Letid Personel Ki Prepar Nu pu Vinn Bann Anseynan Kalifye

“Medit lor sa bann kitsoz la; konsantre lor la, pu ki tu dimunn truv byin to progre. Kontiyn fer atansyon ar tomem ek ar to lanseynman.” —1 TIMOTE 4:15, 16.

1. Ki kitsoz ki vre konsernan letan ek letid personel?

“DAN Eklezyast 3:1, Labib dir ki “pu tu kitsoz ena enn letan fixe.” Sa li byin vre konsernan letid personel. Buku dimunn truve ki li difisil pu reflesi lor bann kitsoz spirityel si li pa dan bon moman uswa dan bon plas. Par egzanp, apre enn zurne travay byin fatigan ek apre ki u’nn byin manze aswar, eski u anvi etidye, sirtu si u devan u televizyon ek u’nn alonze dan u fotey prefere? Sirman pa? Donk ki solisyon ena? Se ki nu bizin swazir enn moman ek enn plas pu etidye avek lintansyon pu profit maximem bann zefor ki nu fer.

2. Suvan, ki pli bon moman pu fer letid personel?

² Buku dimunn truve ki pli bon moman pu zot etidye, se gramatin boner parski zot santi zot pli fit. Ena lezot ki profit poz midi pu etidye enn tigit. Dan bann legzanp ki site apre, remarke ki mansyonn moman ki rezerve pu bann aktivite spirityel inportan. Lerwa David, ki ti reyne an Izrael, ti ekrir: “Dan gramatin, fer mwa konn to lamur fidel, parski mo’nn met mo konfyans an twa. Fer mwa kone lor ki semin mo bizin marse, parski mo’nn turn mwa ver twa.” (Psom 143:8) Profet Izai ti truv linportans pu etidye kan li ti dir: “Pli gran Senyer Zeova Limem inn anseyn mwa pu mo kone kuma pu reponn enn kikenn ki fatige. Tulegramatin Li uver mo zorey pu mo tande, pu mo tande parey kuma bann ki finn anseyne.” Ninport ki moman nu swazire dan lazurne, seki inportan, se ki nu bizin etidye, koz avek Zeova ek les Li koz avek nu, kan nu lespri fre.—Izai 50:4, 5; Psom 5:3; 88:13.

3. Pu kapav fer enn bon letid, ki kondisyon neseser?

³ Enn lot kitsoz ki pu permet nu fer enn bon letid, se pa swazir enn fotey tro konfortab pu asize. Sa pa pu ed nu pu konsantre. Kan nu etidye, nu lespri bizin travay, me si nu tro konfortab, nu pa pu kapav fer sa. Seki bon osi kan nu etidye ek kan nu medite, se enn plas trankil kot pena okenn kitsoz ki pu distrer nu. U pa pu gayn bann bon rezilta, si u sey etidye kan radyo uswa televizyon pe zwe, uswa si bann zanfan tuletan pe apel u. Kan Zezi ti anvi medite, li ti al dan enn landrwa trankil. Li ti dir osi ki li inportan ki nu rod enn plas trankil pu nu priye.—Matye 6:6; 14:13; Mark 6:30-32.

Letid Personel Ki Prepar Nu pu Reponn Bann Kestyon

4, 5. Dan ki fason eski brosir Ki Bondye Pe Demann Nu?, li pratik?

⁴ Nu pu gayn satisfaksyon avek nu letid personel kan nu servi bann diferan mwayin ki nu ena pu konpran Labib. Sa ed nu pu etidye enn size plis an profonder, sirtu kan nu bizin reponn kestyon ki enn dimunn sinser poz nu. (1 Timote 1:4; 2 Timote 2:23). Buku nuvo kumans etidye brosir Ki Bondye Pe Demann Nu?,a ki nu ena asterla an 261 lang. Se enn brosir sinp, me byin presi ki baze net lor Labib. Bann dimunn ki lir sa brosir la, konpran vit ki Bondye demande konsernan vre ladorasyon. Me parski se enn ti brosir, li pa posib egzaminn sak size an profonder. Si u etidyan poz bann kestyon inportan lor sertin size lor ki zot pe fer letid, ki u kapav fer pu gayn plis linformasyon pu ed li reponn sa bann kestyon la?

