“Montre ki Zot Ena Rekonesans”

“Les lape Kris diriz zot leker . . . Ek montre ki zot ena rekonesans.” —KOLOSYIN 3:15.

1. Ki diferans nu kapav truve ant kongregasyon Kretyin ek lemond ki dan puvwar Satan?

DAN tule 94,600 kongregasyon bann Temwin Zeova dan lemond antye, nu truv bann dimunn ki rekonesan. Sak reynion kumanse ek termine par enn lapriyer ki inklir usi bann remersiman pu tu seki Zeova fer. Bann zenn, bann ki aze, bann nuvo ek bann Temwin ki lontan dan la verite, zot zwenn ansam pu ador Zeova ek pu profit bon konpayni zot bann frer ek ser. (Psom 133:1) Suvan dan sa bann rasanbleman-la nu tann zot servi bann expresyon kuma “mersi,” “padkwa,” uswa lezot expresyon parey. Sa li byin diferan ar latitid egois ki existe parmi enn kantite dimunn ‘ki pa konn Zeova ek ki pa obeir la bonn nuvel’! (2 Tesalonisyin 1:8) Wi, nu pe viv dan enn lemond kot pena rekonesans. Me, sa pa etonan, sirtu kan nu kone kisannla bondye sa lemond-la, setadir Satan le Dyab. Pena personn ki pli egois ki li. So fyerte ek so latitid rebel pe fane partu parmi bann dimunn!—Zan 8:44; 2 Korintyin 4:4; 1 Zan 5:19.

2. Ki lavertisman nu bizin pran kont, ek ki bann kestyon nu pu egzamine?

² Pwiski nu anture par lemond Satan, nu bizin fer byin atansyon pu pa les sa bann latitid-la gat nu. Dan premye syek, lapot Pol ti donn sa rapel-la bann Kretyin dan kongregasyon Efez: “Enn lepok, zot ti pe mars dapre sa lemond-la, dapre sef ki ena puvwar lor ler, sa lespri ki asterla pe inflyans bann zanfan ki dezobeir Bondye. Wi, sa lepok-la, parmi zot, nu tu ti viv dapre bann dezir nu laser. Nu ti pe fer bann kitsoz ki nu lekor ek nu panse ti pus nu pu fer, ek de-natir nu ti bann zanfan la koler, parey kuma lezot.” (Efezyin 2:2, 3) Sa li vre pu buku dimunn zordi. Me, kuma eski nu kapav kontiyn ena enn leker rekonesan? Ki led Zeova donn nu? Dan ki bann fason pratik nu kapav montre ki nu vremem rekonesan?

Kifer Nu Bizin Rekonesan

3. Pu ki kitsoz nu rekonesan anver Zeova?

³ Se Bondye Zeova nu Kreater ki donn lavi. Li merit nu rekonesans, sirtu amezir ki nu gete ki kantite kado Li donn nu an abondans. (Zak 1:17) Tulezur nu remersye Zeova ki nu ankor vivan. (Psom 36:9) Tutotur nu, nu truv enn kantite kitsoz ki Zeova finn kre; par egzanp soley, lalinn ek bann zetwal. Nu planet ranpli avek enn kantite mineral ki prezerv nu lavi. Dan latmosfer ena enn melanz byin ekilibre bann gaz ki neseser pu lavi. Ena usi bann cycle dan la natir ki byin konplike. Tu sa bann kitsoz-la pruve komye nu dwa nu Papa dan lesyel ki byin kontan nu. Le Rwa David ti sant sa sante-la: “O Zeova nu Bondye, buku kitsoz twa to’nn fer, wi to bann travay extraordiner ek to bann panse anver nu. Pa kapav konpar personn ar twa. Si mo ti anvi koze ek rakont tusala, zot finn vinn tro buku pu mo kapav rakonte.”—Psom 40:5.

