Marche Dans L’intégrité
“Tant qu’à moi, mo pou marche dans mo l’intégrité.”—PSAUME 26:11.
1, 2. (a) Kifer l’intégrité bann dimoune éna enn lien direct avec question lor souveraineté Jéhovah? (b) Couma bann dimoune ek bann anges kapav montré ki zot soutenir souveraineté Jéhovah?
KAN Satan ti rebellé en Éden, li ti mette en question si vrai-même Bondié éna droit gouverné lor So bann créatures. Plitar, li ti prétann ki bann dimoune pou servi Bondié zis par l’intérêt. (Job 1:9-11; 2:4) Donc, l’intégrité bann dimoune éna enn lien direct avec question ki ti soulevé lor souveraineté Jéhovah.
2 Bien ki souveraineté Jéhovah pa dépann lor l’intégrité so bann créatures, bann dimoune ek bann anges kapav montré ki position zot inn prend lor sa question-la. Comment? C’est kan zot choisir pou garde zot l’intégrité envers Bondié ou-soit non. Donc, l’intégrité enn dimoune forme enn base solide pou juge li.
3. (a) Ki Job ek David ti envie Jéhovah examiné ek jugé? (b) Ki questions nous kapav posé lor l’intégrité?
3 Job ti dire avec confiance: “[Jéhovah] pou pèse moi dans enn balance exacte et Bondié pou konn mo l’intégrité.” (Job 31:6) Dans enn la-prière, le roi David ti demande Jéhovah pou examine so l’intégrité, li ti dire: “Juge moi, Ô Jéhovah, parski mo finn marche dans mo l’intégrité, ek mo finn mette mo confiance en Jéhovah pou mo pa tombé.” (Psaume 26:1) Li vrai-même important alors ki nous aussi, nous marche dans l’intégrité! Mais ki sa veut dire l’intégrité ek couma nous kapav marche dans l’intégrité? Ki pou aide nous garde nou l’intégrité?
‘Mo Finn Marche Dans Mo l’Intégrité’
4. Ki été l’intégrité?
4 Enn dimoune ki marche dans l’intégrité, c’est enn dimoune ki droite, irréprochable, juste ek sans défaut. Seulement, l’intégrité veut dire plus ki zis faire séki droite. Enn kikenn ki marche dans l’intégrité, li droite lor plan moral, ek li éna enn l’attachement complet dans so léker pou Bondié. Satan ti mette en doute bann mobiles Job kan li ti dire Bondié: “Pou changé, avance to la-main, s’il-te-plaît, ek touche ziska so lézo [Job] ek so la-chair ek guetté si li pa pou maudit toi dans to figure.” (Job 2:5) Donc, enn kikenn ki marche dans l’intégrité pa zis faire bann actions ki droite, mais li éna aussi bann bon mobiles dans so léker.
5. Ki montré ki nous pa bizin parfait pou nous garde nou l’intégrité?
5 Mais sa pa veut dire ki enn dimoune ki marche dans l’intégrité, li bizin parfait. Le roi David ti imparfait ek li ti commette plusieurs fautes grave dans so la-vie. Pourtant la Bible koz lor li couma enn dimoune ki ti marche “avec intégrité dans so léker.” (1 Rois 9:4) Kifer? Parski David ti content Jéhovah. So léker ti complet pou Bondié. Li ti reconnaite so bann erreurs, li ti accepté la discipline ek li ti corrige so manière faire. Oui, nous trouve l’intégrité David dans so l’attachement complet envers so Bondié, Jéhovah ek dans so l’amour pou Li.—Deutéronome 6:5, 6.
6, 7. Marche dans l’intégrité, ki sa impliqué?
6 L’intégrité pa applique zis dans enn domaine nou la-vie, couma par exemple domaine religieux. Sa englobe nou la-vie en entier. David ti “marche” dans l’intégrité. D’après The New Interpreter’s Bible, “verbe ‘marché’ implique enn ‘façon vive.’ ” Enn psalmiste ti chante lor bann dimoune ki “marche dans chemin l’intégrité,” li ti dire: “Heureux bann [dimoune] ki obéir bann rappels [Bondié]; zot pé contigne rode li avec tou zot léker. Oui vrai-même, zot pa finn pratique l’injustice, zot finn marche dans so bann chemins.” (Psaume 119:1-3) Nous montré ki nous marche dans l’intégrité kan touletan nous rode faire volonté Jéhovah ek nous marche dans so chemin.
