Done Zis par Obligasyon

“U KAPAV dir ki mo pe demann sarite; sa pa pu ofans mwa. Mo pe demann sarite pu Zezi.” Se seki enn pret Protestan finn dir. So bann parol montre byin problem ki ena pu sutenir bann relizyon lor plan finansye. Li paret ki bann relizyon ki’nn byin etabli reysi egziste, zis si zot gayn enn kantite kas. Bizin kas pu fer lapey. Bizin ranz bann tanp ek gard zot dan enn bon leta. Bizin finans bann kanpayn predikasyon. Kot sa zot pu gayn kas pu fer tusala?

Pu buku legliz, solisyon la se: ladim.a Enn predikater ki apel Norman Robetson pretann ki: “Ladim, se fason ki Bondye finans so Rwayom lor later. Se grasa sa ki kapav pres bann Levanzil.” San ezite, li’nn rapel so bann disip ki zot ena responsabilite pu done. Li’nn dir fran-fran: ‘Ladim se pa enn kitsoz ki u fer parski u kapav fer li. Se enn fason ki u montre ki u pe obeir Bondye. Si u pa donn ladim, u pe montre dan enn fason byin kler ki u pa pe obeir bann komannman Bondye. Se kumadir u pe pran kas ki pu enn lot dimunn, pu u servi.’—Tithing—God’s Financial Plan.

Sirman u pu dakor ki pu enn Kretyin, fer bann don, li form parti dan so ladorasyon pu Bondye. Me, kuma eski u konsider fason ki sertin kontiyne demann kas? Eski u truv sa fatigan, uswa mem agasan? Inácio Strieder, enn teolozyin breziliyen, akiz bann legliz parski zot servi ladim kuma enn mwayin pu “rezud bann problem ki zot ena dan zot legliz.” Li apel sa, bann pratik ki “kont lalwa, ki malonet, ek ki kont larelizyon.” Li finn remarke ki akoz sa “bann dimunn ki pena travay, bann vev, bann dimunn ki pena lakaz ek bann dimunn ki pa kapav reflesi kuma bizin, finn tir konklizyon ki Bondye finn abandonn zot. Zot panse ki zot oblize donn zot ‘predikater’ sa kantite kas la, mem si zot prop fami pena ase manze.

Petet u demann u: ‘Eski bann legliz ki demann ladim pe met an pratik kuma bizin seki Labib dir? Uswa eski ena sertin relizyon ki dir bann dimunn ki si zot pa pey ladim, Bondye pu pini zot, ek zot servi sa laper la pu tir kas ar bann dimunn? Eski vremem Bondye demann nu pu done par obligasyon?’

[Not anba paz]