4. Kifer eski nu bizin remersye Zeova pu sa konpayni ankurazan ki nu profite dan nu bann kongregasyon-la?

⁴ Mem si zordi bann serviter Zeova pa pe viv dan enn paradi fizik, zot pe profit enn paradi spirityel. Dan bann Lasal DiRwayom ek pandan bann lasanble, nu truve kuma frwi lespri Bondye pe azir lor nu bann konpaynon Kretyin. Dayer, kan sertin Temwin pres avek bann dimunn ki ena byin tigit uswa ki pena okenn konesans relizye, zot fer referans ar seki Pol ti dir dan let ki li ti ekrir bann Galat. Dabor zot atir latansyon bann dimunn lor “bann aksyon ki nu lekor inparfe fer” ek zot demann bannla seki zot panse lor la. (Galat 5:19-23) Laplipar, tutswit rekonet ki se kumsa mem ki bann dimunn ete zordi. Kan bann proklamater montre sertin dimunn seki Labib dir lor frwi lespri Bondye, ek kan bann dimunn-la vinn Lasal DiRwayom pu truve par zotmem kuma sa lespri-la pe azir, buku admet ki “Bondye vremem parmi zot.” (1 Korintyin 14:25) Ek se pa zis dan u kongregasyon ki ena sa. Ninport kot u ale, kan u zwenn enn parmi sa plis ki sis milyon Temwin Zeova ki ena lor later-la, u pu truv mem lazwa ek boner parmi zot. Wi, vremem, sa konpayni ankurazan-la donn nu enn rezon pu remersye Zeova ki rann sa posib par mwayin so lespri.—Sefanya 3:9; Efezyin 3:20, 21.

5, 6. Kuma eski nu kapav montre nu rekonesan pu pli gran kado ki Bondye finn donn nu, setadir la ranson?

⁵ Pli gran don, ek kado pli parfe ki Zeova finn donn nu, se so Garson, Zezi, ki finn pey enn ranson kan li finn sakrifye so lavi. Lapot Zan ti ekrir: “Si se kumsa ki Bondye finn kontan nu, alor nu dan lobligasyon pu kontan nu kamarad.” (1 Zan 4:11) Wi, nu exprim nu rekonesans pu sa ranson-la, pa selman kan nu montre Zeova ki nu kontan Li ek ki nu rekonesan anver Li, me usi kan nu viv dan enn fason ki montre ki nu kontan lezot usi.—Matye 22:37-39.

⁶ Nu kapav aprann plis lor fason pu montre nu rekonesans kan nu egzamine kuma Zeova ti azir anver ansyin nasyon Izrael. Atraver lalwa Mozaik, Zeova ti anseyn sa pep-la plizir leson. Atraver “model la konesans ek la verite ki ena dan Lalwa,” nu kapav aprann buku kitsoz ki pu ed nu swiv sa konsey Pol-la: “Montre ki zot ena rekonesans.”—Romin 2:20; Kolosyin 3:15.

Trwa Leson dan Lalwa Moiz

7. Kuma eski atraver dispozisyon ladim, bann Izraelit ti gayn posibilite pu montre zot rekonesans anver Zeova?

⁷ Dan Lalwa Mozaik, Zeova ti revel trwa fason kuma bann Izraelit ti kapav montre zot rekonesans pu so bonte. Premyerman ti ena ladim. Enn dizyem tu zot prodwi lagrikiltir ansam avek ‘enn dizyem zot bann zanimo,’ ti bizin vinn ‘enn kitsoz ki sin pu Zeova.’ (Levitik 27:30-32) Kan bann Izraelit ti obeir, Zeova ti beni zot buku. “ Zeova finn dir: ‘Amenn tu zot dizyem par dan stor, pu ki ena manze dan mo lakaz ek, silvuple teste mwa lor la, gete si mo pa pu lev baraz lesyel ek si vremem mo pa pu vid lor zot enn benediksyon ziska personn pa mank nanyin.’ ”—Malaki 3:10.

