Apresye Letid Personel Parol Bondye

“Mo pu medit lor tu to bann aksyon ek mo pu interes mwa ar tu seki to fer.”—PSOM 77:12.

1, 2. (a) Kifer eski nu bizin rezerv letan pu medite? (b) Ki nu konpran par ‘medite’?

ANTAN ki bann disip Zezi, seki bizin pli inportan dan nu lavi se nu bann relasyon avek Bondye ek tu bann rezon ki nu ena pu servi Li. Purtan zordi, laplipar dimunn telman okipe ki zot pa pran letan pu medite. Zot tro okipe pu gayn bann kitsoz materyel, zot tuletan pe aste ek pe rod tu lokazyon pu ena bann lamizman initil. Kuma eski nu kapav evite perdi nu letan avek bann kitsoz ki pena okenn valer? Parey kuma nu rezerv letan pu bann aktivite inportan kuma manze ek dormi, nu bizin usi rezerv letan sak zur pu medit lor bann kitsoz ki Zeova inn fer.—Deteronom 8:3; Matye 4:4.

² Eski u arive pran letan pu medite? Ki sa vedir medite? Dapre enn diksyoner, medite vedir ‘konsantre lor: reflesi byin lor la, an silans ek an profonder.’ Kuma eski sa konsern nu?

3. Ki kitsoz ena enn rapor direk avek progre spirityel?

³ Dabor, sa bizin fer nu rapel seki Lapot Pol ti dir Timote: “Ziska ki mo vini, kontiyn fer zefor pu lir an piblik, pu konsey ek anseyn lezot. . . . Medit lor sa bann kitsoz la; konsantre lor la, pu ki tu dimunn truv byin to progre.” Wi, nu bizin fer progre. Pol ti montre ki medit lor bann kitsoz spirityel ek fer progre, se de kitsoz ki mars ansam. Zordi usi parey. Kan nu progrese lor plan spirityel, nu gayn enn santiman satisfaksyon. Nu pu kapav gayn sa santiman la si nu kontiyne “medit” uswa “konsantre” lor bann kitsoz ki ena enn rapor avek Parol Bondye.—1 Timote 4:13-15.

4. Ki kitsoz u kapav servi pu medit lor Parol Bondye regilyerman?

⁴ Li depann lor u ek lor lokipasyon ki u ena dan lafami, pu kone ki pli bon moman pu u medite. Buku dimunn medit lor enn tex Labib boner gramatin kan zot lir brosir Examinons les Écritures chaque jour. An realite, 20,000 volonter ki travay dan bann Betel atraver lemond, kumans zot lazurne kumsa. Pandan 15 minit zot egzaminn tex Labib pu sa zur la. Alor ki zis detrwa manb lafami Betel ki donn enn komanter sak matin, lezot reflesi lor seki pe dir ek seki pe lir. Ena lezot temwin ki reflesi lor Parol Zeova kan zot vwayaze pu al travay. Zot ekut bann kaset Labib uswa bann kaset La Tour de Garde ek Reveillez-vous! ki egziste dan sertin lang. Buku menazer fer sa pandan ki zot fer zot luvraz lakaz. Kan zot fer sa, zot pe imit Azaf, enn ekrivin Psom, ki ti dir: “Mo pu rapel tu seki Ya finn fer; wi, mo pu rapel bann kitsoz extraordiner ki to’nn fer lontan. Mo pu medit lor tu to bann aksyon, ek mo pu interes mwa ar manyer to fer kitsoz.”—Psom 77:11, 12.

Enn Bon Latitid Fer Gayn Bann Bon Rezilta

5. Kifer eski letid personel bizin inportan pu nu?

⁵ Dan nu lepok modern, kot ena televizyon, video ek ordinater, laplipar dimunn nepli lir otan ki zot ti pe fer avan. Me, fode pa ki sa arive avek bann Temwin Zeova. An realite, li byin inportan ki nu lir Labib parski se sa ki permet nu res an kontak avek Zeova. Ena plizir milye lane, Zozye ti ranplas Moiz pu diriz nasyon Izrael. Pu li gayn benediksyon Zeova, Zozye ti bizin lir Parol Bondye. (Zozye 1:8; Psom 1:1, 2) Se enn kitsoz ki nu’si, nu bizin fer zordi. Li posib ki sertin gayn difikilte pu lir, uswa zot bizin fer gran zefor pu kapav lir parski zot pa’nn al lekol ase. Donk, ki kapav ed nu pu nu anvi lir ek etidye Parol Bondye? Nu kapav gayn enn repons dan seki Lerwa Salomon inn ekrir dan Proverb 2:1-6. Silvuple uver u Labib ek lir sa bann verse la. Apre nu pu diskit sa ansam.