⁵ Pu bann ki ena Watchtower Library lor CD-ROM dan zot lang, li fasil pu zot gayn enn kantite linformasyon lor ordinater. Me kuma eski bann seki pena ordinater, pu fer? Anu get de size ki egzamine dan brosir Ki Bondye Pe Demann Nu? Nu pu gete kuma nu kapav konpran plis ek reponn plis an detay kestyon ki nu bann etidyan poze—sirtu si enn kikenn demann nu Kisannla Bondye? uswa kisannla Zezi ti ete vremem?—Egzod 5:2; Lik 9:18-20; 1 Pyer 3:15.

Kisannla Bondye?

6, 7. (a) Ki kestyon ki suleve konsernan non Bondye? (b) Ki pwin inportan, enn pret pa’nn mansyone dan so diskur?

⁶ Leson 2 dan brosir Ki Bondye Pe Demann Nu? reponn sa kestyon inportan la, Kisannla Bondye? Se enn lanseynman byin inportan, parski enn dimunn pa pu kapav ador vre Bondye si li pa konn Li, uswa si li ena dut lor So legzistans. (Romin 1:19, 20; Ebre 11:6) Purtan bann dimunn atraver lemond, ena tu sort kalite krwayans lor Bondye. (1 Korintyin 8:4-6) Sak relizyon donn enn repons diferan pu explike ki Bondye ete. Laplipar relizyon ki dir zot Kretyin, krwar ki Bondye enn Trinite setadir ki Li an trwa. Enn pret Amerikin ti fer enn diskur lor “Eski U Konn Bondye?” Me, mem si li ti sit plizir fwa bann verse ki sorti dan Lekritir Ebre, pa enn sel fwa dan so diskur li finn mansyonn non Bondye. Byinsir, li ti lir dan enn tradiksyon Labib kot ena mo “Senyer” ek sa mo la ena plizir fason pu konpran li. Nu pa kone kisannla sa “Senyer” la kapav ete. Donk, tradiksyon Labib ki sa pret la ti servi, pena mo “Zeova” uswa “Yahvé,” me “Senyer.”

⁷ Sa pret la ti rat enn pwin byin inportan kan li ti sit Zeremi 31:33, 34: “‘Personn nepli pu anseyn sakenn so kamarad uswa sakenn so frer, ek dir, “Aprann konn Senyer” [an Ebre “Konn Zeova”], parski zot tu pu konn Mwa, depi pli tipti ziska pli gran parmi zot,’ sa mem ki Senyer [an Ebre, Zeova] dir.” Dan tradiksyon Labib ki li ti servi, pena non Bondye, Zeova.—Psom 103:1, 2.

8. Ki legzanp montre nu ki li inportan servi non Bondye?

⁸ Psom 8:9 montre kifer li inportan servi non Zeova, li dir: “O Zeova nu Senyer, kuma to non gran lor later!” Konpar sa verse la avek seki dir isi: “O SENYER, nu Senyer, kuma to non gran lor later!” (Traduction Œcuménique de la Bible) Purtan kuma ti mansyone dan lartik avan, nu kapav gayn “konesans Bondye” si nu les so Parol ekler nu. Me, ki mwayin ki ed nu konpran Labib ek ki anmemtan pu ed nu pu reponn byin bann kestyon konsernan linportans non Bondye?—Proverb 2:1- 6.

9. (a) Ki brosir kapav ed nu pu explike ki li inportan servi non Bondye? (b) Kuma eski buku tradikter pa finn montre zot respe pu non Bondye?

