Eski ou pou tini ferme ou l’integrité?

“Ziska mo mort, mo pa pou abandonne mo l’integrité!”—JOB 27:5.

1, 2. Ki travail nou bizin faire lor nou-mem, ek ki bann question nou pou examiné?

MAZINÉ ou pé guette plan enn lakaz ki ou pou construire. Ou bien content kan ou guette fason ki’nn faire sa plan-la parski ou trouvé ki ou lakaz pou bien pratik. Ou commence mazinn bann l’avantage ki ou ek ou famille pou gagné. Mais eski ou pa d’accord ki sa bann plan-la ek bann rêve ki ou kapav ena lor la, pa pou servi nanyin, a moins ki ou construire lakaz-la, al reste ladan ek prend li soin?

² Li pareil aussi pou l’integrité. Nou kapav pensé ki c’est enn qualité ki bien important ek ki pou faire nou ek bann dimoune ki nou content beaucoup di-bien. Mais zis dire ki l’integrité li important, pa servi nanyin, a moins ki nou developpe sa qualité-la ek nou garde li. Zordi dan le monde, bann construction souvent coute bien cher. (Luc 14:28, 29) Li pareil aussi pou gagne l’integrité, sa demann le temps ek zeffort, mais selman, li vaut la peine faire sa sacrifice-la. Alors, anou examine trois question: Couma nou kapav vinn bann dimoune ki ena l’integrité? Couma nou kapav garde nou l’integrité? Ki enn kikenn kapav faire si pendant enn temps li pa’nn garde so l’integrité?

Couma nou kapav vinn bann dimoune ki ena l’integrité?

3, 4. (a) Cite certain fason couma Jéhovah aide nou pou gagne l’integrité. (b) Couma nou kapav gagne l’integrité pareil couma Jésus?

³ Nou finn remarké dan lartik avant ki Jéhovah donne nou enn grand privilege pou decidé si nou pou vinn bann dimoune ki montré l’integrité ou-soit non. Mais heureusement, Li pa laisse nou debrouille-nou nou tousel. Li faire nou koné couma pou gagne sa qualité bien important-la, ek Li bien content pou donne nou so l’esprit saint. Sa l’esprit-la aide nou pou mette en pratik so bann l’enseignement. (Luc 11:13) En plus, Li donne enn protection spirituel bann ki faire zeffort pou marche dan l’integrité.—Prov. 2:7.

⁴ Couma Jéhovah inn enseigne nou seki l’integrité vedir? C’est surtout kan Li’nn envoye so Garson, Jésus, lor la terre. Toute longue so la vie, Jésus inn obeir so Papa dan enn fason parfait. Li “ti obeir ziska la mort.” (Phil. 2:8) Dan tou seki li ti faire, Jésus ti obeir so Papa dan le ciel, mem kan sa ti bien difficile. Li ti dire Jéhovah: “Pa couma moi mo envie, mais couma toi to envie.” (Luc 22:42) Sakenn parmi nou bizin demann li-mem: ‘Eski mo disposé pou obeir pareil couma Jésus?’ Enn kikenn ki contigne obeir Bondié avek bann bon mobile pou vinn enn dimoune ki ena l’integrité. Anou examine certain domaine dan nou la vie kot l’obeissance li surtout important.

5, 6. (a) Couma David ti montré ki li bien important pou garde l’integrité mem kan personne pa trouve nou? (b) Zordi, ar ki difficulté bann chretien bizin faire face pou garde zot l’integrité kan zot tousel?

⁵ Nou bizin obeir Jéhovah mem kan nou pensé nou tousel ek ki personne pa trouve nou. Psalmiste David ti remark l’importance pou garde so l’integrité dan bann situation kot li ti kapav tousel. (Lire Psaume 101:2.) En tant ki le roi, David ti touletan ena bann dimoune autour li. Pena doute ki souvent, ti ena plusieurs centaine, mem plusieurs millier dimoune ki ti observe li. (Compare avek Psaume 26:12.) Dan sa bann moment-la, li ti important pou li garde so l’integrité, parski le roi ti bizin donne le peuple enn bon l’exemple. (Deut. 17:18, 19) Mais David ti aprann ki mem kan li ti kapav tousel—‘dan so lakaz’—li ti bizin toujours marche dan l’integrité. Ki leson nou kapav tiré?