6. Ki latitid nu bizin ena anver konesans ki Bondye donn nu?

⁶ Pu kumanse, nu truv sa konsey la: “Mo garson, si to aksepte seki mo dir ek to gard mo bann komannman byin kuma enn trezor, pu to ekut byin bann parol ki saz, ek pu ki to prepar to leker pu konn ziz byin bann kitsoz; . . . ” (Proverb 2:1, 2) Ki nu aprann par sa bann parol la? Sa bann parol la montre nu ki sakenn ena responsabilite pu etidye Parol Bondye. Remarke ki ena enn kondisyon, “si to aksepte mo bann parol.” Nu truv sa mo “si” la, parski laplipar dimunn pa pran kont Parol Bondye. Pu nu kapav kontan etidye Parol Bondye, nu bizin pre pu aksepte bann parol Zeova ek konsider sa kuma enn trezor ki nu pa anvi perdi. Nu bizin zame pa les bann aktivite ki nu fer tulezur, fer nu telman okipe uswa telman okip nu lespri, ki nu kumans pa pran kont Parol Bondye uswa nu kumans ena bann dut.—Romin 3:3, 4.

7. Kifer eski nu bizin asiste reynion tanki posib ek ekut byin seki pe dir?

⁷ Eski nu vremem “ekut byin” kan pe explik Parol Bondye dan reynion? (Efezyin 4:20, 21) Eski nu ‘prepar nu leker’ pu nu gayn disernman, setadir konn ziz byin bann kitsoz? Li posib ki frer ki pe fer diskur la, pena buku lexperyans. Me kan li pe servi Parol Bondye, li merit tu nu latansyon. Byin sir, pu nu kapav pran kont sazes Zeova, nu bizin asiste bann reynion tanki posib. (Proverb 18:1) Mazine ki kantite sagrin enn kikenn inn bizin sagrin, si li finn rat reynion ki ti fer Zerizalem, zur Lapantkot lane 33 N.L.! Mem si nu bann reynion pa pas enn fason osi extraordiner ki sa reynion la, me nu egzaminn Labib, ki nu liv debaz. Donk, nu kapav gayn bann benediksyon spirityel dan sak reynion si nu ekut byin seki pe dir ek si nu swiv dan nu Labib.—Akt 2:1-4; Ebre 10:24, 25.

8, 9. (a) Ki letid personel demann nu fer? (b) Ki konparezon nu kapav fer ant valer lor ek valer lintelizans konsernan konesans Bondye?

⁸ Lerwa Salomon dir apre: “Si anplis, to apel lintelizans ek to kriye pu gayn kapasite pu ziz byin bann kitsoz, . . . ” (Proverb 2:3) Ki sa bann parol la fer nu konpran? Zot fer nu konpran ki nu bizin ena enn gran dezir pu konpran Parol Zeova! Sa montre ki nu bizin ena dezir pu etidye pu nu kapav gayn kapasite pu ziz byin ek pu nu kapav konpran ki volonte Zeova ete. Li vre ki sa demann buku zefor. Sa amenn nu pu get seki Salomon ti dir apre ek legzanp ki li ti servi.—Efezyin 5:15-17.

