Bann Referans Kaye Renion Nou Lavi Kretien ek Nou Minister

6-12 OUT

BANN TREZOR DAN PAROL BONDIE | LIK 17-18

nwtsty bann not pou letid pou Lk 17:12, 14

dis zom ki ena lalep: Dan lepok Biblik, bann dimounn ki ti ena lalep ti res ansam, sa ti permet ki zot ed sakenn zot kamarad. (2Le 7:3-5) Dapre Lalwa ki Bondie ti done, bann dimounn ki ti ena lalep ti bizin res enn kote, separe ar lezot. Enn dimounn ki ena lalep ti bizin fer kone ki li ti la. Li ti bizin kriye: “Inpir, inpir!” (Lv 13:45, 46) An-akor avek seki lalwa ti demande, bann dimounn ki ti ena lalep ti res enn sertin distans ar Zezi.​—Get it-2-F 127.

al prezant zot devan bann pret: Kan Zezi ti lor later, li ti soumet ar Lalwa ek li ti rekonet bann pret kouma bann desandan Aaron. Se pou sa rezon-la ki li ti donn lord bann dimounn ki ti ena lalep ek ki li ti geri pou al get bann pret. (Mt 8:4; Mk 1:44) Dapre Lalwa Mozaik, enn pret ti bizin verifie si enn dimounn ki ti ena lalep inn vremem geri. Sa dimounn ki ti ena lalep ek ki ti geri la ti bizin osi al tanp ek prezant sakrifis ki li ti bizin ofer dapre Lalwa.​—Lv 14:2-32.

Rod Bann Perl Spiritiel

nwtsty not pou letid pou Lk 17:10

bon nanye: Lit., “initil; ki pa vo nanye.” Par sa lexanp-la, Zezi pa ti pe rod dir ki bann esklav, setadir so bann disip, ti bizin konsider zotmem kouma bann dimounn initil ouswa ki pa vo nanye. Dapre kontex, “bon nanye” donn lide ki bann disip ti bizin ena limilite, fode pa zot panse ki zot ti merit bann felisitasion spesial. Dapre sertin biblis, lexpresion ki’nn servi isi se enn lexanp exazere ki vedir “nou zis bann esklav ki pa merit enn latansion spesial.”

nwtsty not pou letid pou Lk 18:8

sa kalite lafwa-la: Lit., “lafwa.” Dan lang Grek, kan servi enn lartik defini avan mo “lafwa,” sa montre ki Zezi pa ti pe fer referans ar lafwa an zeneral, me ar enn kalite lafwa presi, parey kouma lafwa sa vev dan lexanp Zezi la. (Lk 18:1-8) Sa kalite lafwa-la inplik ena konfians dan pouvwar lapriyer, ek osi konfians ki Bondie pou fer an-sort ki rann lazistis bann dimounn ki Li’nn swazir. Zezi pa ti reponn kestion ki li ti poze lor lafwa, koumsa so bann disip ti kapav reflesi lor ki kalite lafwa zotmem zot ena. Lexanp Zezi lor lapriyer ek lafwa ti bien apropriye parski Zezi ti fek dekrir ki kalite leprev so bann disip ti pou gagne.​—Lk 17:22-37.

13-19 OUT

BANN TREZOR DAN PAROL BONDIE | LIK 19-20

Rod Bann Perl Spiritiel

nwtsty not pou letid pou Lk 19:43

enn baraz dibwa pwint: Ouswa “palisad.” Nou trouv mo Grek kharax zis isi dan bann Lekritir Grek Kretien. Finn dekrir li kouma enn “dibwa ouswa kolonn pwint ki servi pou bar enn landrwa; poto” ek osi kouma enn “kitsoz ki bann militer met an plas ki inplik servi bann poto; palisad.” Bann parol Zezi ti realize lane 70 N.L. kan bann Romin, ki ti dirize par Titus, ti fer enn baraz, ouswa palisad, toutotour Zerizalem. Titus ti ena trwa lobzektif: anpes bann zwif sove, ankouraz zot pou livre zotmem, ek fer an-sort ki bann abitan-la nepli ena manze pou zot soumet. Pou gagn bann materyo pou konstrir sa baraz-la otour Zerizalem, bann solda Romin ti koup bann pie dan bann lafore toutotour.

nwtsty not pou letid pou Lk 20:38

parski pou Li, zot tou vivan: Ouswa “parski devan so lizie, zot tou vivan.” Labib montre ki bann dimounn ki vivan me ki elwagne ar Bondie, zot koumadir bann dimounn mor pou Li. (Ef 2:1; 1Tim 5:6) Dan mem lide, bann serviter ki ena faver Bondie ek ki mor, zot touzour vivan pou Zeova, parski pena dout ki so proze pou resisit zot, li sir.​—Rom 4:16, 17.

20-26 OUT

BANN TREZOR DAN PAROL BONDIE | LIK 21-22

Rod Bann Perl Spiritiel

nwtsty bann not pou letid pou Lk 21:33

Lesiel ek later pou disparet: Lezot verse Labib montre ki lesiel ek later pou existe pou touletan. (Ze 9:16; Ps 104:5; Ek 1:4) Nou kapav dir ki bann parol Zezi isi se enn lexanp exazere, li ti pe rod dir ki mem si seki inposib arive ek ki lesiel ek later vremem disparet, bann parol Zezi pou realize. (Konpar ar Mt 5:18.) Me selman, kitfwa isi pe fer referans ar lesiel ek later sinbolik, ki dan Rev 21:1 apel “ansien lesiel ek ansien later.”

pena sime mo bann parol disparet: Ouswa “se sir ki mo bann parol pa pou disparet.” Dan lang Grek, kan servi de term negatif avek enn verb, sa met laksan lor enn lide ki’nn rezete. Isi sa met laksan lor lide ki bann parol Zezi pou dir pou touletan.

27 OUT–2 SEPTAM

BANN TREZOR DAN PAROL BONDIE | LIK 23-24

Rod Bann Perl Spiritiel

nwtsty not pou letid pou Lik 23:31

kan pie-la ver, . . . kan li pou sek: Isi Zezi pe fer referans ar bann Zwif antan ki nasion. Sa nasion-la ti kouma enn pie ki ti pe al mor me ki ankor inpe ver, parski Zezi ti ankor la ek osi sertin Zwif ki ti krwar dan li. Me biento, bann dimounn ti pou touy Zezi, ek bann Zwif ki fidel pou gagn lespri sin ek form parti Izrael spiritiel. (Rom 2:28, 29; Ga 6:16) Apre sa, nasion Izrael literal ti pou mor lor plan spiritiel, li pou resanble enn pie ki’nn sek.​—Mt 21:43.

nwtsty miltimedia

Koulou dan enn Lezo Talon

Sa foto-la se enn kopi enn lezo talon enn dimounn ki’nn perse ar enn koulou feray ki ti 11.5 santimet longer. (Get mwb17.12 5.) Inn dekouver lezo talon orizinal la an 1968, pandan bann lafouy dan lenor Zerizalem, ek ki ti existe dan lepok bann Romin. Sa se enn prev arkeolozik ki ti servi bann koulou kan ti met enn dimounn a-mor lor enn poto dibwa. Kitfwa sa koulou-la li parey ar bann koulou ki bann solda Romin ti servi pou met Zezi Kris lor poto. Ti trouv sa lezo talon-la dan enn bwat an ros, ki apel ossuaire, ladan ti met bann lezo sek enn dimounn ki’nn mor apre ki so lekor ti’nn dekonpoze. Sa montre ki enn dimounn ki ti met a-mor lor enn poto ti kapav gagn enn lanterman.