Ki Zeova Pe Reklam Nu?

“Ki Zeova pe reklam twa, apart zis pratik lazistis, kontan labonte ek mars dan enn fason modes avek to Bondye?”—MIKA 6:8.

1, 2. Kifer sertin serviter Zeova kapav dekuraze, me ki pu kapav ed zot?

VERA ena anviron 75 an. Li enn ser fidel ki pena enn bon lasante. Li dir: “Parfwa, mo get par lafnet ek mo truv mo bann frer ek ser pe prese. Larm vinn dan mo lizye parski mo ti pu kontan avek zot, me akoz maladi, mo pa kapav fer buku pu Zeova.”

² Eski u’si u finn deza ena sa mem santiman la? Byinsir, tu bann ki kontan Zeova anvi mars dapre so non ek fer tu seki Li reklam nu. Me ki pu fer si pli ale nu lasante pe pli gate, nu pe vinn vye, uswa nu ena plis responsabilite familyal? Nu kapav dekuraze parski petet sa bann sityasyon la anpes nu fer tu seki nu leker anvi fer dan servis Bondye. Si nu dan sa sityasyon la, sirman nu pu ankuraze kan nu egzaminn Mika sapit 6 ek 7. Sa bann sapit la montre nu ki Zeova reklam nu bann kitsoz ki rezonab ek ki dan nu porte.

Kuma Bondye Tret So Pep

3. Kuma eski Zeova tret bann Izraelit rebel?

³ Dabor, anu get Mika 6:3-5. Note kuma Zeova tret so pep. Rapel ki dan lepok Mika bann Zwif ti rebel. Malgre sa, avek konpasyon Zeova koz ar zot, Li dir: “A mo pep.” Li sipliy zot: “A mo pep, rapel silteple.” Olye ki Li akiz zot dan enn fason dir, Li sey tus zot leker. Li demann zot: “Ki mo’nn fer twa?” Li mem ankuraz zot pu “temwayn kont” Li.

4. Kuma eski nu kapav imit konpasyon ki Zeova ti manifeste?

⁴ Zeova les enn bon legzanp pu nu. Avek konpasyon, Zeova ti apel bann Zwif rebel “mo pep” ek Li ti mem dir “silteple” kan Li ti koz ar zot. Donk, nu’si nu bizin azir avek konpasyon ek bonte anver bann manb nu kongregasyon. Li vre ki li pa tuzur fasil pu byin adapte avek sertin; petet, zot feb lor plan spirityel. Me si zot kontan Zeova, nu anvi ed zot, ek tret zot avek konpasyon.

5. Ki pwin inportan ki nu konn byin, Mika 6:6, 7 fer resorti?

⁵ Asterla, anu get Mika 6:6, 7. Mika poz enn seri kestyon: “Avek ki kitsoz mo pu prezant mwa devan Zeova? Avek ki kitsoz mo pu bes latet devan Bondye? Eski mo pu prezant mwa devan Li avek bann sakrifis antye ki brile, avek bann vo ki ena enn an? Eski Zeova pu kontan aksepte enn gran kantite muton mal ek enn gran kantite delwil? Eski mo pu donn mo garson premye-ne akoz mo revolt, frwi mo vant pu pese mo nam?” Non, li inposib pu fer Zeova plezir avek “enn gran kantite muton mal ek enn gran kantite delwil.” Me, ena enn kitsoz ki pu fer Li plezir. Ki kitsoz?

Nu Bizin Pratik Lazistis

6. Dapre Mika 6:8, sit trwa kitsoz ki Bondye pe reklam nu.

⁶ Dan Mika 6:8, nu aprann seki Zeova pe reklam nu. Mika demande: “Ki Zeova pe reklam twa, apart zis pratik lazistis, kontan labonte ek mars dan enn fason modes avek to Bondye?” Sa trwa kitsoz ki Bondye pe reklam nu la, zot tus nu santiman, nu panse, ek nu aksyon. Ki sa vedir? Nu bizin santi nu puse pu reflesi lor bann aksyon ki nu kapav fer pu manifeste sa bann kalite la. Anu egzaminn sa trwa kitsoz ki Zeova pe reklam nu la, enn alafwa.

