U Kapav Tir Profi ar Bann Prinsip Bondye

U KONN byin ki bann zanimo dirize par linstin. Buku masinn finn programe pu swiv bann linstriksyon. Me bann dimunn zot, zot finn kre pu swiv bann prinsip. Kuma eski u kapav sir ki sa li vre? Ebyin, kan Zeova, Kikenn ki finn etabli tu bann prinsip drwat, ti kre bann premye dimunn, Li ti dir: “Anu fer zom dan nu resanblans, parey kuma nu ete.” Kreater Li enn lespri; Li pena enn lekor fizik parey kuma nu. Alor, nu finn kre dan so “resanblans” parski nu kapav reflekte so personalite, ek manifeste enn tigit so bann bon kalite. Dimunn ena kapasite pu diriz zot lavi dapre bann prinsip, setadir dapre enn kod aksyon ki drwat pu zot. Zeova finn fer ekrir buku sa bann prinsip la dan so Parol.—Zenez 1:26; Zan 4:24; 17:17.

Enn kikenn kapav dir: ‘Me, ena plizir santenn prinsip dan Labib. Li inposib pu mwa konn tusala.’ Li vre. Me, remarke: Mem si tu bann prinsip Bondye zot profitab, ena ladan ki ena plis pwa ki lezot. U kapav truv sa dan Matye 22:37-39, kot Zezi ti montre ki parmi bann komannman ek bann prinsip Lalwa Moiz, ti ena ki ti pli inportan ki lezot.

Ki bann prinsip ki pli inportan? Bann prinsip pli inportan dan Labib se bann prinsip ki ena enn lefe direk lor nu relasyon avek Zeova. Si nu obeir sa bann prinsip la, Kreater Limem ki pu inflyans nu busol moral. Anplis, ena bann prinsip ki ena enn lefe lor nu bann relasyon avek lezot dimunn. Kan nu met an pratik sa bann prinsip la, sa ed nu pu lit kont sa mantalite “mwa avan” la.

Anu kumans avek enn parmi bann laverite ki pli inportan dan Labib. Ki sa laverite la sa, ek ki lefe li ena lor nu?

‘Kikenn Ki Pli Ot lor Later Antye’

Labib montre klerman ki Zeova, Li nu Gran Kreater, Bondye Tu-Pwisan. Personn pa kapav egal ar Li, uswa pran so plas. Sa li enn laverite byin inportan ki ena dan Labib.—Zenez 17:1; Eklezyast 12:1.

Enn parmi bann ekrivin liv Psom finn dir lor Zeova: “To tusel Pli Ot lor later antye.” Ansyin Lerwa David ti dir: “O Zeova, Rwayom pu twa, to mem Kikenn ki leve kuma sef lor tu kitsoz.” Ek Zeremi enn profet byin renome ti santi li puse pu dir: “Dan okenn fason pena personn kuma twa, O Zeova. To gran, ek to non gran an pwisans.”—Psom 83:18; 1 Kronik 29:11; Zeremi 10:6.

Kuma eski nu kapav aplik sa bann laverite lor Bondye la dan nu lavi tulezur?

Li kler kisannla ki vremem bizin gayn premye plas dan nu lavi—nu Kreater, sa Kikenn ki donn lavi la. Donk, eski li pa normal ki nu reziste kont tu tandans pu atir latansyon lor nu mem—enn tandans ki kapav pli for pu sertin ki pu lezot? Enn prinsip saz ki kapav gid nu se: “Fer tu kitsoz pu laglwar Bondye.” (1 Korintyin 10:31) Profet Danyel finn les enn bon legzanp dan sa domenn la.

Resi istorik rakont nu ki enn fwa Lerwa Babilonn Nebudkadnetzar ti bulverse par enn rev ek li ti demann pu konn so sinifikasyon. Alor ki personn pa ti kone ki pu dir, Danyel finn dir lerwa egzak pu egzak seki li ti anvi kone. Eski Danyel ti rod gayn merit pu sa? Non, li ti donn laglwar “Bondye ki dan lesyel ek ki revel bann sekre.” Danyel ti kontiyne dir: “Pa parski dan mwa ena plis sazes plis ki dan lezot [kreatir] vivan, ki finn revel mwa sa sekre la.” Danyel ti enn dimunn ki ti ena bann prinsip. Pa etonan ki dan liv Danyel, dekrir li trwa fwa kuma enn kikenn “byin dezirab”devan lizye Bondye.—Danyel 2:28, 30; 9:23; 10:11,19.

U pu tir profi kan u imit Danyel. Kan u swiv legzanp Danyel, u bann mobil zwe enn rol inportan. Kisannla bizin gayn loner pu seki u fer? Dan ninport ki sityasyon u ete, u ena posibilite pu azir an armoni avek sa prinsip Labib ki byin inportan la, setadir Zeova li Suverin Senyer. Si u fer sa, u pu “byin dezirab” devan so lizye.

Anu get asterla de prinsip debaz ki kapav gid nu dan nu relasyon avek lezot dimunn. Pwiski partu bann dimunn ena sa mantalite “mwa avan” la, sa domenn la li partikilyerman enn defi.

“Avek enn Lespri Limilite”

Bann ki met zot mem an avan, zot rarman satisfe. Laplipar parmi zot anvi tuletan enn meyer lavi, ek zot anvi sa asterla mem. Pu zot, modesti li enn zar febles. Zot konsider pasyans kuma enn kitsoz ki zis lezot ki bizin manifeste. Pu zot, kan zot anvi avanse dan lavi, zot gayn drwa fer ninport ki kitsoz. Eski u panse u kapav swazir enn kondwit diferan?