⁶ Dan Psaume 101:3, nou trouve seki David inn ecrire: “Mo pa pou mette devant mo lizié okenn kitsoz ki pa vaut nanyin.” Zordi ena beaucoup l’occasion pou mette bann kitsoz ki pa vaut nanyin devant nou lizié, surtout kan nou tousel. Nou ena possibilité pou al lor Internet, a cause sa, li’nn vinn difficile pou beaucoup chretien garde zot l’integrité. Li bien facile ki nou tenté pou guette bann kitsoz immoral, ek mem pornographik. Mais si nou faire sa, eski nou pou obeir sa Bondié ki’nn inspire David pou ecrire sa bann parole la-haut-la? Pornographie faire di-tort parski sa pousse bann ki guette sa pou developpe bann mauvais desir sexuel ki exageré. Sa sali zot conscience, sa mette en danger bann mariage, ek sa abaisse tou dimoune ki tombe dan sa piege-la.—Prov. 4:23; 2 Cor. 7:1; 1 Thess. 4:3-5.

7. Ki principe kapav aide nou pou garde nou l’integrité kan nou tousel?

⁷ Bien sur, okenn serviteur Jéhovah jamais pa vrai-mem tousel. Nou Papa ki dan le ciel, veille lor nou avek amour. (Lire Psaume 11:4.) Pena doute ki Jéhovah bien content kan Li trouve ou resisté kont bann tentation! Kan ou faire sa, ou pé suive l’avertissement ki nou kapav comprend dan bann parole ki Jésus ti dire dan Matthieu 5:28. Prend enn decision bien ferme pou pa guette bann zimage ki pou kapav tente ou pou faire seki mauvais. Pa vann ou l’integrité ki ena valeur zis pou guette ou-soit pou lire bann kitsoz pornographik, enn action ki faire honté!

8, 9. (a) Ki difficulté Daniel ek so bann compagnon ti gagné pou garde zot l’integrité? (b) Couma bann jeune chretien zordi pé faire Jéhovah ek zot bann frere ek soeur spirituel, content?

⁸ Enn lot fason pou nou montré nou l’integrité c’est obeir Jéhovah kan nou parmi bann dimoune ki pa adore Li. Mazinn Daniel ek so trois compagnon. Kan zot ti jeune, bann Babylonien ti amenn zot en captivité dan zot pays. La-bas, zot ti entouré par bann dimoune ki pa ti konn beaucoup lor Jéhovah, kitfois mem zot pa ti konn Li ditou. Bannla ti faire pression lor sa quatre Hébreu-la pou zot mange bann mangé raffiné ki la Loi Bondié ti condamné. Li ti kapav facile pou sa bann garson-la trouve beaucoup pretexte pou pa obeir la Loi Bondié. Apré tou, zot bann parent, bann ancien, ek bann pretre pa ti kapav trouve seki zot ti pé faire. Mais kisannla ti pou koné? Jéhovah Li, Li ti pou koné. Alors, zot ti prend enn position ferme ek zot ti obeir Jéhovah malgré bann pression ek bann difficulté ki zot ti pou kapav gagné.—Dan. 1:3-9.

⁹ Partout dan le monde, bann jeune Témoins de Jéhovah pé imite conduite sa quatre Hébreu-la. Zot pé obeir bann principe ki Bondié inn donne bann chretien ek zot refuse pou cedé devant pression zot bann camarade. Jeune, kan zot refuse la drogue, la violence, zouré, commette l’immoralité ek faire lezot mauvais kitsoz, zot pé obeir Jéhovah. Kan zot faire sa, zot pé garde zot l’integrité. Sa li dan zot prop l’avantage ek zot pé faire Jéhovah ek zot bann frere ek soeur spirituel, content!—Ps. 110:3.

10. (a) Cite bann mauvais fason pensée ki certain jeune ena concernant fornication ek ki finn amenn zot pou perdi zot l’integrité. (b) Couma nou l’integrité aide nou pou pa tombe dan piege fornication?