7, 8. (a) Ki vedir “pratik lazistis”? (b) Ki kalite linzistis ti byin kuran dan lepok Mika?

⁷ “Pratik lazistis” vedir fer seki drwat. Fason ki Zeova azir, sa mem ki prinsip lazistis. Me, bann Zwif lepok Mika pa pe pratik lazistis, me linzistis. Dan ki fason? Get seki Mika 6:10 montre nu. Lafin verse la dir ki bann marsan pe servi enn ‘mezir efa ki tro tipti.’ Verse 11 azute ki zot servi “bann pwa trike.” Ek dapre verse 12, “zot tronp dimunn avek zot lalang.” Donk, fos mezir, pwa trike ek bann parol pu tronp lezot, tusala ti byin kuran parmi bann komersan, dan lepok Mika.

⁸ Se pa zis bann komersan ki pe pratik linzistis, me usi bann ki rann zizman dan lakur. Mika 7:3 montre ki bann “prins pe demann kitsoz an retur, ek [bann] ziz pe ziz pu enn rekonpans.” Bann ziz gayn gus pu zot kondann dimunn inosan. “Sa kikenn ki gran la,” setadir bann Zwif ki ena enn sertenn lotorite, zot usi zot partisip dan bann krim. Avredir, Mika dir ki prins, ziz, ek sa kikenn ki gran la zot “marye-pike” ansam pu organiz zot bann move aksyon.

9. Kuma eski linzistis ki bann move ti pe pratike, ti afekte Zida ek Izrael?

⁹ Linzistis ki bann move sef Zwif pe pratike, afekte tu dimunn dan Zida ek dan Izrael. Mika 7:5 montre ki enn mank lazistis finn amenn enn mank konfyans ant bann dimunn, ant kamarad pros, ek mem ant misye madam ki’nn marye. Verse 6 dir ki sa finn amenn enn sityasyon kot bann fami pros kuma garson ek papa, tifi ek mama, sakenn pe mepriz so kamarad.

10. Ki kalite kondwit bann Kretyin ena dan sa lemond ranpli ar linzistis la?

¹⁰ Ki nu kapav dir zordi? Eski nu pa pe truv mem kondisyon? Parey kuma Mika, nu’si nu anture ar enn mank lazistis, kot personn pa fer so kamarad konfyans. Lavi sosyal ek familyal pe kase. Me, mem si nu anture avek linzistis, nu pa les lespri inzis sa lemond la rant dan kongregasyon Kretyin. Plito, nu fer tu nu posib pu res fidel ek onet dan tu domenn nu lavi. Wi, “nu’le gard enn kondwit onet dan tu kitsoz.” (Ebre 13:18) Eski u pa dakor ki kan nu pratik lazistis, nu gayn buku benediksyon parski nu form parti dan enn fraternite kot ena enn vre konfyans?

Kuma Eski Bann Dimunn Tann “Lavwa Zeova”?

11. Kuma eski Mika 7:12 pe realize?

¹¹ Mika profetize ki malgre bann kondisyon inzis, tu dimunn pu gayn lazistis. Profet la anonse ki bann dimunn pu rasanble “depi enn lamer ziska enn lot lamer, ek depi enn montayn ziska enn lot montayn” pu zot vinn ador Zeova. (Mika 7:12) Zordi, realizasyon final sa profesi la pa konsern zis enn nasyon. Me li tus tu sort kalite dimunn ki pe profit lazistis ki Bondye manifeste, san fer preferans. (Izai 42:1) Kuma sa pe arive?

