Bann Serviter Zeova Ena enn Vre Lespwar
“Bann ki reste dan Zakob pu bizin vinn omilye buku pep, kuma laroze ki sorti kot Zeova . . . ki [pa] kont lor bann zom.”—MIKA 5:7.
1. Kuma eski Izrael spirityel li enn benediksyon pu bann dimunn?
ZEOVA Limem gran Kreater ki donn lapli ek laroze. Li bet ki nu kont lor bann zom pu donn nu laroze uswa lapli. Profet Mika ti ekrir: “Bann ki reste dan Zakob pu bizin vinn omilye buku pep, kuma laroze ki sorti kot Zeova, kuma gro lapli lor bann plantasyon, ki ni kont lor bann zom, ni atann [zot] usi.” (Mika 5:7) Sa “bann ki reste dan Zakob” la, ki zot reprezante zordi? Se bann Izraelit spirityel, bann manb “Izrael Bondye” ki reste lor later. (Galat 6:16) Pu “buku pep” lor later, zot “kuma laroze ki sorti kot Zeova” ek “kuma gro lapli lor bann plantasyon.” Wi, bann manb 144,000 ki ankor lor later, zot enn benediksyon Bondye pu bann dimunn. Antan ki predikater Rwayom, Zeova pe servi zot pu fer bann dimunn konn so mesaz ki donn vre lespwar.
2. Kifer nu ena vre lespwar malgre ki nu pe viv dan enn lemond ki ranpli ar problem?
2 Nu pa etone kan nu truve ki lemond pena vre lespwar. Bann sistem politik ki pa stab, degradasyon moral, krim, kriz ekonomik, teroris, lager—tusala se bann kitsoz ki nu bizin atann pu truve dan enn lemond ki domine par Satan. (1 Zan 5:19) Buku per seki lavenir rezerve. Me nu, bann adorater Zeova, nu pa per parski nu ena enn lespwar sir pu lavenir. Se enn vre lespwar parski li baze lor Parol Bondye. Nu ena lafwa an Zeova ek dan so Parol parski seki Li dir, tuletan realize.
3. (a) Kifer Zeova ti pu pran sanksyon kont Izrael ek Zida? (b) Kifer bann parol Mika aplik ar nu lepok?
3 Profesi Mika ki’nn inspire par Bondye, fortifye nu pu mars dapre non Zeova. Li donn nu bann bon rezon pu nu gard enn vre lespwar. Dan wityem syek A.N.L., kan Mika ti profetize, lepep avek ki Bondye ti fer lalyans ti divize an de nasyon, Izrael ek Zida. Tulede ti pe inyor lalyans Bondye. Rezilta: tulede rwayom ti sufer degradasyon moral, lapostazi relizye, ek materyalis ki depas born. Alor, Zeova ti averti zot ki Li ti pu pran sanksyon kont zot. Byinsir, Zeova ti donn bann avertisman avantu pu seki ti pe viv lepok Mika. Me, sityasyon sa lepok la li telman parey ar sityasyon zordi ki bann parol Mika aplik ar nu lepok usi. Nu pu truv sa pli klerman amezir ki nu egzaminn detrwa pwin for ki ena dan set sapit liv Mika.
Seki Nu Aprann kan Nu Egzaminn Angro Liv Mika
4. Ki bann ranseynman nu gayne dan Mika sapit 1 ziska sapit 3?
4 Anu get enn ku angro seki ena dan liv Mika. Dan sapit 1, Zeova devwal revolt Izrael ek Zida. Akoz zot byin move kondwit, Izrael pu detrir ek pinisyon Zida pu ariv mem ziska laport Zerizalem. Sapit 2 montre nu kuma bann ris ek bann ki ena puvwar pe dominn lor bann dimunn feb, ki san defans. Me selman, ena usi enn promes Bondye. Lepep Bondye pu rasanble ansam dan linite. Sapit 3 sit parol ki Zeova ti prononse kont dirizan bann nasyon ek kont bann profet ki ti pe mal azir. Bann dirizan la pe fer lazistis vinn traver, ek bann profet pe koz manti. Malgre sa, Mika gayn lafors ar lespri sin pu proklam zizman defavorab Zeova.
5. Ki lide santral nu truve dan Mika sapit 4 ek 5?
5 Sapit 4 predir ki dan dernye zur, tu bann nasyon pu vinn lor enn montayn ot ki reprezant landrwa kot ador Zeova, pu zot les zot anseyne par Li. Selman avan sa, Zida pu bizin al an egzil dan Babilonn, me apre Zeova pu delivre li. Sapit 5 revel nu ki Mesi pu ne dan Betleem, an Zida. Li pu diriz so pep ek Li pu sov zot dan lamin bann nasyon dominer.
