Sapit Katorz
Kuma Eski Zeova Diriz So Lorganizasyon?
1. Ki ranseynman lor lorganizasyon Zeova Labib donn nu, ek kifer eski sa li inportan pu nu?
ESKI Bondye ena enn lorganizasyon? Bann Lekritir inspire dir nu wi. Dan so Parol, Li donn nu enn lide kuma sa parti inpresyonan so lorganizasyon ki dan lesyel la ete. (Ezekyel 1:1, 4-14; Danyel 7:9, 10, 13, 14) Mem si nu pa kapav truv sa parti invizib la, li ena enn gran lefe lor bann vre adorater zordi. (2 Lerwa 6:15-17) Lorganizasyon Zeova ena usi enn parti vizib, lor later. Labib ed nu pu konpran ki li ete ek kuma Zeova diriz li.
Idantifye Parti Vizib
2. Ki nuvo kongregasyon Bondye ti kre?
2 Pandan 1,545 an, nasyon Izrael ti kongregasyon Bondye. (Akt 7:38) Me, Izrael pa finn kontiyn obeir bann lalwa Bondye, ek li finn mem rezet Garson Bondye. Alor, Zeova finn rezet sa kongregasyon la ek li finn abandonn li. Zezi ti dir bann Zwif: “Gete! Zot lakaz pe abandone ar zot.” (Matye 23:38) Lerla, Bondye finn kre enn nuvo kongregasyon avek ki Li finn fer enn nuvo lalyans. Dan sa kongregasyon la ti pu ena 144,000 dimunn ki Bondye pu swazire pu viv ansam avek so Garson dan lesyel.—Revelasyon 14:1-4.
3. Ki ti arive zur Lapantkot lane 33 N.L. pu montre klerman ki asterla Bondye ti pe servi enn nuvo kongregasyon?
3 Zur Lapantkot lane 33 N.L., Zeova ti swazir avek so lespri sin bann premye manb sa nuvo kongregasyon la. Nu kapav lir konsernan sa gran levennman la: “Asterla, pandan ki fet Lapantkot ti pe kontinye, zot tu ti ansam dan mem plas, ek enn ku enn tapaz kuma enn divan for finn sorti dan lesyel, ek sa finn ranpli net sa lakaz kot zot ti pe asize la. Dife dan form bann lalang finn kumans paret ek zot finn poz lor tu dimunn, ek lor sak dimunn ti ena dife dan form enn lalang, ek zot tu finn ranpli ar lespri sin.” (Akt 2:1-4) Lerla, lespri Bondye finn pruve klerman ki asterla sa grup dimunn la mem ki Bondye pu servi pu realiz so volonte, anba direksyon Zezi Kris dan lesyel.
4. Kisannla zordi fer parti dan lorganizasyon vizib Zeova?
4 Zordi, res zis enn ti grup parmi bann manb 144,000 lor later. Me kuma profesi Labib ti anonse, “enn gran laful” bann “lezot muton”—plizir milyon—finn rasanble pu asosye avek sa ti grup ki pu al dan lesyel la. Zezi, Ekselan Berze, finn fer sa bann lezot muton la ek sa ti grup 144,000 lor later la zwenn ansam pu ki zot form enn sel trupo anba direksyon zot sel Berze. (Revelasyon 7:9; Zan 10:11, 16) Zot tu form enn kongregasyon byin ini, lorganizasyon vizib Zeova.
Enn Lorganizasyon Ki Organize enn Fason Teokratik
5. Kisannla ki diriz lorganizasyon Bondye, ek kuma?
5 Lexpresyon “kongregasyon Bondye vivan” ki truv dan Labib montre byin kisannla ki diriz kongregasyon la. Li enn lorganizasyon teokratik, uswa ki dirize par Bondye. Zeova diriz so pep par mwayin Zezi, ki Li finn nome kuma Sef invizib kongregasyon ek par mwayin so Parol Labib, ki Li finn fer ekrir.—1 Timote 3:14, 15; Efezyin 1:22, 23; 2 Timote 3:16, 17.
6. (a) Kuma eski li ti kler dan premye syek ki kongregasyon ti gayn direksyon ki sorti dan lesyel? (b) Ki montre ki Zezi li tuzur Sef kongregasyon?
6 Sa kalite direksyon la ti paret byin kler zur Lapantkot. (Akt 2:14-18, 32, 33) Sa ti kler kan anz Zeova ti diriz predikasyon labonn nuvel ziska dan Lafrik, kan lavwa Zezi ti donn bann linstriksyon letan Sol, enn abitan Tars, ti konverti, ek kan Pyer ti kumans pres parmi bann Zanti. (Akt 8:26, 27; 9:3-7; 10:9-16, 19-22) Me avek letan, ti nepli tann okenn lavwa ki ti sorti dan lesyel, ni ti truv okenn anz, ek ti nepli gayn okenn don lespri par mirak. Selman, Zezi ti fer sa promes la: “Gete! Mo avek zot tulezur ziska lafin sa sistem ki egziste la.” (Matye 28:20; 1 Korintyin 13:8) Zordi, bann Temwin Zeova rekonet ki Zezi pe diriz zot. San sa direksyon la li ti pu inposib pu kontiyn anons mesaz Rwayom fas ar bann lopozisyon intans.