12. Kuma eski bann dimunn pe tann “lavwa Zeova” zordi?

¹² Pu gayn repons sa kestyon la, get seki Mika ti prononse avan. Mika 6:9 dir: “Lavwa Zeova pe kriy ver lavil, ek enn kikenn ki ena sazes pratik pu ena lakrint pu to non.” Kuma eski bann dimunn dan tu nasyon pe tann “lavwa Zeova” ek ki rapor sa ena avek pratik lazistis? Byinsir, sa pa vedir ki bann dimunn pe tann vremem lavwa Zeova. Me plito, atraver travay predikasyon ki nu pe fer dan lemond antye, dimunn tu ras ek tu klas sosyal pe tann lavwa Zeova. Avek ki rezilta? Bann ki pe ekute “ena lakrint pu non Bondye”; zot pu respekte sa non la. Kan nu pres Rwayom Bondye avek zel, nu azir avek lazistis ek lamur. Ek kan nu fer tu dimunn, san fer okenn preferans, konn non Zeova, nu “pratik lazistis.”

Nu Bizin Kontan Labonte

13. Ki diferans ena ant lamur fidel ek lamur?

¹³ Anu egzaminn dezyem kitsoz ki Bondye reklam nu dan Mika 6:8. Zeova egzize ki nu “kontan labonte.” Mo Ebre ki’nn tradir par “bonte” vedir usi “lamur fidel.” Lamur fidel vedir pran kont lezot, montre konpasyon pu zot. Lamur fidel diferan ar lamur. Kuma? Ebyin, lamur li enn term byin vag. Nu kapav ena “lamur” mem pu bann kitsoz ek pu bann lide. Par egzanp, Labib koz lor enn kikenn ki “kontan divin ek delwil” ek usi lor enn dimunn ki “kontan lasazes.” (Proverb 21:17; 29:3) Me parkont, lamur fidel aplik tuletan zis ar dimunn, sirtu ar bann ki servi Bondye. Ala kifer, Mika 7:20 koz lor ‘lamur fidel ki Abraam, fidel serviter Zeova, ti benefisye.’

14, 15. Kuma eski nu montre lamur fidel, ek ki legzanp finn site dan paragraf konsernan sa?

¹⁴ Dapre Mika 7:18, profet la dir ki Bondye “pran plezir dan lamur fidel.” Dan Mika 6:8, nu ankuraze pu pa zis montre lamur fidel, me pu byin kontan sa kalite la. Ki sa bann verse la aprann nu? Lamur fidel li enn kalite ki nu montre volonterman ek avek bonker. Parey kuma Zeova, nu pran plezir pu montre lamur fidel anver bann ki bizin nu led.

¹⁵ Zordi, se sa kalite lamur fidel la ki idantifye lepep Bondye. Anu pran zis enn legzanp: An Zin 2001, enn siklonn ti provok enn gran inondasyon dan Texas, États-Unis. Li ti kraz anviron 70,000 lakaz, ek parmi plis ki 700 lakaz bann Temwin Zeova. Pu ed zot bann frer Kretyin ki dan sa sityasyon difisil la, anviron 10,000 Temwin finn donn zot letan ek zot lenerzi volonterman, san pran okenn kas. Pandan plis ki sis mwa, bann volonter la finn travay enn sel tre. Zot finn depans zot letan, plizir zur, lanwit ek wikenn, pu reranz 8 Lasal DiRwayom ek plis ki 700 lakaz pu zot bann frer Kretyin. Bann ki pa ti kapav ede dan konstriksyon, ti fer don manze, provizyon ek larzan. Kifer sa gran kantite Temwin la ti ed zot bann frer? Parski zot “kontan labonte.” Parey kumsa, partu dan lemond nu bann frer pe montre zot lamur fidel par sa bann kalite aksyon la. Sa tus nu leker, pa vre? Wi, fer seki Zeova reklam nu, setadir “kontan labonte,” sa li pa enn fardo, me enn lazwa!