⁹ Li kontinye, li dir: “Si to kontiyn rod sa [lintelizans] kuma larzan, ek kuma bann trezor ki finn kasyet, . . . ” (Proverb 2:4) Sa fer nu pans bann laminn kot bann dimunn al fuye pu tir lor ek larzan. Pandan plizir syek, dimunn inn rod sa bann kitsoz ki sipoze ena valer la. Dimunn inn tuy lezot akoz lor. Sertin inn pas tu zot lavi pu sey gayn sa metal la. Me an realite, ki valer lor vremem ena? Si u finn perdi dan enn dezer ek u pe mor deswaf, ki u ti pu prefer gayne: enn bar lor uswa enn ver delo? Purtan, dimunn inn fer enn kantite zefor pu gayn lor, mem si so valer pa stab ek tuletan pe sanze!a Avek ki kantite plis zefor alor, nu bizin rod kone kuma pu met an pratik nu konesans, kuma pu ziz byin bann kitsoz ek kuma pu gayn lintelizans lor Bondye ek lor so volonte! Me ki profi nu pu gayne kan nu fer sa kalite resers la?—Psom 19:7-10; Proverb 3:13-18.

10. Ki nu kapav truve si nu etidye Parol Bondye?

¹⁰ Salomon kontiyn so diskur, li dir: “Lerla to pu konpran lakrint Zeova, ek to pu truv konesans Bondye.” (Proverb 2:5) Li extraordiner kan nu panse ki nu, bann dimunn inparfe, nu kapav truv “konesans Bondye” Zeova, pli gran Lerwa dan liniver! (Psom 73:28; Akt 4:24) Pandan plizir syek, bann filozof ek bann dimunn ki swadizan byin malin dan sa lemond la, inn sey rod konpran bann mister lor lavi ek lor liniver. Purtan, zot pa’nn reysi truv “konesans Bondye.” Kifer? Mem si pandan plizir milye lane, sa konesans la ti la, dan Parol Bondye, zot rezet li. Zot konsider li tro sinp, akoz sa zot refiz pu aksepte ek konpran li.—1 Korintyin 1:18-21.

11. Ki sertin profi nu gayne kan nu fer letid personel?

¹¹ Salomon atir latansyon lor enn lot kitsoz ki motiv nu: “Zeova Limem donn sazes, konesans ek kapasite pu ziz bann kitsoz ki sorti dan so labus.” (Proverb 2:6) Zeova kontan pu donn sazes, konesans ek kapasite pu zize, ninport kisannla ki ena dezir pu rod sa bann kalite la. Wi, nu ena tu bann rezon pu nu apresye letid personel Parol Bondye, mem si nu bizin fer zefor, disiplinn nu ek fer sakrifis pu fer sa. Omwin nu, nu ena bann kopi Labib ki’nn fini inprime ek nu pa bizin rekopye Labib, kuma bann dimunn ti pe fer lontan!—Deteronom 17:18, 19.

Viv enn Fason Ki Zeova Apruve

12. Ki lintansyon nu bizin ena kan nu rod konesans lor Bondye?

¹² Avek ki lintansyon nu pu etidye personelman? Pu montre ki nu pli siperyer ki lezot? Eski se pu montre ki nu ena enn pli gran konesans lor Labib? Non. Seki nu anvi, se vinn bann Kretyin ki met an pratik seki nu aprann dan seki nu dir ek dan nu aksyon. Nu anvi tuletan pre pu ed lezot ek rekonfort zot avek mem latitid ki Kris ti ena. (Matye 11:28-30) Lapot Pol ti donn sa lavertisman la: “Konesans fer vinn vantar, me lamur fer vinn for.” (1 Korintyin 8:1) Alor nu bizin ena mem latitid ki Moiz, ki ti abes li kan li ti dir Zeova: “Silteple, fer mwa konn to bann semin pu ki mo konn twa ek pu ki mo kapav gayn to faver.” (Egzod 33:13) Wi, nu anvi gayn konesans pu fer plezir Zeova, pa pu inpresyonn bann dimunn. Nu anvi abes nu devan Zeova ek viv enn fason ki Li apruve. Kuma eski nu pu reysi fer sa?

