Sapit Diznef
Kontiyn Koz Parol Bondye Avek Kuraz
1. (a) Ki bonn nuvel bann disip Zezi ti anonse, me kuma eski sertin Zwif ti reazir? (b) Ki bann kestyon nu kapav poz numem?
FINN gayn preske 2,000 an depi ki Bondye ti swazir so Garson Zezi Kris pu vinn fitir Lerwa later antye. Bann lennmi relizye ti fer tuy Zezi, me Zeova finn resisit li. Asterla, grasa Zezi lavi pu tuletan li posib. Me, letan bann disip Zezi ti pe anons labonn nuvel an piblik, zot ti gayn persekisyon. Ena parmi zot ti al dan prizon, zot ti mem gayn bate ek zot ti gayn lord pu aret koz lor Zezi. (Akt 4:1-3, 17; 5:17, 18, 40) Ki zot ti fer? U, ki u ti pu fer? Eski u ti pu kontiyn donn temwaynaz avek kuraz?
2. (a) Ki nuvel extraordiner bizin anonse dan nu lepok? (b) Kisannla ki ena responsabilite pu pres labonn nuvel?
2 An 1914, Lerwa Rwayom Bondye, Zezi Kris, ti mont lor tronn dan lesyel pu reyne ‘omilye so bann lennmi.’ (Psom 110:2) Apre sa, li ti pus Satan ek so bann demon anba lor later. (Revelasyon 12:1-5, 7-12) Bann dernye zur sa move sistem la ti’nn kumanse. Kan sa peryod letan la pu fini, Bondye pu kraz sistem Satan net. (Danyel 2:44; Matye 24:21) Bann ki pu sape pu gayn posibilite pu viv pu tuletan lor later ki pu vinn enn paradi. Si u finn aksepte sa bonn nuvel la, u pu anvi partaz li avek lezot. (Matye 24:14) Me, ki reaksyon u kapav atann?
3. (a) Kuma eski bann dimunn reazir ar mesaz Rwayom? (b) Ki kestyon nu bizin reponn?
3 Kan u anons labonn nuvel lor Rwayom, ena dimunn kapav akeyir mesaz la byin, me laplipar pa pu pran kont. (Matye 24:37-39) Ena kapav mok u uswa kont u. Zezi ti averti so bann disip ki zot ti pu kapav gayn lopozisyon ar zot bann prop fami. (Lik 21:16-19) U kapav usi gayn lopozisyon dan travay uswa dan lekol. Dan sertin landrwa lor later, guvernman finn met restriksyon lor bann Temwin Zeova. Dan bann sityasyon kumsa, eski u pu kontiyne koz Parol Bondye avek kuraz ek “tini ferm dan lafwa”?—1 Korintyin 16:13.
Pa Kont lor Nu Prop Lafors
4. (a) Ki kitsoz ki neseser pu vinn bann fidel serviter Bondye? (b) Kifer eski bann reynion Kretyin byin inportan?
4 Pu vinn enn fidel serviter Zeova, li inportan ki nu kont lor so bann dispozisyon. Bann reynion kongregasyon zot enn parmi sa bann dispozisyon la. Labib ankuraz nu pu pa negliz sa bann reynion la. (Ebre 10:23-25) Bann Temwin Zeova ki finn kontiyn res fidel, ti tuletan fer zefor pu asiste bann reynion regilyerman avek bann lezot adorater. Dan sa bann reynion la, nu konesans Labib ogmante. Nu konpran plis bann laverite ki nu konn byin, ek nu pran plis konsyans lor bann fason ki nu kapav servi sa bann laverite la. Nu vinn pli pros avek nu bann frer Kretyin pu ador Bondye dan linite ek nu gayn lafors pu fer volonte Bondye. Lespri Zeova diriz nu atraver so kongregasyon, ek par mwayin sa lespri la, Zezi li parmi nu.—Matye 18:20; Revelasyon 3:6.
5. Kan ena restriksyon lor bann Temwin Zeova, kuma eski zot organiz bann reynion?
5 Eski u asiste bann reynion regilyerman? Eski u aplik seki u tande? Parfwa, kan ena restriksyon lor bann Temwin Zeova, bann frer bizin fer reynion an ti grup dan bann lakaz prive. Plas ek ler pa tuzur parey ek pa tuzur konvenab; parfwa fer reynion tar aswar. Me, malgre bann dezavantaz personel uswa danze, bann frer ek ser fidel fer enn bel zefor pu asiste sak reynion.