6, 7. Ki bann pwin ki devlope dan sapit 6 ek 7 profesi Mika?
6 Mika sapit 6 koz lor bann akizasyon Zeova kont so pep dan form enn prose legal. Ki Zeova finn fer pu fer so pep rebele? Nanyin! Avredir, tu seki Li reklam so pep, li byin rezonab. Li anvi ki so bann adorater pratik lazistis, labonte, ek ki zot mars dan enn fason modes avek Li. Me olye fer sa, Izrael ek Zida finn revolte ek asterla zot pu bizin pey bann konsekans.
7 Dan dernye sapit, Mika denons mesanste bann Zwif so lepok. Me li, li pa bes lebra. Li determine pu “kontiyn atann” Zeova. (Mika 7:7) Bann dernye parol liv Mika exprim konfyans ki Mika ena ki Zeova pu ena pitye pu So pep. Listwar konfirme ki lespwar Mika ti realize. Dan lane 537 A.N.L., kan Zeova ti’nn fini disiplinn so pep, avek pitye Li ti fer enn grup Zwif return dan zot peyi.
8. Kuma eski u ti pu rezim seki ena dan liv Mika?
8 Zeova finn revel bann bon ranseynman par mwayin Mika, pa vre? Sa liv inspire la, donn bann legzanp ki averti nu kuma Zeova tret bann infidel ki pretann servi Li. Li anons bann evennman ki pe arive zordi. Ek li donn nu konsey Bondye lor kondwit ki nu bizin ena dan sa bann peryod difisil la, pu fortifye nu lesperans.
Suverin Senyer Zeova Koze
9. Dapre Mika 1:2, ki Zeova ti pu al fer?
9 Asterla, anu egzaminn liv Mika dan plis detay. Dan Mika 1:2, nu lir: “Tande, zot bann pep, zot tu; pran kont, later ek tu seki ranpli twa, ek les Suverin Senyer Zeova servi kuma enn temwin kont twa, Zeova depi so tanp sakre.” Si u ti viv dan lepok Mika, sirman sa bann parol la ti pu kapte u latansyon. Wi vremem, zot kapte u latansyon parski Zeova pe koz depi so tanp sakre ek Li pa pe adres Li zis ar Izrael ek Zida, me ar tu dimunn partu. Dan lepok Mika, bann dimunn ti inyor Suverin Senyer Zeova pandan tro lontan. Sa pa ti pu tarde pu sanze. Zeova ti pu pran enn sanksyon final.
10. Kifer bann parol Mika 1:2 byin inportan pu nu?
10 Zordi usi parey. Revelasyon 14:18-20 montre ki Zeova pe kominik ankor enn fwa depi so tanp sakre. Byinto, Zeova pu pran enn sanksyon final, ek bann evennman kapital pu sakuy limanite. Sa fwa la, pu zet move ‘pye rezin ki lor later’ dan gran preswar divin, ki sinifi koler Zeova. Sa sistem ki Satan pe dirize la, pu detrir konpletman.
11. Kuma eski nu kapav konpran bann parol Mika 1:3, 4?
11 Ekut seki Zeova pu fer. Mika 1:3, 4 dir: “Gete! Zeova pe sorti dan so plas, ek vremem Li pu desann ek Li pu mars lor bann plas ki ot lor later. Ek bann montayn pu bizin fonn anba Li, ek bann laplenn anba pu fann, kuma lasir akoz dife, parey kuma enn kantite delo ki pe verse lor enn lapant.” Eski vremem Zeova pu kit landrwa kot Li reste dan lesyel pu vinn mars lor bann montayn ek laplenn sa Peyi ki Li ti promet la? Non. Li pa oblize fer sa. Li nek ena pu turn so latansyon ver later pu ki so volonte akonpli. Anplis, se pa planet later ki pu sufer sa bann kitsoz ki pe dekrir la, me so bann abitan. Kan Zeova azir, konsekans pu terib pu bann ki pa fidel—li pu parey kumadir bann montayn finn fonn kuma lasir ek bann laplenn finn fann par enn tranbleman deter.
12, 13. An akor avek 2 Pyer 3:10-12, ki permet nu gard enn lespwar sir?
12 Bann parol dan profesi Mika 1:3, 4 kapav fer u rapel enn lot profesi ki ti anons bann evennman terib lor later. Dan 2 Pyer 3:10, lapot Pyer ti ekrir: “Zur Zeova pu vinn kuma enn voler. Sa zur la, lesyel pu al fini dan enn tapaz sifleman, me bann eleman ki’nn byin sofe pu fonn, ek later ek bann travay ki ena dan li pu dekuver.” Parey kuma profesi Mika, bann parol Pyer pa aplik ar lesyel ek later literal. Zot fer referans ar enn gran detres ki pu vinn lor lemond, ki pa pe fer Bondye plezir.
