Anu Kontiyn Koz lor Bann Travay Extraordiner Jéhovah

1. Parmi bann travay extraordiner Jéhovah, ki kitsoz ki pli tus u?

¹ Pena personn kuma nu Bondye, Jéhovah! David ti ekrir: “Buku kitsoz to’nn fer, A Jéhovah, mo Bondye, wi to bann travay extraordiner ek to bann panse anver nu; pena personn kuma twa.” (Ps. 40:5) Parmi bann kitsoz extraordiner ki Jéhovah inn fer ek Li pe fer, Li’nn kre liniver, Li’nn etabli Royaume Messianique, Li manifeste lamur fidel anver so pep dan plizir fason, ek Li pe diriz enn gran travay predikasyon atraver lemond antye. (Ps. 17:7, 8; 139:14; Dan. 2:44; Mat. 24:14) Lamur pu Jéhovah ek rekonesans pu tu seki Li’nn fer, pus nu pu koz Li ar lezot. (Ps. 145:5-7) Pandan mwa Mars, Avril ek Mai, nu pu gayn lokazyon pu fer sa ankor plis.

2. Ki profi nu tire personelman kan nu fer pyonye oxilyer?

² Kan Nu Fer Pyonye Oxilyer: Eski u kapav aranz u pu fer 50 hrs dan predikasyon pandan enn uswa plizir sa bann mwa spesyal-la? Sirman u pu bizin fer sertin sanzman dan u program. Me pa trakase, sa pu vo vremem lapenn! (Éph. 5:16) Buku finn truve ki kan zot fer pyonye oxilyer, sa fer zot vinn pli efikas dan zot minister. Par egzanp, zot pli alez devan laport bann dimunn ek zot gayn lokazyon pu plis servi la Bib. Etandone ki zot pas plis letan dan zot minister, li pli fasil usi pu swiv lintere bann dimunn ki’nn ekut zot. Ena finn kapav mem kumans enn letid, alor ki avan zot pa ti ena okenn letid. Ek enn lot byinfe ankor, seki servis pyonye oxilyer rann nu ere, parski nu pe depans numem pu lezot.—Actes 20:35.

3. Kuma sertin finn kapav fer pyonye oxilyer malgre bann sityasyon difisil?

³ Fode pa tutswit u panse ki u sityasyon pa pu permet u fer pyonye. Lane pase, enn ansyin ti fer pyonye oxilyer malgre ki li travay aplintan ek li ena de zanfan. Kuma eski li’nn reysi, mem si li byin okipe? Etandone ki la semenn li travay, li’nn aranz li pu fer bann long zurne dan wikenn; dan Samedi li kumans donn temwaynaz lor lari apartir 7:00 gramatin. Plizir proklamater ki ti dan mem sityasyon ki sa ansyin-la, finn fer parey. Zot finn kapav sutenir ek ankuraz zot ant zotmem. Dan enn lot kongregasyon, enn ser ti invit so mama pu fer pyonye ansam avek li. Ebyin, so mama ti desid fer pyonye an Mai, malgre so 99 an, u rann u kont? Lezot proklamater dan la kongregasyon finn ed nu ser aze pu avanse dan so fotey-rulant, kan li pres deport-an-port ek kan li al fer letid. Li finn usi donn temwaynaz par telefonn, lor lari, ek atraver let. Li sir ki si li’nn reysi fer tusala, se pa par so prop lafors, me selman grasa led Jéhovah.—Isa. 40:29-31.

4. Ki bann kitsoz nu kapav pran an konsiderasyon kan nu fer enn program pu fer pyonye oxilyer?

⁴ Fer enn program ki adapte ar u sityasyon. Petet enn parmi bann model ki’nn sigzere dan sa lartik-la, kapav pratik pu u. Eski u travay uswa u al lekol? Li pu pli pratik pu u si u fer enn program ki permet u sorti plis dan wikenn. Eski u lasante pa tro bon ek u pa kapav fer bann long zurne? Li pu bon alor ki u fer enn program ki permet u pres enn tigit tulezur. Fer lezot kone ki u anvi fer pyonye oxilyer. Kitfwa, sa kapav motiv zot pu fer parey.

