn gran laktivite predikasyon, eski u pu bizin ogmant kantite peryodik ki u pran dan kongregasyon? Tutlong lane servis, nu prezant Latur Degard ek Réveillez-vous ! sak Samdi, dan nu Zurne Peryodik. Me, pwiski buku pu fer pyonye oxilyer ek nu tu, nu pu prezant bann peryodik tutlong sa de mwa la, kitfwa li pu neseser ogmant nu komann peryodik dan kongregasyon. Alor, inform frer ki okip peryodik deswit. An mem tan, frer ki okip piblikasyon bizin fer sir ki ena ase trak Eski U Ti Pu Kontan Konn Plis lor Labib? pu tu bann proklamater servi.

²¹ Buku finn exprim zot lapresyasyon pu lartik “Kuma pu Prezant Bann Peryodik” ki paret dan Nu Minister DiRwayom. Eski u aprann sa bann model prezantasyon magazinn la pu profit byin sa dispozisyon la? Kifer eski u pa pran enn ti letan dan u letid Labib familyal sak semenn pu pratik sa bann prezantasyon la?

²² Profit Byin Sa Lepok Memoryal La: Anu partisip plin-plin dan bann aktivite spirityel ki organize pu lepok Memoryal, pu ki kumsa nu montre Zeova, parey kuma lapot Pol, komye nu apresye “so don gratis”. Sa vedir ki nu pu bizin (1) asiste levennman pli inportan dan lane, selebrasyon Repa Diswar Senyer, Zedi, le 28 Mars 2002; (2) ed bann ki’nn vinn inaktif pu fer zot regayn “lamur ki [zot] ti ena dan kumansman” (Rev. 2:4; Rom. 12:11); (3) ed nu bann zanfan ek ninport ki etidyan ki ranpli bann kondisyon pu vinn bann proklamater ki pa batize; ek (4) partisip otan ki posib dan travay predikasyon, ek si posib mem fer pyonye oxilyer an Mars ek dan bann lezot mwa apre.—2 Tim. 4:5.

²³ Nu priye sinserman ki nu tu nu pu partisip plin-plin dan predikasyon labonn nuvel lor Rwayom sa lepok Memoryal la, ek kumsa nu montre ki kantite nu apresye tu seki Zeova finn fer pu nu.

[Lankadre lor paz 6]

Program Predikasyon Personel pu Mars 2002

Dimans Lindi Mardi Merkredi Zedi Vandredi Samdi

1 2

Zurne Peryodik

3 4 5 6 7 8 9

Zurne Peryodik

10 11 12 13 14 15 16

Zurne Peryodik

17 18 19 20 21 22 23

Zurne Peryodik

24 25 26 27 28 29 30

MEMORYAL Zurne Peryodik

APRE KUSE SOLEY

Eski u kapav fer enn program pu gayn 50 er pu u fer pyonye oxilyer an Mars?