Kris Li Nu Lider—Eski Sa Li Reel pu U?

“Pa les personn apel zot ‘lider,’ parski zot ena enn sel Lider, Kris.”—MATYE 23:10.

1. Kisannla sel Lider bann vre Kretyin?

TI Mardi, le 11 Nizan. Trwa zur plitar, pu tuy Zezi. Sa ti so dernye vizit dan tanp. Sa zur la, Zezi ti transmet enn lanseynman inportan ar laful ki ti’nn rasanble la ek ar so bann disip. Li’nn dir: “Pa les lezot apel zot Rabi, parski zot ena enn sel anseynan, tandiki zot tu zot bann frer. Pa apel usi personn zot monper lor later, parski zot ena enn sel Papa, Seki dan lesyel la. Pa les lezot apel zot ‘bann lider,’ parski zot ena enn sel Lider, Kris.” (Matye 23:8-10) Vremem, Zezi Kris li Lider tu bann Kretyin.

2, 3. Kan nu ekut Zeova ek aksepte Lider ki Li finn etabli, ki lefe sa ena lor nu lavi?

² Direksyon Zezi antan ki Lider ena buku lefe profitab lor nu lavi kan nu aksepte li! Kan Bondye Zeova ti anons larive sa Lider la, Li ti dir atraver profet Izai: “E zot tu laba, bann ki swaf! Vinn ver delo. Ek tu bann ki pena larzan! Vini, aste ek manze. Wi, vinn aste divin ek dile san larzan ek san pri. . . . Ekut mwa byin, ek manz seki bon, ek ki zot nam profit byin lagres. . . . Gete! Mo finn donn li kuma temwin pu bann grup nasyonal, kuma enn lider ek enn komandan pu bann grup nasyonal.”—Izai 55:1-4.

³ Izai ti servi bann likid byin popiler—delo, dile, ek divin—kuma bann legzanp pu montre komye nu lavi personel li afekte kan nu ekut Zeova ek nu swiv Lider ek Komandan ki Li finn donn nu. Rezilta la li rafresisan, parey kumadir nu pe bwar enn ver delo fre enn zur kot fer so. Nu laswaf pu laverite ek pu lazistis pase. Parey kuma dile donn bann tibaba lafors ek ed zot pu grandi, ‘dile laparol’ fortifye nu ek ed nu pu grandi lor plan spirityel dan nu relasyon avek Bondye. (1 Pyer 2:1-3) Kisannla kapav dir ki divin pa donn lazwa dan bann fet? Pareyman, ador vre Bondye ek swiv bann pa sa Lider ki Li finn etabli la, ranpli nu lavi “zis ar lazwa.” (Deteronom 16:15) Dan sa ka la, li inportan ki nu tu—zenn ek vye, zom ek fam—montre ki direksyon Kris li reel pu nu. Donk, kuma eski nu kapav montre dan nu lavi tulezur ki Mesi li nu Lider?

Zenn—Kontiyn “Grandi dan Sazes”

4. (a) Ki ti arive kan Zezi ki ti ena 12 an, ti al Zerizalem dan lepok Pak? (b) Ki kantite li ti byin ranseyne alor ki li ti ena zis 12 zan?

⁴ Get legzanp ki nu Lider finn lese pu bann zenn. Mem si nu pa konn buku lor lanfans Zezi, enn levennman ki ti arive dan so lavi revel nu buku lor li. Kan Zezi ti ena 12 an, so bann paran ti amenn li Zerizalem pu selebre fet Pak, parey kuma sak lane. Dan sa lokazyon la li finn angaz enn konversasyon biblik, sibyin ki so fami finn kit li, finn ale san zot rann zot kont. Trwa zur plitar, so bann paran Zozef ek Mari, trakase, finn truv li dan tanp; “li ti pe asize omilye bann anseynan, li ti pe ekute ek li ti pe poz bannla kestyon.” Anplis, “tu bann ki ti pe ekut li ti etone par so lintelizans ek so bann repons.” Mazinn enn ku, Zezi ti ena zis 12 an, pa selman li ti kapav poz bann kestyon profon ek spirityel, me li ti donn usi bann repons intelizan! Pena dut ki formasyon ki so bann paran ti donn li ti zwe enn gran rol ladan.—Lik 2:41-50.