¹⁰ Nou bizin aussi obeir Jéhovah dan nou bann rapport avek bann dimoune lot sexe. Nou koné ki Parole Bondié condamne fornication. Pourtant, li facile ki tigit-tigit nou perdi nou l’obeissance ek nou commence accepté bann mauvais kitsoz. Par exemple, certain jeune finn pratik bann kitsoz couma sexe oral, sexe anal ou-soit zot finn masturbe bann organe sexuel zot partenaire. Zot pensé ki sa bann pratik-la pa sa quantité grave-la parski zot dire ki zot pa pé vrai-mem gagne “relation sexuel.” Sa bann jeune-la blié—ou-soit choisir pou pa prend compte—ki tou sa bann pratik-la forme partie dan mot fornication ki la Bible servi, ek ki enn dimoune kapav exclu pou sa mauvais conduite-la.a Mais seki pli pire, zot pa trouve l’importance pou garde zot l’integrité. Kan nou pé faire tou zeffort pou garde nou l’integrité, nou pa rod bann pretexte pou ena enn mauvais conduite. Nou pa essaye al pli pré possible ar peché sans ki nou gagne enn punition. Nou pa zis mazinn discipline ki nou pou kapav gagné ar congregation. Au contraire, nou reflechi lor seki nou kapav faire pou faire Jéhovah plaisir ek rejette tou seki kapav faire Li la peine. Au lieu ki nou guetté ki pli pré possible nou kapav kosté ar peché, nou reste loin ar sa ek nou “sauvé, [nou] al loin ar fornication.” (1 Cor. 6:18) C’est coumsa ki nou montré ki nou bann dimoune ki manifesté enn vrai l’integrité.

Couma nou kapav garde nou l’integrité?

11. Kifer chaque action ki nou faire pou montré nou l’obeissance, li important? Donne enn l’exemple.

¹¹ Nou developpe l’integrité kan nou obeir; alors nou garde nou l’integrité kan nou contigne faire zeffort pou reste obeissant. Enn sel action ki nou faire pou montré nou l’obeissance, kapav parette pena valeur. Pourtant, avek le temps, kan ajoute tou bann action coumsa ensam, zot vinn beaucoup. Anou prend enn l’exemple: zis enn sel blok pa parette important, mais si nou mette beaucoup blok ensam avek precaution, nou kapav construire enn joli lakaz. Alors, kan nou contigne ajoute bann action ki montré nou l’obeissance, nou pou garde nou l’integrité.—Luc 16:10.

12. Couma David inn laisse enn bon l’exemple kan li’nn garde so l’integrité devant bann mauvais traitement ek l’injustice?

¹² Nou montré nou l’integrité surtout kan nou endure bann difficulté, kan dimoune maltraite nou, ou-soit kan nou bizin faire face ar l’injustice. Anou prend l’exemple David ki la Bible mentionné. Kan li ti jeune, enn le roi ki ti supposé represente l’autorité Jéhovah ti persecute li. Mais le roi Saül ti’nn perdi faveur Jéhovah ek li ti bien jaloux David ki ti ena faveur Bondié. Pourtant, Saül ti contigne reste le roi pendant enn bon lepok, ek li ti servi l’armée Israël pou lachasse David partout ek pou faire li di-tort. Jéhovah ti permette ki sa l’injustice-la contigné pendant plusieurs l’année. Eski David ti en colere kont Bondié? Eski li ti pensé ki sa pa vaut la peine pou enduré? Non, au contraire. Li ti garde enn grand respé pou position ki Saül ti ena en tant ki oint Bondié, ek li ti refuse pou faire li di-tort kan li ti gagne l’occasion.—1 Sam. 24:2-7.

13. Couma nou kapav garde nou l’integrité si enn kikenn inn blesse nou bann sentiment ou-soit inn offense nou?

¹³ David inn vrai-mem laisse enn bon l’exemple pou nou zordi! Nou forme partie dan enn congregation mondial kot ena bann dimoune imparfait, ek n’importe kisannla kapav offense nou ou-soit mem vinn infidele. Bien sur, nou ena privilege pou vive enn lepok kot nanyin pa kapav contamine peuple Jéhovah en tant ki enn groupe. (Is. 54:17) Mais, couma nou pou reagir si enn kikenn inn agir dan enn fason ki nou pa ti attann ou-soit si li’nn blesse nou bann sentiment? Si nou laisse enn sentiment amer pou enn parmi nou bann frere ou-soit nou bann soeur empoisonne nou leker, nou l’integrité envers Bondié pou en danger. Fodé jamais nou prend conduite ki lezot ena couma enn pretexte pou vinn amer envers Bondié ou-soit pou vinn infidele. (Ps. 119:165) Kan nou enduré malgré bann l’epreuve, sa pou aide nou pou garde nou l’integrité.