⁹ Nu kapav get brosir Le nom divin qui demeure à jamais, ki finn tradir an 69 lang.b Parti ki koz lor Le nom divin – sa signification et sa prononciation (Non Bondye, so sinifikasyon ek so prononsyasyon) (paz 6-11), montre byin ki Tetragram Ebre (an Grek, Tetragram vedir “kat let”), paret apepre 7,000 fwa dan bann ansyin tex Ebre. Purtan bann pret ek bann tradikter dan relizyon Zwif ek Kretyin, finn fer par expre pu pa met li dan laplipar bann tradiksyon Labib.c Kuma eski zot kapav dir ki zot konn Bondye ek ena enn bon relasyon avek Li, si zot refiz apel Li par so non? So vre non fer nu konpran so proze ek seki Li ete. Dan lapriyer “Notre Père,” Zezi ti dir “nu Papa dan lesyel, ki to non sanktifye.” Me si pa servi non Bondye, ki valer sa bann parol la pu ena?—Matye 6:9; Zan 5:43; 17:6.

Kisannla Zezi Kris?

10. Kuma eski nu kapav gayn tu bann ranseyman lor lavi ek lor minister Zezi?

¹⁰ Leson 3 dan brosir Ki Bondye Pe Demann Nu?, koz lor “Kisannla Zezi Kris?” Zis dan sis paragraf, ena enn ti lexplikasyon lor Zezi, kot li sorti, ek kifer li ti vinn lor later. Me, si u anvi konn so lavi net, apar bann Levanzil, pena pli bon liv ki Le plus grand homme de tous les temps, ki’nn inprime dan 111 lang.* Sa liv la ena 133 sapit ek li rakont tu lor lavi Zezi ek seki li ti anseyne dan lord ki sa ti pase, ek li baze lor kat Levanzil. Tu seki finn arive dan lavi Zezi ek lor so minister, rakonte dan sa liv la. Si u anvi etidye lavi Zezi enn manyer diferan, ek etidye sak parti so lavi, u kapav get Étude perspicace des Écritures Volim 2, anba tit “Jésus Christ.” uswa sapit 4 dan liv Konesans Ki Amenn ver Lavi pu Tuletan.

11. (a) Ki kitsoz ki fer bann Temwin Zeova diferan konsernan zot krwayans lor Zezi? (b) Sit sertin tex Labib ki montre ki doktrinn Trinite fos, ek ki piblikasyon kapav ed nu pu montre sa?

¹¹ Dan bann relizyon ki dir zot Kretyin, zot pa dakor lor seki Zezi ete, si li “Garson Bondye” ek an mem tan “Dye Lefis.” Kuma liv Catéchisme de l’Église catholique dir, zot diskite lor “prinsipal mister konsernan lafwa Kretyin,” setadir, Trinite. Bann Temwin Zeova, zot diferan avek bann lezot relizyon ki swadizan Kretyin. Zot krwar ki Zezi ti kree par Bondye, me li pa Bondye. Ena enn bon lexplikasyon lor sa size la, dan brosir Doit-on croire à la Trinité, ki finn tradir an 95 lang.d Ena enn kantite tex Labib ki servi pu montre ki Trinite pa vre, parmi ena Mark 13:32 ek 1 Korintyin 15:24, 28.

12. Ki kestyon ankor nu bizin poz nu?

¹² Seki nu’nn fek gete, konsernan Bondye ek Zezi Kris, montre dan ki fason nu kapav fer nu letid personel. Nu pu fer sa sirtu pu ed bann nuvo ki pena enn konesans lor Labib, pu gayn enn konesans egzak. (Zan 17:3) Me ki nu kapav dir konsernan bann Temwin ki dan laverite depi lontan? Avek tu sa konesans Labib ki zot inn gayne pandan tu sa letan la, eski zot ankor bizin pran kont zot letid personel Parol Zeova?

Kifer Nu Bizin “Kontiyn Fer Atansyon”?

