Anu Kont lor Lespri Bondye kan Ena Sanzman dan Nu Lavi

“Fer tu to posib pu paret devan Bondye [kuma enn dimunn] apruve.”—2 TIMOTHÉE 2:15.

1. Sit bann sanzman ki kapav ena enn bel linflyans lor nu spirityalite.

LEMOND otur nu kontiyn sanze. Nu truv bann progre extraordiner lor plan syantifik ek teknolozi, me an mem tan bann valer moral pe degrade deplizanpli. Kuma nu finn gete dan lartik avan, bann Kretyin bizin reziste kont lespri lemond ki opoze ar lespri Bondye. Me, amezir ki lemond pe sanze, nu’si nu sanze dan diferan fason. Amezir bann lane pase, nu pran plis laz. Nu vinn pli ris uswa pli pov; nu la sante amelyore uswa deteryore; nu fami grandi uswa vinn pli tipti. Nu pa kapav anpes sa bann sanzman-la arive. Me, zot kapav ena enn bel linflyans lor nu spirityalite.

2. Ki bann sanzman David finn kone dan so lavi?

² Si ena enn dimunn ki vremem finn konn bann gran sanzman dan so lavi, se David, garson Jessé. David ti enn zenn berze. Personn pa ti konn li. Me enn ku, li’nn vinn enn dimunn byin renome dan la nasyon Israël grasa explwa ki li ti fer. Li ti gayn buku la-glwar. Me, plitar li finn bizin sove pu sap so lavi akoz le-Rwa Saül ki ti zalu li. Saül ti pe lasas li parey kuma enn saser lasas enn zanimo sovaz. Apre sa, David finn vinn le-rwa ek li’nn ranport enn kantite gran viktwar lor lezot nasyon. Selman, akoz pese grav ki li ti fer, li ti bizin sufer bann move konsekans. Li’nn konn buku maler; so fami finn divize. Mem si li’nn gayn buku rises, li’nn sufer dan so vyeyes. Malgre tu sa bann sanzman-la, tutlong so lavi, David finn met so konfyans an Jéhovah; li’nn kont lor So lespri. Li’nn fer tu so posib pu prezant limem “[kuma enn dimunn] apruve devan Bondye,” ek Bondye finn beni li. (2 Timothée 2:15) Mem si nu sityasyon pa parey kuma David, nu kapav tir leson lor la fason ki li’nn fer fas ar bann difikilte dan so lavi. So legzanp kapav fer nu konpran kuma nu kapav kontiyn gayn led lespri Bondye kan nu fer fas ar bann sanzman dan nu lavi.

Limilite David, Se enn Bon Legzanp pu Nu

3, 4. Kuma eski David ki ti sinpleman enn zenn berze, finn vinn byin renome dan la nasyon Israël?

³ Kan David ti ankor zenn, li pa ti enn dimunn renome dan so fami. Kan profet Samuel ti vinn kot li, dan Bethléhem, Papa David ti prezant Samuel set parmi so wit garson. David, so dernye garson, pa ti la, li ti pe gardyin muton. Me purtan, Jéhovah ti fini swazir David kuma fitir le-rwa Israël. Alor, finn al apel David, ek lerla, nu lir dan la Bib: “Samuel finn pran enn resipyan delwil ek li’nn vers sa lor so latet devan tu so bann frer [pu montre ki Bondye] finn swazir li. Ek lespri Jéhovah finn kumans azir lor David apartir sa zur-la.” (1 Samuel 16:12, 13) David finn kont lor lespri sin Bondye tutlong so lavi.

⁴ Byin vit, sa zenn berze-la finn kumans vinn enn kikenn byin renome parmi la nasyon Israël. Le-rwa ti invit li pu vinn zwe lamizik pu li. Li ti tuy Goliath, enn zean san pitye, ki ti defye bann solda Israélites ki ti per pu afront li. Kan li ti vinn alatet larme Israël, li ti reysi konbat bann Philistins. Lepep ti kontan li. Zot ti mem konpoz bann sante pu glorifye li. Enn tipe avan, enn konseye le-Rwa Saül ti dekrir zenn David, pa selman kuma enn kikenn “ki byin konn zwe” la-arp, me usi kuma “enn zom for ki ena buku kuraz, enn gerye ki koz avek lintelizans ek enn zom ki ena enn zoli laparans.”—1 Samuel 16:18; 17:23, 24, 45-51; 18:5-7.

