Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w05 1/7 p. 8-p. 11 par. 11
  • Point biblik interessant dan deuxieme livre Samuel

Pena video ki disponib pou seki ou finn swazir.

Sori, enn erer inn anpes sa video-la zwe.

  • Point biblik interessant dan deuxieme livre Samuel
  • La Tour de Garde pé annonce Royaume Jéhovah—2005
  • Soutit
  • Lor Mem Size
  • DAVID VINN “DE PLUS EN PLUS GRAND”
  • (2 Samuel 1:1–10:19)
  • Reponse pou bann question biblik:
  • JÉHOVAH FAIRE MALHEUR VINN KONT CELUI KI LI FINN CHOISIR
  • (2 Samuel 11:1–20:26)
  • ANOU TOMBE “DAN LA MAIN JÉHOVAH”
  • (2 Samuel 21:1–24:25)
  • Nou kapav vinn bann dimoune ki ‘selon leker Bondié’
  • Anu Kont lor Lespri Bondye kan Ena Sanzman dan Nu Lavi
    La Tour de Garde pé annonce Royaume Jéhovah—2004
  • “Enseigne moi pou faire to volonté”
    La Tour de Garde pé annonce Royaume Jéhovah—2012
  • Bann Israélite demann enn le roi
    La Bible—Ki message ena ladan?
  • David Vinn Lerwa
    Mo Liv Zistwar Labib
Rod Plis
La Tour de Garde pé annonce Royaume Jéhovah—2005
w05 1/7 p. 8-p. 11 par. 11

Parole Jéhovah vivant

Point biblik interessant dan deuxieme livre Samuel

KAN enn dimoune reconette souveraineté Jéhovah, eski sa vedir ki li bizin obeir Li dan enn maniere parfait? Eski enn dimoune ki fidel faire touletan seki droite dan lizié Bondié? Ki qualité dimoune Jéhovah considere “selon so leker”? (1 Samuel 13:14) Deuxieme livre Samuel reponn sa bann question-la.

Deuxieme livre Samuel ti ecrire par Gad ek Nathân, deux prophete ki ti bien proche avek David, le roi Israël.a Livre-la finn terminé vers 1040 a.n.l., vers la fin regne David, ki ti regné pendant 40 an. Sa livre-la raconte surtout zistoire David ek so relation avek Jéhovah. Sa recit interessant-la montré couma, enba direction enn lé-roi courageux, enn nation ki dechiré par bann la-guerre, vinn enn royaume kot ena l’unité ek la prosperité. C’est enn zistoire ki rempli avek bann sentiment humain ki exprimé dan enn fason bien fort.

DAVID VINN “DE PLUS EN PLUS GRAND”

(2 Samuel 1:1–10:19)

Fason ki David reagir kan li tann la mort Saül ek Yonathân, faire nou koné ki sentiment li ti ena pou zot ek pou Jéhovah. Dan Hébrôn, tribu Juda etabli David couma zot lé-roi. Ish-Bosheth, garson Saül vinn lé-roi lor bann lezot tribu Israël. David contigne vinn “de plus en plus grand,” ek apepré sept an six mois plitar, li vinn le roi lor tou bann tribu Israël.—2 Samuel 5:10.

David laguerre kont bann Yebousite, li prend Jérusalem, ek li faire sa la-ville-la vinn capital so royaume. Premier fois ki li essaye amenn l’arche l’alliance dan Jérusalem, sa fini en catastrophe. Mais deuxieme coup, David reussi, ek li dansé dan la joie. Jéhovah faire enn l’alliance avek David pou donne li enn royaume. David gagne la victoire lor so bann l’ennemi parski Bondié contigne aide li.

Reponse pou bann question biblik:

2:18—Kifer presente Yoab ek so deux frere couma trois garson Tserouïa, zot mama? Dan bann l’Écritures hébraïques, c’est bann papa ki ti compté lor la liste bann ancetre. Kitfois, Tserouïa so missié ti mort jeune, ou-soit pa ti juge li digne pou parette dan bann recit la Bible. Li aussi possible ki mentionne Tserouïa, parski li ti soeur ou-soit demi-soeur David. (1 Chroniques 2:15, 16) Sel fois kot mentionne papa sa trois frere-la, c’est kan pé koz place kot ti enterre li dan Bethléhem.—2 Samuel 2:32.