13. Pu enn kikenn vinn enn serviter ki Bondye apruve, ki li bizin fer?

¹³ Pol ti konsey Timote lor seki li ti bizin fer pu fer Bondye plezir, li ti dir li: “Fer tu to posib pu paret devan Bondye kuma enn kikenn ki ena so faver, enn zuvriye ki pena naryin pu onte, ki konn servi parol laverite kuma bizin.” (2 Timote 2:15) Dan sa tex la, Pol dir “servi . . . kuma bizin,” an grek lontan, sa bann mo la ti vedir “kup drwat.” (Kingdom Interlinear) Dapre sertin, sa fer pans enn tayer ki kup latwal dapre enn patron. Uswa, sa fer pans enn laburer ki tras bann laliyn dan later pu plante. Dan sak ka, rezilta final bizin drwat ek pa traver. Donk, pu vinn enn kikenn ki apruve par Bondye ek ki gayn so faver, Timote ti bizin ‘fer tu so posib’ pu li sir ki so lanseynman ek so kondwit ti an akor avek Parol laverite.—1 Timote 4:16.

14. Kuma eski nu letid personel bizin inflyans nu parol ek nu aksyon?

¹⁴ Pol ti dir mem zafer kan li ti konsey bann Kretyin ki ti res dan lavil Kolos. Li ti dir zot “viv enn fason ki Zeova apruve pu fer Li plezir” kan “zot kontiyne raport bann bon frwi par zot bon travay, ek kontiyne fer progre dan konesans egzak Bondye.” (Kolosyin 1:10) Isi, Pol fer nu konpran ki, pu viv enn fason ki Zeova apruve, bizin ‘raport bann bon frwi.’ Li usi montre ki sa ena enn rapor avek “fer progre dan konesans egzak Bondye.” Donk, seki inportan pu Zeova, se pa zis ki kantite nu apresye konesans, me ki kantite nu pe met an pratik Parol Bondye dan nu lavi par nu aksyon ek par seki nu dir. (Romin 2:21, 22) Sa montre ki, si nu anvi fer Bondye plezir, letid personel bizin inflyans nu fason panse ek nu kondwit.

15. Kuma eski nu kapav protez ek kontrol nu lespri ek nu panse?

¹⁵ Zordi Satan byin deside pu detrir nu lor plan spirityel. Li fer nu lager kont nu prop lespri. (Romin 7:14-25) Donk, pu nu kapav viv enn fason ki apruve par Zeova, nu bizin protez ek kontrol nu lespri ek nu panse. “Konesans Bondye,” li kuma enn zarm ki ed nu pu “kontrol sak panse pu fer li obeir Kris.” Sa, se enn rezon anplis ki nu ena pu pran kont nu letid Labib tulezur. Nu pu fer sa, parski nu anvi tir dan nu lespri bann move panse egois.—2 Korintyin 10:5.

Bann Mwayin pu Konpran Labib

16. Kuma eski nu kapav tir profi kan Zeova anseyn nu?

¹⁶ Nu gayn bann byinfe lor plan spirityel ek fizik kan nu swiv lanseynman Zeova. Sa lanseynman la pa zis enn konesans ki res dan lespri ki nu pa kapav met an pratik. Akoz sa, nu lir sa bann parol la dan liv Izai: “Mwa, Zeova, mo to Bondye, se mwa ki anseyn twa pu to profi, se mwa ki fer twa mars lor enn semin kot to bizin marse.” (Izai 48:17) Kuma eski Zeova fer nu mars dan enn fason ki pu profit nu? Dabor, nu ena so Parol ki Li’nn fer ekrir, Labib. Se nu liv debaz kot nu tuletan rod ranseynman ek led. Akoz samem pandan reynion, li bon ki nu swiv dan nu Labib. Kan nu lir zistwar konsernan ofisye Etyopyin dan Akt sapit 8, nu truve ki profi sa kapav ena.

17. Ki’nn arive dan ka ofisye Etyopyin ek ki sa montre nu?

¹⁷ Ofisye Etyopyin ti konverti dan larelizyon Zwif. Li ti etidye Parol Bondye ek li ti enn krwayan byin sinser. Kan li ti pe vwayaze lor so kales, li ti pe lir liv Izai. Filip ti galup pre kot so kales pu kapav koz ar li. Li ti demann li: “Eski to konpran vremem seki to pe lir?” Kuma eski ofisye la ti reponn? “‘Kuma eski mo pu kapav konpran si personn pa explik mwa?’ Ek li ti sipliy Filip pu mont lor so kales ek vinn asiz kot li.” Apre sa, Filip, ki ti gide par lespri sin, inn ed sa ofisye la pu konpran profesi Izai. (Akt 8:27-35) Ki sa montre nu? Pu nu konpran Labib, li pa ase ki nu zis lir li personelman. Par so lespri sin, Zeova servi esklav fidel ki ena bon zizman pu ed nu pu konpran so Parol dan bon moman. Kuma eski li fer sa?—Matye 24:45-47; Lik 12:42.

