Lintelizans Artifisiel​—Eski Li enn Led Ouswa enn Danze?​—Ki Labib Dir lor La?

Bann dirizan sa lemond-la, bann siantis, ek bann exper lor teknolozi finn koz lor pouvwar ki lintelizans artifisiel (AI) ena. Zot rekonet ki lintelizans artifisiel li inportan. Selman, zot trakase akoz bann danze ki ena si nou mal servi li.

• “AI se enn parmi bann teknolozi pli pwisan ki ena azordi, ek li kapav amelior lavi bann dimounn . . . Me anmemtan, akoz AI, nou kapav santi nou mwins an sekirite, li kapav rant dan nou lavi prive ek fer nou perdi konfians dan gouvernman.”​—Kamala Harris, Vis-Prezidan Letazini, 4 Me 2023.

• “Mem si lintelizans artifisiel (AI) kapav amelior nou lasante, li kapav osi ena enn move lefe lor nou lasante fizik ek emosionel.” Se seki ti ekrir dan BMJ Global Health, ki ti pibliye le 9 Me 2023 par enn group dokter ek bann exper lasante dan lemond ki dirize par Dokter Frederik Federspiel.a

• “Bann dimounn pe deza servi AI pou fann bann fos linformasion. Bien vit, bann dimounn kapav perdi zot travay akoz sa. Bann ki travay dan sekter teknolozi bien trakase parski AI kapav vinn enn danze pou limanite dan lavenir.”​—The New York Times, 1^e Me 2023.

Avek letan, nou pou kone si AI li enn led ouswa enn danze pou nou. Me ki Labib dir lor la?

Kifer nou kapav santi nou mwins an sekirite ar bann kitsoz ki bann dimounn invante?

Labib montre kifer pena okenn garanti ki kapav servi bann teknolozi zis pou fer seki bon.

1. 1. Mem si bann dimounn ena bann bon lintansion, zot pa kapav trouv lefe negatif ki zot aksion pou ena dan lavenir.

   • “Ena enn semin ki paret drwat devan enn dimounn, me alafin li amenn ver lamor.”​—Proverb 14:12.

2. 2. Enn dimounn pa kapav kone si lezot pou bien servi ouswa mal servi seki li’nn invante.

   • “Mo pou les [mo travay] pou dimounn ki pou vinn apre mwa. Ek kisann-la ki kone si li pou saz ouswa bet? Pourtan li pou pran kontrol lor tou travay dir ki mo’nn fer zefor pou fer avek sazes anba soley.”​—Ekleziast 2:18, 19.

Akoz sa bann dout-la, nou konpran kifer nou bizin direksion nou Kreater.

Dan kisann-la nou kapav met nou konfians?

Nou Kreater promet nou ki li pa pou les okenn imin ek okenn teknolozi detrir later ek bann dimounn.

• “Later pou res pou touletan.”​—Ekleziast 1:4.

• “Bann ki swiv bon sime pou posed later e viv lor la pou touletan.”​—Psom 37:29. (Psom An Kreol Morisien, PKM)

Gras-a Labib, nou Kreater pe gid nou ver enn lavenir kot pou ena lape ek sekirite. Pou aprann plis lor seki Labib dir, lir bann lartik ““Ki Kapav Ed Nou pou Ena enn Pli Bon Lavenir?” ek “Enn Vre Lespwar pou Lavenir.”