‘Anou rann temoignage a fond lor bon nouvelle’
1. Ki bon nouvelle nou ena pou partagé?
1 Dan enn lé-monde kot ena tigit bon nouvelle, nou ena privilege pou “rann temoignage a fond lor bon nouvelle faveur Bondié ki personne pa merité.” (Actes 20:24) Sa vedir ki nou faire bann dimoune koné ki bientot Jéhovah pou remplace sa bann ‘dernier jour-la’ par enn nouveau lé-monde ki juste ek kot “bann kitsoz avant [pou’nn] disparette.” (2 Tim. 3:1-5; Rév. 21:4) Kan sa pou arrivé, nepli pou ena maladie. (Is. 33:24) Bann dimoune ki nou ti content mais ki’nn mort pour sorti dan tombe ek zot pou retrouve zot bann famille ek zot bann camarade. (Jean 5:28, 29) La terre entier pou vinn enn joli paradi. (Is. 65:21-23) Sa c’est zis deux-trois bon nouvelle ki nou bizin partagé!
2. Ki kitsoz pou encourage nou faire plus dan ministere pendant mois mars, avril ek mai?
2 Ou pou gagne bann bon l’occasion pou annonce sa bann bon nouvelle-la pendant mois mars, avril ek mai. En plus, samedi 22 mars, dan le monde entier, pou celebré Mémorial, l’evenement pli important dan l’année. Nou bizin commence prepare-nou pou augmente nou l’activité asterla-mem.
3. Ki kapav aide nou pou augmente l’activité nou famille?
3 Pionnier auxiliaire: Eski ou kapav arrange ou programme pou faire pionnier auxiliaire pendant enn, deux, ou-soit toulé-trois mois? Kifer ou pa prend enn tipé lé-temps pou koz lor la dan ou prochain l’etude familial? Si ena enn bon cooperation, enn ou-soit plusieurs membre dan la famille kapav faire pionnier auxiliaire. (Prov. 15:22) Mentionne sa dan ou la-priere, ek guetté couma Jéhovah pou beni ou bann zeffort. (Prov. 16:3) Mem si personne dan ou famille pa kapav faire pionnier auxiliaire, zot tou kapav fixé bann l’objectif precis pou augmente zot l’activité ek travail ensam avek bann lezot ki kapav faire pionnier.
4. Couma nou kapav arrange nou programme pou faire pionnier auxiliaire si nou ena enn travail a plein temps?
4 Si ou ena enn travail a plein temps, enn bon programme kapav aide ou faire pionnier auxiliaire. Kitfois ou kapav servi ou pause dejeuner pou preché. Ou-soit ou kapav demann enn territoire personnel pré kot ou resté ou-soit pré kot ou travail. Lerla ou pou kapav al preché pendant enn heure-temps ou-soit avant ou apré travail. Ou kapav gagne plus lé-temps dan ou programme si ou renvoye bann activité ki pa important pou enn lot mois ek si ou passe ou week-end entier pou preché. Certain kapav prend enn ou deux jour congé pou preché.
5. Couma ou kapav aide bann ki agé ou ki handicapé pou faire pionnier auxiliaire?
5 Si ou enn dimoune agé ou handicapé ou-soit ki ou pena beaucoup la-force, ou pou kapav faire pionnier auxiliaire si ou passe inpé lé-temps dan ministere toulé-jour. Demann Jéhovah pou donne ou “sa puissance ki plus ki seki normal-la.” (2 Cor. 4:7) Enn soeur ti reussi faire pionnier auxiliaire alors ki li ti ena 106 an! Avek l’aide so bann famille dan la verité ek lezot dan congregation, li ti preche de maison en maison, li ti retourne faire bann nouvelle visite, li ti conduire bann l’etude la Bible, ek li ti participe dan lezot l’aspect so ministere. Li ti apporte so l’aide pou commence dix l’etude la Bible. Li dire: “Kan mo pense sa grand privilege ki mo’nn gagné pou servi couma pionnier auxiliaire-la, mo leker debordé ar l’amour ek reconnaissance pou Jéhovah, pou so Garson, ek pou so l’organisation ki rempli ar l’amour. Mo vrai-mem envie dire ‘merci Jéhovah!’”
