Kifer nou bizin garde nou l’integrité?

“Juge moi, o Jéhovah, . . . dapré mo l’integrité.”—PS. 7:8.

1, 2. Cite certain situation ki arrivé souvent ki testé l’integrité enn chretien.

MAZINN sa trois scene-la: Enn garson pé bizin faire face ar certain so bann camarade lekol. Zot pé sikann li ek pé essaye provok li pou li perdi controle, kitfois pou li zouré ou-soit pou li laguerre. Eski li aussi li pou faire pareil, ou-soit eski li pou kapav controle li-mem ek contigne so chemin? Enn mari ki tousel lakaz pé faire bann recherche lor Internet. Li trouve enn message kot ena enn publicité pou al lor enn site immoral ki parette lor so l’ecran. Eski li pou tenté ek li pou al lor sa site-la, ou-soit eski li pou faire enn maniere evite sa? Enn soeur pé koz avek bann lezot soeur kan conversation mal tourné, zot commence koz en mal lor enn lot soeur dan congregation. Eski li pou ajoute so boute li aussi, ou-soit eski li pou essaye change sujet conversation?

² Mem si sa bann situation-la zot different, ena enn kitsoz ki pareil entre zot: toulé-trois cas montré ki enn chretien bizin lutté pou garde so l’integrité. Eski ou pense ou l’integrité kan ou faire face ar ou bann tracas, ou bann besoin, ek kan ou fixé bann l’objectif dan ou la vie? Chaque jour ki passé, bann dimoune reflechi lor zot l’apparence, lor zot la santé, lor difficulté pou gagne zot la vie, lor l’amitié ki zot ena avek lezot ki passe par bann bon ek bann mauvais moment, ek kitfois-mem lor zot relation sentimental avek enn kikenn. Li possible ki sa bann kitsoz-la ena beaucoup l’importance pou nou. Mais kan Jéhovah examine nou leker, ki kitsoz ki pli important pou Li? (Ps. 139:23, 24) C’est nou l’integrité.

3. Ki choix Jéhovah laisse nou faire, ek ki nou pou examiné dan sa lartik-la?

³ Jéhovah, sa Kikenn ki donne “tou joli don ek tou cadeau parfait[-la],” inn donne sakenn parmi nou enn quantité don. (Jacq. 1:17) Nou remercié Li pou bann don ki Li’nn donne nou couma par exemple, nou lekor, nou l’esprit, nou la santé, mem si nou la santé pa parfait, ek plusieurs lezot capacité. (1 Cor. 4:7) Selman, Jéhovah pa force nou pou montré nou l’integrité. Li laisse nou choisir par nou-mem si nou pou developpe sa qualité-la. (Deut. 30:19) Alors, nou bizin examiné ki été l’integrité. Nou pou guette aussi trois raison kifer sa qualité-la li tellement important.

Ki été l’integrité?

4. Ki l’integrité impliké, ek ki nou kapav aprann ar la loi ki Jéhovah ti donné concernant bann sacrifice zanimo?

⁴ Beaucoup dimoune pa koné vrai-mem ki été l’integrité. Par exemple, kan bann politicien faire vantard concernant zot l’integrité, souvent zot pé rod dire ki zot bann dimoune honnete. L’honneteté li important, mais c’est zis enn partie dan l’integrité. La Bible servi mot integrité pou koz lor l’etat enn dimoune ki complet lor plan moral, enn dimoune sans defaut ki personne pa kapav faire okenn reproche. Bann mot hébreu ki ena enn rapport avek “integrité” sorti dan enn racine ki vedir sans defaut, ki pa kapav faire okenn reproche, ki complet. La Bible servi enn parmi sa bann mot-la en rapport avek bann sacrifice ki ti bizin offert Jéhovah. Li ti accepté enn sacrifice selman si zanimo-la ti sans defaut, ou-soit complet. (Lire Lévitique 22:19, 20.) Jéhovah ti condamne dan enn fason bien severe bann ki ti desobeir volontairement so commandement kan zot ti offert en sacrifice enn zanimo ki boité, malade ou-soit aveugle.—Mal. 1:6-8.

5, 6. (a) Ki bann l’exemple ki montré ki souvent nou donne valeur enn kitsoz ki entier, ou-soit ki complet? (b) Kan nou koz concernant bann dimoune imparfait, eski sa vedir ki zot bizin parfait pou zot ena l’integrité? Expliké.