3:29—Ki vedir l’expression “enn zom ki saisi baton ki tourné pou fabrik la toile”? En principe, c’est bann madame ki ti fabrik la toile. Alors, kitfois servi sa l’expression-la pou koz lor bann missié ki pa ti kapav faire bann kitsoz couma par exemple al laguerre, ek a cause sa, zot ti obligé faire l’ouvrage ki normalement enn madame ti pou faire.

5:1, 2—Comié lé-temps apré ki finn touye Ish-Bosheth, eski David inn vinn le roi lor tou bann tribu Israël? Li parette raisonnable pou dire ki Ish-Bosheth ti commence regné pa trop longtemps apré la mort Saül, apepré dan mem lepok kot David ti vinn le roi dan Hébrôn, ek li ti regné pendant deux an. David ti dirige Juda depuis la ville Hébrôn pendant sept an six mois. Enn tipé lé-temps apré ki David vinn le roi lor tou bann tribu Israël, li ti faire Jérusalem vinn capital so royaume. Alors, apepré cinq an ti passé entre la mort Ish-Bosheth ek le temps kan David ti vinn le roi lor tou bann tribu Israël.—2 Samuel 2:3, 4, 8-11; 5:4, 5.

8:2—Comié Moabite bann Israélite inn touyé apré ki zot inn gagne la victoire lor zot? Pou decidé comié Moabite zot ti pou touyé, li possible ki bann Israélite pa ti compté, zot ti plutot mesuré. Li parette ki David ti faire bann Moabite allongé enba, enn a coté lot. Apré, li ti faire mesure sa rangé Moabite-la avek enn la-corde. Apparemment, li ti faire touye deux longueur la-corde, setadir deux tiers bann Moabite, ek li ti sap la vie enn longueur la-corde, setadir enn tiers parmi zot.

Bann leson pou nou:

2:1; 5:19, 23. David ti consulté Jéhovah avant li ti al reste Hébrôn, ek avant li ti al laguerre kont so bann l’ennemi. Nou aussi, nou bizin rod direction Jéhovah avant nou prend bann decision ki pou affecté nou spiritualité.

3:26-30. Kan rod vengeance, sa ena bann consequence triste.—Romains 12:17-19.

3:31-34; 4:9-12. David pa ti ena l’esprit vengeance, ek li pa ti nourri okenn mauvais sentiment. Sa li enn l’exemple pou nou.

5:12. Jamais nou bizin blié ki Jéhovah inn montré nou dan ki fason nou bizin marché, ek Li finn donne nou possibilité pou ena bann bon relation avek Li.

6:1-7. Mem si David ti ena bann bon l’intention, li ti desobeir commandement Jéhovah, kan li ti essaye transporte l’arche l’alliance lor enn charrette, ek li pa ti reussi. (Exode 25:13, 14; Nombres 4:15, 19; 7:7-9) Seki Ouzza ti faire kan li ti trappe l’Arche, aussi montré ki mem si nou ena bann bon l’intention, sa pa change seki Jéhovah demann nou faire.

6:8, 9. Dan enn situation bien difficile, David ti en colere premier coup, apré li ti peur—kitfois li ti mem rann Jéhovah responsable pou so malheur. Nou bizin faire attention pou pa rann Jéhovah responsable pou bann problem ki nou gagné parski nou pa finn prend compte so bann commandement.

7:18, 22, 23, 26. David ti ena l’humilité, li ti ena enn l’attachement zis pou Jéhovah tousel, ek li ti interessé pou glorifié nom Bondié. C’est sa bann qualité-la ki nou bizin imité.

8:2. Enn prophetie ki ti prononcé apepré 400 an avant, realisé. (Nombres 24:17) Parole Jéhovah, li touletan realisé.

9:1, 6, 7. David ti garde so promesse. Nou aussi, nou bizin faire tou seki nou kapav pou garde nou parole.

