KOUMA NOU KAPAV GAGN LAVIKTWAR LOR LAENN?
3 | Tir Tou Tras Laenn dan Ou Lespri ek Ou Leker
Seki Labib Ansegne:
“Pa rant dan moul sa lemonn la, me les Bondie transform zot par enn intelizans nouvo, pouki zot kapav diserne ki volonte Bondie, setadir seki bon, seki agreab, seki parfe.”—ROMIN 12:2.
Seki Savedir:
Nou bann panse bien inportan pou Bondie. (Zeremi 17:10) Li pa ase ki nou zis evit dir ouswa fer bann kitsoz ki montre ki nou ena laenn. Nou bizin fer plis ki sa pou ki laenn pa pran rasinn dan nou lespri ek nou leker. Alor, nou bizin derasinn tou tras laenn ki ena dan nou leker ek nou lespri. Se lerla ki nou pou “transform” nou pou “pa rant dan moul sa lemonn la” ek gagn laviktwar lor laenn.
Seki Ou Kapav Fer:
Pran letan pou reflesi seki ou vremem panse lor lezot, sirtou bann ki sorti dan enn lot pei ouswa enn lot ras. Demann oumem: ‘Kouma mo trouv zot? Eski mo fason panse baze lor seki mo kone personelman lor zot? Ouswa mo ena bann prezize lor zot?’ Evit bann rezo sosial, bann fim ouswa bann lezot divertisman ki met boukou laksan lor laenn ek laviolans.
Parol Bondie kapav ed nou pou tir laenn dan nou lespri ek nou leker
Li pa touletan fasil pou analiz nou prop fason panse ek nou bann santiman dan enn fason onet. Me Parol Bondie kapav ed nou pou “analiz seki ena dan panse ek leker imin.” (Ebre 4:12) Alor kontign examinn Labib. Konpar bann lansegnman Labib ar ou fason panse, ek esey fer zefor pou ki ou fason panse an-akor avek seki Labib ansegne. Parol Bondie kapav ed nou pou tir laenn ki’nn bien anrasine dan nou lespri ek nou leker.—2 Korintien 10:4, 5.