5. Ki kitsoz ti kapav fer David pran grander, me kuma nu kone ki sa pa’nn arive?

⁵ David ti ena la glwar ek la bote. Li ti zenn, li ti ena fasilite parol, li ti enn bon mizisyin, enn vre solda, ek li ti ena faver Bondye—kumadir li ti ena tu bann talan ki bizin. Sa ti kapav fer li pran grander, me sa pa’nn arive. Kan le-Rwa Saül ti donn David so tifi an maryaz, get seki David ti dir avek buku limilite: “Ki mo ete mwa? Ek, fami mo papa, ki zot ete zot dan Israël, pu ki mo vinn zann le-rwa?” (1 Samuel 18:18) Konsernan sa verse-la, enn spesyalis dan la Bib finn fer sa komanter-la: “David ti pe rod dir ki li pena nanyin ki kapav fer li merite vinn zann le-rwa. Li pena ni kalifikasyon, ni ran sosyal, ek ni li sorti dan enn gran fami.”

6. Kifer nu bizin kiltiv limilite?

⁶ David ti ena limilite parski li ti rekonet ki dan tu domenn, Jéhovah buku pli siperyer ki bann dimunn inparfe. Sa ti tus David buku kan li ti aprann ki bann dimunn ena valer devan lizye Bondye. (Psaume 144:3) Li ti kone usi ki, si li li’nn gayn tu sa la glwar-la, se parski ti ena lamin Bondye ladan. Wi, Jéhovah ti manifeste so limilite anver David, Li finn abes Limem, pu Li kapav sutenir David, protez li ek pran li swin. (Psaume 18:35) Sa fer nu tir enn leson. Fode zame nu les nu bann talan, nu bann reysit, ek nu bann privilez dan kongregasyon, fer nu pran grander. Lapot Paul ti ekrir: “Wi, ki to ena ki to pa finn resevwar? Si vremem to finn resevwar [sa], kifer to fer vantar kumadir to pa finn resevwar [sa]?” (1 Corinthiens 4:7) Pu nu gayn lespri sin Bondye ek so laprobasyon, nu bizin kiltiv limilite ek prezerv li.—Jacques 4:6.

“Pa Tir Vanzans Zotmem”

7. Ki lokazyon David ti gayne pu tuy le-Rwa Saül?

⁷ La glwar ki David ti gayne, pa ti fer li vinn enn dimunn fyer. Me sa ti fer le-Rwa Saül, ki ti perdi faver Bondye, vinn telman zalu, ki li ti anvi tuy David. Mem si David pa ti fer nanyin de mal, li ti bizin sove, al res dan dezer. Enn fwa, alor ki li ti pe purswiv David, Saül ti rant dan enn kavern. Li pa ti kone ki David ek so bann zom ti pe kasyet andan. Alor, bann zom David ti sipliy li pu sezi sa lokazyon ki kumadir Bondye inn met devan li-la, pu tuy Saül. Nu kapav imazinn zot dan sa kavern nwar-la, pe koz dan zorey David: “Zur finn arive kot Jéhovah pe dir twa: ‘Gete! Mo pe donn twa to lennmi dan to lamin, fer seki to anvi ar li.’ ”—1 Samuel 24:2-6.

8. Kifer eski David finn retenir limem pu pa tir vanzans?

⁸ David ti refiz fer Saül ditor. Parski li ti ena lafwa ek pasyans, li ti les tu dan lamin Jéhovah. Kan Saül ti sorti dan kavern-la, David ti kriye: “Les Jéhovah ziz ant mwa ek twa: Jéhovah pu bizin tir vanzans ar twa pu mwa, me mwa, mo pa pu met lamin lor twa.” (1 Samuel 24:12) Mem si li ti kone ki Saül ena tor, David pa finn tir vanzans, ni li’nn koz brit ar li uswa lor li. Plizir fwa, David finn retenir limem pu pa tir vanzans. Okontrer, li’nn les tu dan lamin Jéhovah.—1 Samuel 25:32-34; 26:10, 11.