18. Kuma eski grup esklav fidel ki ena bon zizman ed nu?

¹⁸ Mem si Labib apel sa grup esklav la “esklav fidel ki ena bon zizman,” Zezi pa ti dir ki zame li pu fer erer. Sa grup frer fidel ki finn swazire pu al viv dan lesyel la, zot kanmem bann Kretyin inparfe. Mem si zot ena bann bon lintansyon, zot kapav fer erer, parey kuma bann Kretyin ki ti viv dan premye syek. (Akt 10:9-15; Galat 2:8, 11-14) Purtan, zot ena bann bon mobil ek Zeova servi zot pu donn nu bann mwayin pu ed nu pu konpran Labib. Sa bann mwayin la permet nu ogmant nu lafwa dan Parol Bondye ek dan so bann promes. Mwayin prinsipal ki sa grup la inn donn nu pu nu letid personel se Les Saintes Écritures—Traduction du monde nouveau. Zordi, sa Labib la paret an 42 lang, swa an parti uswa an antye ek li’nn inprime an 114 milyon kopi dan plizir edisyon. Kuma eski nu kapav byin servi li dan nu letid personel?—2 Timote 3:14-17.

19. Ki ranseynman anplis dan Les Saintes Écritures – Traduction du monde nouveau - avec notes et références, kapav ed nu kan nu etidye personelman?

¹⁹ Pran par egzanp Les Saintes Écritures—Traduction du monde nouveau - avec notes et références. Dan sa Labib la ena bann referans, bann not, enn lindex bann mo inportan ki ena dan Labib (Index des mots bibliques), enn lindex bann not (Index des notes) ek enn Apandis (Appendice) setadir bann lezot not ki’nn azute par deryer. Sa Apandis la tret an detay 43 size ek ena bann kart, bann plan ek bann desin. Ena usi enn “Introduction” ki explike ki bann liv ek bann dokiman ki fi’nn servi pu tradir sa Labib la. Pena enn lot tradiksyon Labib ki parey kumsa. Fer tu seki u kapav pu u byin abitye avek tu sa bann ranseynman ki’nn mansyone la ek servi zot. Antuka, se avek Labib ki nu kumans nu letid, ek Traduction du monde nouveau, li enn versyon ki atir latansyon lor non Bondye ek lor dominasyon so Rwayom.—Psom 149:1-9; Danyel 2:44; Matye 6:9, 10.

20. Asterla, ki bann kestyon konsernan letid personel nu bizin reponn?

²⁰ Asterla, nu kapav demande: ‘Ki kitsoz ankor nu bizin pu konpran Labib? Kuma eski nu kapav organiz nu pu etidye Labib personelman? Kuma eski nu kapav fer nu letid personel vinn pli efikas? Kuma eski nu letid bizin inflyans lezot? Dan prosin lartik, nu pu egzaminn sa bann kitsoz byin inportan la. Se bann kitsoz ki permet nu progrese.

[Not anba paz]

Eski U Rapel?

• Ki vedir “medite”?

• Kuma eski nu bizin konsider letid Parol Bondye?

• Avek ki lintansyon nu bizin etidye personelman?

• Ki bann mwayin nu ena pu ed nu konpran Labib?

[Zimaz lor paz 21]

Tulezur bann manb fami Betel egzaminn enn tex Labib pu kumans zot lazurne. Zot truve ki sa fer zot vinn for lor plan spirityel

[Zimaz lor paz 21]

Nu kapav byin profit letan kan nu pe vwayaze pu nu ekut bann kaset Labib

[Zimaz lro paz 22]

Bann zom inn travay dir ek pandan lontan pu zot gayn lor. Ki kantite zefor eski u, u fer pu etidye Parol Bondye?

[Bann foto]

Courtesy of California State Parks, 2002

[Zimaz lor paz 23]

Labib se enn trezor ki kapav fer nu gayn lavi pu tuletan