7 Pou nous marche dans l’intégrité, nous bizin éna enn l’attachement fidèle envers Jéhovah, même dans bann situations difficile. Kan nous pé passe par bann l’épreuves, ek nous reste ferme malgré bann malheurs, ou-soit kan nous tini ferme devant bann tentations ki éna dans sa mauvais lé-monde-la, nous montré clairement ki nous pé marche dans l’intégrité. Nous ‘faire léker Jéhovah content’ parski lerla, Li kapav réponn celui ki pé provoque Li. (Proverbes 27:11) Lerla, nous kapav déterminé pou dire pareil couma Job: “Ziska mo mort, mo pa pou rejette mo l’intégrité!” (Job 27:5) Psaume 26 montré nous séki pou aide nous pou marche dans l’intégrité.
“Nettoye Mo lé-Reins ek Mo Léker”
8. Ki leçon ou tiré dans la prière ki David ti faire pou Jéhovah examine so lé-reins ek so léker?
8 Dans so la-prière, David ti dire: “Examine moi, Ô Jéhovah, ek testé moi, nettoye mo lé-reins ek mo léker.” (Psaume 26:2) Lé-reins enn dimoune trouve dans fond so lé-corps. Dans enn façon symbolique, lé-reins représente bann pensées ek bann sentiments pli profond enn dimoune. Ek léker symbolique représente séki enn dimoune été au fond—so mobiles, so sentiments ek so l’intelligence. Kan David ti demann Jéhovah pou examine li, en fait li ti pé prié pou ki Jéhovah fouille dans so bann pensées ek so bann sentiments pli profond, ek examine zot bien.
9. Couma Jéhovah purifié nou lé-reins ek nou léker symbolique?
9 David ti supplie Jéhovah pou purifié so lé-reins ek so léker. Couma Jéhovah purifié séki nous été au fond nous-même? David ti chanté: “Mo pou béni Jéhovah ki finn conseille moi. Oui, pendant plusieurs nuit, mo lé-reins finn corrige moi.” (Psaume 16:7) Ki sa veut dire? Sa veut dire ki bann conseils Jéhovah ti touche David au pli profond li-même, ek ti reste là pou corrige so bann pensées ek so bann sentiments pli profond. Pareillement, bann conseils Jéhovah kapav corrige nous aussi. Couma? Kan nous médite avec reconnaissance lor bann conseils ki nous gagné à travers la Bible, par bann représentants Bondié ek à travers so l’organisation, ek kan nous laisse sa bann conseils-la reste au fond nous-même. Si nous prié Jéhovah régulièrement pou purifié nous dans sa façon-la, sa pou aide nous pou marche dans l’intégrité.
‘To l’Amour Fidèle Li Devant Moi’
10. Ki ti aide David pou marche dans la vérité?
10 David contigne dire: “To l’amour fidèle li devant mo lizié, ek mo’nn marche dans to vérité.” (Psaume 26:3) David ti bien koné couma Bondié finn agir avec l’amour fidèle, ek li ti médite lor là avec reconnaissance. Li ti chanté: “Béni Jéhovah, Ô mo nâme, ek pa blié tou so bann actions.” Li ti rappelle enn parmi bann actions ki Jéhovah ti faire, li ti dire: ‘Jéhovah inn agir avec justice ek li’nn rann jugement pou tou dimoune ki victime bann fraudes. Li’nn faire Moïse konn so bann chemins, ek Li’nn faire bann Israélites konn so manière faire.’ (Psaume 103:2, 6, 7) Peut-être David ti pé pense l’injustice bann Égyptiens, kan zot ti prend tou séki bann Israélites ti éna, dans l’époque Moïse. Si li ti pé pense sa, sûrement so léker ti bien touché kan li ti médite lor façon ki Jéhovah ti faire Moïse koné couma li pou délivré So peuple. Sa ti fortifié aussi so détermination pou marche dans la vérité.