14. Couma bann chretien ki ena l’integrité reagir kan ena bann changement dan fason ki faire kitsoz dan l’organisation ou-soit concernant l’explication bann verset la Bible?

¹⁴ Nou kapav aussi garde nou l’integrité kan nou evite ena enn l’attitude critik. Bien sur, sa pou montré ki nou fidele envers Jéhovah. Li pé beni so peuple asterla couma jamais Li finn faire avant. Jamais dan l’Histoire, vrai l’adoration pa’nn arrive enn niveau haute couma li été zordi lor la terre. (Is. 2:2-4) Kan ena bann changement en rapport avek bann l’explication lor bann verset la Bible ou-soit dan fason ki faire bann kitsoz dan l’organisation, nou envie accepté zot. Nou content pou trouvé ki la lumiere spirituel pé contigne augmenté. (Prov. 4:18) Si nou trouve sa dur pou comprend enn certain changement, nou demann Jéhovah pou aide nou pou comprend sa changement-la. Entre-temps, nou contigne obeir, coumsa nou garde nou l’integrité.

Ki pou arrivé si enn kikenn pa garde so l’integrité?

15. Ki sel dimoune ki kapav faire ou perdi ou l’integrité?

¹⁵ C’est enn question bien serieux ek ki faire nou reflechi, pa vrai? Couma nou finn aprann dan lartik avant, l’integrité li bien-bien important. Sans sa qualité-la, nou pa kapav ena okenn relation avek Jéhovah ek okenn vrai l’espoir. Rappel sa bien: ena zis enn sel dimoune dan l’univers ki kapav faire ou perdi ou l’integrité. Sa dimoune-la c’est ou-mem. Job ti bien comprend sa. Li ti dire: “Ziska mo mort, mo pa pou abandonne mo l’integrité!” (Job 27:5) Si ou aussi ou ena mem determination ki Job, ek si ou reste proche ar Jéhovah, sa pou empeche ou perdi ou l’integrité.—Jacq. 4:8.

16, 17. (a) Si enn chretien pé pratik enn peché grave, ki erreur fodé pa li faire? (b) Ki bon reaction li bizin ena?

¹⁶ Mais kan-mem, certain pa reussi garde zot l’integrité. Pareil couma sa ti arrivé dan lepok bann zapotre, zordi aussi certain chretien pratik bann peché grave. Si sa arrive ou, eski ou situation desesperé? Pa necessairement. Ki ou kapav faire? D’abord, anou guetté ki fodé pa ou faire. En general, bann dimoune ena tendance pou cachiette zot peché ar zot parent, bann lezot chretien, ou-soit bann ancien. Pourtant, la Bible rappel nou: “Kikenn ki cachiette so bann peché pa pou reussi, mais si li confesse ek arrete faire sa bann peché-la, li pou gagne misericorde.” (Prov. 28:13) Bann ki rod cachiette zot peché, faire enn grave erreur, parski pa kapav cachiette Bondié nanyin. (Lire Hébreux 4:13.) Certain essaye mem amenn enn double la vie, zot faire semblant servi Jéhovah mais en mem temps zot pé pratik enn peché. Pena okenn l’integrité dan enn conduite coumsa. En realité, sa bann dimoune-la inn perdi zot l’integrité. Jéhovah pa accepté l’adoration bann dimoune ki cachiette bann peché grave. Au contraire, sa qualité conduite hypocrite-la faire li en colere.—Prov. 21:27; Is. 1:11-16.