⁵ Li pa difficile pou comprend ki li normal pou rod ek pou apprecié seki entier, ou-soit complet. Mazinn par exemple enn kikenn ki collectionne bann livre, ek ki depuis bien longtemps pé rod enn livre ki ena valeur. Li reussi trouve sa livre-la, mais selman, li decouvert ki ena plusieurs page bien important ki manké. Li bien decouragé ek kitfois li remette livre-la dan so place. Ou-soit mazinn enn madame ki pé marché lor la plage, li pé ramasse bann coquillage ki bann vague inn sarié. Li bien content pou trouve sa quantité different joli coquillage-la, ek de temps en temps li versé pou examine enn-deux. Lekel finalement li pou gardé? Seki entier ek pa finn cassé, pa vrai? Li pareil aussi pou Bondié, Li rod bann dimoune ki complet, setadir ki attaché ar Li cent pour cent.—2 Chron. 16:9.

⁶ Mais kitfois ou demann ou-mem si enn dimoune bizin parfait pou li kapav ena l’integrité? Nou faire peché ek nou imparfait, a cause sa nou kapav pensé ki nou enn tipé couma enn livre ki pa complet ou-soit couma enn coquillage ki’nn cassé. Eski ou ena sa sentiment-la parfois? Nou kapav sur ki Jéhovah pa attann ki nou parfait dan enn sens complet. Jamais Li attann ki nou faire plus ki seki nou kapav faire.a (Ps. 103:14; Jacq. 3:2) Mais selman Li attann ki nou garde nou l’integrité. Alors, eski ena enn difference entre perfection ek integrité? Oui. Anou prend enn l’exemple. Enn jeune homme content enn jeune fille ek li pou marié ar li. Bien sur, li pa pou attann ki sa tifi-la parfait. Pourtant, li pou ena droit attann ki tifi-la content li avek tou so leker, setadir ki tifi-la amoureux ar li tousel. Li pareil aussi pou Jéhovah; Li “enn Bondié ki oulé ki [nou] reste attaché zis ar [Li] tousel.” (Ex. 20:5) Li attann ki nou content Li avek tou nou leker, ki nou adore zis Li tousel, pa ki nou parfait.

7, 8. (a) Ki l’exemple Jésus ti laissé concernant l’integrité? (b) Ki vedir vrai-mem l’integrité dapré la Bible?

⁷ Kitfois nou rappel reponse ki Jésus ti donné kan enn kikenn ti demann li ki la loi ki pli important dan tou bann la loi. (Lire Marc 12:28-30.) Jésus pa ti zis donne enn reponse; li ti vive en accord avek seki li ti dire. Li ti donne pli grand l’exemple ki kapav kan li ti content Jéhovah avek tou so l’esprit, tou so leker, tou so nâme ek tou so la force. Li ti montré ki enn kikenn manifesté l’integrité pa zis en parole, mais par bann bon action ki li faire parski li ena bann bon mobile. Pou nou garde nou l’integrité, nou bizin suive bien trace Jésus.—1 Pierre 2:21.

⁸ Tousala permette nou comprend ki vedir vrai-mem mot integrité couma la Bible servi li. Sa vedir ena enn l’attachement complet pou Jéhovah, sa Kikenn ki reste dan le ciel-la, ek aussi ar so volonté ek so projet ki Li’nn faire nou koné. Garde nou l’integrité vedir ki dan nou la vie toulé-jour, nou pou rod faire Jéhovah plaisir avant tou. Seki priorité pou Jéhovah pou vinn nou priorité. Anou examine trois raison kifer sa li bien important.

1. Nou l’integrité ek question lor souveraineté Jéhovah

9. Ki rapport ena entre nou l’integrité ek droit ki Jéhovah ena pou dirige l’univers?

⁹ Souveraineté Jéhovah, setadir so droit pou dirigé pa depann lor nou l’integrité. Li ena droit pou dirige tou l’univers, Li faire sa avek justice ek so droit li eternel. Sa pou toujours coumsa, malgré seki n’importe ki creature dire ou-soit faire. Selman, Satan finn bien mette en doute souveraineté Bondié dan le ciel ek lor la terre. Alors, Jéhovah bizin justifié so souveraineté devant tou so bann creature intelligent, setadir confirmé ki Li ena droit dirige l’univers, ek aussi ki so domination li juste, ek rempli ar l’amour. En tant ki Témoins de Jéhovah, nou content pou koz lor souveraineté Jéhovah ar tou dimoune ki disposé pou ecoute nou. Alors, couma nou kapav montré ki nou soutenir droit ki Bondié ena pou dirigé? Couma nou montré ki nou choisir Jéhovah couma nou Souverain? Kan nou garde nou l’integrité.

10. Ki l’accusation Satan inn faire concernant l’integrité bann dimoune, ek couma ou ti pou content reponn sa l’accusation-la?