5. Ki bann lobzektif bann zenn kapav fixe pu mwa Mars, Avril ek Mai?

⁵ Kuma Bann Zenn Kapav Fer Zot Par? Jéhovah kontan kan bann zenn koz lor so bann travay extraordiner. (Ps. 71:17; Mat. 21:16) Si u enn zenn ki batize, petet u kapav fer pyonye kan u gayn konze lekol an Avril. Si u pa kapav fer pyonye oxilyer, eski u kapav fixe sertin lobzektif byin presi pu fer plis dan u minister ek pu vinn pli efikas pandan sa bann mwa-la? Si u ankor tuzur akonpayn u bann paran dan predikasyon me u pankor vinn proklamater, kitfwa se enn bon moman pu ranpli bann kondisyon rekiz. Pa panse ki u bizin konn repons tu ti kestyon ki ena dan la Bib, uswa u pu bizin konn mem kantite kitsoz ki bann adilt batize kone. Eski u konpran bann prinsipal lanseynman ki ena dan la Bib? Eski u respekte bann prinsip moral ki ena dan la Bib? Eski u anvi ki dimunn konn u kuma enn Temwin Jéhovah? Koz sa avek u bann paran. Zot pu fer ansort ki bann ansyin gayn enn ti konversasyon avek u an zot prezans, pu gete si u ranpli bann kondisyon rekiz.—Get liv Notre Ministère, paz 98-100.

6. Kuma nu kapav ed nu bann letid pu kumans prese?

⁶ Nu Kapav Ed Lezot Pu Prese: Si u ena bann letid ki pe progrese, zot usi zot kapav ranpli bann kondisyon rekiz pu kumans prese pandan sa bann mwa spesyal ki pe vini-la. Pu sa, u bizin inform u sirveyan letid-de-liv uswa sirveyan servis. Lerla, enn parmi zot pu asiste letid sa nuvo-la pu gete kot li’nn arive dan so progre. Si dimunn-la ranpli kondisyon rekiz ek li anvi prese, sirveyan prezidan pu pran dispozisyon pu ki de ansyin gayn enn ti konversasyon avek li ek u. (Get La Tour de Garde, 15 Novembre 1988, paz 17.) Si bann ansyin dakor ki u etidyan kapav sorti an predikasyon, kumans form li tutswit.

7. Kuma kapav ed bann proklamater inaktif ek iregilye?

⁷ Bann sirveyan letid-de-liv pu sirman anvi vizit bann proklamater inaktif uswa iregilye dan zot grup. Invit sa bann proklamater-la pu pres personelman avek u. Si ena ki inaktif depi byin lontan, li pu bon ki dabor, de ansyin koz avek zot pu gete si zot ankor ranpli bann kondisyon rekiz pu prese. (Get Le Ministère du Royaume Novembre 2000 Réponses à vos questions.) Zel ki la kongregasyon pu manifeste dan sa bann mwa spesyal-la, pu kapav motiv zot pu rekumans prese regilyerman kuma avan.

8, 9. Ki bann ansyin kapav fer pu motiv la kongregasyon pu sa laktivite spesyal ki pe atann nu devan-la?

⁸ Prepar Nu Depi Asterla-Mem: Ansyin, kumans motiv u kongregasyon depi asterla-mem pu fer pyonye oxilyer. U kapav fer sa par u bann komanter ankurazan ek par u bon legzanp. (1 Pierre 5:3) Ki sif rekor la kongregasyon inn deza fer an rapor avek pyonye oxilyer? Eski kapav kas sa rekor-la sa lane-la? Bann sirveyan letid-de-liv ek zot adzwin pu bizin rod bann mwayin pu ankuraz tu dimunn dan zot grup pu ogmant zot aktivite. Sirveyan servis kapav fixe lezot randevu servis pu la predikasyon. Fer la kongregasyon kone, depi byin alavans, ki bann dispozisyon ki’nn pran. Swazir bann proklamater kapab pu responsab bann sorti, ek fer sir ki reynion predikasyon kumans ek terminn aler. (Get Nu Minister DiRwayom Septembre 2001 Kestyon ki Suleve.) Sirveyan servis pu bizin asir li usi ki ena ase teritwar ek piblikasyon pu prese.