5. Kuma eski bann zenn kapav analiz zot latitid anver letid Labib an fami?

⁵ Kitfwa u enn zenn. Si u bann paran bann serviter Bondye devwe, sirman ena enn program letid Labib regilye an fami kot u. Ki u latitid anver letid an fami? Li bon ki u reflesi lor sa bann kestyon la: ‘Eski mo sutenir dispozisyon letid Labib an fami ar tu mo leker? Eski mo korpere ek pa fer nanyin ki kapav kas program ki finn etabli pu letid?’ (Filipyin 3:16) ‘Eski mo ena enn partisipasyon byin aktif dan letid? Kan neseser, eski mo poz bann kestyon konsernan size ki pe etidye ek fer komanter lor so aplikasyon? Amezir mo progrese spirityelman, eski mo pe devlop enn gu pu “manze solid [ki] pu bann dimunn mir”?’—Ebre 5:13, 14.

6, 7. Ki kantite valer enn program lektir Labib tulezur kapav ena pu bann zenn?

⁶ Enn program lektir Labib tulezur usi ena buku valer. Enn ekrivin Psom ti sante: “Ere sa zom ki pa finn mars dan konsey bann move dimunn, . . . me so plezir li dan lalwa Zeova, ek li lir so lalwa dusma-dusma lanwit lizur.” (Psom 1:1, 2) Zozye ki ti ranplas Moiz, ‘ti lir liv lalwa dusma-dusma lanwit lizur.’ Sa ti permet li azir avek sazes ek akonpli responsabilite ki Bondye ti donn li avek sikse. (Zozye 1:8) Nu Lider, Zezi Kris, ti dir: “Finn ekrir, ‘Enn zom bizin viv, pa zis avek dipin, me avek tu parol ki sorti dan labus Zeova.’” (Matye 4:4) Si nu bizin manze fizik sak zur, komye plis ankor nu bizin manze spirityel regilyerman!

⁷ Kan Nicole ki ti ena 13 an, ti pran konsyans so bezwin spirityel, li ti kumans lir Labib tulezur.a Asterla ki li ena 16 an, li finn lir Labib an antye enn fwa ek li’nn ariv lamwatye pu so dezyem fwa. So metod sinp. Li dir: “Mo fer mwa enn devwar pu lir omwin enn sapit par zur.” Kuma eski so lektir Labib tulezur finn ed li? Li reponn: “Ena buku move linflyans zordi. Tulezur mo fer fas avek bann presyon dan lekol ek dan lezot plas usi, ek sa li enn defi pu mo lafwa. Lektir Labib tulezur ed mwa rapidman pu rapel bann lalwa ek bann prinsip Labib ki ankuraz mwa pu reziste kont sa bann presyon la. Rezilta ki mo finn gayne: Mo santi mwa pli pros ar Zeova ek Zezi.”

8. Ki ti labitid Zezi konsernan sinagog, ek kuma eski bann zenn kapav imit li?

⁸ Zezi ti ena labitid ekute ek partisipe dan lektir Labib dan sinagog. (Lik 4:16; Akt 15:21) Wi, li byin bon ki bann zenn swiv sa legzanp la kan zot asiste regilyerman bann reynion Kretyin, kot lir ek etidye Labib! Pu montre so rekonesans pu sa bann reynion la, Richard ki ena 14 an dir: “Sa bann reynion la ena buku valer pu mwa. Laba pe tultan rapel mwa seki bon ek seki move, seki moral ek seki imoral, seki an akor avek Kris ek seki pa an akor avek li. Mo pena pu fer lexperyans amer pu mo aprann.” Wi, “nu kapav fer rapel Zeova konfyans, li fer dimunn ki pena lexperyans vinn saz.” (Psom 19:7) Nicole usi fer li enn devwar pu asiste tule sink reynion kongregasyon sak semenn. Li pas usi dezertan—trwazertan pu prepar sa bann reynion la.—Efezyin 5:15, 16.