6. Couma eski li possible pou bann jeune ki’nn baptisé mais ki encore lekol, pou faire pionnier auxiliaire?
6 Si ou enn jeune ki’nn baptisé ek ki encore lekol, ou aussi ou kapav faire service pionnier auxiliaire. Pareil couma bann ki travail a plein temps, surement ou aussi ou pou bizin servi surtout ou bann week-end pou ou kapav preché. Kitfois certain jour ou kapav al preché apré lekol pendant enn heure-temps. Eski ena enn jour congé kot ou kapav profité pou al preché? Si ou envie faire pionnier auxiliaire, koz sa avek ou bann parent.
7. Ki bann ancien kapav faire pou encourage l’enthousiasme pou predication pendant lepok Mémorial?
7 Encourage l’enthousiasme: Bann ancien kapav faire beaucoup par zot l’exemple pou encourage l’enthousiasme dan la congregation. (1 Pierre 5:2, 3) Zot kapav decide pou organise bann lezot reunion predication boner gramatin, apré lekol, ou-soit apré travail. Surveillant service bizin faire sur ki c’est bann proclamateur qualifié ki dirige predication, ek ki ena assez territoire, periodik ek publication pou sa bann mois kot pou ena enn l’activité special-la.
8. Ki nou aprann avek seki enn congregation ti faire?
8 Dan enn congregation, plusieurs mois a l’avance, bann ancien ti commence encourage bann proclamateur pou faire pionnier auxiliaire. Chaque semaine zot ti faire congregation koné comié proclamateur finn approuvé pou vinn pionnier auxiliaire. Sa ti donne l’assurance bann ki ti envie augmente zot service ki zot pou gagne enn bon soutien. Ti organise plus reunion predication boner gramatin ek dan la soirée. Resultat? Ti ena 53 pionnier auxiliaire en avril, preské la moitié congregation!
9. Kifer lepok Mémorial enn bon lepok pou bann ki rempli bann condition, pou commence preche la bonne nouvelle?
9 Aide lezot pou preché: Kan bann nouveau ek bann jeune rempli bann condition pou commence preché, bann proclamateur ki ena plus l’experience kapav invite zot pou preche ensam avek zot. Sa l’occasion-la kapav presenté pendant lepok Mémorial, kan beaucoup proclamateur dan congregation pou augmente zot l’activité. Eski ou ena enn etudiant ki pé faire progré ek ki pé vive en accord avek bann principe juste Jéhovah? Eski ou ena bann zenfant ki pé faire bann bon progré mais ki pankor vinn proclamateur? Si ou etudiant ou-soit ou bann zenfant finn faire ou konn zot desir pou vinn bann proclamateur non-baptisé, ek si ou pensé ki zot rempli bann condition, alors faire enn parmi bann ancien koné. Surveillant-president pou faire l’arrangement pou ki deux ancien discute lor la avek ou ek ou zenfant ou-soit ou etudiant.
10. Ki bann ancien kapav faire pou aide bann inactif?
10 Bann mois ki pé vini pou enn bon l’occasion pou bann inactif recommence zot activité avek la congregation. Bann surveillant l’etude de livre ek lezot ancien bizin faire zeffort pou visite zot ek encourage zot avek amour pou sorti ensam avek zot dan ministere. Si zot inactif depuis longtemps, deux ancien bizin d’abord koz avek zot pou guetté si zot rempli bann condition pou preché.—kmF 11/00 p. 3.
11. Ki pli grand preuve “faveur Bondié”?
11 Prepare-ou pou Mémorial: La ranson c’est pli grand preuve “faveur Bondié ki personne pa merité.” (Actes 20:24) Plusieurs million dimoune ki reconnaissant pou sa disposition-la, pou rassemblé samedi 22 mars apré coucher soleil pou celebré Mémorial la mort Christ. Nou envie invite ek aide tou bann dimoune ki ena enn leker sincere pou assisté sa l’evenement important-la, enn l’evenement ki rann temoignage lor faveur Jéhovah.
12. Kisannla nou bizin invité pou Mémorial?
12 Faire enn la-liste tou bann dimoune ki ou envie invité. Surement dan ou la-liste pou ena ou bann famille, bann voisin, bann collegue travail, bann camarade lekol, bann ki ti etudié longtemps, bann ki pé etudié asterla, ek tou bann lezot dimoune ki ou visité souvent. Si certain parmi ou bann invité ena bann question, ou kapav servi lartik concernant Repas nou Seigneur ki ena dan l’appendice livre Ki la Bible enseigné? page 206-8 pou aide zot. Sa kapav ouvert enn chemin pou commence enn l’etude la Bible parski ou pou gagne l’occasion pou introduire livre ki nou servi pou conduire bann l’etude la Bible.