11. Ki kapav aide nous pou marche dans l’intégrité?
11 Kan nous étudié la Bible régulièrement ek nous médite lor séki nous aprann, sa aussi pou aide nous pou marche dans l’intégrité. Par exemple, si nous rappelle couma Joseph ti sauvé kan femme Potiphar ti faire li bann propositions immoral, sa pou sûrement encourage nous pou ‘sauvé’ kan nous gagne bann propositions pareil dans travail, dans l’école ou-soit dans lézot places. (Genèse 39:7-12) Eski éna bann lézot l’exemples ki kapav aide nous kan nous tenté pou gagne plus kitsoz matériel ou-soit enn grand position ek plus pouvoir dans le monde? Oui, nous éna l’exemple Moïse ki ti refuse pou gagne la gloire en Égypte. (Hébreux 11:24-26) Si nous médite lor l’endurance Job, sa pou sûrement faire nous encore pli déterminé pou reste fidèle envers Jéhovah kan nous malade ek kan nous dans malheur. (Jacques 5:11) Ki nous pou faire si nous gagne persécution? Eh bien, nous kapav rappelle l’expérience ki Daniel ti faire dans la fosse aux lions. Sa pou donne nous beaucoup courage!—Daniel 6:16-22.
“Mo Pa Finn Assize Avec Bann Dimoune Ki Éna Fausseté Dans Zot”
12, 13. Ki qualité fréquentations nous bizin rejeté?
12 David ti koz lor enn l’autre kitsoz ki ti fortifié so l’intégrité, li ti dire: “Mo pa finn assize avec bann dimoune ki éna fausseté dans zot; ek mo pa rentre avec bann dimoune ki cachiette séki zot été. Mo finn éna la haine pou l’assemblée bann dimoune ki faire le mal, ek avec bann mauvais dimoune, mo pa assizé.” (Psaume 26:4, 5) Oui, David ti refuse assize avec bann mauvais dimoune. Li ti détesté bann mauvais fréquentations.
13 Ki nous kapav dire lor nous? Eski nous refuse fréquente bann dimoune ki éna fausseté dans zot, à travers bann programmes télévision, bann films vidéo ek cinéma, par Internet ou-soit par lézot moyens? Eski nous reste loin ar bann dimoune ki cachiette séki zot été? Certains dans l’école ou-soit dans travail kapav faire semblant ki zot camarade ar nous, mais zot éna bann mauvais l’intentions. Eski nous vrai-même envie vinn proche avec bann dimoune ki pa marche dans la vérité? Bann apostats aussi prétann ki zot sincère, mais zot kapav cachiette zot vrai l’intention pou détourne nous dans nou service pou Jéhovah. Ki nous kapav dire lor certains dans congrégation ki amène enn la-vie double? Zot aussi zot cachiette séki zot été vrai-même. Jayson, ki enn assistant ministériel zordi, ti éna bann camarades coumsa kan li ti jeune. Guette ki li dire lor zot: “Enn jour, enn ladan ti dire moi: ‘Séki nous pé faire asterla, péna okenn l’importance, parski kan le monde nouveau pou là, nous, nous pou’nn fini mort. Nous pa pou koné ki nous finn manqué.’ Sa qualité kozé-la ti couma enn warning pou moi. Mo pa pou content mort kan le monde nouveau arrivé.” Jayson ti prend enn bon décision pou arrête fréquente sa qualité jeunes-la. L’apôtre Paul ti donne sa l’avertissement-la: “Pa laisse zot trompé. Mauvais fréquentations gâte bann bon l’habitudes.” (1 Corinthiens 15:33) Oui, li bien important ki nous rejette bann mauvais fréquentations!
‘Mo Pou Proclame Tou To Bann Actions Extraordinaire’
14, 15. Couma eski nous kapav “faire lé-tour l’autel [Jéhovah]”?
