3. Kifer Bann Bon Dimounn Soufer?
Kifer Repons sa Kestion-la Inportan?
Li paret inzis kan bann bon dimounn soufer. Sertin panse ki li pa vo lapenn ki nou fer seki bon, parski kanmem sa nou pou soufer.
Reflesi lor La
Sertin dimounn krwar ki bann imin mor ek repran nesans plizir fwa. Zot dir ki bann ki’nn fer bann bon kitsoz repran nesans ek viv enn pli bon lavi, alor ki bann ki’nn fer bann move kitsoz repran nesans ek soufer toutlong zot lavi. Dapre sa krwayans-la, mem si enn dimounn bon azordi, li pou kanmem soufer parski li’nn fer bann move kitsoz dan so lavi avan. Me selman . . .
Ki litilite sa soufrans-la, si dimounn ki’nn repran nesans-la pa mem rapel seki li’nn fer dan so lavi avan?
Kifer nou bizin fer zefor pou gard enn bon lasante ek evit bann aksidan, si finalman nou pou pey konsekans bann kitsoz ki nou’nn fer dan nou lavi avan?
APRANN PLIS
Get video Kifer Bondie Permet Soufrans? lor jw.org/mfe.
Seki Labib Dir
Kan bann dimounn soufer se pa parski Bondie pe pini zot.
Okontrer, boukou kitsoz arive par azar, souvan enn dimounn dan move plas dan move moman.
“Se pa touletan bann dimounn rapid ki gagn lekours, ni bann ki for ki gagn batay, ni bann dimounn saz ki touletan ena manze, ni bann dimounn intelizan ki touletan ena dibien, ni mem bann ki ena konesans ki touletan reisi, parski bann moman difisil ek bann sitiasion ki personn pa atann ariv zot tou.”—EKLEZIAST 9:11.
Nou soufer parski nou’nn erit pese.
Souvan bann dimounn servi mo “pese” pou fer referans ar enn move kitsoz ki enn dimounn inn fer. Me selman, Labib servi sa mo-la osi pou dekrir kondision ki tou bann dimounn inn erite, ki nou enn bon dimounn ouswa enn move dimounn.
“Mo finn ne dan pese; depi dan vant mama mo dan pese.”—PSOM 51:5.
Pese ki nou’nn erite ena enn move lefe lor bann dimounn.
Akoz pese nou pena enn bon relasion avek Bondie. Sa gat osi relasion ki nou ena avek bann lezot dimounn ek ena enn move lefe lor noumem. Akoz sa, nou pa pe zis soufer lor plan personel, me limanite an zeneral pe soufer.
“Kan mo oule fer kiksoz bien, mo retrouv mwa pe fer lemal.”—ROMIN 7:21.
“Kreasion antie pe kontign plengne ansam ek soufer ansam.”—ROMIN 8:22, NW.