Mars dan enn Fason Modes Avek Bondye

16. Ki legzanp fer resorti linportans pu rekonet nu bann limit devan Bondye?

¹⁶ Trwazyem kitsoz ki Zeova reklam nu ek ki truv dan Mika 6:8, se “mars dan enn fason modes avek Bondye.” Sa vedir ki nu bizin rekonet nu bann limit ek depann lor Bondye. Les nu pran enn legzanp: Sey mazinn pu enn ti moman, enn tipti tifi pe trap for lamin so papa, alor ki zot pe marse dan enn siklonn. Tifi la konn byin ki li pena buku lafors, me li fer so papa konfyans. Parey kuma sa tifi la, nu’si nu bizin rekonet nu bann limit ek fer konfyans nu Papa ki dan lesyel. Kuma eski nu kapav prezerv sa konfyans la? Enn fason se kan nu gard byin dan nu lespri kifer li saz ki nu res pros ar Zeova. Mika rapel nu trwa rezon: Zeova Li nu Sover, nu Gid, ek nu Protekter.

17. Kuma eski dan lepase Zeova ti sov so pep, Li ti gid zot ek Li ti protez zot?

¹⁷ Dapre Mika 6:4, 5, Bondye dir: “Mo’nn fer twa sorti dan peyi Lezip.” Wi, Zeova ti Sover Izrael. Apre sa, Zeova dir: “Mo’nn avoy ver twa Moiz, Aaron ek Miryam.” Zeova ti servi Moiz ek Aaron pu gid nasyon Izrael, ek Miryam ti fer bann fam Izrael danse pu selebre viktwar Bondye. (Egzod 7:1, 2; 15:1, 19-21; Deteronom 34:10) Zeova ti servi so sertin so bann serviter pu gid so pep. Dan verse 5, Zeova rapel nasyon Izrael ki Li ti protez zot kont zot bann lennmi, Balak ek Balaam. Li ti protez zot pandan dernye parti zot vwayaz depi Sitim dan Moab, ziska Gilgal dan Peyi ki Li ti promet zot.

18. Kuma eski zordi Bondye azir kuma nu Sover, nu Gid, ek nu Protekter?

¹⁸ Amezir ki nu mars avek Bondye, Li delivre nu dan lemond Satan. Li gid nu par mwayin so Parol ek so lorganizasyon, ek Li protez nu, antan ki grup, kont bann lennmi. Wi, nu’si nu pe fer dernye parti nu vwayaz pu rant dan lemond nuvo ki Bondye finn promet nu. Se pa enn vwayaz fasil. Me rekonpans ki nu pu gayne, li buku pli gran ki Peyi Bondye ki ti promet bann Izraelit dan lepase. Donk, amezir ki nu kontiyn nu larut, nu ena bann bon rezon pu trap for lamin nu Papa.

19. Kuma eski sa ed nu, kan nu rekonet nu bann limit?

¹⁹ Kan nu rekonet nu bann limit devan Bondye, sa ed nu pu ena enn lopinyon rezonab lor nu bann sityasyon. Akoz lavyeyes uswa enn move lasante, kitfwa nu pa kapav fer buku dan servis Zeova. Me, fode pa ki nu les sa dekuraz nu. Plito, li bon ki nu rapel ki Bondye aksepte nu bann zefor ek nu bann sakrifis ‘dapre seki nu ena, pa dapre seki nu pena.’ (2 Korintyin 8:12) Zeova atann ki nu servi Li avek tu nu nam, dapre seki nu sityasyon permet nu. (Kolosyin 3:23) Si, avek zel nu fer tu seki nu kapav dan servis Bondye, Li pu byin beni nu.—Proverb 10:22.

Kan Nu Kontiyn Atann, Nu Gayn Benediksyon

20. Ki kitsoz nu bizin konsyan pu ki nu kapav kontiyn atann parey kuma Mika?

²⁰ Kan nu gayn benediksyon Bondye, sa pu pus nu ena mem latitid ar Mika. Li ti dir: “Mo pu kontiyn atann Bondye, ki pu sov mwa.” (Mika 7:7) Ki rapor sa bann parol la ena avek rekonet nu bann limit devan Bondye? Ebyin, si nu atann Zeova avek pasyans, sa pu anpes nu ena enn santiman desepsyon ki zur Zeova tuzur pankor vini. (Proverb 13:12) Fransman, nu tu byin anvi ki lafin sa move lemond la arive vit. Me selman, tulesemenn ena plizir milye dimunn ki aster pe kumans mars avek Bondye. Sa donn nu enn bon rezon pu ena pasyans. Enn temwin ki dan laverite depi byin lontan, dir: “Kan mo get sa 55 lane ki mo’nn pase dan travay predikasyon la, mo sir ki mo pa finn perdi nanyin, mem si mo finn kontiyn atann Zeova ziska asterla. Okontrer, mo finn kapav evit buku move lexperyans.” Eski u’si u finn fer enn lexperyans parey kuma sa frer la?