13. Ki move rezonnman sertin kapav ena konsernan letid personel?

¹³ Sertin Temwin Zeova ki dan laverite depi lontan, kapav pran labitid pu kontant zot avek konesans ki zot finn gayne kan zot ti fek konn laverite. Li fasil pu ena sa rezonnman la: “Mwa, mo pa bizin etidye sa kantite la kuma bann nuvo. Apre tu, pandan tu sa lane ki finn pase la, gete ki kantite fwa mo finn lir Labib ek bann piblikasyon.” Li pu parey si nu dir: “Mo pa bizin pran kont ki kantite mo manze asterla, parski, get sa kantite repa ki mo finn pran depi tu sa letan la.” Nu kone ki nu bizin kontiyne nuri nu avek bann bon repa, ki’nn byin prepare, pu nu kapav res an bonn sante ek aktif. Eski sa li pa pli vre ankor lor plan spirityel, si nu anvi res for ek an bonn sante?—Ebre 5:12-14.

14. Kifer eski nu bizin fer atansyon ar numem?

¹⁴ Donk, nu tu, ki nu lontan uswa nuvo dan laverite, nu bizin pran kont konsey ki Pol ti donn Timote. Alor ki Timote ti deza enn sirveyan ki ti responsab ek byin spirityel, Pol ti dir li: “Kontiyn fer atansyon ar tomem ek ar to lanseynman. Persiste dan sa bann kitsoz la, parski kan to fer sa, to pu sov tomem ek bann ki ekut twa.” (1 Timote 4:15, 16) Kifer eski nu bizin pran byin kont sa konsey Pol la? Rapel, Pol ti osi fer resorti ki nu bizin lager kont bann “pyez ki Dyab instale” ek “kont bann move lespri.” Lapot Pyer ti met nu an gard ki Satan “pe rod enn kikenn pu devore” ek sa kikenn la kapav ninport kisannla parmi nu. Si nu tro satisfe ar numem ek nu pa pran kont danze ki devan nu, sa kapav donn lokazyon Satan pu atak nu.—Efezyin 6:11, 12; 1 Pyer 5:8.

15. Ki nu ena pu defann nu lor plan spirityel, ek kuma eski nu kapav gard li dan enn bon leta?

¹⁵ Donk, ki nu kapav servi pu defann nu? Lapot Pol rapel nu: “Met lor zot, tu bann lekipman lager spirityel Bondye, pu ki zot kapav reziste dan move zur, ek apre ki zot finn fer tu sa bann kitsoz la byin, zot kapav tini ferm.” (Efezyin 6:13) Pu ki sa lekipman spirityel la efikas, sa pa depann selman kuma li ti ete okumansman, me osi seki nu pe fer pu gard li tuzur dan enn bon leta. Alor, pu nu ena tu sa lekipman la, nu bizin ena enn konesans Labib ki byin azur. Sa montre linportans pu nu kontiyne res byin informe lor laverite ki Zeova fer nu kone par mwayin so Parol ek esklav fidel ki ena bon zizman. Pu nu gard nu lekipman spirityel dan enn bon leta, nu bizin regilye dan nu letid personel Labib ek bann piblikasyon ki baze lor Labib.—Matye 24:45-47; Efezyin 6:14, 15.

16. Ki nu kapav fer pu nu sir ki nu “gran bukliye lafwa” dan enn bon leta?

¹⁶ Pol montre ki enn parti inportan nu lekipman spirityel se nu “gran bukliye lafwa.” Avek sa nu kapav deturn ek teyn bann fos akizasyon ek lanseynman bann aposta, ki kuma bann misil dife ki Satan avoy lor nu. (Efezyin 6:16) Donk, li byin inportan ki nu verifye ki kantite nu bukliye lafwa solid ek ki zefor nu pe fer pu gard li dan enn bon leta ek fer li vinn pli solid. Par egzanp u kapav demann umem: ‘Kuma eski mo prepar mo letid Labib ki mo fer sak semenn avek led Latur Degard ? Eski mo’nn etidye ase pu mo kapav donn bann bon repons dan reynion? Eski mo bann repons ki byin prepare, ankuraz ‘pu ena lamur ek pu fer bann bon aksyon’? Eski mo uver mo Labib ek mo lir bann verse ki’nn zis site? Eski mo ankuraz lezot parski mo byin partisipe dan reynion?’ Nu nuritir spirityel, li byin profon, donk pu nu kapav profit li byin, nu pu bizin pas letan pu absorb li.—Ebre 5:14; 10:24.

