Kan Rwayom Bondie Pou Dirize, “Pou Ena Lape an Abondans”

Biento Rwayom Bondie, enn gouvernman ki’nn etabli par Bondie ek ki pou diriz later antie, pou amenn lape ek linite. Psom 72:7 fer sa promes-la: “Pou ena lape an abondans.” Me kan eski Rwayom Bondie pou koumans diriz later? Kouma li pou fer sa? Ek kouma ou kapav gagn bann bienfe ar Rwayom Bondie?

KAN ESKI RWAYOM BONDIE POU VINI?

Labib ti predir ki enn seri levennman bien vizib ti pou arive ek ki sa ti pou montre ki Rwayom Bondie ti pre pou vini. Tou sa bann levennman-la, parmi ena bann lager dan lemond, lafaminn, bann lepidemi, bann tranbleman-de-ter, ek lemal ki pe kontign ogmante, form parti enn “sign.”​—Matie 24:3, 7, 12; Lik 21:11; Revelasion 6:2-8.

Enn lot profesi dir: “To bizin kone ki pou ena bann moman difisil dan bann dernie tan. Dimoun pou konn zis zotmem ek zot larzan. . . . Pou ena rebel anver paran. Dimoun pou ingra, zot pou komet sakrilez, zot pou san pitie, ek laenn pou ranpli leker. Zot pou ena parol blesan ek zot pa pou kontrol zot lalang. Zot pou kont tou seki bien. . . . Zot fronte telman lorgey amar zot. Olie kontan Bondie, zot kontan plezir.” (2 Timote 3:1-4) Touletan finn ena bann dimounn avek sa bann defo-la. Me azordi, laplipar dimounn koumsa.

Sa bann profesi-la ti koumans realize apartir lane 1914. Boukou istorien, politisien, ek ekrivin inn fer bann komanter pou explike kouma lemond inn sanze apre sa lane-la. Par exanp, Peter Munch, enn istorien Danwa ti ekrir: “Lager ki finn ena an 1914 inn sanz listwar limanite. Avan sa lane-la, bann dimounn ti panse ki bann kondision dan lemond ti pe ameliore, . . . me lerla enn lepok katastrof, panik, laenn, ek traka inn koumanse.”

Me enn kitsoz ki pozitif, se ki sa bann kondision-la zot kouma enn tanpet avan ki letan vinn bon. Zot montre ki Rwayom Bondie pou diriz later biento. An realite, Zezi ti koz lor enn kitsoz pozitif ki form parti dan sign lafin. Li ti dir: “Bonn Nouvel Rwayom Bondie pou anonse partou dan lemonn, kouma enn temwagnaz pou tou bann nasion; lerla lafin pou vini.”​—Matie 24:14.

Sa bonn nouvel-la se tem prinsipal mesaz ki bann Temwin Zeova anonse. Anplis, zot magazinn prinsipal apel Latour Degard Pe Anons Rwayom Zeova. Li souvan koz lor bann kitsoz extraordiner ki Rwayom Bondie pou fer pou bann dimounn ek pou later.

KOUMA RWAYOM BONDIE POU KOUMANS DIRIZE?

Repons sa kestion-la inplik kat kitsoz inportan:

1. Rwayom Bondie pa pou servi okenn dirizan politik sa lemond-la.

2. Bann dirizan politik sa lemond-la pou anvi gard zot pouvwar ek zot pou lager kont Rwayom Bondie.​—Psom 2:2-9.

3. Bann gouvernman politik pou anvi kontign dirize. Alor, Rwayom Bondie pou bizin detrir zot. (Daniel 2:44; Revelasion 19:17-21) Sa dernie lager mondial la apel Armagedon.​—Revelasion 16:14, 16.

4. Tou bann dimounn ki aksepte dominasion Rwayom Bondie pou proteze pandan Armagedon ek zot pou rant dan enn nouvo lemond kot pou ena lape. Zot pou form seki Labib apel “enn gran lafoul,” ek kitfwa zot pou plizir milyon.​—Revelasion 7:9, 10, 13, 14.

KOUMA OU KAPAV GAGN BANN BIENFE AR RWAYOM BONDIE?

Ledikasion se enn premie letap pou vinn enn sitwayen Rwayom Bondie. Dan enn lapriyer, Zezi ti dir Bondie: “Samem ki vedir lavi eternel, ki zot aprann konn twa, sel vre Bondie, ek sa kikenn ki to finn avoye la, Zezi Kris.”​—Zan 17:3, NW.

Kan bann dimounn aprann konn Bondie Zeova, zot gagn boukou bienfe. Anou get zis de parmi sa bann bienfe-la: Premierman, zot devlop enn gran lafwa an Li. Sa lafwa-la, ki baze lor bann prev, donn zot konviksion ki Rwayom Bondie li bien reel ek ki li pou dirize biento. (Ebre 11:1) Deziemman, zot lamour pou Bondie ek pou bann dimounn grandi. Zot lamour pou Bondie motiv zot pou obeir Li ar tou zot leker. Zot lamour pou bann dimounn motiv zot pou swiv bann parol Zezi, ki nou apel la règle d’or: “Seki to ti a kontan lezot fer pou twa, fer samem pou zot.”​—Lik 6:31.

Parey kouma enn papa ki ena boukou lamour, nou Kreater anvi seki pli bon pou nou. Li anvi ki nou ena seki Labib apel “vre lavi.” (1 Timote 6:19) Lavi ki nou pe viv azordi, se pa “vre lavi.” Pou bann milyon dimounn azordi, lavi bien-bien dir ek zot bizin lite pou kontign viv. Pou ou gagn enn avangou kouma “vre lavi” pou ete, get sertin kitsoz extraordiner ki Rwayom Bondie pou fer pou so bann sitwayen.