Eski Zeova Remark Seki U Fer?

KUMA u pu reponn sa kestyon la? Buku pu dir: ‘Mo krwar ki Bondye ti remark seki bann zom kuma Moiz, Gideonn ek David ti fer, me mo pa sir ki Li interese ar tu seki mo kapav fer. Antuka, mo pa kuma Moiz, Gideonn ek David.’

Li vre ki sertin zom fidel dan lepok Biblik ti fer bann aksyon extraordiner ki montre ki zot ena lafwa. Zot ‘ti gayn laviktwar lor bann rwayom, ti ferm lagel bann lyon, ti aret lafors dife ek ti manke mor par lepe.’ (Ebre 11:33, 34) Me, ena lezot ki finn montre zot lafwa dan bann fason mwin extraordiner. Purtan, Labib donn nu lasirans ki Bondye ti remark zot bann aksyon ki zot ti fer par lafwa. Pu sa, anu get trwa legzanp Biblik. Legzanp enn berze, enn profet ek enn vev.

Enn Berze Ofer enn Sakrifis

Ki u rapel lor Abel, dezyem garson Adan ek Ev? Kitfwa u rapel ki li ti mor an martyr, ek sa se enn kitsoz par ki pa buku parmi nu kitfwa pu pase. Me, Bondye ti remark Abel pu enn lot rezon.

Enn zur Abel ti pran sertin parmi so bann pli bon zanimo dan so trupo ek Li ti ofer zot kuma enn sakrifis pu Bondye. Zordi, nu kapav konsider sa don la kuma enn kitsoz ki sinp. Me, Zeova ti remark sa don la ek Li ti montre ki Li ti apruv sa. Me, pa fini. Preske kat mil an plitar, par so lespri sin, Zeova ti fer lapot Pol ekrir lor la dan liv Ebre. Apre tu sa lane la, Bondye pa ti bliye sa sinp sakrifis la!—Ebre 6:10; 11:4.

Kuma eski Abel ti deside ki kalite sakrifis li ti pu ofer? Labib pa dir nanyin lor la. Me Abel ti sirman pran letan pu reflesi lor la. Li ti enn berze, donk li normal ki li ofer sertin parmi so bann zanimo. Me, remarke ki li ti donn seki ti pli bon, bann “parti gra.” (Zenez 4:4) Li posib usi ki li ti reflesi lor bann parol ki Zeova ti dir serpan dan zardin Edenn: “Mo pu met enn lager ant twa ek sa fam la, ant to desandans ek so desandans. Li pu kraz to latet ek twa, to pu mord so talon.” (Zenez 3:15; Revelasyon 12:9) Li vre ki Abel pa ti kone kisannla sa “fam” la ek so “desandans.” Me li ti realize ki ti pu bizin ena disan ki ti pu verse kan desandans sa fam la ti pu gayn ‘morde dan so talon.’ Sirman li ti rekonet ki nanyin pa vo enn kreatir ki vivan. Pli inportan ankor, sa sakrifis ki li ti ofer la ti vremem byin apropriye.

Parey kuma Abel, bann Kretyin zordi zot ofer Bondye bann sakrifis. Zot pa ofer bann premye-ne dan zot trupo. Zot donn ‘enn sakrifis luanz, setadir frwi zot lalev ki fer deklarasyon piblik pu so non.’ (Ebre 13:15) Nu fer deklarasyon piblik kan nu partaz nu krwayans ar lezot.

Eski u ti pu kontan amelyor kalite u sakrifis luanz? Alor, reflesi byin lor bezwin bann dimunn ki dan u teritwar. Ki trakas zot? Ki kitsoz interes zot? Ki bann laspe dan mesaz Labib ki atir zot? Sak fwa ki u prese, analiz bann konversasyon ki u’nn gayne, avek lintansyon pu vinn pli efikas. Ek kan u koz lor Zeova, fer Li avek konviksyon ek avek tu u leker. Fer u sakrifis vinn enn vre “sakrifis luanz.”