14 David ti contigné, li ti dire: “Mo pou lave mo la-mains dans l’innocence, ek mo pou faire lé-tour to l’autel, Ô Jéhovah.” Kifer? Li réponn: “Pou ki tou dimoune tann mo bann remerciements, ek pou mo proclame tou to bann actions extraordinaire.” (Psaume 26:6, 7) David ti envie reste pur lor plan moral pou li kapav adore Jéhovah ek dire ki quantité li attaché ar Li.
15 Tou séki ti éna enn rapport avec vrai l’adoration dans tabernacle, ek plitar dans temple, ti “enn modèle ek enn l’ombrage bann kitsoz ki dans le ciel.” (Hébreux 8:5; 9:23) L’autel représente volonté Jéhovah kan Li’nn accepté sacrifice Jésus Christ pou pardonne nou péchés. (Hébreux 10:5-10) Nous lave nou la-mains dans l’innocence ek nous “faire lé-tour l’autel [Jéhovah]” kan nous exerce la foi dans sacrifice Jésus.—Jean 3:16-18.
16. Ki bienfaits nous gagné kan nous proclame bann actions extraordinaire ki Bondié finn faire?
16 Kan nous pense tou séki la rançon inn rann possible, eski nou léker pa rempli ar reconnaissance pou Jéhovah ek pou so Garçon? Donc, anou faire lézot dimoune konn bann kitsoz extraordinaire ki Jéhovah finn faire depuis création bann dimoune dans jardin Éden, ziska jour ki tou kitsoz pou’nn fini rétabli dans le monde nouveau. (Genèse 2:7; Actes 3:21) Kan nous prêche le Royaume ek nous faire bann disciples, c’est vrai-même enn grand protection pou nous! (Matthieu 24:14; 28:19, 20) Tant ki nous occupé avec sa l’activité-la, sa aide nous pou garde nou l’espérance ferme, pou garde nou la-foi dans bann promesses Bondié solide, ek pou garde nou l’amour pou Jéhovah ek pou nou prochain fort.
“Mo’nn Content Place Kot To Resté”
17, 18. Ki l’attitude nous bizin éna envers bann rassemblements Chrétiens?
17 En Israël, tabernacle ek l’autel sacrifices, ti centre l’adoration Jéhovah. Dans so la-prière, David ti montré ki quantité li content sa place-la, li ti dire: “Jéhovah, mo’nn content place kot to resté, ek place kot to la-gloire été.”—Psaume 26:8.
18 Eski nous content rassemblé-nous dans bann places kot nous aprann konn Jéhovah? Dans chaque la Salle du Royaume, nous gagne enn l’instruction spirituel régulièrement, ek sa place-la, sa-même centre vrai l’adoration dans l’endroit. En plus, chaque l’année, nous éna nous bann l’assemblées district, l’assemblée circonscription, ek l’assemblée spécial enn jour. Sa bann l’assemblées-la koz lor bann “rappels” Jéhovah. Si nous aprann pou “content zot beaucoup,” nous pou envie al dans sa bann rassemblements-la ek nous pou bien écouté kan nous là-bas. (Psaume 119:167) Li vrai-même enn grand l’encouragement pou nous, kan nous avec nou bann compagnons Chrétiens ki intéressé ar nou bien-être ek ki aide nous pou marche dans l’intégrité!—Hébreux 10:24, 25.
‘Pa Tire Mo la-Vie’
19. Ki péchés David pa ti envie vinn coupable?
19 David ti bien conscient ki éna bann mauvais conséquences kan enn kikenn éloigne-li ar la vérité. C’est pou sa ki li ti supplie Jéhovah: “Pa tire mo nâme ensam avec bann dimoune ki faire péché, ni mo la-vie ensam avec bann dimoune ki verse di-sang. Dans zot la-mains éna conduite dévergondé, ek zot la-main droite rempli ar bribe.” (Psaume 26:9, 10) David pa ti envie forme partie ensam avec bann dimoune ki péna okenn respect pou Bondié, ki coupable bann mauvais actions ou-soit ki donne bribe.
20, 21. Ki kapav faire nous agir couma bann dimoune ki pa servi Jéhovah?
