4. Eski Bondie Inn Kree Nou Pou ki Nou Soufer?

Kifer Repons sa Kestion-la Inportan?

Repons sa kestion-la ena enn lefe lor fason nou trouv lavi.

Reflesi lor La

Kifer enn Bondie ki’nn kree bann zoli kitsoz permet soufrans?

Bann dimounn ki pa krwar dan Bondie konsider soufrans kouma enn lokazion pou met an dout Bondie so bann mobil ouswa mem so lexistans. Zot krwar ki soufrans montre ki swa (1) Bondie pena pouvwar pou aret sa, swa (2) Bondie pa anvi aret sa, swa (3) ki Bondie pa existe.

Eski se zis pou sa bann rezon-la ki bann dimounn soufer?

Seki Labib Dir

Bondie pa’nn kree nou pou ki nou soufer.

Li anvi ki nou profit lavi.

“Pena nanye ki pli bon pou [bann dimounn] ki zot dan lazwa ek ki zot fer seki bien dan zot lavi, ek ki sakenn manze ek bwar ek gagn satisfaksion pou tou sa travay dir ki li’nn fer la. Sa se enn don Bondie.”​—EKLEZIAST 3:12, 13.

Dan koumansman, Bondie ti fer tou kitsoz parfe pou de premie imin.

Li pa ti anvi ki zot, ouswa zot desandan, soufer.

“[Bondie] ti dir zot: ‘Gagn zanfan, vinn boukou, ranpli later ek ena kontrol lor li.’”​—ZENEZ 1:28.

De premie imin ti swazir pou dezobeir Bondie.

Akoz sa, zot ek tou zot bann desandan finn konn boukou soufrans.

“Par enn zom pese finn vinn dan lemonn, e lamor finn rantre par pese, e lamor finn tous tou dimoun, parski tou finn fer pese.”​—ROMIN 5:12.a

Bondie pa ti kree nou avek kapasite pou diriz nou par noumem.

Parey kouma li inposib ki bann dimounn viv anba delo, li inposib ki bann dimounn diriz zot par zotmem.

“Enn dimounn ki pe marse pa finn kree pou diriz so pa.”​—ZEREMI 10:23.

Bondie pa anvi ki nou soufer.

Li anvi ki nou viv dan enn fason kot nou evit maximum problem ki ena.

“Si selman to ti pran kont mo bann komannman! Lerla to lape ti pou vinn parey kouma enn larivier.”​—IZAI 48:18.