21, 22. Kuma eski Mika 7:14 pe realize dan nu lepok?

²¹ Kan nu mars avek Zeova, nu konn buku byinfe. Sa, nu pena okenn dut lor la. Dan Mika 7:14, Mika konpar lepep Bondye ar bann muton ki pe res an sekirite avek zot berze. Zordi, sa profesi la pe konn so pli gran realizasyon. Bann manb Izrael spirityel ki lor later ek “bann lezot muton” zot vremem an sekirite ar Zeova, zot Berze. Zot fer Li konfyans. Zot res “tusel dan enn bwa—omilye enn verze,” separe lor plan spirityel ar lemond, ki pe vinn deplizanpli bulversan ek danzere.—Zan 10:16; Deteronom 33:28; Zeremi 49:31; Galat 6:16.

²² Lepep Bondye pe konn prosperite, parey kuma Mika 7:14 ti usi anonse. Konsernan lepep Bondye, Mika dir: “Les zot nuri lor Basann ek Gilead.” Parey kuma bann muton dan Basann ek Gilead ti manz dan bann patiraz byin fertil, zordi lepep Bondye pe konn prosperite lor plan spirityel. Ala enn lot benediksyon ankor pu bann ki rekonet zot bann limit devan Bondye.—Nonm 32:1; Deteronom 32:14.

23. Ki leson nu aprann kan nu egzaminn Mika 7:18, 19?

²³ Dan Mika 7:18, 19, profet la montre nu ki Zeova dezir pardonn bann ki repanti. Verse 18 dir ki Zeova “pardonn erer” ek Li “pas lor bann fot.” Ek dapre verse 19, Li “pu avoy tu zot pese dan profonder lamer.” Ki leson sa aprann nu? Nu kapav demann numem si nu pe imit Zeova dan sa domenn la. Eski nu pardonn bann erer ki lezot dimunn arive fer kont nu? Kan zot repanti ek zot repar zot bann erer, nu bizin pre pu pardone parey kuma Zeova. Nu bizin pardonn zot bann erer konpletman ek pa revinn lor la ankor.

24. Ki profi u finn tire dan profesi Mika?

²⁴ Ki profi nu finn tire kan nu finn egzaminn profesi Mika? Li finn rapel nu ki Zeova Li enn Bondye ki donn vre lespwar bann ki vinn pros ar Li. (Mika 2:1-13) Li finn ankuraz nu pu fer tu kitsoz posib pu favoriz vre ladorasyon pu ki nu mars dapre non Bondye pu tuletan. (Mika 4:1-4) Ek Li finn rasir nu ki ninport ki nu sityasyon, nu kapav fer seki Zeova pe reklam nu. Wi, profesi Mika vremem fortifye nu pu mars dapre non Zeova.

Kuma Eski U Pu Reponn?

• Dapre Mika 6:8, ki Zeova pe reklam nu?

• Ki kitsoz ki neseser si nu anvi “pratik lazistis”?

• Kuma eski nu kapav montre ki nu “kontan labonte”?

• Ki vedir ‘mars dan enn fason modes avek Bondye’?

[Zimage page 18]

Malgre bann move kondisyon ki ti egziste dan so lepok, Mika ti fer seki Zeova ti reklam li. U’si u kapav fer parey

[Zimage page 20]

Pratik lazistis kan u donn temwaynaz ar tu dimunn, san eksepsyon

[Zimage page 20]

Montre ki u kontan labonte kan u ed bann ki byin bizin led

[Zimage page 20]

Fer seki u kapav amezir ki u rekonet u bann limit