Amelior Nou Bann Kapasite dan Nou Minister—Form Nou Bann Etidian Labib pou Devlop Bann Bon Labitid pou Etidie

Kifer li inportan: Pou ki bann etidian Labib progrese ek vinn bann adilt lor plan spiritiel, fode pa zot nouri zot lespri ek zot leker zis avek bann kitsoz debaz ki ena dan Parol Bondie. (Ebre 5:12–6:1) Etidie demann bann zefor. Sa inplik ki nou konpar seki nou pe aprann avek seki nou deza kone, ek pou reflesi kouma nou kapav aplik sa. (Prov. 2:1-6) Kan bann etidian aprann pou fer bann resers personel, zot pou servi nou bann piblikasion pou zot reponn bann kestion Biblik. Tou bann zefor ki zot fer pou aplik seki zot aprann pou ed zot reziste bann leprev ki zot pou fer fas dan zot lavi Kretien.—Lik 6:47, 48.

Kouma To Kapav Fer Sa:

Fer to etidian bien konpran linportans pou rod led Zeova dan lapriyer sak fwa, avan ki zot koumans letid.—Zan 14:26; 1 Kor. 2:10.
Depi koumansman mem, ankouraz to etidian pou prepar so letid alavans. Montre li to liv, ek montre li kouma pou soulign zis bann mo ouswa bann fraz ki inportan.
Fer etidian-la reponn dan so prop mo. Fer tou pou ki letid-la pa vinn enn seans kestion-repons, kot etidian-la zis lir bann repons direk dan so liv.
Ankouraz to etidian pou lir Parol Bondie sak zour. Montre li program lektir Labib ki ena lor jw.org. Sa program-la pou montre li kouma li kapav fer sa. Pou ki enn dimounn devlop enn labitid pou lir Labib toulezour, li pou bizin ena enn gran volonte, me li vo lapenn fer sa zefor-la.—Ps. 1:2, 3.
Montre to etidian kouma li kapav trouv bann repons pou bann kestion Biblik kan li servi Watchtower Library ouswa BIBLIOTHÈQUE EN LIGNE Watchtower. Ed li pou konpran sinbol bann piblikasion ki souvan nou servi dan bann renion.

Pandan Sa Mwa-la, Esey Sa:

Alafin enn soutit ouswa enn sapit, demann to etidian pou fer enn ti rezime an de-trwa fraz seki li’nn fek aprann. Si to pena letid, pran labitid pou fer enn ti rezime de-trwa fraz pou seki to lir dan Labib ouswa dan enn paragraf Latour Degard. Sa pou ed twa pou konpran pli bien seki to lir.