7. (a) Ki bann ki fer parti dan“esklav fidel ek avize,” ek kifer? (b) Ki responsabilite sa “esklav” la finn gayne?
7 Enn tipe zis avan so lamor, Zezi ti koz ar so bann disip lor “esklav fidel ek avize.” Kuma enn Met, li ti pu konfye sa “esklav” la enn responsabilite spesyal. Sa “esklav” la ti la kan Senyer ti al dan lesyel ek li ti pu tuzur pe travay dir kan Kris returne enn fason invizib dan pwisans Rwayom. Sa deskripsyon esklav la pa kapav aplik ar zis enn dimunn, me li aplik pli byin ar kongregasyon Kris ki Bondye finn swazire. Pwiski li finn aste kongregasyon la avek so disan, Zezi apel li so “esklav.” Li finn donn bann manb sa kongregasyon la responsabilite pu fer bann disip ek pu kontiyn nuri so bann disip tigit par tigit avek “manze [spirityel] dan ler ki bizin.”—Matye 24:45-47; 28:19; Izai 43:10; Lik 12:42; 1 Pyer 4:10.
8. (a) Ki bann responsabilite grup esklav ena zordi? (b) Kifer nu reaksyon devan linstriksyon ki Bondye pe donn nu atraver sa kanal la li inportan?
8 Etandone ki sa grup esklav la ti pe fer travay zot Met fidelman kan li finn returne enn fason invizib an 1914, li ti kler ki grup esklav la ti gayn bann pli gran responsabilite an 1919. Bann lane ki finn pase depi sa finn donn zot lokazyon pu pres mesaz Rwayom dan lemond antye, ek pu rasanble enn gran laful bann adorater Zeova pu zot sape dan gran detres. (Matye 24:14, 21, 22; Revelasyon 7:9, 10) Sa bannla usi bizin manze spirityel ek grup esklav la ki servi zot sa manze la. Alor, pu fer Zeova plezir, nu bizin aksepte linstriksyon ki Li donn nu par mwayin sa kanal la ek nu bizin azir an akor avek sa linstriksyon la.
9, 10. (a) Dan premye syek, ki laranzman ti ena pu regle bann kestyon konsernan bann doktrinn ek pu diriz travay predikasyon labonn nuvel? (b) Ki laranzman egziste zordi pu diriz bann aktivite lepep Zeova?
9 Suvan, ena bann kestyon ki suleve konsernan bann doktrinn ek bann fason fer. Ki arive lerla? Akt sapit 15 dir nu kuma ti regle enn kestyon konsernan bann Zanti ki ti konverti. Sa kestyon la ti al devan bann zapot ek bann ansyin dan Zerizalem, ki ti pe servi kuma enn kolez santral. Sa bann zom la usi ti fer erer, me Zeova ti servi zot kan mem. Alor, zot ti egzaminn bann lekritir lor sa size la ek usi bann prev ki lespri Bondye ti uver semin pu ki predikasyon tus bann Zanti. Lerla, zot ti pran enn desizyon. Bondye ti beni sa laranzman la. (Akt 15:1-29; 16:4,5) Sa kolez santral la ti usi nom bann dimunn ek ti anvway zot pu fer avans travay predikasyon Rwayom dan bann lezot teritwar.
10 Dan nu lepok, bann frer ki finn swazire avek lespri ek ki sorti dan plizir peyi, form parti dan Kolez Santral, lorganizasyon vizib Zeova ki truv dan biro santral bann Temwin Zeova. Avek direksyon Zezi Kris, Kolez Santral pe fer vre ladorasyon tus tu peyi ek zot pe diriz travay predikasyon bann Temwin Zeova dan zot bann dizenn milye kongregasyon. Bann manb Kolez Santral partaz mem lide ki lapot Pol, ki ti ekrir so bann frer Kretyin: “Nu pa pe dominn lor zot lafwa, me nu bann travayer kuma zot pu zot lazwa, parski par zot lafwa ki zot pe debute.”—2 Korintyin 1:24.
11. (a) Kuma eski nom bann ansyin ek bann serviter ministeryel? (b) Kifer eski nu bizin korper byin avek bann frer nome?