20 Le monde zordi débordé ar bann pratiques immoral. Bann programmes télévision ek cinéma, ek bann livres encourage enn conduite dévergondé, c’est-à-dire enn conduite ‘débauché, ki faire honté.’ (Galates 5:19, note) Certains finn vinn esclaves pornographie, ek souvent sa finn pousse zot pou éna enn conduite immoral. Bann jeunes surtout, zot facilement influencé par sa bann kitsoz-la. Dans certains pays, li enn coutume ki bann dimoune sorti ensam, sans ki zot éna l’intention pou marié, ek bann adolescents senti zot obligé pou éna enn ti-copain ou enn ti-copine zot aussi. Donc, beaucoup jeunes garçons ek tifi commence sorti ensam même si zot péna l’âge pou marié. Pou satisfaire zot désir sexuel ki vinn de plus en plus fort, bien vite zot commence éna enn conduite immoral, ek zot al ziska commette fornication.
21 Bann adultes aussi touché par sa bann mauvais l’influences-la. Bann pratiques commercial malhonnêtes ek tendance pou prend bann décisions égoïste, montré ki beaucoup pa marche dans l’intégrité. Si nous agir couma bann dimoune dans le monde, sa pou éloigne nous ar Jéhovah. Donc, anou “éna la haine pou séki mauvais ek content séki bon” ek contigne marche dans l’intégrité.—Amos 5:15.
‘Ah Couvert Mo Péché ek Donne Moi To Faveur’
22-24. (a) Ki l’encouragement ou trouvé à la fin Psaume 26? (b) Ki piège nous pou examiné dans prochain l’article?
22 Pou terminé, David ti dire Jéhovah: “Tant qu’à moi, mo pou marche dans mo l’intégrité. Ah couvert [mo péché] ek donne moi to faveur. Mo pou deboute lor enn terrain plate ek parmi bann la-foules rassemblé, mo pou béni Jéhovah.” (Psaume 26:11, 12) David pa ti zis déterminé pou garde so l’intégrité, mais li ti aussi supplie Jéhovah pou couvert so péché. Sa encourage nous beaucoup! Parski même si nous imparfait, Jéhovah pou aide nous si nous déterminé pou marche dans l’intégrité.
23 Par nou façon vive, anou montré ki nous respecté, ek ki nous accorde valeur ar souveraineté Bondié dans tou domaines nou la-vie. Sakenn parmi nous kapav prié pou ki Jéhovah examine ek purifié so bann pensées ek so bann sentiments profond. Si nous étudié so Parole sérieusement, la vérité pou touletan présent dans nou l’esprit. Donc, anou faire tou pou rejette bann mauvais fréquentations, ek pou béni Jéhovah parmi bann la-foules rassemblé. Anou participe avec zèle dans la prédication ek dans l’activité pou faire bann disciples, ek jamais pa permette le monde mette en danger nou bann bons relations avec Jéhovah. Pendant ki nous pé faire nou maximum pou marche dans l’intégrité, nous kapav sûr ki nous pou gagne faveur Jéhovah.
24 Etant donné ki l’intégrité concerne tou domaines nou la-vie, nous bizin faire attention ar enn piège mortel, c’est à dire abuse l’alcool. Nous pou discute sa dans prochain l’article.
Eski Ou Rappelle?
• Kifer li approprié ki juge bann anges ek bann dimoune intelligent d’après zot l’intégrité?
• Ki veut dire l’intégrité, ek couma nous kapav marche dans sa chemin-la?
• Ki pou aide nous pou marche dans l’intégrité?
• Pou garde nou l’intégrité, ar ki dangers nous bizin faire attention ek rejetté?
[Zimage lor page 23]
Eski ou demande Jéhovah régulièrement pou examine ou bann pensées profond?
Eski ou garde l’amour-fidèle Jéhovah devant ou lizié?
[Zimage lor page 24]
Nous faire léker Jéhovah content kan nous garde nou l’intégrité dans bann l’épreuves
[Zimage lor page 25]
Eski ou profite bann dispositions ki Jéhovah prend pou aide ou marche dans l’intégrité?