⁹ Lane pase, dan enn kongregasyon, bann ansyin ti byin motiv bann proklamater depi kumansman lane pu fer pyonye oxilyer an Mars, Avril ek Mai. Rezilta? Buku ti ranpli enn form. La kongregasyon ti prevwar lezot randevu servis. Par egzanp, ti fixe enn randevu 5:30 dimatin pu pres lor lari, enn lot 3:00 lapremidi pu bann ki sorti lekol ek enn trwazyem randevu 6:00 tanto pu bann ki sorti travay. Ti ena usi trwa randevu servis Samedi. Li pa etonan donk ki dan sa kongregasyon-la, ti ena 66 pyonye oxilyer an Avril!

10. Kuma bann fami kapav prepar zot pu ogmant zot aktivite?

¹⁰ Eski u kapav rezerv enn ti letan dan prosin letid familyal pu gete ansam ki bann lobzektif, la fami kapav fixe pu sa bann mwa ki pe vini-la? Si fer enn bon program ek si tu dimunn korpere, sertin uswa mem tu dimunn kapav fer pyonye oxilyer. Me si la fami pa kapav fer pyonye, zot kapav fixe lezot lobzektif pu ogmant zot aktivite. Par egzanp, zot kapav res inpe pli lontan dan predikasyon uswa sorti pli suvan. Priye Jéhovah an fami lor sa size-la. Zot kapav sir ki Jéhovah pu beni zot bann zefor.—1 Jean 3:22.

11. (a) Ki bann kitsoz extraordiner sakrifis Jésus Christ finn akonpli? (b) Ki zur ek ki ler pu selebre Mémorial dan u kongregasyon?

¹¹ Travay Pli Extraordiner Ki Jéhovah Inn Fer: Pli gran fason ki Jéhovah inn montre so lamur, se kan Li’nn ofer so Garson an ranson pu nu. (1 Jean 4:9, 10) Se selman sakrifis Jésus ki ena drwa legal pu liber nu ar pese ek lamor. (Rom. 3:23, 24) Disan ki Jésus inn verse, finn konfirm la nuvel alyans. Ek sa finn donn bann dimunn inparfe la posibilite pu vinn garson Bondye, avek lespwar pu reyne dan lesyel, dan so Rwayom. (Jér. 31:31-34; Marc 14:24) Me seki pli inportan, seki lobeisans Jésus ziska la fin, finn sanktifye non Jéhovah. (Deut. 32:4; Prov. 27:11) Dimanche 4 Avril, apre kuse soley, partu lor later pu selebre Mémorial lamor Jésus Christ.

12. Ki profi bann nuvo kapav tire kan zot asiste Mémorial?

¹² Kan nu selebre le Repas du Seigneur, se enn fason pu donn Jéhovah luanz pu so bann travay extraordiner. Diskur ki pu prononse sa lokazyon-la, pu fer nu pli konpran ek apresye seki Jéhovah inn akonpli atraver la ranson. Bann nuvo ki pu la, pu kapav apresye lezot kitsoz extraordiner ki Jéhovah pe fer. Zot pu kapav truv linite ek lamur sinser ki Jéhovah finn anseyn so pep pu manifeste. (Éph. 4:16, 22-24; Jacq. 3:17, 18) Sa levennman inportan-la kapav ena enn bel lefe lor bann ki prezan sa zur-la. Akoz sa, nu anvi ki enn maximem dimunn posib asiste sa selebrasyon-la.—2 Cor. 5:14, 15.

13, 14. Kisannla nu pu invite pu Mémorial, ek kuma nu pu fer sa?

