Nu Pu Mars Dapre Non Zeova pu Tuletan!

“Nu pu mars dapre non Zeova nu Bondye pu tuletan, wi pu tuzur.” —MIKA 4:5.

1. Ki bann mesaz Mika sapit 3-5 fer resorti?

ZEOVA ena enn kitsoz pu dir so pep, ek Li pe servi Mika kuma So profet. Bondye pu pran sanksyon kont bann ki pe fer seki move. Li pu pini Izrael parski li finn tom dan lapostazi. Me, erezman kan mem, Zeova pu beni bann ki mars dapre so non. Profesi Mika sapit 3-5 fer resorti klerman sa bann mesaz la.

2, 3. (a) Ki kalite bann sef an Izrael ti bizin manifeste, me ki zot pe fer anrealite? (b) Kuma eski u pu explik sa legzanp ki Mika ti servi dan Mika 3:2, 3?

² Profet Bondye dir: “Ekute, zot, bann sef dan Zakob ek zot, bann dirizan dan Izrael. Eski pa zot ki sipoze konn lazistis?” Abe wi, sa mem ki zot ti pe sipoze fer. Me ki zot pe fer anrealite? Mika dir: “Zot ki ayir seki bon ek ki kontan seki move, ki ras lapo bann dimunn ek ki kraz zot lezo; zot finn manz laser mo pep, ek zot finn ras bannla zot lapo. Zot finn kas zot lezo ek zot finn kraz sa but-but, parey kuma lavyann dan enn marmit.”—Mika 3:1-3.

³ Inkrwayab! Bann sef parmi lepep pe fer dominer ar bann pov ki kuma bann muton san defans. Li pa difisil pu bann ki pe ekut Mika, konpran byin legzanp ki profet la pe servi. Pu prepar enn muton ki’nn fini egorze, bizin met li bwi. Avan sa, bizin tir so lapo ek demanbre li. Defwa bizin kas so lezo pu tir so lamwel. Lerla, bizin met so lavyann ek so lezo bwi ansam dan enn gran resipyan, parey kuma seki Mika inn mansyone. (Ezekyel 24:3-5, 10) Wi, sa legzanp la montre byin ki kantite sa bann sef san pitye la, pe fer dominer ar lepep!

Zeova Atann ki Nu Pratik Lazistis

4. Ki diferans ena ant Zeova ek bann sef an Izrael?

⁴ Ena enn gran diferans ant Zeova, nu Berze ki ena lamur, ek sa bann sef san pitye la. Parski zot pa finn pratik lazistis, zot pa finn protez trupo kuma bizin. Olye sa, zot finn rod zot lintere personel. Zot finn profit lor ledo bann ti dimunn. Zot pa finn fer lazistis ar bannla ek zot finn ranpli Zerizalem ar krim parey kuma Mika 3:10 dir. Ki nu kapav aprann ar sa sityasyon la?

5. Ki Zeova demann bann ki diriz so pep?

⁵ Bondye atann ki bann ki diriz so pep, zot pratik lazistis. Sa mem ki nu truve zordi parmi bann vre serviter Zeova. Sa li an akor avek Izai 32:1, kot nu lir: “Gete! Enn lerwa pu reyne pu lazistis; ek konsernan bann prins, zot pu guverne kuma prins pu lazistis.” Me ki nu truve dan lepok Mika? Bann “ki degut seki bon ek ki kontan seki move” pe kontiyn fer lazistis vinn traver.

Lapriyer Kisannla Zeova Reponn?

6, 7. Ki pwin inportan Mika 3:4 fer resorti?

⁶ Eski bann Izraelit dan lepok Mika ti kapav atann pu gayn faver Zeova? Paditu! Mika 3:4 dir: “Zot pu apel Zeova pu gayn led, me Li pa pu reponn zot. Ek Li pu kasyet zot so figir dan sa lepok la, dapre tu zot bann move fason azir.” Sa fer resorti enn pwin byin inportan.

⁷ Zeova pa pu reponn nu lapriyer si nu pratik pese. Se seki nu fer, si nu amenn enn dub lavi, nu kasyet nu pese ek an mem tan nu fer krwar ki nu fidel dan servis Bondye. Dapre Psom 26:4, David ti sante: “Mo pa finn asiz avek bann zom ki pena laverite an zot; ek mo pa rant avek bann ki kasyet seki zot ete.” Asterla, bann ki volonterman pe dezobeir so Parol, Zeova Li plis pa pu ekut zot lapriyer ankor!