6. Kuma eski nu kapav montre nu konfyans an Zeova, ek kuma eski sa kapav ed nu pu koz avek kuraz?
6 Nu devlop konfyans an Zeova kan nu priye Li regilyerman, ek kan nu pran konsyans ki nu bizin so led. Eski u fer sa? Zezi ti priye sanses pandan so minister lor later. (Lik 3:21; 6:12, 13; 22:39-44) Lanwit avan ki li mor lor enn poto, li ti ankuraz so bann disip: “Kontiyn veye ek priye pu ki zot pa gayn tantasyon.” (Mark 14:38) Si bann dimunn pa pran kont mesaz Rwayom, nu kapav tante pu ralanti nu minister. Si bann dimunn mok nu uswa persekit nu, nu kapav tante pu aret prese pu pa gayn problem. Me si nu priye sinserman pu ki lespri Bondye ed nu pu kontiyn koz avek kuraz, Li pu protez nu pu nu pa sede devan sa bann tantasyon la.—Lik 11:13; Efezyin 6:18-20.
Legzanp Bann Ki Finn Donn Temwaynaz Avek Kuraz
7. (a) Kifer eski seki finn ekrir dan liv Akt ena enn lintere spesyal pu nu? (b) Reponn bann kestyon ki ena alafin sa paragraf la, ek montre byin kuma sa ranseynman la kapav servi nu.
7 Seki finn ekrir dan liv Akt ena enn lintere spesyal pu nu. Li rakonte kuma bann zapot ek bann lezot premye disip—bann dimunn ki ti ena bann mem santiman ki nu—pa finn les nanyin anpes zot kontiyn donn temwaynaz lor non Zeova avek kuraz ek fidelite. Anu egzaminn enn parti sa resi la avek led bann kestyon ek bann verse ki site anba. Pandan ki nu fer sa, gete kuma u kapav tir profi personelman ar seki u pe lir.
Eski bann zapot ti ena bel-bel ledikasyon? Si sa bann dimunn la pa ti per dan ninport ki sityasyon, eski se parski zot natir mem ki ti kumsa? (Zan 18:17, 25-27; 20:19; Akt 4:13)
Ki ti permet Pyer koz avek kuraz devan lakur siprem Zwif ki ti kondann prop Garson Bondye? (Matye 10:19, 20; Akt 4:8)
Ki bann zapot ti pe fer dan bann semenn avan ki amenn zot devan lakur siprem Zwif? (Akt 1:14; 2:1, 42)
Kan bann dirizan ti donn bann zapot lord pu aret prese onon Zezi, kuma eski Pyer ek Zan ti reponn? (Akt 4:19, 20)
Kan bann zapot ti sorti dan prizon, ver ki zot ti turne ankor enn fwa pu gayn led? Eski zot ti priye pu ki persekisyon arete? Sinon, pu ki kitsoz zot ti priye? (Akt 4:24-31)
Par ki mwayin Zeova ti donn so led kan bann lennmi ti rod fer aret predikasyon? (Akt 5:17-20)
Kuma eski bann zapot ti montre ki zot ti konpran kifer zot ti’nn libere? (Akt 5:21, 41, 42)
Mem si buku bann disip ti disperse akoz persekisyon, ki zot ti kontiyn fer? (Akt 8:3, 4; 11:19-21)
8. Ki bann rezilta extraordiner minister bann premye disip finn done, ek kuma eski nu, nu finn arive partisip dan sa mem minister la?
8 Predikasyon labonn nuvel pa ti enn travay dan vid. Apepre 3,000 disip ti batize pandan fet Lapantkot, lane 33 N.L. “Kantite dimunn ki ti krwar dan Senyer finn kontiyn ogmante, enn gran laful zom ek fam tulede.” (Akt 2:41; 4:4; 5:14) Avek letan, mem enn gran persekiter lepep Bondye, Sol, abitan lavil Tars, ti’nn vinn Kretyin ek li ti kumans rann temwaynaz lor laverite avek kuraz. Plitar, li ti gayn non lapot Pol. (Galat 1:22-24) Travay ki ti kumanse dan premye syek pa finn arete. Li finn pran plis lanpler dan sa bann dernye zur la ek li finn tus tu rezyon lor later. Nu ena privilez pu partisip ladan, ek amezir nu fer sa, nu kapav tir leson ar legzanp bann fidel serviter ki finn servi avan nu.
9. (a) Ki bann lokazyon Pol ti sezi pu donn temwaynaz? (b) Dan ki bann fason u fer lezot konn mesaz Rwayom?