Bann serviter Bondye truv sa latitid la sak zur, me fode pa ki zot kontamine ar sa. Bann Kretyin ki mir lor plan spirityel aksepte sa prinsip ki dir: “Pa dimunn ki rekomann limem, [ki] apruve, me sa kikenn ki Zeova rekomande la.”—2 Korintyin 10:18.

Si u met an pratik prinsip ki dan Filipyin 2:3, 4, sa pu ed u. Sa pasaz la ankuraz u pu pa fer “nanyin dan enn lespri pu lager ek pu met [u] mem an avan, me avek enn lespri limilite, [konsider] lezot kuma pli gran ki [u].” Kumsa u ‘pa pu get zis lintere u prop zafer me usi lintere personel lezot.’

Gideonn, enn ziz parmi bann Ebre dan lepok lontan, ti enn kikenn ki ti ena enn bon latitid lor limem ek ki ti konn estim valer ki li ti ena. Li pa ti rod vinn enn sef lor Izrael. Me, kan ti swazir li pu akonpli sa travay la, Gideonn ti fer remarke ki li pa ti merit sa. Li ti explike: “Sa grup mil dimunn dan ki mo fami ete la, sa mem pli tipti dan Manase, ek mo mem pli tipti dan lakaz mo papa.”—Ziz 6:12-16.

Anplis, apre ki Zeova ti fer Gideonn gayn enn viktwar, bann zom Efraim ti rod lager avek li. Kuma eski Gideonn ti reazir? Eski viktwar la ti gonfle li ek fer li santi li kuma enn dimunn pli inportan? Non. Li finn evit enn ta problem par repons dus ki li’nn done: “Ki mo’nn kapav fer an konparezon avek zot?” Gideonn ti ena lespri limilite.—Ziz 8:1-3.

Li vre, sa bann levennman konsernan Gideonn la ti arive byin lontan. Kan mem sa, li inportan nu egzaminn sa resi la. U kapav truve ki Gideonn ti ena enn latitid byin diferan ar seki nu truve zordi, ek li ti viv an akor avek sa, pu so profi.

Sa latitid atir latansyon lor nu mem ki byin popiler la, kapav deform lopinyon ki nu ena lor nu valer. Me, bann prinsip Labib koriz sa deformasyon la ek li anseyn nu nu vre valer an rapor avek nu Kreater ek lezot.

Kan nu pran kont bann prinsip Labib, nu sirmont sa latitid “mwa avan” ki byin popiler la. Nu pu nepli les bann santiman uswa bann tre karakter diriz nu. Plis nu aprann lor bann prinsip drwat, plis nu pu konn sa Kikenn ki finn etabli sa bann prinsip la. Wi, li vo lapenn pran byin kont bann prinsip Bondye kan nu lir Labib.—Get lankadre.

Zeova finn fer dimunn pli siperyer ki bann zanimo, ki azir sirtu par linstin. Swiv volonte Bondye vedir usi met an pratik so bann prinsip. Kumsa nu busol moral pu mars kuma bizin, ek li pu diriz nu dan nuvo sistem ki Bondye pu fer. Labib donn nu rezon pu atann byinto enn nuvo sistem lor later antye kot “lazistis pu bizin reste.”— 2 Pyer 3:13.

[Lankadre/Zimaz lor paz 6]

Bann Prinsip Labib Ki Kapav Ed Nu

Dan fami:

“Ki sakenn pa rod so prop lavantaz, me lavantaz lezot.”—1 Korintyin 10:24.

“Lamur . . . pa rod so prop lintere.”—1 Korintyin 13:4, 5.

“Ki sakenn usi dan so kote, kontan so fam kuma li kontan limem.”—Efezyin 5:33.

“Zot, bann fam, sumet ar zot mari.”—Kolosyin 3:18.

“Ekut to papa grasa ki to ena lavi, ek pa bizin mepriz to mama parski li’nn vinn vye.”—Proverb 23:22.

Dan Lekol, dan Travay, uswa dan biznes:

“Enn balans ki finn trike li enn move kitsoz . . . Sa move dimunn la pe fos bann lapey.”—Proverb 11:1, 18.

“Fode ki voler aret kokin, me plito ki li travay dir.”—Efezyin 4:28.

“Si enn kikenn pa anvi travay, fode pa ki li manze usi.”—2 Tesalonisyin 3:10.

“Ninport ki zot fer, fer li kuma dir pu Zeova avek tu zot nam.”—Kolosyin 3:23.

“Nu’le gard enn kondwit onet dan tu kitsoz.”—Ebre 13:18.

Latitid anver rises:

“Kikenn ki pe prese pu gayn larises pa pu res inosan.”—Proverb 28:20.

“Enn kikenn ki kontan larzan pa pu satisfe ar larzan.”—Eklezyast 5:10.

Ziz nu prop merit:

“Kan dimunn rod zot prop laglwar, eski vremem enn laglwar sa?”—Proverb 25:27.

“Les plito enn etranze donn twa loner, olye to prop labus.”—Proverb 27:2.

“Mo dir sakenn ant zot pa pans plis ki bizin lor limem.”—Romin 12:3.

“Si enn kikenn panse ki li vo kitsoz alor ki li pa vo nanyin, abe li pe anbet so prop lintelizans.”—Galat 6:3.

[Zimaz lor paz 5]

Danyel ti donn Bondye loner ki Li merite

[Zimaz lor paz 7]

Si nu pran kont bann prinsip Bondye dan nu relasyon avek lezot, sa pu permet nu gard bann bon relasyon ek truv boner

[Foto lor paz 7]

U.S. Fish & Wildlife Service, Washington, D.C./Robert Bridges