¹³ Anu Invit Lezot Pu Assiste: Pu kumanse, fer enn lalis bann dimunn ki u pu invite. Sirman, u pu anvi invit u bann fami, vwazin, koleg travay, kamarad lekol, u bann letid, bann ki’nn aret etidye, ek tu u bann vizit. Bann sirveyan letid-de-liv pu inklir usi bann proklamater inaktif lor zot lalis.

¹⁴ Servi bann fey invitasyon ki la kongregasyon inn resevwar, ek lor la, ekrir klerman ler ek landrwa kot pu fer Mémorial. Ubyin, u kapav servi linvitasyon ki truv lor dernye paz La Tour de Garde 15 Mars, 2004 uswa Réveillez-vous ! 22 Mars, 2004. Amezir ki le 4 Avril aprose, repas get u bann invite uswa telefonn zot, pu zot pa bliye.

15. Kuma nu kapav montre lospitalite zur Mémorial?

¹⁵ Zur Mémorial: Fer zefor pou ariv lasal boner sa zur-la. Swet bann nuvo la byinveni. (Rom. 12:13) Pa bliye ki li u responsabilite pu pran swin u bann invite. Akeyir zot byin, met zot alez ek prezant zot ar lezot manb dan la kongregasyon. Si posib, fer zot asiz kot u. Si zot pena la Bib ek kantik, fer zot swiv ar u uswa avek enn lot Temwin. Apre Mémorial, res avek zot pu ki kumsa, u kapav reponn bann kestyon ki zot kapav poze. Si ena ki’nn vini pu la premyer fwa, demann zot si zot ti pu kontan konn plis lor Parol Bondye ek lor seki Li pu fer. Propoz zot enn letid la Bib.

16. Ki kapav fer pu ed bann ki’nn asiste Mémorial, pu progrese lor plan spirityel?

¹⁶ Nu Bizin Kontiyn Ed Bann Ki’nn Asiste Mémorial: Apre Mémorial, nu pu bizin kontiyn ed bann ki ti’nn asiste sa selebrasyon-la. Kitfwa parmi, ena bann ki ti pe asiste reynion regilyerman avan, me ki asterla nepli truv zot suvan. Bann ansyin pu fer ansort ki sa bann dimunn-la gayn led neseser; zot pu sey gete kifer zot inn aret progrese lor plan spirityel. Fer zot pran konsyans ki la fin byin pre. (1 Pierre 4:7) Ed tu sa bann dimunn-la pu truv byinfe ki zot pu gayne kan zot asiste reynion regilyerman, kuma la Bib konsey nu.—Héb. 10:24, 25.

17. Kifer nu pu tuletan kontiyn koz lor bann travay extraordiner Jéhovah?

¹⁷ Bann travay Jéhovah telman extraordiner, ki zame nu pu kapav konpran zot konpletman, mem si nu viv eternelman. (Job 42:2, 3; Eccl. 3:11) Sa vedir ki tuletan pu ena kitsoz ki pu pus nu pu donn Jéhovah luanz. Anu fer plis dan nu minister pandan sa lepok Mémorial-la, pu montre ki nu apresye bann travay extraordiner Jéhovah.

[Tablo lor paz 5]

Eski enn dan Sa Bann Program-la Pratik pu U?

Mars Di Lu* Mar* Mer* Je Ven Sam Mwa Total

Sak Zur 2 1 1 1 1 1 5 51

De Zur 0 5 0 5 0 0 0 50

Wikenn Selman 5 0 0 0 0 0 8 52

Avril Di Lu Ma Mer Je* Ven* Sam Mwa Total

Sak Zur 2 1 1 1 1 1 5 50

De Zur 0 0 0 0 5 5 0 50

Wikenn Selman 5 0 0 0 0 0 8 52

Mai Di* Lu* Ma Mer Je Ven Sam* Month Total

Sak Zur 2 1 1 1 1 1 4 51

De Zur 0 5 0 0 0 0 5 50

Wikenn Selman 3 0 0 0 0 0 7 50

* Ena sink pandan sa mwa-la