8. Ki diferans ti ena ant bann kontribisyon volonter ek ladim?

⁸ Dezyeman, apar ladim, Zeova ti prevwar ki bann Izraelit fer bann kontribisyon volonter. Li ti donn Moiz lord pu dir bann Izraelit: “Kan zot pu rant dan peyi kot mo pe amenn zot, ala seki pu arive: Kan zot pu manz dipin sa peyi-la, zot bizin fer enn kontribisyon pu Zeova.” Zenerasyon apre zenerasyon, zot ti bizin ofer enn parti dan zot premye rekolt “lafarinn ki pankor rafine, [ki servi pu] fer bann gato an form kuronn.” Remarke ki Labib pa presize ki kantite zot ti bizin ofer. (Nonm 15:18-21) Me kan bann Izraelit ti ofer enn kontribisyon pu remersye Zeova, zot ti kapav ena lasirans ki Zeova ti pu beni zot. Nu truv enn dispozisyon parey kumsa an rapor avek tanp dan vizyon Ezekyel. Nu lir: “Premye rekolt tu bann premye frwi mir ek tu zot kontribisyon, sa se pu bann pret; ek premye rekolt zot lafarinn ki pankor rafine, zot bizin donn sa pret, pu ki ena enn benediksyon lor to lakaz.”—Ezekyel 44:30.

9. Ki Zeova ti anseyne atraver dispozisyon ki Li ti pran pu ki bann dimunn kapav glane?

⁹ Trwazyeman, Zeova ti pran dispozisyon pu ki bann dimunn kapav glane. Bondye ti donn lord: “Kan zot rekolte dan zot peyi, fode pa ramas bann rekolt ziska dan bor karo, ek fode pa ramas seki reste kan finn fini rekolte. Fode pa kas usi frwi ki’nn reste lor bann pye rezin, ek fode pa ramas bann rezin ki finn tonbe. Parski to bizin les sa pu dimunn pov ek dimunn etranze. Mwa mo Zeova zot Bondye.” (Levitik 19:9, 10) Ankor enn fwa, pa ti presize komye ti bizin kite. Sak Izraelit ti lib pu deside ki kantite li pu lese pu bann ki dan bezwin. Dan so sazes, le Rwa Salomon ti byin explik sa: “Seki ed enn ti dimunn, pe pret Zeova kitsoz, ek an retur Zeova pu rann li sa.” (Proverb 19:17) Par la, Zeova ti anseyn so pep pu ena konpasyon ek konsiderasyon anver bann dimunn pov.

10. Ki bann konsekans lepep Izrael finn kone parski zot pa finn montre zot rekonesan?

¹⁰ Zeova ti beni bann Izraelit kan zot ti donn ladim, zot ti fer bann kontribisyon volonter, ek zot ti fer ansort ki bann pov kapav glane. Me kan lepep Izrael pa finn montre zot rekonesan, zot finn perdi faver Zeova. Zot finn konn bann maler ek finalman zot finn mem al an exil. (2 Kronik 36:17-21) Donk, ki bann leson nu kapav tire?

Bann Fason pu Montre Nu Rekonesans

11. Ki fason prinsipal nu kapav montre nu rekonesans anver Zeova?

¹¹ Pareyman, prinsipal fason nu kapav donn Zeova la glwar ek montre Li nu rekonesans, se kan nu fer enn “ofrand.” Li vre ki nu, bann Kretyin, nu pa anba Lalwa Mozaik, kot nu ti pu oblize ofer bann sakrifis zanimo uswa bann rekolt. (Kolosyin 2:14) Me, lapot Pol ti ankuraz bann Kretyin Ebre: “Anu tuletan donn Bondye enn sacrifice de louange, setadir, frwi nu lalev ki fer deklarasyon piblik pu so non.” (Ebre 13:15) Nu’si nu kapav montre nu rekonesans sinser anver Bondye Zeova, nu Papa ki kontan nu. Kuma? Se kan nu servi nu bann kapasite ek tu seki nu ena, pu ofer enn sacrifice de louange pu Zeova, dan predikasyon uswa parmi “bann laful rasanble,” dan la kongregasyon. (Psom 26:12) Amezir ki nu fer sa, ki nu kapav aprann lor fason ki bann Izraelit ti montre zot rekonesans anver Zeova?