9. Kifer nu bizin pa tir vanzans si nu pe gayn lopozisyon uswa persekisyon?

⁹ Parey kuma David, nu’si nu kapav retruv nu dan bann sityasyon difisil. Kitfwa nu gayn lopozisyon uswa persekisyon bann kamarad lekol, koleg travay, bann manb nu fami uswa lezot ankor ki pa partaz nu lafwa. Me, fode pa nu tir vanzans. Nu bizin met tu dan lamin Jéhovah, ek demann Li led so lespri sin. Kitfwa, nu bon kondwit kapav tus sa bann dimunn-la, ek zot usi zot vinn bann serviter Jéhovah. (1 Pierre 3:1) Me dan ninport ki sityasyon u ete, u kapav sir ki Jéhovah truv u sityasyon, ek Li pu fer kitsoz kan ariv le moman apropriye. Lapot Paul ti ekrir: “Pa tir vanzans zotmem mo bann byineme, me sed plas pu koler, parski finn ekrir: ‘Se mwa ki pu tir vanzans, se mwa ki pu fer [zot] peye, ala seki Jéhovah pe dir.’ ”—Romains 12:19.

“Ekut la Disiplinn”

10. Kuma David ti tom dan pese, ek kuma eski li’nn sey kuver sa pese-la?

¹⁰ Letan finn pase. David finn vinn enn le-rwa ki la nasyon Israël byin kontan, ek li ti ena enn la-glwar extraordiner. Tutlong so lavi, li finn ena enn lafwa solid an Bondye, ek li’nn ekrir bann zoli kantik ki donn Jéhovah la glwar. Tusala kapav donn nu linpresyon ki petet enn dimunn kumsa zame pa pu fer enn pese grav. Me, purtan sa-mem ki finn arive. Enn zur, alor ki li ti lor so teras, li’nn truv enn zoli madam pe beyne. Li fer demars pu kone kisannla sa, ek li al aprann ki madam-la apel Bath-Shéba, ek ki so mari, Ouriya, finn al lager. Alor, David fer apel Bath-Shéba, ek li gayn bann relasyon avek li. Plitar, kan li’nn aprann ki Bath-Shéba inn tom ansint, David rod evit ki sa kre enn gran skandal, etandone ki dan la-Lwa Mosaïque, ladilter ti enn pese grav ki merit lamor. Pu kasyet so pese, li avoy so larme enn mesaz pu fer Ouriya return Jérusalem. David ti pe espere ki Ouriya pas la nwit avek Bath-Shéba. Me, sa pa finn arive. David pa kone ki pu fer. Li return Ouriya avek enn let pu Yoab, so komandan militer. Dan sa let-la, li donn lord pu plas Ouriya dan enn pozisyon danzere dan lager, pu ki li mor. Yoab exekit lord le-rwa, ek Ouriya perdi lavi. Lerla, apre ki Bath-Shéba inn obzerv peryod dey pu so mari, David marye ar li.—2 Samuel 11:1-27.

11. Ki legzanp Nathân finn donn David, ek kuma eski David finn reazir?

¹¹ David ti panse ki li finn reysi so plan, mem si li ti kone ki Jéhovah ti truv tu seki finn pase. (Hébreux 4:13) Plizir mwa plitar, Bath-Shéba donn nesans sa tibaba-la. Lerla, Jéhovah fer profet Nathân al get David. Nathân rakont le-rwa enn zistwar konsernan enn dimunn ris ki ti ena buku muton. Me purtan, li’nn al kot enn dimunn ki ena enn sel muton ki li byin kontan, ek li’nn tuy muton-la. Sa zistwar-la finn evey la zistis ki David ti ena dan li, me li pa ti pe dute ki sa zistwar-la ti ena enn lot sinifikasyon. Tutswit, David finn kondann sa dimunn ris-la. Avek enn gran koler, li dir Nathân: “Sa dimunn-la merit lamor!”—2 Samuel 12:1-6.