13 Malgre sa katastrof ki pe vini la, bann Kretyin kapav ena konfyans dan lavenir, parey kuma Mika. Kuma? Kan zot swiv konsey ki Pyer done apre dan so let. Li dir: “Ki kalite dimunn zot bizin ete par bann aksyon ki montre zot kondwit sin ek zot latasman avek Bondye; kontiyn atann ek gard tuzur dan zot lespri prezans zur Zeova!” (2 Pyer 3:11, 12) Wi, nu pu ena enn lespwar sir pu lavenir. Me pu sa, nu bizin kiltiv enn leker obeisan, fer tu pu gard enn kondwit sin ek fer bann aksyon ki montre nu latasman ar Bondye. Pu gard nu lespwar solid, fode zame nu bliye usi ki zur Zeova pu vini kutkekut.
14. Kifer Izrael ek Zida merit pinisyon?
14 Zeova explike kifer so pep sa lepok la, ti merit pinisyon. Mika 1:5 dir: “Se parski Zakob finn revolte ki ena tusala, wi akoz bann pese lakaz Izrael. Ki revolt Zakob finn fer? Eski pa Samari sa? Ek ki zot ete, sa bann plas ot dan Zida la? Eski pa Zerizalem sa?” Si Izrael ek Zida ti egziste, se grasa Zeova. Purtan, zot finn rebel kont Li, ek zot rebelyon finn al mem ziska Samari, kapital Izrael, ek Zerizalem, kapital Zida.
Ena Buku Move Pratik
15, 16. Pu ki kalite move aksyon bann Zwif lepok Mika ti responsab?
15 Mika 2:1, 2 dekrir klerman enn legzanp mesanste bann Zwif lepok Mika: “Maler bann ki, lor zot lili, pe fer enn proze pu fer ditor, ek bann ki pe pratik seki move! Avek lalimyer gramatin zot kumans fer li, parski li dan puvwar zot lamin. Zot finn anvi gayn bann karo ek zot finn pran sa pu zot; bann lakaz usi, zot finn pran; zot finn fer frod ar enn zom ek so fami, avek enn zom ek tu so dibyin ki li’nn erite.”
16 Bann ki gurman dibyin, dormi lizye uver aswar. Zot fer plan pu pran karo ek lakaz zot prosin. Gramatin, zot degaze pu realiz zot plan. Bann Zwif pa ti pu mal azir kumsa, si zot ti rapel lalyans Zeova. Dan Lalwa ki Bondye ti donn Moiz, ti ena bann regleman pu protez dimunn mizer. Dapre Lalwa, enn fami pa kapav perdi so leritaz dan enn fason permanan. Me, bann ki gurman dibyin pa pran kont sa lalwa la. Zot inyor bann parol Levitik 19:18 ki dir: “To bizin kontan to prosin kuma tomem.”
17. Ki kapav arive kan enn kikenn ki pretann servi Bondye, met bann kitsoz materyel an premye dan so lavi?
17 Sa montre ki kapav arive kan enn dimunn ki pretann servi Bondye, negliz so bann obzektif spirityel ek li galup deryer bann kitsoz materyel. Pol ti averti bann Kretyin so lepok: “Bann ki byin deside pu vinn ris, zot tom dan tantasyon, dan enn pyez ek dan buku bann dezir ki pena valer ek ki fer zot ditor, ki plonz bann dimunn dan destriksyon ek larwinn.” (1 Timote 6:9) Si enn dimunn galup zis deryer larzan, avredir li pe ador enn fos bondye—Mamonn, setadir Rises. Sa fos bondye la pa donn okenn lespwar sir pu lavenir.—Matye 6:24, not.
18. Ki ti pu ariv bann ki dan lepok Mika ti pe galup deryer bann kitsoz materyel?
18 Atraver move lexperyans ki zot inn fer, buku dan lepok Mika finn aprann ki kan zot met zot konfyans dan bann kitsoz materyel, sa pa amenn nanyin. Dapre Mika 2:4, Zeova dir: “Sa zur la, pu pronons enn proverb lor zot ek pu pleyn lor zot. Pu bizin dir: ‘Vremem nu finn ravaze net! Li sanz porsyon mo pep. Get kuma li pran sa ar mwa! Li pe partaz nu bann karo ar enn kikenn ki pa fidel.’ ” Wi, bann voler lakaz ek karo pu perdi zot prop leritaz familyal. Zot pu deporte dan enn peyi etranze, ek tu zot bann dibyin pu vinn enn piyaz pu “enn kikenn ki pa fidel,” setadir bann nasyon. Pena okenn lespwar pu zot pu lavenir.