Gayn Lafors par Lespri Bondye

8. Kont ki kitsoz bann profet lepok Mika ti gayn avertisman?

⁸ Parmi bann sef an Izrael, sertin vremem pe pratik bann kitsoz byin move! Bann fos profet pe fer lepep kit ladorasyon vre Bondye. Sa bann sef gurman la pe kriye, “Lape!” me anrealite, kan enn kikenn pa met nanyin dan zot labus, zot lager ar li. “Alor,” Zeova dir, “zot pu gayn lanwit, ek lerla pa pu ena okenn vizyon. Zot pu gayn nwarte, pu ki zot pa rod get lavenir. Soley pu kus lor bann profet, ek lizur pu bizin vinn nwar lor zot. Bann vizyoner pu bizin onte, ek bann ki get lavenir pu dekonserte. Zot pu bizin kuver zot mustas.”—Mika 3:5-7a.

9, 10. Ki vedir ‘kuver mustas,’ ek kifer Mika pena okenn rezon pu fer sa?

⁹ Kifer “kuver mustas”? Se seki bann move dimunn lepok Mika pe fer parski ena laont lor zot. Wi, zot pu bizin onte. “Pena okenn repons Bondye” pu zot. (Mika 3:7b) Zeova pa pran kont lapriyer okenn move dimunn ki vantar.

¹⁰ Mika pena okenn rezon pu li ‘kuver so mustas.’ Pena laont lor li ek Zeova reponn so bann lapriyer. Not seki li dir dan Mika 3:8: “Mwa parkont, mo finn ranpli ar lafors, avek lespri Zeova, avek lazistis ek pwisans.” Mika ena enn gran rekonesans pu Zeova. Tutlong so lavi ki li’nn servi Bondye, li finn tuletan “ranpli ar lafors, avek lespri Zeova”! Sa finn donn li kuraz “pu dir Zakob so revolt ek Izrael so pese.”

11. Kuma eski bann imin kapav gayn lafors pu anons mesaz Bondye?

¹¹ Mika pa ti pu kapav anons mesaz zizman Bondye si li ti kont zis lor so prop lafors. Li ti byin bizin lespri Zeova. Abe nu alor? Nu pu kapav ranpli nu misyon predikasyon, selman si Zeova fortifye nu par mwayin so lespri sin. Si nu pratik pese volonterman, tu zefor ki nu fer pu prese, pu tom dan delo. Kifer? Parski dan sa ka la, Bondye pa kapav reponn nu bann lapriyer, ek lerla, nu pa pu gayn lafors pu fer so travay. Wi, nu pa pu kapav anons mesaz zizman Zeova si so “lespri” pa lor nu. Me, atraver bann lapriyer ki Zeova ekute ek avek led lespri sin, nu kapav koz Parol Bondye avek kuraz, parey kuma Mika.

12. Ki ti permet bann premye disip Zezi ‘kontiyn pres Parol Bondye avek kuraz’?

¹² Sirman, u rapel seki rakonte dan Akt 4:23-31. Fer kumadir u enn parmi bann disip Zezi dan premye syek. Bann persekiter fanatik pe rod ferm labus bann disip Zezi Kris. Me, bann fidel disip priye zot Suverin Liniver, zot sipliye: “Zeova, pran kont zot menas, ek permet to bann esklav kontiyn koz to parol avek kuraz.” Ki rezilta? Kan zot ti fer zot siplikasyon, landrwa kot zot ti rasanble, ti tranble. Zot tu ti ranpli avek lespri sin ek zot ti pe koz parol Bondye avek kuraz. Alor, amezir ki nu akonpli nu minister, anu turn ver Zeova dan lapriyer ek kont lor led so lespri sin.

13. Ki pu ariv Zerizalem ek Samari, ek kifer?

¹³ Pans ankor enn fwa lepok Mika. Dapre Mika 3:9-12, bann sef ki ena det disan lor zot latet, pe pran gus pu rann zizman. Bann pret pe anseyn lepep pu enn pri, ek bann fos profet pe get lavenir pu larzan. Ala kifer, Bondye finn donn lord ki Zerizalem, kapital Zida, bizin vinn “enn ta larwinn”! Dan Izrael usi, fos ladorasyon ek bann kondwit imoral finn pran byin lanpler. Ala kifer, par linspirasyon Bondye, Mika averti zot ki Bondye pu fer Samari vinn “enn ta larwinn.” (Mika 1:6) Avredir, Mika ti ankor vivan kan larme Asiri ti kraz Samari an 740 A.N.L., parey kuma ti anonse. (2 Lerwa 17:5, 6; 25:1-21) Li kler ki se grasa lafors Zeova, ki Mika ti kapav transmet bann mesaz byin for kont Zerizalem ek Samari.

14. Kuma eski profesi Mika 3:12 ti realize, ek kuma eski sa bizin inflyans nu?

¹⁴ Byinsir, Zida pa pu kapav sap zizman kondanasyon Zeova. An akor avek realizasyon profesi Mika 3:12, Syon pu “bime parey kuma bim later dan enn karo.” Zordi dan nu 21em syek, nu kone ki sa profesi la ti realize kan larme Babilonyin ti ravaz Zida ek Zerizalem an 607 A.N.L. Sa ti arive plis ki 100 an apre ki Mika ti profetize, me li ti sir ki sa ti pu arive. Nu’si nu bizin ena mem lasirans ki sa move lemond la pu fini dan “zur Zeova.”—2 Pyer 3:11, 12.