13. Couma Jéhovah finn beni zeffort deux proclamateur ki ti faire zot enn devoir pou invite lezot pou Mémorial?
13 Lor la liste ki enn soeur ti faire pou invite bann dimoune pou Mémorial, ti ena 48 famille. A chaque fois ki li ti invite enn, li ti mette enn la-croix lor zot nom ek li ti ecrire date ki li ti invite zot. Li ti bien content pou trouve 26 dimoune ki li ti invité vinn Mémorial! Enn frere ki ena enn magasin ti invite enn employé ki avant ti enn pretre. Apré Mémorial, sa missié-la ti dire: “Mo’nn aprann plus kitsoz lor la Bible dan enn heure-temps ki mo’nn aprann dan l’Eglise catholique pendant 30 an.” Pa trop longtemps apré Mémorial, li ti accepté enn l’etude dan livre Ki la Bible enseigné?
14. Ki campagne mondial pou commencé le 1er mars?
14 Campagne l’invitation: A partir samedi 1er mars ziska le 22 mars, nou pou distribué enn l’invitation special dan le monde entier. Nou tou nou pou envie participe bien dan sa campagne important-la. Li pou pli bon ki nou donne enn dimoune enn l’invitation dan so la-main-mem ki nou zis laisse li enba so la-porte. Selman, si ou ena enn grand territoire, bann ancien kapav decidé pou laisse bann invitation kot bann absent, sans trop faire remarké. Dan bann week-end nou pou kapav aussi presente bann dernier periodik.
15. Ki nou kapav dire kan nou presente l’invitation pou Mémorial?
15 Parski nou pa pou ena beaucoup lé-temps pou distribué bann invitation, li bon ki nou faire enn presentation simple. Nou bizin amical ek enthousiaste. Ou kapav dire sa: “Nou envie faire sur ki ou, ou famille, ek ou bann camarade invité pou enn l’evenement important ki pou ena le 22 mars. Sa c’est ou l’invitation. Tou bann detail inn imprimé ladan.” Dimoune-la kapav ena bann question. Ou-soit li kapav accepté l’invitation-la ek li kapav mem dire ki li pou vini. Alors, note l’interet ki sa dimoune-la manifesté, ek faire l’arrangement pou revisite li.
16. Ki l’experience montré ki sa campagne pou invite bann dimoune Mémorial-la, ena enn grand valeur?
16 L’année derniere enn soldat ti trouve enn l’invitation pou vinn Mémorial enba so la-porte. Li ti decidé pou vini mais li ti bizin gagne permission avek so sergent. Kan li’nn montré l’invitation-la so sergent, sergent-la inn reste trankil ek li’nn dire li ki so bann parent Témoins de Jéhovah ek ki li ti habitué al reunion avek zot. Sergent-la pa ti zis donne sa soldat-la permission pou allé, mais li ti aussi accompagne li Mémorial!
17. Couma nou montré ki nou pa finn rate but faveur Bondié ki nou pa merité?
17 Montré reconnaissance: A mesure ki Mémorial 2008 pé approché, anou reflechi lor sa faveur ki personne pa merité ki Jéhovah inn accorde nou-la. L’apotre Paul ti ecrire: “Nou aussi suppliye zot pou pa accepté faveur ki Bondié donné ek ki personne pa merité, pou apré mank so but.” (2 Cor. 6:1) Couma nou kapav montré ki nou pa’nn rate but faveur Bondié? Paul ti ecrire: “Mais dan tou fason, nou recommande nou-mem couma bann ministre Bondié.” (2 Cor. 6:4) Alors, nou montré nou l’appreciation pou sa don ki Jéhovah inn faire-la par nou bon conduite ek nou zele pou preche la bonne nouvelle. Sa lepok Mémorial ki pé vini-la pou enn bon l’occasion pou augmente nou l’activité, ek pou rann temoignage a fond lor bon nouvelle.
[L’encadré page 3]
Kisannla ki kapav faire pionnier auxiliaire?
◼ Bann ki ena zenfant
◼ Bann ki travail a plein temps
◼ Bann dimoune agé ek handicapé
◼ Bann ki al lekol
[L’encadré page 4]
Kan nou distribué l’invitation Mémorial:
◼ Faire enn presentation courte; koz avek l’enthousiasme
◼ Prend note bann dimoune interessé ek revisite zot
◼ Offert bann periodik dan week-end