12. Ki zizman Jéhovah ti rande kont David?

¹² Lerla, profet-la reponn: “Tomem sa dimunn-la!” Wi, David finn kondann limem. Alor, koler David finn transform byin vit an enn gran laont ek sagrin. Li’nn gayn sezisman, kan li tann Nathân pronons zizman Jéhovah kont li, ek li kone ki li pa kapav evit sa. Dan sa ler-la, okenn parol pa ti kapav rekonfort li. David konsyan ki li’nn mepriz parol Jéhovah, li’nn fer seki pabon. Eski li pa ti tuy Ouriya avek lepe so lennmi? Asterla, lepe pa pu kit lakaz David. Eski li pa ti pran madam Ouriya an kasyet? Sa fwa-la enn maler parey, pu vinn lor so lakaz, me sa fwa-la li pa pu an kasyet, tu dimunn pu kone!—2 Samuel 12:7-12.

13. Kuma David finn reazir kan Jéhovah finn disiplinn li?

¹³ Erezman ki David pa finn demanti so pese. Li pa finn an koler kont profet Nathân. Li pa finn avoy so fot lor ledo enn lot dimunn, ni li finn rod zistifye limem. Li finn aksepte so tor, ek li’nn dir: “Mo’nn pese kont Jéhovah.” (2 Samyel 12:13) Psaume 51 montre nu ki kantite li ti santi li kupab, ek profonder so repantans. Li ti sipliy Jéhovah: “Pa rezet mwa, ek silteple pa anlev to lespri sin lor mwa.” Li ti ena konfyans ki Jéhovah pu akord li so mizerikord, ek ki Li pa pu mepriz “enn leker ki’nn kase ek ki dan lapenn” akoz pese. (Psaume 51:11, 17) David ti kontiyn kont lor lespri Bondye. Mem si Jéhovah pa ti protez David kont bann konsekans amer ki li ti pu gayne akoz so pese, Li ti pardonn li.

14. Kuma eski nu bizin reazir kan Jéhovah disiplinn nu?

¹⁴ Nu tu nu inparfe, ek nu tu nu fer pese. (Romains 3:23) Defwa, nu kapav fer enn pese grav parey kuma David. Me, parey kuma enn bon papa ki disiplinn so bann zanfan, Jéhovah koriz bann ki fer zefor pu servi Li. Mem si la disiplinn kapav fer nu buku dibyin, li pa fasil pu aksepte sa. Parfwa, la disiplinn kapav fer nu “buku lapenn.” (Hébreux 12:6, 11) Me, si nu “ekut la disiplinn,” nu kapav rekonsilye avek Jéhovah. (Proverbes 8:33) Pu kontiyn gayn benediksyon Jéhovah, nu bizin aksepte koreksyon ek fer zefor pu gayn laprobasyon Bondye.

Pa Met Zot Lespwar dan Bann Rises Ki Pa Dirab

15. (a) Kuma eski sertin dimunn servi zot rises? (b) Me kuma eski David li, li ti anvi servi so rises?

¹⁵ Okenn par, la Bib pa dir ki David ti sorti dan enn gran fami, uswa so fami ti byin ris. Se pandan so reyn ki David finn gayn buku rises. An zeneral, buku dimunn pa montre zot rises. Zot fer tu pu ogmant zot rises, ek zot depans sa dan enn fason egois. Ena lezot ki servi zot larzan pu glorifye zotmem. (Matthieu 6:2) Me David li, li pa ti servi so rises dan sa fason-la. Li ti anvi onor Jéhovah. Li ti dir Nathân ki li anvi konstrir enn tanp pu Jéhovah. Dan sa tanp-la, pu ena lars-de-lalyans ki sa lepok-la ti pe “res dan enn latant an twal,” dan Jérusalem. Jéhovah ti byin apresye lintansyon ki David ti ena. Me, atraver Nathân Li ti dir David ki se pa li ki pu konstrir tanp, me so garson Salomon.—2 Samuel 7:1, 2, 12, 13.

16. Ki bann preparasyon David ti fer pu konstriksyon tanp?

¹⁶ David ti rasanble tu bann materyo ki ti pu servi dan sa gran proze konstriksyon-la. David ti dir Salomon: “Pu lakaz Jéhovah, mo’nn prepar san mil talan lor ek enn milyon talan larzan, ek telman ena buku kwiv ek feray ki pa kapav peze, ek mo finn prepar dibwa ek bann pyer, me to pu azut ankor.” Personelman, David finn donn 3,000 talan lor ek 7,000 talan larzan.a (1 Chroniques 22:14; 29:3, 4) David pa ti montre li zenere sinpleman pu lizye dimunn. Non, se so lafwa ek so latasman ar Bondye ki ti pus li pu ofer so rises a Jéhovah. David ti rekonet ki Jéhovah limem la Surs so rises, ek li ti dir Jéhovah: “Tu kitsoz sorti ar twa, ek nu finn donn twa seki sorti dan to lamin-mem.” (1 Chroniques 29:14) David ti ena enn leker zenere, ek sa finn pus li pu fer tu seki li kapav pu favoriz vre ladorasyon.

