Ankor Plis l’Occasion pou Loué Jéhovah
1. Ki nouveau disposition pou aide nou pou “loué Jéhovah beaucoup”?
1 Depuis Mars sa l’année-la, ena enn nouveau disposition ki donne bann proclamateur l’occasion pou faire pionnier auxiliaire pou 30 heure pendant bann mois Mars, Avril ek mois kot ena visite surveillant circonscription. Si semaine visite surveillant tombe lor deux mois, bann proclamateur ki decide pou faire pionnier auxiliaire pou 30 heure kapav choisir entre enn sa deux mois-la. Tou bann pionnier auxiliaire kapav assisté en entier reunion ki surveillant faire avek bann pionnier permanent ek special. Si nou pa kapav faire pionnier auxiliaire pou 50 heure, nou kapav kan-mem “loué Jéhovah beaucoup,” parski nou pou ena possibilité pou faire pionnier auxiliaire pou 30 heure, quatre fois par an!—Ps. 109:30; 119:171.
2. Ki bienfait bann ki faire pionnier auxiliaire pendant visite surveillant circonscription pou gagné?
2 Pendant Visite Surveillant Circonscription: Asterla, pli beaucoup proclamateur pou kapav faire pionnier auxiliaire pendant visite surveillant circonscription ek profite enn l’echange l’encouragement kan zot travail avek li dan ministere. (Rom. 1:11, 12) Beaucoup pionnier auxiliaire ki travail dan la semaine surement pou prend enn jour congé pou preche avek surveillant. Bann ki travail dan la semaine kapav demann surveillant circonscription pou preche avek zot Samedi ou-soit Dimanche. En plis, sa pou vrai-mem encourage bann pionnier auxiliaire kan zot pou assisté reunion pionnier ensam avek bann pionnier permanent ek special!
3. Kifer lepok Mémorial c’est enn bon moment pou faire pionnier auxiliaire?
3 Pendant Mars ek Avril: Bann proclamateur ki ti profite disposition ki ti ena avant pou faire pionnier auxiliaire pou 30 heure enn mois pendant lepok Mémorial, asterla kapav augmente zot “sacrifice louange”! (Héb. 13:15) Mars ek Avril, c’est bann bon mois pou faire pionnier auxiliaire ek coumsa faire plis dan nou ministere. Chaque l’année, pendant sa bann mois-la, nou participe dan enn campagne ki donne nou beaucoup la joie. Nou invite lezot pou assisté Mémorial. En plis, pendant lepok Mémorial beaucoup proclamateur faire plis dan zot ministere. Alors, sa donne nou l’occasion pou travail avek plusieurs proclamateur. Apré Mémorial, nou suive l’interet bann ki’nn assisté sa reunion-la ek encourage zot pou vinn ecoute discours special. Eski ou leker pou pousse ou pou profite sa nouveau disposition-la pou faire pionnier auxiliaire?—Luc 6:45.