9. Kuma eski bann zenn kapav kontiyn “progrese an sazes”?

⁹ Lepok zenes li enn bon lokazyon pu gayn ‘konesans lor sel vre Bondye, ek Zezi Kris, sa kikenn ki Li finn anvwaye la.’ (Zan 17:3) Kitfwa u konn bann zenn ki pas enn ta letan pu lir bann liv ti komik, get televizyon, zwe video games, uswa lor Internet. Kifer eski u bizin imit zot kan u kapav swiv legzanp parfe nu Lider? Kan li ti enn ti garson, li ti pran plezir pu aprann lor Zeova. Ek avek ki rezilta? Parski li ti kontan bann kitsoz spirityel “Zezi ti pe kontiyn grandi dan sazes.” (Lik 2:52) Alor u’si u kapav fer parey.

“Sumet Sakenn Ar So Kamarad”

10. Ki pu ed lavi fami vinn enn lasurs lape ek boner?

¹⁰ Lakaz kapav enn landrwa sekirite kot ena lape ek kontantman uswa enn landrwa kot ena diskisyon ek lager. (Proverb 21:19; 26:21) Si nu aksepte direksyon Kris, sa pu ogmant lape ek boner dan nu fami. Dayer, legzanp Zezi li enn model pu bann relasyon familyal. Labib dir: “Sumet sakenn ar so kamarad dan lakrint Kris. Fode ki bann fam sumet ar zot mari parey kuma ar Senyer, parski enn mari li sef so fam parey kuma Kris li sef kongregasyon, limem sover sa lekor la. . . . Mari, kontiyn kontan zot fam, parey kuma Kris usi finn kontan kongregasyon ek li finn donn limem pu kongregasyon.” (Efezyin 5:21-25) Ala seki lapot Pol ti ekrir kongregasyon Kolos: “Zot, bann zanfan, obeir zot paran dan tu kitsoz, parski sa li bon dan Senyer.”—Kolosyin 3:18-20.

11. Kuma eski enn mari kapav montre ki direksyon Kris reel pu li?

¹¹ Swiv sa konsey la vedir ki enn mari pran latet dan fami, so fam ed li fidelman, ek bann zanfan obeir zot paran. Me, lotorite zom kapav amenn boner selman kan li egzers li kuma bizin. Enn mari saz bizin aprann kuma pu egzers lotorite kan li imit so prop Sef ek Lider, Kris Zezi. (1 Korintyin 11:3) Mem kan plitar Zezi ti vinn “sef lor tu kitsoz pu kongregasyon,” li ti vinn lor later, “pa pu ki servi li, me pu li, li servi.” (Efezyin 1:22; Matye 20:28) Pareyman, enn mari Kretyin egzers so lotorite, pa pu so lavantaz personel, me pu pran swin bann lintere so fam ek so bann zanfan—wi, pu tu lafami. (1 Korintyin 13:4, 5) Li sey imit bann kalite Bondye ki so sef Zezi Kris usi ena. Parey kuma Zezi, li dus ek li ena limilite dan so leker. (Matye 11:28-30) Kan li ena tor, li pa difisil pu li dir par egzanp “exkiz mwa” uswa “to ena rezon.” Par so bon legzanp, li pli fasil pu enn fam vinn enn “led” ek enn “partner” pu sa kalite zom la. Li pu aprann ar li ek li pu travay kotakot avek li.—Zenez 2:20; Malaki 2:14.

12. Ki pu ed enn fam sumet ar prinsip lotorite?

¹² Dan so kote, enn fam bizin sumet ar so mari. Me, si li inflyanse par lespri lemond, sa kapav kumans sanz so lopinyon lor prinsip lotorite, ek lide pu sumet ar enn zom pa pu atir li. Labib pa dir ki zom bizin fer dominer, me li dir ki bann fam bizin sumet avek zot mari. (Efezyin 5:24) Labib dir usi ki bann mari uswa bann papa zot responsab zot fami, ek kan aplik bann konsey Labib, sa amenn lape ek lord dan lafami.—Filipyin 2:5.