Zeova Remet Bann Kitsoz an Ord

15. Kuma eski u pu dekrir dan u prop mo seki profesi Mika 4:1-4 dir?

¹⁵ Dan prosin seksyon, nu truve ki Mika pe transmet enn mesaz lespwar. Bann parol ki nu lir dan Mika 4:1-4 zot vremem donn kuraz! Mika dir, an parti: “Dan dernye zur, montayn [ladorasyon] Zeova pu byin etabli. Li pu vinn pli ot ki but bann montayn ek kolinn. Bann pep pu bizin al ver li. . . . Ek, vremem Li pu rann zizman parmi buku pep, ek Li pu remet bann kitsoz an ord konsernan tu nasyon for ki lwin. Ek zot pu bizin forz zot lepe, ek fer li vinn enn zuti ki fuy later. Zot pik, zot pu fer li vinn sizay. Okenn nasyon pa pu lev lepe kont enn lot nasyon, ek personn pa pu aprann lager ankor. Sakenn pu asiz anba so pye rezin ek so pye fig, ek pa pu ena personn ki fer zot tranble, parski labus Zeova, ki ena bann larme, ki finn dir sa.”

16, 17. Kuma eski Mika 4:1-4 pe realize zordi?

¹⁶ Sa bann “buku pep” ek “nasyon for” la, kisannla zot reprezante? Se pa bann nasyon ek bann guvernman sa lemond la. Me plito, sa profesi la aplik ar bann dimunn ki sorti dan tu nasyon. Ansam kuma enn sel pep, zot pe donn Zeova enn servis sakre lor So montayn sinbolik, kot ena vre ladorasyon.

¹⁷ An akor avek profesi Mika, dan ankor enn tigit letan, partu lor later dimunn pu ador zis vre Bondye. Zordi, bann ki ena enn ‘leker byin dispoze pu lavi eternel’ pe aprann bann manyer ki Zeova ule zot viv. (Akt 13:48) Zeova ‘pe rann zizman ek li pe remet bann kitsoz an ord’ lor plan spirityel pu seki pe pran pozisyon pu so Rwayom. Zot form parti dan enn “gran laful” ki pu sirviv dan “gran detres.” (Revelasyon 7:9, 14) Pwiski zot inn fini fer zot lepe vinn enn zuti ki fuy later, depi asterla mem zot pe viv anpe avek lezot Temwin Zeova ek lezot dimunn usi. Se vremem enn plezir pu form parti dan sa pep la!

Nu Determine pu Mars Dapre Non Zeova

18. Ki vedir ‘asiz anba nu prop pye rezin ek nu prop pye fig’?

¹⁸ Dan nu lepok, alor ki partu dan lemond dimunn viv dan gran laper, nu, nu leker kontan parski buku dimunn pe aprann bann manyer ki Zeova ule zot viv. Nu pe atann avek inpasyans lepok, ki byin pre asterla, kot tu bann ki kontan Bondye, pu nepli aprann lager. Sakenn pu asiz anba so pye rezin ek anba so pye fig. Suvan plant bann pye fig dan bann plantasyon rezin. (Lik 13:6) Asiz anba nu prop pye rezin ek anba nu prop pye fig reprezant bann bon kondisyon, kot ena lape, prosperite ek sekirite. Depi asterla mem, nu relasyon avek Zeova permet nu ena lape dan nu lespri ek sekirite spirityel. Kan sa bann kondisyon la pu egziste dan reyn Rwayom Bondye, nu pa pu gayn per ek nu pu konn enn sekirite total.

19. Ki vedir mars dapre non Zeova?

¹⁹ Pu gayn faver Bondye, nu bizin mars dapre non Zeova. Dan Mika 4:5 profet la dir sa avek buku pwa: “Tu bann pep zot, zot pu mars sakenn dapre non zot bondye; me nu, nu pu mars dapre non Zeova nu Bondye pu tuletan.” Mars dapre non Zeova pa vedir sinpleman dir ki Li nu Bondye. Sa pa vedir usi sinpleman partisip dan bann reynion Kretyin ek dan predikasyon, mem si se bann aktivite byin inportan. Mars dapre non Zeova, vedir ki nu finn pran langazman avek Li ek nu fer tu seki nu kapav pu servi Li fidelman parski nu kontan Li avek tu nu leker. (Matye 22:37) Ek antan ki so bann adorater, nu determine pu mars dapre non Zeova nu Bondye pu tuletan.