19, 20. Ki ti ariv bann Zwif ki ti met zot konfyans an Zeova?
19 Me, bann ki fer Zeova konfyans, zot lespwar pa pu tom dan delo. Zeova fidel ar so bann lalyans ki Li ti fer ar Abraam ek David, ek Li ena pitye pu bann ki, kuma Mika, kontan Li ek gayn sagrin parski bann Zwif, parey kuma zot, finn deporte. Akoz bann dimunn drwat, pu ena enn retablisman dan ler ki Bondye finn fixe.
20 Sa finn arive dan lane 537 A.N.L., apre ki Babilonn inn tonbe ek enn grup Zwif ti’nn return dan zot peyi. Sa lepok la, bann parol Mika 2:12 finn konn enn premye realizasyon. Zeova dir: “Vremem mo pu rasanble Zakob, zot tu; san fot, mo pu rasanble bann ki reste dan Izrael. Mo pu etabli zot dan linite, kuma enn trupo dan lanklo, kuma enn grup zanimo omilye so patiraz; [lanklo] pu ranpli ar lavwa plizir zom ansam.” Wi, Zeova Li vremem enn Bondye ki ena lamur! Apre ki Li’nn disiplinn so pep, Li permet enn ti grup returne ek servi Li dan peyi ki Li ti donn zot bann anset.
Bann Paralel Remarkab pu Nu Lepok
21. Kuma eski bann kondisyon ki egziste dan nu lepok parey kuma bann kondisyon ki ti egziste dan lepok Mika?
21 Pandan ki nu finn egzaminn bann verse dan de premye sapit Mika, eski sa pa finn frap u kuma zordi usi, sityasyon parey? Parey kuma dan lepok Mika, buku zordi pretann servi Bondye. Purtan, parey kuma Zida ek Izrael, zot divize ek zot finn mem lager ant zot. Buku dimunn ris parmi bann swadizan Kretyin finn fer dominer ar dimunn pov. Deplizanpli, bann sef relizye toler bann pratik ki kondane klerman dan Labib. Li pa etonan donk, ki Zeova profetize ki bann swadizan Kretyin byinto pu disparet, ansam avek lezot parti “Gran Babilonn,” lanpir mondyal fos relizyon! (Revelasyon 18:1-5) Me, parey kuma dan lepok Mika, Zeova pu ena ankor bann serviter fidel ki reste lor later.
22. Sit de grup dimunn ki finn met zot lespwar dan Rwayom Bondye.
22 An 1919, bann manb 144,000 ki ti ankor lor later, ti separ zot konpletman ar bann swadizan Kretyin. Lerla, zot ti kumans proklam labonn nuvel avek tu bann nasyon. (Matye 24:14) Pu kumanse, zot ti rod bann dernye manb Izrael spirityel. Apre sa, enn gran laful “lezot muton” finn rasanble ansam avek zot, ek sa de grup la form “enn sel trupo, enn sel berze.” (Zan 10:16) Mem si asterla zot pe servi Bondye dan plis ki 234 peyi, tu sa bann adorater fidel la finn vremem etabli “dan linite.” Ek asterla, “[lanklo] ranpli ar lavwa plizir zom,” fam ek zanfan usi. Zot lespwar li pa dan sa lemond la, me dan Rwayom Bondye, ki byinto pu retabli Paradi lor later.
23. Ki konvink u ki u lespwar li sir?
23 Konsernan bann fidel adorater Zeova, dernye verse Mika sapit 2 dir: “Zot lerwa pu pase devan zot, avek Zeova alatet.” Eski u truv u dan sa defile laviktwar la, kot u pe swiv u Lerwa Zezi Kris, ek alatet ena Zeova Limem? Si wi, u kapav ena lasirans ki u lor semin laviktwar final ek ki u lespwar li sir. Nu pu truv sa pli klerman ankor amezir ki nu egzaminn lezot pwin for profesi Mika.
Kuma U Pu Reponn?
• Dan lepok Mika, kifer Zeova ti pran sanksyon kont Zida ek Izrael?
• Ki kapav arive kan enn kikenn ki pretann servi Bondye, met bann kitsoz materyel an premye dan so lavi?
• Apre legzamin Mika sapit 1 ek 2, kifer u kapav dir, san okenn dut, ki u lesperans sir?
[Zimage page 6]
Profesi Mika kapav fortifye nu lor plan spirityel
[Zimage page 7]
Parey kuma sa ti grup Zwif an 537 A.N.L., bann Izraelit spirityel ek zot bann konpaynon pe favoriz vre ladorasyon