Bann Relizion ek Lager dan Ikrenn​—Ki Labib Dir Lor La?

Get seki nou kapav lir konsernan bann sef relizie ki bann dimounn bien kone ek lager dan Ikrenn:

• “Patriyars Kirill, sef Legliz Ortodox Larisi, pa’nn fer okenn kritik konsernan seki Larisi pe fer. . . . So Legliz inn kontign fann bann fos news lor Ikrenn, ek Putin inn servi sa bann linformasion-la kouma enn pretext pou fer lager.”​—EUobserver, 7 Mars 2022.

• “Patriyars Kirill . . . inn montre dan enn fason bien kler ki li dakor ar lager ki Larisi pe fer kont Ikrenn, kan li’nn dir ki sa lager-la se enn mwayin pou lager kont pese.”​—AP News, 8 Mars 2022.

• “Metropolitan Epiphanius I dan Kiev, enn sef dan Legliz Ortodox Ikrenn, ti beni so bann konpatriyot Lindi pou ‘al lager kont bann solda Ris’ . . . [Li] ti osi dir ki li pa enn pese pou touy bann solda Ris.”​—Jerusalem Post, 16 Mars 2022.

• “Nou [setadir Ukrainian Council of Churches and Religious Organizations (UCCRO)] soutenir bann Larme Ikrenn ek tou bann ki pou defann nou pei, nou beni zot dan zot lager pou defann Ikrenn, ek nou priye pou zot.”​—Deklarasion UCCROa, 24 Fevriye 2022.

Ki ou panse? Eski bann relizion ki dir ki zot pe swiv Zezi Kris bizin ankouraz zot bann manb pou al lager? Ki Labib dir?

Rol bann relizion dan bann lager

Listwar montre ki bann relizion bien souvan inn dir ki li akseptab pou al lager, ki li enn bon zafer pou al lager, ouswa ki li mem neseser pou al lager, alor ki zot pe pretann pou travay pou lape. Pandan plizir dizenn lane, bann Temwin Zeova inn met okler lipokrizi sa bann relizion-la. Anou get de-trwa lexanp ki nou kapav trouve dan nou bann piblikasion.

• Lartik « Les croisades : une ‘illusion tragique’ » montre kouma Legliz Katolik Romin ti responsab pou bann masak ki ti fer lor nom Bondie ek lor nom Kris.

• Lartik « L’Église catholique en Afrique » montre enn lexanp kouma bann relizion pa’nn anpes bann lager ant bann tribi, ek mem bann zenosid.

• Bann lartik kouma « La religion est-elle responsable ? », « Le rôle de la religion dans les guerres » ek « La religion prend parti » explike kouma bann sef Legliz Katolik, Ortodox, ek Protestan finn soutenir toulede kan dan boukou lager.

Eski bann relizion Kretien bizin soutenir bann lager?

Seki Zezi inn ansegne: “Kontan to prosin kouma tomem.” (Matie 22:39, NTKM) “Kontan zot lennmi.”​—Matie 5:44-47, NTKM.

Seki Zezi inn dir: “Mo Rwayom pa lor later; si mo Rwayom ti lor later, mo bann gard ti pou lager pou mwa.” (Zan 18:36, NTKM) “Seki servi lepe pou mor ar lepe.”​—Matie 26:47-52, NTKM.

Reflesi lor la: Si bann Kretien pa ti bizin mem lager pou protez Zezi, eski zot bizin al lager pou ninport ki lezot rezon? Lir lartik « Peut-on concilier guerre et christianisme ? » pou gete kouma bann premie Kretien ti swiv lexanp Zezi ek so bann lansegnman avek fidelite.

Ki pou ariv bann relizion ki ankouraz lager?

Labib ansegne ki Bondie rezet tou bann relizion ki dir zot reprezant Zezi me ki pa swiv so bann lansegnman.​—Matie 7:21-23; Tit 1:16.

• Liv Revelasion montre ki pou Bondie, se sa bann relizion-la ki responsab lamor “tou bann ki ti masakre lor later.” (Revelasion 18:21, 24, NTKM) Pou konpran kifer, lir lartik « Qu’est-ce que Babylone la Grande ? »

• Parey kouma bizin ‘koup ek zet dan dife,’ enn pie malad ki pa donn bann bon frwi, Zezi inn dir ki Bondie pou detrir tou bann relizion ki Li’nn rezete akoz zot bann move aksion. (Matie 7:15-20, NTKM) Lir lartik “La fin fausse religion pé kosté!” pou aprann kouma sa pou pase.

Photo credits, gos a drwat: Foto par Sefa Karacan/Anadolu Agency/Getty Images; Maxym Marusenko/NurPhoto via Getty Images