13. Ki legzanp sumisyon Zezi finn donn bann zanfan?

¹³ Bann zanfan bizin obeir zot paran. Dan sa domenn la, Zezi finn les enn bon legzanp. Apre sa levennman kot Zezi ki ti ena 12 an ti res Zerizalem pandan trwa zur la, “li finn desann avek [so bann paran] ek li ti vinn Nazaret, ek li finn kontiyn sumet avek zot.” (Lik 2:51) Bann zanfan ki sumet ar zot paran pu favoriz lape ek larmoni dan fami. Enn fami ere kan tu so bann manb sumet ar direksyon Kris.

14, 15. Ki pu ed nu pu reysi fer fas avek enn sityasyon difisil dan lakaz? Donn enn legzanp.

¹⁴ Imit Zezi ek aksepte so direksyon, sa li lakle pu reysi, mem kan bann sityasyon difisil kumans leve dan lakaz. Par egzanp, maryaz ant Jerry ki ena 35 an avek Lana, enn mama ki ena enn tifi adolesan, ti kre enn problem ki ni enn ni lot pa ti panse ti pu arive. Jerry explike: “Mo ti kone ki pu vinn enn bon sef, mo ti bizin aplik bann mem prinsip Labib ki donn sikse dan lezot fami. Me byinto mo finn dekuver ki mo ti bizin aplik zot avek enn pli gran sazes ek disernman.” Tifi Lana ti konsider Jerry kuma enn kikenn ki finn rant ant li ek so mama, alor li ti rezet li konpletman. Jerry ti bizin disernman pu truve ki sa latitid la ti ena enn lefe lor seki tifi la ti dir ek ti fer. Kuma eski li’nn regle sa sityasyon la? Jerry reponn: “Lana ek mwa finn tom dakor ki omwin pu lemoman, Lana ki ti pu okip disiplinn ki enn responsabilite bann paran, pandan ki mwa mo ti pu konsantre pu devlop enn bon relasyon avek mo belfi. Avek letan, sa fason fer la finn amenn bann bon rezilta.”

¹⁵ Kan nu fer fas avek bann difikilte dan lakaz, nu bizin disernman pu truve kifer bann manb fami koze ek azir dan sa fason la. Nu bizin usi sazes pu aplik bann prinsip Bondye kuma bizin. Par egzanp, Zezi ti disern klerman kifer sa madam ki ti ena enn emorazi la ti tus li, ek li ti tret li avek sazes ek konpasyon. (Levitik 15:25-27; Mark 5:30-34) Nu Lider ena sazes ek disernman. (Proverb 8:12) Nu ere kan nu azir parey kuma li, li ti pu azir.

‘Kontiyn Rod Rwayom Avan Tu’

16. Ki bizin okip premye plas dan nu lavi, ek kuma eski Zezi finn montre sa par so legzanp?

¹⁶ Zezi finn montre klerman ki kitsoz bizin okip premye plas dan lavi bann ki aksepte so direksyon. Li’nn dir: “Donk, kontiyn rod rwayom ek so [Bondye] lazistis.” (Matye 6:33) Ek par so legzanp, li’nn montre nu kuma pu fer sa. Apre karant zur karem, meditasyon ek lapriyer, zis apre so batem, Zezi ti fer fas ar enn tantasyon. Satan le Dyab ti ofer li lotorite lerwa lor “tu bann rwayom dan lemond.” Mazinn lavi ki Zezi ti kapav ena si li ti aksepte propozisyon Dyab! Me, Kris ti konsantre pu fer volonte so Papa. Li finn usi realize ki sa kalite lai la dan lemond Satan ti pu dir zis pu enn ti moman. Deswit li finn rezet propozisyon Dyab, ek li’nn dir: “Finn ekrir, ‘Zeova to Bondye ki to bizin adore, ek ar Li tusel ki to bizin rann enn servis sakre.’” Inpe plitar, Zezi “finn kumans prese ek dir: ‘Repanti, parski rwayom dan lesyel finn koste.’” (Matye 4:2, 8-10, 17) Pu leres letan ki li’nn viv lor later, Kris ti enn proklamater Rwayom Bondye aplintan.