12. An seki konsern nu responsabilite Kretyin, ki nu kapav aprann lor dispozisyon ladim?

¹² Dabor, kuma nu finn truve, sak Izraelit ti oblize donn ladim, zot pa ti ena swa. Nu, bann Kretyin, nu ena responsabilite pu partisip dan predikasyon ek asiste bann reynion Kretyin. Se bann laktivite ki obligatwar. Dan so gran profesi konsernan lepok la fin, Zezi ti dir byin klerman: “Sa bonn nuvel lor rwayom-la pu prese partu kot dimunn reste lor later kuma enn temwaynaz pu tu bann nasyon, ek lerla la fin pu vini.” (Matye 24:14; 28:19, 20) Konsernan bann reynion Kretyin, lapot Pol ti ekrir: “Anu pans lor sakenn nu bann frer, pu pus nu pu ena lamur ek pu fer bann bon aksyon; pa negliz nu bann reynion, kuma sertin ena labitid fer. Me ankuraz nu kamarad, ek ankor plis kan nu truv zur-la pe aprose.” (Ebre 10:24, 25) Nu montre nu rekonesans anver Zeova kan nu aksepte avek lazwa nu responsabilite pu prese ek anseyne. Enn lot fason ankor se kan nu rasanble avek nu bann frer regilyerman dan bann reynion kongregasyon. Wi, nu konsider tu sa bann kitsoz-la kuma enn privilez ek enn loner.

13. Ki leson nu kapav tire an seki konsern bann kontribisyon volonter ek dispozisyon pu glane?

¹³ Nu kapav tir profi kan nu egzaminn usi sa de lezot mwayin ki bann Izraelit ti montre zot rekonesans-la, setadir bann kontribisyon volonter ek les lezot glane. Nu rapel ki dan dispozisyon ladim, ti demann enn kantite presi. Me, an seki konsern bann kontribisyon volonter ek dispozisyon pu glane, pa ti etabli ki kantite bizin done. Alor sa ti permet enn serviter Zeova montre ki kantite li rekonesan anver Bondye. Pareyman, nu kone ki pu sak serviter Zeova, partisip dan predikasyon ek asiste bann reynion Kretyin se bann responsabilite byin-byin inportan. Me, eski nu fer sa de kitsoz-la avek tu nu leker ek avek enn bon volonte? Eski nu konsider sa kuma enn mwayin kot nu kapav exprim nu profon rekonesans pu tu seki Zeova finn fer pu nu? Eski nu partisip plin-plin dan sa bann laktivite la, otan ki nu sityasyon personel permet nu? Uswa eski nu konsider tusala zis kuma enn responsabilite ki nu bizin ranpli? Byinsir, sa se bann kestyon ki nu bizin reponn personelman. Get kuma lapot Pol exprim li lor sa size-la: “Sakenn bizin verifye kuma so prop travay ete ek pa konpar li avek enn lot. Lerla li pu ena rezon pu glorifye limem.”—Galat 6:4.

14. Ki Zeova demann nu dan nu servis pu Li?

¹⁴ Bondye Zeova byin konn nu sityasyon. Li konn nu bann limit. Li apresye tu ti sakrifis ki so bann serviter fer avek tu zot leker. Li pa atann ki nu tu pu donn Li mem kantite. Dayer, nu pa kapav fer sa. Kan li ti pe koz lor bann don materyel avek bann Kretyin dan kongregasyon Korint, lapot Pol ti dir zot: “Si bon volonte li la an premye, li pu sirtu akseptab dapre seki enn kikenn ena, me pa dapre seki li pena.” (2 Korintyin 8:12) Sa prinsip-la li aplik usi ar nu servis pu Bondye. Seki fer nu servis vinn akseptab devan lizye Zeova, se pa ki kantite nu fer, me plito fason ki nu fer li, setadir avek lazwa ek avek tu nu leker.—Psom 100:1-5; Kolosyin 3:23.

Devlop ek Gard Lespri Pyonye

15, 16. (a) Ki rapor ena ant servis pyonye ek rekonesans? (b) Kuma eski bann ki pa kapav fer servis pyonye kapav manifeste lespri pyonye?