Enn Profet Pres ar Bann Dimunn Ki Pa Aksepte So Mesaz

Asterla, get legzanp profet Enok. Li posib ki sa lepok la li ti sel kikenn ki ti pe rann temwaynaz lor Bondye Zeova. Eski u dan mem sityasyon ki Enok, setadir u tusel pe servi Zeova fidelman dan u fami? Eski u sel zelev dan u klas uswa sel travayer ki res atase ar bann prinsip Labib dan landrwa kot u travay? Si wi, sirman u pe fer fas ar buku presyon. Kitfwa u bann kamarad, fami, kamarad lekol, kamarad travay ankuraz u pu kas bann lalwa Bondye. Kitfwa zot dir: “Zame kikenn pu kone ki to’nn fer, nu pa pu dir nanyin.” Zot kapav mem persiste pu dir ki li bet pu u trakas u konsernan bann prinsip moral ki ena dan Labib, parski Bondye pa kas latet ar seki u fer. Zot agase ki u pa pans ek azir parey kuma zot. Akoz sa zot kapav fer tu pu afebli lafors ki u ena pu reziste.

Nu bizin rekonet ki li pa fasil pu fer fas ar sa kalite presyon la. Me, li pa inposib. Mazinn Enok, setyem zom ki ti viv apre Adan. (Zid 14) Lepok ki Enok ti ne, laplipar dimunn ti deza fini perdi tu zot sans moral. Zot pa ti koz byin ar li. Zot kondwit ti “sokan.” (Zid 15) Zot ti azir preske parey kuma buku dimunn zordi.

Me ki Enok ti fer? Repons sa kestyon la li interesan pu nu zordi. Mem si, sa lepok la, Enok kitfwa ti sel zom lor later ki ti servi Zeova, an realite li pa ti tusel. Enok ti mars avek Bondye.—Zenez 5:22.

Fer Zeova plezir, sa mem ti pli inportan dan lavi Enok. Li ti kone ki mars avek Bondye ti inplik plis ki zis amenn enn lavi ki prop lor plan moral. Zeova ti atann ki li prese. (Zid 14, 15) Bann dimunn ti bizin gayn lavertisman ki Bondye ti’nn remark bann move aksyon ki zot ti pe fer. Enok ti kontiyn mars avek Bondye pandan plis ki 300 an, buku plis ki sertin parmi nu finn bizin siporte. Ziska li mor, li finn kontiyn mars avek Bondye.—Zenez 5:23, 24.

Parey kuma Enok, nu’si nu’nn gayn lord pu prese. (Matye 24:14) Nu pa zis pres bon nuvel lakaz-lakaz. Nu sey pres usi avek nu bann paran, bann koleg travay ek nu bann kamarad lekol. Me defwa, nu kapav ezite pu koz avek kuraz. Eski u dan sa sityasyon la? Pa dekuraze. Imit legzanp bann premye Kretyin ki ti priye Bondye pu zot gayn kuraz. (Akt 4:29) Fode zame u bliye ki tanki u mars avek Bondye, zame u pa pu tusel.

Enn Vev Prepar enn Repa

Mazinn enn kut. Enn vev ki nu pa kone kuma li apele, ti gayn de benediksyon zis parski li ti prepar enn sinp ti manze! Li pa ti enn Izraelit. Li ti enn etranze ki ti viv plis ki 2,800 an desela dan lavil Sarfat. Ver lafin enn long peryod lasesres ek lafaminn, sa vev la pa ti ena preske nanyin pu li manze. Li ti res zis enn pwayne lafarinn ek ase delwil pu li fer enn dernye repa pu li ek pu so garson.

Zis lerla, enn viziter finn vini. Sa viziter la ti Eliya, profet Zeova, ek li ti demann vev la pu partaz sa tigit manze ki ti reste la avek li. Ti ena ase manze zis pu sa vev la ek so garson, ek byinsir pa ti ena anplis pu donn sa viziter la. Me Eliya ti asir li par bann parol ki Zeova ti dir, setadir ki si vev la partaz sa repa la avek li, ni li ni so garson pa pu mank manze. Sa vev la ti bizin ena lafwa pu krwar ki Bondye Izrael ti pu remark li, enn vev etranze. Me purtan, li finn krwar Eliya, ek Zeova finn beni li. “Parey kuma Zeova ti dir atraver Eliya, sa gran po lafarinn la pa’nn vid, ek delwil dan sa ti po la pa’nn diminye.” Sa vev la ek so garson finn gayn manze tulezur ziska ki lafaminn fini.—1 Lerwa 17:8-16.