9 Kan Pol ti aprann laverite lor Zezi Kris, ki li ti fer? “Deswit . . . li finn kumans prese ki Zezi Limem Garson Bondye.” (Akt 9:20) Li ti ena rekonesans pu faver Bondye ki li pa ti merite, ek li ti pran konsyans ki tu dimunn ti bizin gayn sa bonn nuvel ki li ti’nn gayne la. Pol ti enn Zwif, ek dapre kutim sa lepok la, li ti al dan enn sinagog pu donn enn temwaynaz. Li ti pres lakaz-lakaz usi ek li ti rezonn avek bann dimunn dan bann plas bazar. Ek li ti dispoze pu al dan bann nuvo teritwar pu pres labonn nuvel.—Akt 17:17; 20:20; Romin 15:23, 24.
10. (a) Kuma eski Pol ti montre ki mem si li ti ena kuraz, li ti ena usi disernman dan fason ki li ti rann temwaynaz? (b) Kuma eski nu kapav montre bann kalite ki Pol ti ena kan nu donn temwaynaz ar nu bann pros, bann koleg travay, uswa kamarad lekol?
10 Pol ti ena kuraz, me li ti ena usi disernman, parey kuma nu’si nu bizin ena. Avek bann Zwif, li ti koz lor bann promes ki Bondye ti fer ar zot bann anset. Avek bann Grek, li ti koz lor bann kitsoz ar ki zot ti abitye. Parfwa, li ti servi so prop lexperyans lor fason ki li ti aprann laverite, kuma enn mwayin pu donn temwaynaz. Li ti dir: “Mo fer tu kitsoz akoz labonn nuvel pu ki mo vinn enn partisipan ladan avek lezot.”—1 Korintyin 9:20-23; Akt 22:3-21.
11. (a) Ki Pol ti fer pu evit kontiyn afront bann dimunn ki ti opoze? (b) Kan eski nu kapav, avek sazes, imit legzanp Pol, ek kuma? (c) Kot sa nu gayn lafors pu koz avek kuraz?
11 Kan li ti paret preferab pu Pol pres dan enn lot teritwar pandan enn sertenn letan akoz lopozisyon ti deklare, li ti fer sa olye ki li ti persiste kontiyn afront bann dimunn ki opoze. (Akt 14:5-7; 18:5-7; Romin 12:18) Me zame li pa ti onte akoz labonn nuvel. (Romin 1:16) Mem si Pol pa ti apresye kan bann lennmi ti tret li san respe ek mem avek vyolans, li “ti pran kuraz pu koze par mwayin nu Bondye” pu kontiyn prese. Li ti dir: “Senyer finn debut pre kot mwa ek li finn met kuraz dan mwa pu ki atraver mwa, predikasyon kapav byin fer.” (1 Tesalonisyin 2:2; 2 Timote 4:17) Zezi, Sef kongregasyon Kretyin, kontiyn donn nu lafors ki nu bizin pu fer sa travay ki li ti anonse pu nu lepok la.—Mark 13:10.
12. Ki montre ki bann Kretyin ena kuraz, ek kot sa kuraz la sorti?
12 Nu ena tu rezon pu kontiyn koz Parol Bondye avek kuraz, parey kuma Zezi ek lezot fidel serviter Bondye ti fer dan premye syek. Sa pa vedir ki nu mank konsiderasyon uswa nu fors bann dimunn pu aksepte nu mesaz mem si zot pale. Me, nu pa bes lebra zis parski bann dimunn pa pran kont nu mesaz; ni nu res trankil akoz lopozisyon. Parey kuma Zezi, nu fer lezot kone ki Rwayom Bondye enn guvernman drwat ki pu diriz later antye. Nu koz avek lasirans parski nu reprezant Zeova, Suverin Liniver ek parski sa mesaz ki nu pe anonse la se so mesaz, pa nu mesaz. Nu lamur pu Zeova, sa mem ki bizin sirtu pus nu pu donn Li laglwar.—Filipyin 1:27, 28; 1 Tesalonisyin 2:13.
Kestyon Revizyon
• Kifer eski li inportan nu partaz mesaz Rwayom avek tu dimunn ki nu zwenn, me ki bann reaksyon nu bizin atann?
• Kuma eski nu kapav montre ki nu pa kont lor nu prop lafors pu servi Zeova?
• Ki bann leson ki ena gran valer nu kapav aprann dan liv Akt?
[Bann zimaz paz 173]
Parey kuma dan lepase, zordi bann serviter Zeova koz parol Bondye avek kuraz