¹⁰ Guetté couma ou l’integrité impliké. En realité, Satan ti pretann ki okenn dimoune pa pou kapav soutenir droit ki Bondié ena pou dirigé, ki personne pa pou servi Jéhovah avek enn l’amour ki pa egoïste. Devant beaucoup ange ki ti pé ecouté, Satan ti dire Jéhovah: “La peau pou la peau, ek tou seki enn dimoune ena, li pou donne sa pou sap so nâme.” (Job 2:4) Remarké ki sa l’accusation ki Satan ti faire-la pa ti concerne zis Job, enn dimoune ki ti droite, mais l’humanité en general. A cause sa la Bible appel Satan “sa kikenn ki accuse nou bann frere-la.” (Rév. 12:10) Li provok Jéhovah kan li pretann ki bann chretien—ou aussi parmi—pa pou reste fidele. Satan pretann ki ou pou trahir Jéhovah pou ou kapav sauve ou la peau, setadir ou la vie. Ki sentiment ou ena kan ou pense sa bann l’accusation ki li’nn mette lor ou-la? Eski ou pa ti pou content gagne enn l’occasion pou prouvé ki Satan enn menteur? Kan ou garde ou l’integrité, ou kapav faire sa.

11, 12. (a) Cite bann l’exemple pou montré ki bann decision ki nou prend toulé-jour ena enn rapport avek nou l’integrité. (b) Dan ki sens li enn privilege pou garde nou l’integrité?

¹¹ Sa question ki’nn soulevé lor ou l’integrité-la faire ki chaque jour ou conduite ek ou bann choix ena l’importance. Anou reguette sa trois scene ki nou ti mentionné au commencement-la. Ki sa trois chretien-la pou faire pou garde zot l’integrité? Sa jeune garson ki so bann camarade lekol pé provoké-la bien envie faire pareil li aussi, mais li rappel sa conseil ki la Bible donné-la: “Pa tire vengeance zot-mem, mo bann frere ki mo bien content, mais laisse place pou colere; parski finn ecrire: ‘Jéhovah dire: Vengeance pou moi; moi ki pou faire zot payé.’ ” (Rom. 12:19) Li pa prend compte so bann camarade ek li contigne so chemin. Sa mari ki pé servi Internet-la ti kapav al guette sa site immoral-la, mais li rappel principe ki trouve dan bann parole Job: “Mo’nn faire enn l’alliance avek mo lizié. Alors, couma mo kapav guette enn vierge?” (Job 31:1) Alors, sa missié-la aussi refuse pou guette bann zimage immoral; li evite sa qualité zimage-la coumadir zot enn poison. Sa soeur ki pé kozé dan enn groupe kot li kapav tann bann palab lor enn soeur, controle li-mem ek li rappel sa l’ordre-la: “Fodé ki sakenn parmi nou faire so prochain plaisir dan seki bon pou fortifié li.” (Rom. 15:2) Sa palab ki li ti pou kapav raconté-la, pa pou fortifié lezot. Sa pou affecté reputation so soeur; ek sa pa pou faire so Papa ki dan le ciel plaisir. Alors, li decide pou pa participe dan sa palab-la ek li change sujet conversation.

¹² Dan sakenn sa bann cas-la, chretien-la faire enn choix ek en realité coumadir li pé dire: ‘C’est Jéhovah ki dirige moi. Mo pou essaye faire seki faire Li plaisir dan sa situation-la.’ Kan ou bizin faire enn choix ou-soit prend enn decision, eski ou aussi ou essaye faire Jéhovah plaisir? Si oui, ou pé vrai-mem obeir seki Proverbes 27:11 dire: “Montré ki to sage mo garson, ek faire mo leker content, pou ki mo kapav reponn celui ki pé provok moi.” Oui, c’est vrai-mem enn grand privilege ki nou ena pou faire leker Bondié content! Eski sa pa vaut la peine ki nou faire tou zeffort ki nou kapav pou garde nou l’integrité?