20. Ki Mika 4:6-13 ti predir?

²⁰ Asterla, get bann parol profetik ki truv dan Mika 4:6-13. “Tifi Syon” pu bizin al kuma prizonye dan enn lot peyi, byin lwin “ziska Babilonn.” Sa mem ki ti’nn ariv bann abitan Zerizalem dan setyem syek A.N.L. Me, profesi Mika montre ki enn grup Zwif ti pu return dan Zida. Kan Syon pu fini retabli, Zeova pu fer sir ki so bann lennmi disparet pu tuletan.

21, 22. Kuma eski Mika 5:2 ti realize?

²¹ Mika sapit 5 predir lezot levennman extraordiner. Par egzanp, not seki Mika 5:2-4 dir. Mika profetiz ki Bondye finn etabli enn Dirizan “ki finn egziste depi byin lontan.” Li pu sorti dan Betleem. Li pu reyne kuma enn berze avek “lafors Zeova.” Pa fini, sa Dirizan la pu gran, pa zis an Izrael, me “ziska bann parti pli lwin lor later.” Mem si laplipar dimunn dan lemond pa konpran lidantite sa Dirizan la, pu nu, li pa enn sekre.

²² Ki dimunn pli inportan ki’nn pran nesans dan Betleem? Ek kisannla ki “pu gran ziska bann parti pli lwin lor later”? Personn apart nu Mesi, Zezi Kris! Kan Erod Legran ti demann bann pret ansarz ek bann skrib kot Mesi ti pu ne, zot ti reponn: “Dan Betleem, an Zida.” Zot ti mem sit bann parol Mika 5:2. (Matye 2:3-6) Sertin parmi bann dimunn ordiner usi ti konn sa. Dan Zan 7:42, nu lir seki sa bann dimunn la ti dir: “Eski Lekritir pa ti dir ki Kris pu vinn dan desandans David, ek dan vilaz Betleem kot David ti ete?”

Vre Sulazman pu Lepep

23. Ki pe arive zordi an ankor avek realizasyon Mika 5:7?

²³ Mika 5:5-15 montre kuma larme Asiri ti pu atake, me so latak pa ti pu reysi pandan lontan. Mika anonse usi ki Bondye pu pini bann nasyon ki dezobeir Li. Mika 5:7 promet ki enn grup Zwif ki’nn repanti, pu retabli dan zot peyi. Me sa bann parol la aplik usi ar nu lepok. Mika dir: “Bann ki reste dan Zakob pu bizin vinn omilye buku pep, parey kuma laroze ki sorti kot Zeova, kuma gro lapli lor bann plantasyon.” Mika servi sa zoli legzanp la pu anonse ki leres Zakob uswa bann manb Izrael spirityel ki lor later, zot pu enn benediksyon Bondye pu lepep. “Bann lezot muton” ki Zezi ena, pran plezir pu travay kotakot avek leres Izrael spirityel nu lepok. Ansam, zot pe ankuraz lezot lor plan spirityel. (Zan 10:16; Galat 6:16; Sefanya 3:9) An rapor avek sa, ena enn pwin inportan lor ki nu kapav reflesi. Pwiski nu pres labonn nuvel lor Rwayom Bondye, nu tu bizin apresye privilez ki nu ena pu amenn vre lankurazman pu lezot.

24. Ki bann pwin dan Mika sapit 3-5 finn kapte u latansyon?

²⁴ Ki u finn aprann dan sapit 3-5 profesi Mika? Sirman u finn not sa bann pwin la: (1) Bondye atann ki diriz so pep, zot pratik lazistis. (2) Zeova pa pu reponn nu lapriyer si nu pratik pese volonterman. (3) Nu pu kapav ranpli nu misyon predikasyon selman si Bondye fortifye nu par mwayin so lespri sin. (4) Pu gayn faver Bondye, nu bizin determine pu mars dapre non Zeova. (5) Antan ki bann proklamater Rwayom Bondye, nu bizin apresye nu privilez ki nu ena pu amenn vre lankurazman pu bann dimunn. Kitfwa ena lezot pwin ankor ki’nn kapte u latansyon. Ki nu kapav aprann ankor dan sa liv profetik la? Prosin lartik pu fer nu truv bann leson pratik ki nu kapav tire dan de dernye sapit profesi Mika, sa profesi ki fortifye nu lafwa la.

Kuma U Pu Reponn?

• Ki Zeova demann bann ki diriz so pep?

• Kifer lapriyer ek lespri sin zot inportan an rapor avek nu servis pu Zeova?

• Kuma eski bann dimunn ‘mars dapre non Zeova’?

[Zimage page 12]

Eski u kapav explik legzanp marmit ki Mika ti site dan so profesi?

[Zimage page 15]

Parey kuma Mika, nu bizin akonpli nu minister avek kuraz