Zistwar 36
Enn Vo An-Or
AYO, ayo! Ki lepep pe fer? Zot pe ador enn vo! Kifer zot pe fer sa?
Pandan ki Moïse res lor montagn pandan enn bon bout letan, lepep dir: ‘Nou pa kone ki’nn ariv Moïse. Alor les nou al fer enn bondie ki pou fer nou sorti dan sa pei-la.’
Moïse so frer, Aaron, dir: ‘Dakor, tir zot bann zanon an-or, ek donn mwa.’ Kan lepep fer sa, Aaron fonn sa bann bizou-la ek fer enn vo an-or. Ek lerla lepep dir: ‘Samem nou Bondie, ki’nn tir nou dan l’Égypte!’ Apre sa, bann Izraelit fer enn gran fet, ek zot ador sa vo an-or la.
Kan Jéhovah trouv sa, Li bien ankoler. Alor Li dir Moïse: ‘Degaze desann. Lepep pe fer enn kitsoz ki bien pa bon. Zot inn bliye mo bann lalwa ek zot pe ador enn vo an-or.’
Moïse degaze desann depi montagn. Ek kan li arive, ala seki li trouve: Lepep pe sante ek danse otour sa vo an-or la! Moïse telman ankoler ki li zet sa de ros plat lor ki ti ena lalwa la, ek zot kase bout-bout. Lerla li pran sa vo an-or la ek fonn li. Apre sa, li kraz-kraz li ek fer li vinn lapoud.
Lepep inn fer enn kitsoz bien move. Alor Moïse dir sertin so bann zom pran zot lepe. Moïse dir: ‘Bann move dimounn ki’nn ador sa vo an-or la bizin mor.’ Lerla so bann zom touy 3,000 dimounn! Eski sa pa montre nou ki nou bizin fer atansion pou ador zis Jéhovah, ek pa okenn lezot fos bondie?