JÉHOVAH FAIRE MALHEUR VINN KONT CELUI KI LI FINN CHOISIR

(2 Samuel 11:1–20:26)

Jéhovah dire David: ‘Asterla, a partir to prop lakaz, mo pé faire malheur vinn kont toi, mo pou prend to bann madame devant to lizié ek mo pou donne zot to prochain, ek li pou certainement gagne relation avek to bann madame en plein li-jour.’ (2 Samuel 12:11) Kifer Jéhovah prononce sa jugement-la? C’est a cause peché David avek Bath-Shéba. Mem si Jéhovah pardonne David parski li repenti, li pa kapav evite consequence so peché.

Premierement, zenfant ki Bath-Shéba gagné, li mort. Apré, tifi David, Tamar, ki vierge, violé par so demi-frere Amnôn. Absalom, prop frere Tamar, touye Amnôn par vengeance. Absalom complote kont so prop papa ek faire li-mem vinn le roi dan Hébrôn. David obligé sauvé, quitte Jérusalem. Absalom gagne relation avek dix parmi bann concubine so papa ki ti’nn resté pou occupe lakaz. David regagne so trone seulement apré la mort Absalom. Shéba ki dan tribu Benjamin, leve enn revolte, mais sa termine par so la-mort.

Reponse pou bann question biblik:

14:7—Ki vedir l’expression “mo la-braise charbon”? La braise charbon ki encore pé brulé doucement-doucement represente enn descendant ki encore en vie.

19:29—Kifer David ti ena sa reaction-la kan li ti tann bann explication Mephibosheth? Kan li ti ecoute Mephibosheth, surement David ti realisé ki li ti’nn faire enn erreur kan li finn croire bann parole Tsiba. (2 Samuel 16:1-4; 19:24-28) Surement li ti agacé a cause sa, ek li pa ti envie tann plus l’explication lor la.

Bann leson pou nou:

11:2-15. Sa recit franc concernant bann peché David-la, montré bien ki la Bible, li Parole inspiré Bondié.

11:16-27. Kan nou faire enn peché grave, nou bizin pa rod couvert li couma David ti faire. Plutot, nou bizin confesse nou peché ar Jéhovah ek rod l’aide bann ancien dan la congregation.—Proverbes 28:13; Jacques 5:13-16.

12:1-14. Nathân inn laisse enn bon l’exemple pou bann ancien dan la congregation. Bann ancien bizin aide bann ki’nn tombe dan peché corrige zot conduite. Zot bizin faire bien attention ki zot faire sa dan enn bon fason.

12:15-23. David ti comprend bien seki ti pé arrive li, ek sa ti aide li pou reagir dan bon fason kan li ti bizin faire face ar bann situation difficile.

15:12; 16:15, 21, 23. Kan Ahithophel, ki ti enn conseiller bien malin, ti pensé ki Absalom ti pou vinn le roi, l’orgueil ek desir pou gagne grandeur, ti faire li vinn enn traitre. L’intelligence kapav vinn enn piege si nou pena l’humilité ek nou pa fidel.

19:24, 30. Mephibosheth ti vrai-mem reconnaissant pou l’amour fidel ki David ti manifesté envers li. Li ti soumette avek tou so leker ar decision ki le roi ti prend concernant Tsiba. La reconnaissance envers Jéhovah ek so l’organisation bizin pousse nou pou soumette.

20:21, 22. Sagesse enn sel dimoune kapav empeche beaucoup lezot gagne problem. —Ecclésiaste 9:14, 15.

ANOU TOMBE “DAN LA MAIN JÉHOVAH”

(2 Samuel 21:1–24:25)

Pendant trois an ena enn famine a cause dette di-sang Saül, ki ti touye bann Guibéonite. (Josué 9:15) Pou venge-zot, bann Guibéonite demandé ki touye sept garson Saül. David donne zot bann garson Saül, ek enn la-pluie vinn arrete la secheresse ki ti ena. Quatre geant Philistin “tombé par la main David ek par la main so bann serviteur.” —2 Samuel 21:22.

David commette enn peché grave kan li demann pou faire enn recensement ki pa en accord avek volonté Jéhovah. Li repenti ek li choisir pou tombe “dan la main Jéhovah.” (2 Samuel 24:14) Resultat: 70,000 dimoune mort par enn l’epidemie. David suive commandement Jéhovah, ek sa malheur-la arreté.