17. (a) Ki pwazon Satan servi pu esey minn nu lor plan spirityel? (b) Ki antidot nu ena kont sa pwazon ki Satan servi la?

¹⁷ Satan konn febles bann dimunn inparfe, ek so bann pyez byin tret. Enn mwayin pu li ena enn move linflyans lor bann dimunn se kan li fer zot gayn enn gran fasilite pu get bann kitsoz porno. Zordi, li fasil pu bann dimunn get bann zimaz porno dan televizyon, lor Internet, lor video uswa dan bann liv. Sertin Kretyin inn les sa pwazon la minn zot defans ki ti deza feb. Sa inn fer zot perdi privilez ki zot ti ena dan kongregasyon. Parfwa sa inn ena bann pli move rezilta ankor. (Efezyin 4:17-19) Ki antidot nu ena kont sa pwazon la? Nu bizin pa negliz nu letid personel Labib, nu bann reynion ek tu lekipman spirityel ki Bondye donn nu. Tusala ansam, pu ed nu pu kapav fer diferans ant seki bon ek seki move ek pu ayir tu seki Bondye ayir.—Psom 97:10; Romin 12:9.

18. Kuma eski “lepe lespri” kapav ed nu dan nu lager spirityel?

¹⁸ Si nu gard nu bann bon labitid pu etidye regilyerman Labib, nu pu ena enn defans solid. Konesans egzak ki nu pu gayne lor Parol Bondye, pa pu zis ed nu pu defann nu, me osi nu pu ena kapasite pu atake. Nu pu fer sa avek “lepe lespri, setadir parol Bondye.” Parol Bondye li “pli fite ki enn lepe ki fite de kote ek li perse ziska ki li diviz nam ek lespri, ek bann zwin ek zot lamwel, ek li kapav dekuver bann panse ek ban lintansyon ki ena dan nu leker.” (Efezyin 6:17; Ebre 4:12) Si nu vinn bann dimunn ki kapav byin servi sa “lepe” la, alor kan nu gayn bann tantasyon, nu pa pu les nu anbete par bann kitsoz ki paret inosan uswa atiran. Nu pu truve ki an realite se bann pyez Satan ki amenn ver lamor spirityel. Konesans ek lintelizans lor Labib ki nu ena, pu ed nu pu rezet bann move kitsoz ek pu fer seki bon. Donk, nu tu, nu bizin demann numem: ‘Eski mo lepe spirityel byin fite, uswa eski li ruye? Eski li difisil pu mo rapel bann tex Labib ki kapav fer mwa vinn pli for kan mo pe atake?’ Anu gard nu bann bon labitid dan letid personel Labib ek lerla nu pu reziste kont Satan.—Efezyin 4:22-24.

19. Ki profi nu kapav gayne si nu pran kont nu letid personel?

¹⁹ Pol ti ekrir: “Tu lekritir finn inspire par Bondye, li profitab pu anseyne, pu korize, pu met bann kitsoz an ord, pu disipline dan lazistis, pu ki zom Bondye kapav byin kalifye, byin ekipe pu tu bon travay.” Si nu pran kont seki Pol ti dir Timote, nu kapav fer nu spirityalite vinn pli for ek nu predikasyon pu pli efikas. Bann ansyin ek bann serviter ministeryel spirityel, pu enn pli gran led dan kongregasyon, ek nu tu nu kapav res for ek gard enn lafwa solid.—2 Timote 3:16, 17; Matye 7:24-27.

[Not anba paz]

Eski U Rapel?

• Dan ki kondisyon favorab u kapav fer enn bon letid personel?

• Ki erer eski buku tradiksyon Labib fer konsernan non Bondye?

• Ki tex Labib u pu servi pu montre ki lanseynman lor Trinite fos?

• Ki nu bizin fer pu protez nu kont bann pyez Satan, mem si nu dan laverite depi lontan?

[Zimaz lor paz 25]

Pu u kapav byin etidye, u bizin enn bon plas kot ena mwins kitsoz ki kapav distrer u

[Caption on page 1]

Eski u “lepe” fite uswa li ruye?