2. C’est dapré nou l’integrité ki Jéhovah juge nou

13. Couma bann parole Job ek David montré ki c’est dapré nou l’integrité ki Jéhovah juge nou?

¹³ Nou trouvé ki l’integrité permette nou pou prend position pou souveraineté Jéhovah. Alors Bondié base lor nou l’integrité pou juge nou. Job ti bien comprend sa point-la. (Lire Job 31:6.) Job ti koné ki Bondié pese tou dimoune dan enn “balance exact,” Li servi So bann principe ki juste pou guetté si nou pé garde nou l’integrité. David aussi ti dire pareil: “Jéhovah Li-mem pou prononce enn jugement kont bann peuple. Juge moi, o Jéhovah, dapré mo justice ek dapré mo l’integrité ki dan moi. . . . Bondié ki juste examine leker ek le rein.” (Ps. 7:8, 9) Nou koné ki Bondié kapav trouve seki nou été vrai-mem endan, dan pli profond nou-mem, setadir nou “leker ek [nou] le rein” symbolik. Mais nou bizin pa blié seki Bondié pé rodé kan Li examine nou. Pareil couma David ti dire, c’est dapré nou l’integrité ki Jéhovah juge nou.

14. Kifer fodé jamais nou pensé ki parski nou imparfait ek nou faire peché, sa empeche nou pou garde nou l’integrité?

¹⁴ Mazinn Jéhovah ki pé examine leker plusieurs milliard dimoune zordi. (1 Chron. 28:9) Eski Li trouve beaucoup dimoune ki pé garde zot l’integrité? Bien rare! Selman, fodé pa nou pensé ki nou trop imparfait pou garde nou l’integrité. Au contraire, pareil couma David ek Job, nou ena bann bon raison pou ena confiance ki Jéhovah pou trouvé ki nou pé contigne garde nou l’integrité mem si nou imparfait. Rappel bien, c’est pa parski enn dimoune parfait ki c’est enn garantie ki li pou garde so l’integrité. Zis trois dimoune parfait inn marche lor sa la terre-la, ek deux ladan, Adam ek Ève pa finn reussi garde zot l’integrité. Mais plusieurs million dimoune imparfait zot, zot inn reussi garde zot l’integrité. Ou aussi ou kapav faire sa.

3. L’integrité important pou nou l’esperance

15. Couma David ti montré ki l’integrité li important pou l’esperance ki nou ena pou l’avenir?

¹⁵ Parski c’est surtout dapré nou l’integrité ki Jéhovah juge nou, sa qualité-la li important pou l’esperance ki nou ena pou l’avenir. David ti koné ki sa li vrai. (Lire Psaume 41:12.) Pou li, l’espoir pou gagne faveur Bondié pou touletan, ti ena enn grand valeur. Pareil couma bann vrai chretien zordi, David ti ena l’espoir pou vive pou touletan. Li ti contigne vinn pli proche ar Jéhovah a mesure ki li ti pé servi Li. David ti trouvé ki li ti bizin garde so l’integrité si li ti envie ki sa l’esperance-la realisé. Li pareil aussi pou nou, Jéhovah soutenir nou, enseigne nou, dirige nou ek beni nou a mesure ki nou garde nou l’integrité.

16, 17. (a) Kifer ou bien decidé pou toujours reste ferme dan ou l’integrité? (b) Ki bann question nou pou examiné dan prochain lartik?

¹⁶ L’esperance li important pou nou kapav heureux asterla. Li kapav donne nou la joie ki nou bizin kan nou pé passe par bann periode difficile. L’esperance kapav aussi protege nou bann pensée. Rappel ki la Bible compare nou l’esperance ar enn casque. (1 Thess. 5:8) Pareil couma enn casque protege la tête enn soldat dan la guerre, pareil aussi, l’esperance protege nou bann pensée kont bann raisonnement negatif ek decourageant ki Satan fané dan sa vié le monde ki pé al mort-la. Oui, la vie pena okenn sens si nou pena enn l’esperance pou l’avenir. Nou bizin examine nou-mem dan enn fason honnete, examine bien dan ki l’etat nou prop l’integrité été ek nou l’esperance ki ena enn rapport avek sa l’integrité-la. Pa blié ki, kan ou garde ou l’integrité, ou pé soutenir souveraineté Jéhovah ek ou pé protege sa l’esperance ki ou ena pou l’avenir-la, enn l’esperance ki ena valeur. Nou souhaité ki ou toujours reste ferme dan ou l’integrité!

¹⁷ Parski l’integrité li tellement important, nou bizin examine lezot question. Couma nou kapav gagne sa qualité-la? Couma nou kapav garde sa qualité-la? Ek ki kapav faire si pendant enn temps, enn kikenn pa’nn garde so l’integrité? Prochain lartik pou reponn sa bann question-la.

[Note]

Couma ou pou reponn?

• Ki été l’integrité?

• Ki rapport ena entre l’integrité ek droit ki Jéhovah ena pou dirige l’univers?

• Dan ki sens l’integrité li enn base pou nou l’esperance?

[Zimage lor page 14]

Toulé-jour nou faire face ar beaucoup difficulté pou garde nou l’integrité