¹⁷ La Bible dire dan enn fason bien clair seki enn chretien ki pé pratik enn peché grave bizin faire: li bizin rod l’aide bann ancien. Jéhovah finn etabli bann ancien pou aide bann ki ena enn maladie grave lor plan spirituel. (Lire Jacques 5:14.) Pa laisse la peur ki ou riské gagne enn discipline ou-soit enn correction, empeche ou pou rod ou la santé spirituel. Apré tou, eski li pou raisonnable ki enn dimoune ki malade ek ki entre la vie ek la mort refuse pou faire soigne-li parski li peur pangar li souffert a cause enn piqure ou-soit enn l’operation?—Héb. 12:11.

18, 19. (a) Couma l’exemple David montré ki li possible pou enn dimoune regagne so l’integrité? (b) Ki determination ou ena concernant l’integrité?

¹⁸ Eski ena enn l’espoir ki li gueri net? Eski enn kikenn ki’nn perdi so l’integrité, kapav regagne li encore? Anou reprend l’exemple David. Li ti commette bann peché grave. Li ti guette femme enn lot zom avek enn mauvais desir, sa ti faire li commette l’adultere, ek li ti faire touye conjoint innocent sa femme-la. Li difficile pou dire ki dan sa moment-la David ti enn zom ki ti ena l’integrité, pa vrai? Pourtant, eski so situation ti desesperé? David ti bizin enn discipline severe, ek li ti gagne li. Apré, parski li ti repenti avek tou so leker, Jéhovah ti montré misericorde envers li. David ti tire leson ar sa discipline-la ek ti regagne so l’integrité kan li ti contigne obeir Bondié n’importe ki ti arrivé. Bann parole ki trouve dan Proverbes 24:16 appliké dan cas David: “Enn dimoune juste kapav tombé sept fois, mais pena doute, li pou relevé.” Ki reputation David inn laissé? Guette seki Jéhovah ti dire Salomon lor David apré so la mort. (Lire 1 Rois 9:4.) Bondié ti rappel David couma enn zom ki ti ena l’integrité. Oui, kan bann dimoune ki’nn faire peché repenti, Jéhovah kapav efface tache ki sa bann peché-la inn faire, mem si c’est bann peché grave.—Is. 1:18.

¹⁹ Oui, ou pou vinn enn dimoune ki ena l’integrité kan ou obeir Bondié parski ou content Li. Garde ou fidelité ek ou l’endurance, ek si arrivé ou commette enn peché grave, repenti avek tou ou leker. L’integrité li vrai-mem enn tresor! Nou souhaité ki sakenn parmi nou ena sa mem determination ki David ti ena-la: “Mais moi, mo pou marche dan mo l’integrité.”—Ps. 26:11.

[Note]

Couma ou pou reponn?

• Couma ou kapav vinn enn dimoune ki ena l’integrité?

• Cite bann fason couma ou kapav garde ou l’integrité.

• Couma li possible pou regagne l’integrité?

[L’encadré lor page 17]

“C’EST VRAI-MEM EXTRAORDINAIRE!”

C’est seki enn madame ki ti enceinte cinq mois ti dire en rapport avek bonté ek l’integrité ki enn madame ki li pa ti koné ti manifesté envers li. Madame enceinte-la ti’nn al dan enn place kot kapav boire café, ek apré, li ti realisé ki li ti’nn blié so sac la-bas. Dan so sac ti ena 2,000 dollar (environ 56,000 roupie). Li pa ti habitué amenn sa quantité kass-la avek li. Plitar li ti dire dan enn la gazette: “Mo ti bien abatte.” Mais, enn jeune madame ti trouve sac-la ek desuite li ti faire enn demarche pou rod so proprietaire. Mais li pa ti reussi, alors li ti donne sa la police, ek la police ti reussi trouve proprietaire sac-la. Kan sa madame-la ti regagne so sac, li ti dire avek reconnaissance: “C’est vrai-mem extraordinaire!” Kifer sa jeune madame ki ti trouve sa sac-la ti faire tou sa zeffort-la pou retourne sa l’argent-la? La gazette-la expliké ki, en tant ki Témoin de Jéhovah, madame-la dire ki si li ti manifesté “l’integrité, c’est grace a sa religion kot li ti elevé-la.”

[Zimage lor page 18]

Bann jeune kapav garde zot l’integrité kan zot dan bann l’epreuve