11 Dan lemond antye bann Temwin Zeova kont lor Kolez Santral pu swazir bann frer responsab pu ki zot usi lerla zot nom bann ansyin ek bann serviter ministeryel pu pran swin bann kongregasyon. Sa bann frer nome la ranpli bann kondisyon ki ena dan Labib, ki pran an konsiderasyon ki sa bann zom la zot pa parfe ek zot fer erer. Bann ansyin ki rekomann bann frer ek bann ki nom bann frer ena enn responsabilite byin serye devan Bondye. (1 Timote 3:1-10, 12, 13; Tit 1:5-9) Akoz sa, zot priye Bondye pu gayn led so lespri ek zot rod so direksyon dan so Parol inspire. (Akt 6:2-4, 6; 14:23) Anu montre nu rekonesans pu sa “don bann zom” ki ed nu tu pu “vinn enn sel dan lafwa.”—Efezyin 4:8, 11-16.
12. Kuma eski Zeova servi bann fam dan laranzman ki Li finn fer?
12 Labib dir bann zom ki bizin pran latet dan kongregasyon. Me, sa pa abes bann fam, pwiski sertin parmi zot, zot bann zeritye Rwayom dan lesyel, ek zot fer buku dan travay predikasyon. (Psom 68:11) Pa fini, kan bann fam kontiyn pran kont zot bann responsabilite familyal, zot kontribye pu ki kongregasyon gard so bon repitasyon. (Tit 2:3-5) Me selman, anseyne dan kongregasyon, sa li rezerve zis pu bann zom ki finn nome pu fer sa.—1 Timote 2:12, 13.
13. (a) Ki latitid Labib ankuraz bann ansyin pu ena an rapor avek zot pozisyon? (b) Dan ki privilez nu tu kapav partisipe?
13 Dan lemond, enn dimunn ki ena enn gran pozisyon li enn dimunn inportan, me dan lorganizasyon Bondye ena enn lot prinsip ki aplike: “Seki pli tipti parmi zot, limem ki pli gran.” (Lik 9:46-48; 22:24-26) Labib konsey bann ansyin pu fer atansyon pu pa dominn lor bann ki leritaz Bondye, me pu vinn plito bann legzanp pu trupo. (1 Pyer 5:2, 3) Pa zis enn ti grup, me tu bann Temwin Zeova, zom ek fam, ena privilez pu reprezant Suverin liniver ek pu koz avek limilite lor so non ek so Rwayom avek bann dimunn partu.
14. Servi bann tex Labib ki finn site pu egzaminn bann kestyon ki ena apre sa paragraf la.
14 Li bon nu demann numem: ‘Eski vremem mo apresye fason ki Zeova diriz so lorganizasyon vizib? Eski mo montre sa par mo bann latitid, mo parol, ek mo bann aksyon?’ Nu pu kapav egzaminn numem si nu rezonn lor sa bann pwin ki ena anba la:
Si vremem mo sumet ar Zezi Kris kuma Sef kongregasyon, alor dapre seki finn ekrir dan Labib, ki mo bizin pe fer? (Matye 24:14; 28:19, 20; Zan 13:34, 35)
Kan mo aksepte avek rekonesans bann dispozisyon spirityel ki grup esklav ek so Kolez Santral pran, pu kisannla anrealite mo pe montre respe? (Lik 10:16)
Kuma eski tu dimunn dan kongregasyon, sirtu bann ansyin bizin tret zot kamarad? (Romin 12:10)
15. (a) Par nu latitid anver lorganizasyon vizib Zeova, ki nu montre? (b) Ki bann lokazyon nu ena pu pruve ki Dyab enn manter ek pu fer leker Zeova kontan?
15 Zeova pe gid nu zordi par mwayin so lorganizasyon vizib avek direksyon Zezi Kris. Nu latitid anver sa laranzman la montre nu santiman lor kestyon suverennte Bondye. (Ebre 13:17) Satan pretann ki nu atas plis linportans ar numem. Me, si nu servi dan ninport ki fason kot bizin led ek si nu evit bann kitsoz ki fer nu atir tro latansyon lor numem, nu pu pruve ki Satan li enn manter. Si nu kontan ek nu respekte bann ki pran latet dan kongregasyon nu olye ki nu ‘admir bann dimunn pu nu prop profi,’ nu pu fer Zeova kontan. (Zid 16; Ebre 13:7) Kan nu fidel ar lorganizasyon Zeova, nu montre ki Zeova Li nu Bondye ek ki nu ador li dan linite.—1 Korintyin 15:58.
Kestyon Revizyon
• Ki ete lorganizasyon vizib Zeova zordi? Ki so rol?
• Kisannla Sef nome pu kongregasyon, ek atraver ki bann laranzman vizib li diriz nu avek lamur?
• Ki bann bon latitid nu bizin devlope pu bann ki dan lorganizasyon Zeova?
[Bann zimaz paz 133]
Zeova gid nu par mwayin so lorganizasyon vizib, anba direksyon Zezi Kris