Reponse pou bann question biblik:

21:8—Kifer sa verset-la dire ki Mikal, tifi Saül, ti ena cinq garson, kan 2 Samuel 6:23 dire ki li ti mort sans zenfant? L’explication ki plus accepté, c’est ki zot ti bann garson Mérab, Mikal so soeur ki ti marié avek Adriël. Kitfois, Mérab ti mort jeune, ek Mikal, ki pa ti ena zenfant, ti elevé sa bann garson-la.

21:9, 10—Pendant comié lé-temps Ritspa ti veille so deux garson ek sa cinq ti-zenfant Saül ki bann Guibéonite ti’nn touyé-la? Ti pendi sa sept zom-la “dan bann premier jour la moisson,” vers mars ou-soit avril. Ti laisse zot lekor exposé lor montagne. Ritspa ti veille lor sa bann lekor-la la nuit li jour ziska ki Jéhovah arrete la secheresse ek montré ki so colere finn passé. Gros la-pluie pa ti kapav tombé avant la fin la moisson en octobre. Alors li possible ki Ritspa ti monte la garde pendant cinq ou-soit six mois. Apré sa, David ti faire enterre zot bann lezo.

24:1—Kifer David ti faire enn peché grave kan li ti faire recensement le peuple? La loi pa ti empeche faire recensement le peuple. (Nombres 1:1-3; 26:1-4) La Bible pa dire seki ti pousse David pou faire sa recensement-la. Mais, 1 Chroniques 21:1 montré ki c’est Satan ki ti incite li pou faire sa. De tout fason, Yoab, chef l’armée David, ti koné ki sa decision David-la ti mauvais, ek li ti essaye decourage li pou faire sa.

Bann leson pou nou:

22:2-51. Dan sa cantik-la, David presente bien Jéhovah couma vrai Bondié, ki merite ki nou mette tou nou confiance en Li!

23:15-17. David ti ena tellement enn profond respé pou la loi Bondié lor la vie ek di-sang ki li ti evite faire enn kitsoz ki ti kapav mem faire croire ki li ti pé desobeir sa la-loi-la. Nou bizin ena enn l’attitude coumsa envers tou bann commandement Bondié.

24:10. Conscience David ti pousse li pou repenti. Eski nou conscience assez sensible pou pousse nou pou repenti?

24:14. David ti sur ki Jéhovah ena plus misericorde ki bann dimoune. Eski nou ena sa mem l’assurance-la?

24:17. David ti regretté ki so peché ti faire nation Israël en entier souffert. Enn pecheur ki’nn repenti bizin ena remord a cause l’opprobre ki so conduite kapav inn jeté lor la congregation.

Nou kapav vinn bann dimoune ki ‘selon leker Bondié’

Jéhovah ti trouve deuxieme lé-roi Israël couma ‘enn dimoune selon So leker.’ (1 Samuel 13:14) David pa ti jamais ena doute lor bann principe droite Jéhovah, ek li pa ti rod vive independant ar Li. Chaque fois ki David ti faire enn peché, li ti reconette sa, li ti accepté la discipline, ek li ti ré-vinn dan bon chemin. David ti enn zom ki ti fidel. Li ti pou bon ki nou imite li, surtout kan nou commette enn peché, pa vrai?

La vie David montré bien ki reconette souveraineté Jéhovah vedir aussi accepté so bann principe concernant seki bon ek seki mauvais, ek faire tou seki nou kapav pou vive dapré sa, avek fidelité. Sa, li enn kitsoz ki nou kapav faire. Nou bizin vrai-mem reconnaissant pou bann leson ki nou tiré dan deuxieme livre Samuel! Sa message inspiré par Bondié ki ena ladan-la, li vrai-mem vivant ek li puissant.—Hébreux 4:12.

[Note]

a Mem si Samuel pa finn ecrire sa livre-la, appel livre-la par so nom parski avant, dan collection bann livre la Bible en hébreu, sa deux livre Samuel-la ti ensam dan enn sel rouleau. Samuel ti ecrire pli grand partie dan premier livre Samuel.

[Zimage, page 8]

David pa ti blié kisannla ti etabli li dan so position lé-roi, ek sa ti aide li pou garde so l’humilité

[Zimage, page 10]

“Asterla, a partir to prop lakaz, mo pé faire malheur vinn kont toi”

Bath-Shéba

Tamar

Amnôn

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze