U Swa lor Bann Prinsip

ESKI u enn dimunn ki gide par bann prinsip? Uswa eski u konsider bann prinsip enn tipe demode? Avredir, sak dimunn gide par sertin kalite prinsip ki li, li truv inportan. Dapre The New Shorter Oxford English Dictionary, kapav definir enn prinsip kuma “enn kod personel pu bann aksyon ki drwat.” Bann prinsip inflyans nu bann desizyon ek determinn direksyon nu pran dan lavi. Bann prinsip kapav azir kuma enn busol.

Par egzanp, Zezi ti ankuraz so bann disip pu obeir Lareg-Dor, ki truv dan Matye 7:12: “Alor, tu kitsoz ki zot anvi ki bann dimunn fer pu zot, zot bizin fer parey pu bannla.” Bann disip Confucius swiv bann prinsip li [tu seki konvenab dan manyer viv] ek jen [rann servis limanite], ki inplik usi bann kalite kuma bonte, limilite, respe, ek fidelite. Mem bann dimunn ki pa relizye ena bann priorite uswa bann prinsip ki gid zot kondwit.

Ki Kalite Prinsip Nu Bizin Swazir?

Me, fode pa bliye ki bann prinsip kapav swa bon swa move. Par egzanp, pli ale enn kantite dimunn motive par enn mantalite: “mwa avan.” Mem si kitfwa buku panse ki zot pena sa mantalite la, sa latitid “mwa avan” la li enn prinsip kondwit ki buku dimunn adopte kan zot abandonn bann prinsip elve lor kondwit. Sa mantalite la reflet enn lespri egois ek li suvan akonpayne par enn dezir materyalis ki pa rezonab. Enn direkter Televizyon an Chine finn dir: “Nu ena zis de prinsip. Enn la satisfer dezir pu aste. Lot la: fer kas.”

Sa latitid “mwa avan” la kapav azir kuma enn lema. Ki lefe enn lema ena lor enn busol? Kan tulede enn akote lot, zegwi busol la pa pwint dan direksyon ki bizin. Pareyman, kan sa mantalite “mwa avan” la pus enn dimunn pu pas so bann dezir avan tu kitsoz, sa kapav fer so busol moral, uswa so kod bon kondwit fose.

Eski u pu etone si u aprann ki sa latitid “mwa avan” la li pa enn mantalite modern sa? Sa ti kumanse kan nu bann premye paran ti manifeste sa latitid la dan zardin Edenn ek zot ti abandonn prinsip kondwit ki nu Kreater ti etabli. Alor, sa finn sanz zot busol moral. Antan ki bann desandan Adan ek Ev, limanite usi afekte par sa latitid “mwa avan” la.—Zenez 3:6-8, 12.

Nu pe truv sa latitid la plis pandan lepok ki profesi Labib apel “bann dernye zur,” kot “bann letan kritik pu fer fas ek difisil pu siporte.” Buku dimunn “kontan zot mem.” Donk, li pa drol ki nu tante pu adopte sa mem latitid la nu’si.—2 Timote 3:1-5.

Kitfwa u pu dakor avek enn zenn zan ki apel Olaf. Li ti ekrir enn filyal Bann Temwin Zeova an Europe: “Li byin difisil pu res drwat lor plan moral, sirtu pu nu, bann zenn. Silvuple kontiyn rapel nu ki li neseser pu res atase avek bann prinsip Labib.”

Olaf ti enn kikenn ki ti ena disernman. Bann prinsip Bondye kapav ed nu—zenn uswa vye—pu gard bann prinsip elve lor kondwit. Zot kapav usi permet nu reziste kont sa mantalite “mwa avan” la. Si u ti pu kontan aprann plis kuma bann prinsip Labib kapav vremem ed u, egzaminn prosin lartik.

[Zimaz lor paz 4]

Zordi buku dimunn pena okenn konsiderasyon pu bann bezwin lezot