Enn bon l’objectif pou nouveau l’année service
1. Ki l’objectif nou kapav fixé pou nouveau l’année service?
1 Si nou envie faire progré lor plan spirituel, nou bizin fixé bann l’objectif. Ki bann l’objectif personnel ou finn fixé pou nouveau l’année service? Enn bon l’objectif c’est pou faire pionnier auxiliaire pendant enn mois ou-soit plus. Normalement, nou bizin faire certain preparation avant, pou nou kapav faire sa. Alors, li bon ki nou commence prepare nou asterla-mem. Kifer nou kapav fixé service pionnier auxiliaire couma enn l’objectif?
2. Ki bann raison nou ena pou fixé l’objectif pou faire pionnier auxiliaire?
2 Bann raison pou faire pionnier auxiliaire: Service pionnier auxiliaire permette nou faire nou Papa ki dan le ciel content “encore plus” kan nou augmente le temps ki nou passé dan ministere. (1 Thess. 4:1) Kan nou mazinn tou bann kitsoz ki Jéhovah finn faire pou nou, nou leker pousse nou pou koz Li avek lezot. (Ps. 34:1, 2) Jéhovah trouvé ek Li apprecié bann sacrifice ki nou tou nou faire pou nou kapav faire plus dan predication. (Héb. 6:10) Sa faire nou gagne enn grand la-joie kan nou koné ki Jéhovah apprecié sa dur travail ki nou pé faire-la.—1 Chron. 29:9.
3, 4. Ki bienfait nou gagné kan nou faire pionnier auxiliaire?
3 Normalement, plus ou faire enn kitsoz, plus li vinn facile ek plus ou content pou faire li. Kan ou augmente le temps ki ou passé dan predication, sa pou permette ou gagne plus confiance en ou-mem kan ou preché porte-en-porte. Ou pou vinn pli efficace pou commence bann conversation ek pou servi la Bible. Plus ou koz lor ou la-foi, plus li vinn pli fort. Beaucoup ki pa ti pé conduire enn l’etude la Bible, finn reussi commence enn l’etude kan zot inn faire pionnier auxiliaire.
4 Li possible ki service pionnier auxiliaire, sa-mem l’encouragement ki ou ti bizin pou ou reussi casse ou routine spirituel. Enn frere ki avant ti enn pionnier permanent ti trouvé ki li ti pé passe trop beaucoup lé-temps dan so travail, ek li ti decidé pou faire pionnier auxiliaire pendant enn mois. Li dire: “Mo pa ti’lé croire ziska ki point sa enn mois ki mo ti faire pionnier auxiliaire-la, ti redonne moi la force lor plan spirituel! Mo ti’nn decidé pou contigne faire pionnier auxiliaire, ek apré, sa inn permette moi ré-vinn pionnier permanent.”
5. Couma eski nou kapav surmonte bann sentiment ki faire nou pensé ki nou pa assez qualifié?
5 Surmonte bann barriere: Ena kapav hesité pou prend service pionnier auxiliaire parski zot pensé ki zot pena assez capacité pou preché bien. Si sa pé empeche ou faire pionnier, Jéhovah kapav aide ou couma Li ti aide Jérémie. (Jér. 1:6-10) Mem si Moïse so ‘la-bouche ek so la-langue ti lourd,’ Jéhovah ti servi li pou faire so volonté. (Ex. 4:10-12) Si ou senti ki ou pa assez qualifié, suppliye Jéhovah pou donne ou courage.
6. Couma eski li possible pou faire pionnier auxiliaire malgré bann problem la santé ou-soit a cause enn program ki rempli?
6 Eski ou hesité a cause bann problem la santé ou-soit parski ou program trop rempli? Si ou ena enn handicap, kitfois li possible ki ou faire service pionnier auxiliaire dapré vitesse ki adapté ar ou situation. Si ou ena enn program ki bien rempli, kitfois ou kapav renvoye certain activité ki moins important pou enn lot mois. Certain ki travail a plein temps finn reussi trouve le temps pou faire pionnier auxiliaire kan zot finn prend enn ou-soit deux jour congé.—Col. 4:5.
7. Kifer li bon ki nou prié concernant service pionnier auxiliaire?
7 Couma pou faire: Prié concernant ou desir pou faire pionnier auxiliaire. Demann Jéhovah pou beni bann zeffort ki ou faire pou augmente ou ministere. (Rom. 12:11, 12) Li kapav aide ou pou prend bann bon decision lor fason pou organise ou program. (Jacq. 1:5) Si ou mank motivation pou preché, demann Jéhovah pou aide ou trouve plaisir dan sa l’activité-la.—Luc 10:1, 17.
8. Couma si ou applik Proverbes 15:22, sa kapav aide ou faire pionnier auxiliaire?
8 Koz lor service pionnier auxiliaire en famille. (Prov. 15:22) Kitfois enn dimoune dan la famille kapav faire pionnier ek lezot dan la famille kapav soutenir li. Koz avek lezot dan congregation lor ou desir pou faire pionnier, surtout avek bann ki dan mem situation ki ou. Sa kapav augmente zot l’interet pou faire pionnier auxiliaire.
9. Ki mois ou kapav choisir pou faire pionnier auxiliaire?
9 Pendant ki ou examine ou program predication pou nouveau l’année service, kan eski ou pensé ou pou kapav faire pionnier auxiliaire? Si ou travail a plein temps ou-soit si ou al lekol, ou kapav note bann mois kot ena congé publik ou-soit kot ena cinq samedi ou cinq dimanche. Par exemple, en septembre, décembre, mars, ek août ena cinq week-end. Mois mai ena cinq samedi, ek mois juin ena cinq dimanche. Si ou ena bann problem la santé, rod bann mois kot le temps bon. Kitfois ou envie aussi faire pionnier pendant mois ki surveillant pou visite ou congregation. Pendant so visite, ou pou ena enn lot privilege encore: ou pou kapav ecoute premier partie discours ki faire pou bann pionnier permanent. Li pou enn bon l’occasion pou faire pionnier pendant mois mars, avril ek mai, parski l’année prochaine, Mémorial pou tombe le 22 mars. Enn fois ki ou’nn fini choisir mois ou-soit bann mois kot ou pou faire pionnier auxiliaire, commence faire enn program ki pou permette ou gagne ou l’heure.
10. Ki ou kapav faire si li pa possible pou ou faire pionnier auxiliaire?
10 Mem si ou pensé ki ou pa pou kapav faire pionnier auxiliaire sa l’année service ki pé vini-la, ou kapav toujours garde l’esprit pionnier. Contigne faire tou seki ou kapav dan ou ministere, ek pa blié ki Jéhovah apprecié bann zeffort ki ou faire pou donne Li ou best. (Gal. 6:4) Soutenir ek encourage bann ki kapav faire pionnier auxiliaire. Kitfois ou kapav arrange ou program dan enn fason kot ou kapav participe dan ministere enn jour en plus avek bann ki pé faire pionnier.
11. Kifer nou bizin conscient ki la fin bien pré?
11 Bann serviteur Jéhovah koné ki la fin bien pré. Ena enn travail ki bizin faire—preche la bonne nouvelle. La vie beaucoup dimoune en danger, ek pa reste beaucoup lé-temps. (1 Cor. 7:29-31) L’amour pou Bondié ek pou nou prochain pou pousse nou pou faire tou seki nou kapav dan nou ministere. Avek zeffort ek enn bon program, kitfois nou kapav faire pionnier auxiliaire au moins enn fois dan sa nouveau l’année service-la. Sa li vrai-mem enn bon l’objectif, pa vrai?