¹⁵ Enn bon fason pu montre nu rekonesans anver Zeova, se kan nu pran servis aplintan. Motive par lamur pu Zeova ek rekonesans pu so faver imerite, buku serviter Zeova batize finn fer bann gran sanzman dan zot lavi pu zot kapav ena plis letan pu servi Zeova. Sertin kapav fer pyonye permanan, setadir zot pas anviron 70 er sak mwa pu pres la bonn nuvel ek anseyn bann dimunn la verite. Lezot ki ena enn sityasyon inpe pli limite, pran servis pyonye oxilyer detanzantan, setadir zot pas 50 er pu prese dan enn mwa.

¹⁶ Me ki nu kapav dir lor bann serviter Zeova ki pa kapav pran servis pyonye permanan, ni pyonye oxilyer? Zot usi zot kapav montre zot rekonesans kan zot devlop ek gard lespri pyonye. Kuma? Se kan zot ankuraz bann ki kapav fer pyonye. Zot kapav met dan leker zot bann zanfan dezir pu fer servis aplintan, ek fer sa vinn zot karyer. Zot kapav usi partisip dan predikasyon avek zel, dapre zot sityasyon. Seki nu done dan nu minister, li depann buku lor profonder rekonesans ki nu ena dan nu leker pu seki Zeova finn fer, pe fer ek pu fer pu nu.

Montre Nu Rekonesans Avek Nu “Bann Kitsoz-de-Valer”

17, 18. (a) Kuma eski nu kapav montre nu rekonesans avek nu “bann kitsoz-de-valer”? (b) Ki Zezi ti dir lor kontribisyon enn vev, ek kifer?

¹⁷ Proverb 3:9 dir: “Donn Zeova loner avek zot bann kitsoz-de-valer, avek bann premye rekolt tu zot prodwi.” Bann serviter Zeova nepli bizin donn ladim. Okontrer, Pol ti ekrir bann Kretyin dan kongregasyon Korint: “Ki sakenn fer kuma li finn deside dan so leker, pa avek regre, ni parski li santi li oblize, parski Bondye kontan enn dimunn ki donn avek lazwa.” (2 Korintyin 9:7) Kan nu fer bann kontribisyon volonter pu sutenir predikasyon ki pe fer dan lemond antye, nu montre nu rekonesans. Nu rekonesans sinser pus nu pu fer sa regilyerman, kitfwa mem pu met dekote enn ti kas tulesemenn, parey kuma bann premye Kretyin ti fer.—1 Korintyin 16:1, 2.

¹⁸ Se pa kantite ki nu done ki montre ki kantite rekonesans nu ena pu Zeova. Me, se plito avek ki lespri nu pe done. Se seki Zezi ti remarke kan li ti pe get bann dimunn met zot don dan bann kof, dan tanp. Kan Zezi ti truv enn vev ki limem ti dan bezwin, met “de ti pyes ki ena byin tigit valer,” li ti dir: “Vremem mo dir zot, sa vev-la mem si li pov, li finn met plis ki tu sa bann lezot dimunn-la. Parski zot tu finn donn seki zot ena an plis, me sa madam-la, dan so lamizer, li finn met tu seki li ti ena pu viv.”—Lik 21:1-4.

19. Kifer eski li bon ki nu re-egzaminn bann fason pu montre nu rekonesans?

¹⁹ Nu swete ki sa letid-la pus nu pu re-egzaminn fason ki nu pe montre nu rekonesans. Eski nu kapav ogmant nu sacrifice de louange pu Zeova ek nu kontribisyon pu sutenir predikasyon mondyal? Si nu fer zefor pu fer sa, nu kapav sir ki Zeova, nu Papa pu byin kontan ki nu montre nu rekonesans.

Eski U Kapav Rapel?

• Pu ki bann rezon nu bizin montre nu rekonesans anver Zeova?

• Ki bann leson nu aprann an seki konsern ladim, bann kontribisyon volonter, ek dispozisyon pu glane?

• Kuma eski nu kapav devlop lespri pyonye?

• Kuma eski nu kapav servi nu “bann kitsoz-de-valer” pu remersye Zeova?

[Zimage page 28]

“Tu zoli don ek tu kado parfe sorti lao”

[Zimage page 31]

Ki bann sakrifis nu kapav fer?