17. Kuma eski nu kapav montre ki bann lintere Rwayom okip premye plas dan nu lavi?

¹⁷ Nu bizin imit nu Lider ek pa permet lemond Satan atir nu pu fer enn travay byin peye ek enn karyer vinn nu prinsipal obzektif dan lavi. (Mark 1:17-21) Li pu vremem bet si nu les nu telman antrene dan pyez bann obzektif lemond ki lerla nu fer bann lintere Rwayom vinn segonder! Zezi finn konfye nu predikasyon Rwayom ek travay fer bann disip. (Matye 24:14; 28:19, 20) Wi, kitfwa nu ena enn fami uswa lezot responsabilite pu okipe, me eski nu pa kontan pu pas nu bann sware ek nu bann wikenn pu akonpli nu responsabilite Kretyin pu prese ek anseyne? Ek li byin ankurazan pu kone ki pandan lane servis 2001, plis ki 780,000 finn kapav servi antan ki minis aplintan, uswa pyonye.

18. Ki ed nu pu truv lazwa dan predikasyon?

¹⁸ Resi Levanzil reprezant Zezi kuma enn dimunn aktif ek ki ena bann bon santiman. Kan li ti truv bezwin spirityel bann ki ti otur li, li ti resanti pitye pu zot ek li ti ofer zot so led san atann. (Mark 6:31-34) Kan nu partisip dan nu minister avek enn lamur pu lezot ek enn dezir sinser pu ed zot, nu gayn lazwa dan nu minister. Me kuma eski nu kapav gayn sa kalite dezir la? Enn zenom ki apel Jayson dir: “Kan mo ti adolesan, mo ti al prese parski kiafer.” Ki finn ed li pu devlop lamur pu sa travay la? Jayson reponn: “Dan mo fami, ti tuzur rezerv bann Samdi gramatin pu predikasyon. Sa ti bon pu mwa parski plis mo ti al prese, plis mo ti truv dibyin ki sa travay la akonpli ek mo finn plis kontan li.” Nu tu nu bizin partisip dan predikasyon regilyerman ek avek serye.

19. Ki bizin nu determinasyon an rapor avek direksyon Kris?

¹⁹ Li vremem enn rekonfor ek enn rekonpans pu aksepte direksyon Kris. Kan nu fer sa, lepok zenes vinn enn lepok pu grandi dan konesans ek sazes. Lavi fami vinn enn lasurs lape ek boner, ek minister vinn enn aktivite ki amenn lazwa ek satisfaksyon. Donk, anu vremem determine pu montre dan nu lavi tulezur ek dan bann desizyon nu pran ki Kris, nu Lider li reel pu nu. (Kolosyin 3:23, 24) Zezi Kris diriz nu kuma enn Lider atraver enn lot mwayin—kongregasyon Kretyin. Prosin lartik pu montre kuma nu kapav tir profi ar sa dispozisyon la.

[Not anba paz]

Eski U Rapel?

• Kuma eski nu tir profi kan nu swiv Lider ki Bondye finn etabli?

• Kuma eski bann zenn kapav montre ki zot ule swiv direksyon Zezi?

• Ki lefe direksyon Kris ena lor lavi fami bann ki sumet ar sa direksyon la?

• Kuma eski nu minister montre ki Kris nu Lider, li reel pu nu?

[Zimaz lor paz 10]

Lepok zenes li enn lepok pu gayn konesans lor Bondye ek lor nu Lider ki Li finn etabli

[Zimaz lor paz 11]

Sumisyon ar direksyon Kris favoriz boner dan fami

[Zimaz lor paz 13]

Zezi ti rod Rwayom avan tu. Eski u’si u fer parey?