Me ti ena enn lot benediksyon ki ti pe atann sa vev la. Inpe letan apre sa mirak la, so garson byineme finn tom malad ek finn mor. Eliya ti ena pitye pu li. Li finn sipliy Zeova pu resisit sa garson la. (1 Lerwa 17:17-24) Ti pu bizin fer enn mirak ki zame pa finn arive avan. Dan Labib, okenn par nu pa lir ki enn kikenn finn resisite avan sa. Eski Zeova ankor enn fwa pu montre so mizerikord anver sa vev etranze la? Se seki Li finn fer. Zeova finn donn Eliya puvwar pu resisit sa garson la. Get seki Zezi finn dir plitar lor sa madam ki ti gayn sa gran privilez la: “Ti ena buku vev dan Izrael . . . Purtan, Bondye ti avoy Eliya . . . dan Sarfat, dan peyi Sidonn, ver enn vev.”—Lik 4:25, 26.

Zordi, mem dan bann peyi byin devlope, sityasyon ekonomik pa stab ditu. Sertin gran konpayni finn met deor bann anplwaye ki ti bann bon travayer pandan plizir dizenn lane. Devan lide ki enn kut li kapav perdi so travay, enn Kretyin kapav tante pu pas buku plis letan dan travay avek lespwar ki so konpayni pu gard li. Si li fer sa, kitfwa li pa pu gayn ase letan pu asiste bann reynion, partisip dan predikasyon, uswa mem pran swin so fami lor plan afektif ek spirityel. Me selman, li panse ki li bizin gard sa travay la kutkekut.

Enn Kretyin ki dan sa kalite sityasyon difisil la, ena rezon pu li trakase. Zordi, li difisil pu gayn enn travay. Laplipar parmi nu, nu pa pe lite pu vinn ris. Me, parey kuma sa vev dan Sarfat la, nu anvi omwin ena bann kitsoz ki neseser pu viv. Me, lapot Pol rapel nu seki Bondye ti dir: “Zame mo pa pu kit twa, zame mo pa pu abandonn twa.” Avek konfyans nu kapav dir: “Zeova ki ed mwa. Ki enn zom kapav fer mwa?” (Ebre 13:5, 6) Pol ti pre pu riske so lavi akoz sa promes la, ek Zeova tuletan finn pran li swin. Bondye pu fer parey pu nu, si nu pa abandonn Li.

Nu kapav santi ki zame nu pu kapav fer bann bon aksyon ki remarkab parey kuma sa bann dimunn spirityel la, kuma Moiz, Gideonn, ek David. Me nu kapav imit zot lafwa. Ek nu kapav rapel bann aksyon sinp ki Abel, Enok ek sa vev dan Sarfat la ti fer pu montre zot lafwa. Zeova pran kont tu bann aksyon ki nu fer pu montre nu lafwa, mem bann ki pli tipti. Kan enn zenn ki al lekol ek ki ena lakrint pu Bondye refiz ladrog ki so kamarad pe ofer li, kan enn Kretyin refiz bann propozisyon imoral dan travay, kan enn Temwin aze asiste reynion regilyerman malgre lafatig uswa enn move lasante, Zeova truv tusala. Ek sa fer so leker kontan!—Proverb 27:11.

Eski U Remark Seki Lezot Fer?

Wi, Zeova remark seki nu fer. Donk, pwiski nu imit Bondye, nu bizin pre pu rekonet zefor ki bann lezot fer. (Efezyin 5:1) Kifer eski u pa pran inpe plis kont bann difikilte ki u bann frer pe fer fas pu zot kapav asiste bann reynion, partisip dan predikasyon uswa mem fer zot bann laktivite tulezur?

Apre sa, fer u frer ek ser kone ki u byin apresye bann zefor ki zot fer. Zot pu byin kontan ki u’nn remark zot bann zefor. Ek u lintere kapav rasir zot ki Zeova usi remark seki zot fer.