17. Kuma eski konsey ki truv dan 1 Timothée 6:17-19, aplik pu bann ris ek bann pov?

¹⁷ Nu’si nu kapav servi nu rises pu fer seki bon. Olye nu amenn enn lavi materyalis, li pu pli bon ki nu rod laprobasyon Bondye. Se sa ki pu ed nu truv vre sazes ek vre boner. Paul ti ekrir: “Donn lord bann ki ris dan sa sistem-la ki fode pa zot fer vantar, ek fode pa zot met zot lespwar dan bann rises ki pa dirab, me plito an Bondye, ki donn nu tu kitsoz an abondans pu nu plezir. [Ankuraz zot] pu fer dibyin, pu vinn ris dan bann bon aksyon, pu vinn zenere, ek pre pu partaze, kumsa zot pu poz avek swin enn bon fondman pu lavenir, ek zot pu sezi lavi veritab.” (1 Timothée 6:17-19) Ki nu sityasyon ekonomik bon uswa pa tro bon, anu kont lor lespri Bondye, ek anu amenn enn lavi ki pu fer nu vinn “ris devan Bondye.” (Luc 12:21) Pena nanyin ki ena plis valer ki laprobasyon nu bon Papa ki dan lesyel.

Prezant Umem Devan Bondye Kuma enn Dimunn Apruve

18. Kuma eski David finn les enn bon legzanp pu nu, bann Kretyin?

¹⁸ Tutlong so lavi, David ti rod laprobasyon Jéhovah. Li ti sante: “Donn mwa to faver, A Bondye, donn mwa to faver, parski mo nam finn gayn to proteksyon.” (Psaume 57:1) So konfyans an Jéhovah pa ti dan vid. Kan David ti vinn vye, la Bib dir ki “li’nn byin viv.” (1 Chroniques 23:1) Mem si David ti fer bann pese grav, bann dimunn ankor rapel li kuma enn parmi bann temwin Jéhovah ki ti ena enn gran lafwa.—Hébreux 11:32.

19. Kuma eski nu kapav prezant nu devan Bondye kuma enn dimunn apruve?

¹⁹ Kan nu fer fas ar bann sanzman dan nu lavi, li bon ki nu rapel ki, parey kuma Jéhovah ti sutenir David, ti fortifye li ek koriz li, Li kapav fer parey pu nu. Lapot Paul usi ti konn buku sanzman dan so lavi. Me li usi, parey kuma David, li ti res fidel ar Jéhovah ek li’nn tuzur kont lor lespri Bondye. Li ti ekrir: “Pu tu kitsoz mo ena kuraz grasa Selwi ki donn mwa lafors.” (Philippiens 4:12, 13) Si nu kont lor Jéhovah, Li pu fer nu reysi. Dayer, se sa ki Li anvi. Si nu ekut Li ek nu vinn pros ar Li, Li pu donn nu lafors ki nu bizin pu fer so volonte. Ek si nu kontiyn kont lor lespri Bondye, nu pu kapav ‘prezant numem devan Bondye kuma enn dimunn apruve’ asterla ek pu leternite.—2 Timothée 2:15.

[Notes]

Kuma U Pu Reponn?

• Kuma eski nu kapav protez nu kont lorgey?

• Kifer nu bizin pa tir vanzans numem?

• Kuma eski nu bizin konsider la disiplinn?

• Kifer nu bizin met nu konfyans an Bondye, ek pa dan la rises?

[Zimaz lor paz 28]

David ti kont lor lespri Bondye ek li ti rod so laprobasyon. Eski u’si u fer parey?

[Zimaz lor paz 30]

“Tu kitsoz sorti ar twa, ek nu finn donn twa seki sorti dan to lamin-mem”