Pese Lerwa David

Kan Sail ti mor, David ti vinn lerwa. Li ti ena 30 an. Plizir lane plitar, li ti fer enn erer bien grav. Enn aswar, pandan ki li ti pe mars-marse lor teras so pale, li ti trouv enn zoli madam. David ti pran bann ransegnman lor sa madam-la: li ti apel Betsabe ek so mari ti enn solda ki ti apel Iri. David ti fer Betsabe vinn dan so pale. Zot ti gagn relasion sexiel, ek Betsabe ti tom ansint. David ti esey kasiet seki li ti fer. Li ti dir so sef larme: ‘Met Iri net devan dan lager. Fer bann lezot solda rekile ek les li tousel.’ Iri ti mor dan sa lager-la. Lerla, David ti marye ar Betsabe.

Me Zeova ti trouv tou bann move kitsoz ki David ti fer. Ki Zeova ti pou fer? Zeova ti avoy profet Natan kot David. Natan ti dir David: ‘Enn zom ris ti ena boukou mouton, ek enn zom mizer ti ena zis enn sel ti mouton, ki li ti bien kontan. Sa zom ris la ti pran sa sel ti mouton ki sa zom mizer la ti ena.’ David ti bien ankoler ek li ti dir: ‘Sa zom ris la bizin mor!’ Lerla, Natan ti dir David: ‘Sa zom ris la, tomem sa!’ David ti bien tris, ek li ti rekonet so erer. Li ti dir: ‘Mo’nn fer pese kont Zeova.’ Akoz sa pese-la, David ek so fami ti gagn boukou maler. Zeova ti pini David. Me Li ti les David viv parski li ti ena limilite ek li ti onet.

David ti anvi ranz enn tanp pou Zeova. Me Zeova ti swazir Salomon, garson David, pou ranz sa tanp-la. Alor, David ti dir: ‘Salomon ankor zenn, ek tanp Zeova bizin extra zoli. Mo pou ed Salomon ek mo pou fer bann preparasion pou li.’ David ti donn boukou larzan pou sa proze konstriksion la. Li ti rod bann travayer ki ti ena bann konpetans pou fer sa travay-la. Li ti rasanble lor ek larzan, ek osi dibwa sed ki sorti depi Tir ek Sidon. Ler David ti pre pou mor, li ti donn Salomon bann plan pou konstriksion tanp. Li ti dir: ‘Se Zeova ki’nn gid mwa pou fer sa bann plan-la pou twa. Pa gagn per. Zeova pou ed twa. To bizin for ek fer travay-la.’